Lucas 6:24 - O Novo Testamento na língua Kaingáng

²⁴ “Hã ra Topẽ vỹ ãjag ve kónãn mũ, ãjag tỹ: “há ẽg tóg nỹtĩ,” hen kỹ. Ga kri mũn kỹ ãjag tóg nén ũ há vég tĩ, kỹ ãjag tóg kanhkã tá jun ke tũ nĩ,” he tóg.

Lucas 6:24 Iomraidhean Croise

Mateus 6:16

“Kejẽn ãjag tóg vãkrég tĩ. Jẽg tũ ãjag nĩ, Topẽ mỹ há nỹtĩ jé. Kỹ fe ũ nỹtĩ tũg nĩ. Vãkre ki ũ tỹ vẽjykre régre han mũ ag jykre ri ke han tũg nĩ. Ag tỹ ón kỹ vãkre kỹ ag tóg, fe ũ nỹtĩgtĩ sir, vẽnh kar tỹ ag vãkre ve jé. Ag ganho hã vẽ. Kanhkã tá ag tóg, ganho ũ venh ke tũ nĩ ha. Ãjag mỹ sóg ki hã tó mũ, ha mẽ.

Mateus 6:2

“Hã kỹ ãjag tỹ ũn jagtar ag jagãgtãn kỹ ũ mỹ: ag jagãgtãn inh tĩ, he tũg nĩ. Ũ tỹ vẽjykre régre han mũ ag jykre ri ke han tũg nĩ. Vẽnh kar mỹ ag tóg: ag jagãgtãn inh tĩ, fag ke gé, he tĩ. Ag ganho hã vẽ, kỹ ag tóg kanhkã tá ganho ũ ve mãn ke tũ nĩ ha, he tóg.

Mateus 6:5

“Kỹ ãjag tỹ Topẽ mré vẽmén kỹ ũ tỹ vẽjykre régre han mũ ẽn jykre ri ke han tũg nĩ gé. Ag tỹ ón kỹ Topẽ mré vĩ kỹ ag tóg, igreja krẽm jẽgjẽ kỹ nỹtĩ, ke tũ nĩ kỹ ĩn krẽm. Kỹ vẽnh kar vỹ ón kỹ ag to vĩ há han mũ sir, fag to ke gé. Kanhkã tá tóg ganho ũ ve mãn ke tũ nĩ ha. Ãjag mỹ sóg ki hã tó mũ, ha mẽ.

Lucas 6:25

“Topẽ vỹ ãjag ve kónãn mũ, ti tỹ ón kỹ ãjag mỹ sér tĩn kỹ, ẽprã, ãjag tỹ vẽjykre kuryj ve sór tũ nỹtĩn kỹ, ti tỹ ãjag mỹ ãjag kókĩnkĩr ri ke tũ nĩ kỹ, ẽprã. Kỹ ãjag tóg venh ke tũ nĩ. Vẽsỹrénh jé ãjag tóg ke mũ. Kỹ tóg ãjag kókĩnkĩr ri ke tĩnh mũ, tá. Kygfỹ jé ãjag tóg ke mũ,” he tóg.

1 Timóteo 6:17

Ẽprã ũn riko ag mỹ tóm nĩ, ag tỹ vẽso: “tỹ inh ũn riko pẽ nĩ,” he tũ nĩ jé. Ag riko vỹ kãnhmar tũ' henh ke mũ. Ag jé Topẽ hã ki nén ũ kar ve sór. Ti hã vỹ ẽg mỹ nén ũ kar nĩm tĩ, ẽg fe tỹ mrin ken jé.

Tiago 2:6

Jãvo ãjag tóg ũn jagtar ag to é he tĩ. Ũn riko ag to ãjag tóg vĩ há han tĩ. Hã ra ũn riko ũ ag tóg ãjag to kórég nỹtĩ gé. Kỹ ag tóg ãjag to vĩ kónãn tĩ. Hã kỹ tóg vẽnhmỹ nỹ, ãjag tỹ ũn jagtar to é he ti.