Lucas 8:10 - O Novo Testamento na língua Kaingáng

¹⁰ Kỹ tóg ag mỹ: “ãjag hã mỹ sóg, kãmén há han ke mũ, Topẽ tỹ tỹ ẽg pã'i nĩ ti,” he mũ. “Hã ra sóg ũ ag mỹ: tag ri ke ti nĩ, he tãvĩ han mũ, ũ tỹ ón kỹ mẽg mũ ag mỹ. Kỹ ag tóg mẽg mũ ra ki kagtĩg nỹtĩnh mũ. To jykrén ke tũ ag nĩ gé,” he tóg.

Lucas 8:10 Iomraidhean Croise

Mateus 11:25

Kỹ tóg: “jóg',” he mũ. “Tỹ ã kanhkã tãn ag kãfór kar nĩ, kar kỹ ã tỹ ẽprã ke ag kãfór kar nĩ gé,” he tóg. “Inh mỹ tóg há tĩ, ã tỹ nén han mũ ti. Ũ tỹ: ki kanhró mág inh nĩ, he mũ ag mỹ ã tóg, ã jykre ven ja tũ nĩ. Ag mỹ ã tóg kãmén ja tũ nĩ gé. Ũ tỹ gĩr ri ke ki kagtĩg ag hã mỹ ã tóg ven ja nĩ, ã jykre ti,” he tóg.

Mateus 16:17

Kỹ Jesus tóg ti mỹ: “Simão', João kósin',” he mũ. “Ẽprã ke tỹ ã mỹ tó pijé', inh jóg tỹ kanhkã tá nĩ ẽn tỹ ã mỹ tó vẽ. Hã kỹ tóg ã ve há han mũ, Topẽ ti,” he tóg.

Marcos 4:11

Kỹ tóg: “ãjag hã tóg Topẽ tỹ tỹ ẽg pã'i nĩ ki kanhró nỹtĩnh mũ, ijo tó ja tũ ẽn ki,” he mũ. “Hã ra sóg ẽn ag mỹ: tag ri ke ti nĩ, he tãvĩ han mũ.

Marcos 4:12

Ũ tỹ ón kỹ mẽg mũ ag mỹ sóg tó há han ke tũ nĩ. Kỹ ag tóg ag tỹ vég mũ ra ki kagtĩg nỹtĩnh mũ. Ag tỹ mẽg mũ ra ag tóg to jykrén ke tũ nĩ. Kỹ ag tóg Topẽ ki ge tũ nỹtĩ gé. Kỹ Topẽ tóg ag mỹ vẽnh pãte fón ke tũ nĩ gé,” he tóg.

João 12:40

“Topẽ vỹ ag kyvó han, nĩgrẽg kutu, hã kỹ ag tóg mẽg tũ nĩgtĩ. Kỹ ag tóg to jykrén sór tũ nĩgtĩ gé. Kỹ ag tóg inh ki ge sór tũ nĩgtĩ gé. Kỹ sóg ag tỹ há' henh ke tũ nĩ gé,” he ja tóg nĩgtĩ gé, Isaías ti.

Roma 16:25

Ha mẽ, ẽg jé Topẽ mỹ vĩ há han. Ẽg tar han ki kanhró tóg nĩ, ẽg tỹ ti ki rã kar krónh ke tũ nĩn jé. Sỹ ãjag mỹ Topẽ vĩ sér tó mũn hã vẽ, Jesus Cristo kãmén kỹ. Vãsỹ ẽg tóg mẽ ja tũ nĩ, ti vĩ sér tag ti. Ẽg tỹ vãhã mẽ vẽ, Topẽ tỹ ẽg mỹ to vẽjykre nĩm kỹ. Prỹg tỹ hẽn ri ke ki ag tóg mẽ ja tũ nĩ, ẽg jo ke ag.

1 Corinto 12:11

Hã ra tóg pir nĩ, Topẽ kuprĩg ti. Ti pir nĩ ra tóg nén ũ e tag hynhan tĩ, kỹ tóg to ẽg tar han tĩ. Ti hã ne to jykrén kỹ: “tag tar han jé sóg ke mũ, tag to, jo sóg ũ ẽn tar han ke mũ, ẽn to,” he tĩ'.

Colossos 2:2

“Ag tỹ inh vãsãn tag mẽ kỹ ag hỹn tóg nén ũ kamẽg ke tũ nĩ. Kỹ ag hỹn jagnẽ to há kar nỹtĩnh mũ,” he sóg tĩ. Inh mỹ tóg ãjag tỹ tag ki kanhrãn kãn há tĩ. Topẽ tỹ nén to jykrén jan hã vỹ tỹ Cristo nĩ.

1 Timóteo 3:16

Ha vé, Topẽ tỹ ũri ẽg mỹ nén tó mũ tag vỹ tỹ nén ũ há tãvĩ nĩ. Vãsỹ ag tóg mẽ ja tũ nĩ. Ti jykren hã vẽ, ha mẽ: Jesus Cristo vỹ ẽg ri ke mur, ga kri, kỹ Topẽ tóg ti tỹ ũn mág han, tá, ti tỹ jykre kuryj nĩn kỹ. Kỹ tóg ti tỹ jẽgnẽ jafã ag mỹ ti ven. Kỹ ti mré mũ tĩ ag vỹ povo kar mỹ ti tó. Hã kỹ ga kri mũ ag vỹ ti ki ge mũ, Ẽg tỹ Jesus kãmén hã vẽ.