Lucas 22:20 - O Novo Testamento na língua Kaingáng

²⁰ Ag tỹ ko kar kỹ tóg kópa vãg mũ gé. Kỹ tóg ag mỹ: “kópa ki jẽ tag vỹ tỹ inh kyvénh ri ke nĩ,” he mũ. “Ãjag jagfy tóg inh ki kãkutẽnh mũ. Inh jykre tãg to ken hã vẽ, isỹ inh kyvénh tugrĩn ãjag mỹ vẽnh pãte fón jé,” he tóg.

Lucas 22:20 Iomraidhean Croise

Mateus 26:28

“Inh kyvénh hã vẽ,” he tóg, vinho to. “Inh kyvénh tỹ vẽnh kar jagfy kutẽnh ke vẽ. Sỹ vẽnh e mré vẽjykre tãg han to ken hã vẽ, hã vỹ tỹ inh kyvénh ti nĩ. Hã tugrĩn Topẽ vỹ ãjag mỹ vẽnh pãte fón ke mũ, ãjag tỹ ti vĩ mranh ja ti,” he tóg.

Marcos 14:24

Kỹ tóg ag mỹ: “inh kyvénh hã vẽ. Vẽnh kar jagfy tóg inh ki kã kutẽnh ke mũ. Topẽ vỹ vẽnh kar to há nĩ sór mũ, inh kyvénh tugrĩn,” he mũ.

1 Corinto 11:25

Ag tỹ ko kar kỹ tóg kópa vyn ja nĩgtĩ gé sir. Kỹ tóg ag mỹ: “kópa ki jẽ tag vỹ inh kyvénh ri ke nĩ,” he ja nĩgtĩ. “Inh jykre tãg to ken hã vẽ, isỹ inh kyvénh tugrĩn ãjag mỹ vẽnh pãte fón jé. Kỹ inh kyvénh tỹ inh ki kutẽ mũ ẽn mĩ ẽkrén nĩ, ãjag tỹ kópa ki jẽ tag kron kỹ,” he ja tóg nĩgtĩ gé.

2 Corinto 3:6

Ti hã ne inh krĩn tĩ', isỹ ti jykre tãg kãmén jé. Vãhã tóg ẽg mỹ ti kuprĩg jẽnẽg mũ. Vẽjykre tãg to ken hã vẽ, hã vỹ: Topẽ kuprĩg tỹ ẽg krĩn mũ, he mũ. Ha vé, Topẽ kuprĩg vỹ ẽg rĩn tĩ. Jãvo vãsỹ Topẽ jykre si vỹ ẽg tén ke ja nĩgtĩ, ẽg tỹ mranh kỹ.

Hebreu 12:24

Kỹ Jesus vỹ tá nĩ gé, ũ tỹ ẽg jagfy ter mũ ẽn ti, kỹ ẽg tóg ti kyvénh tugrĩn jãnhkri nỹtĩ, Topẽ tỹ ẽg mỹ vẽnh pãte fón ti kỹ. Topẽ tỹ Abel kyvénh ven kỹ tóg jũ mũ, ũ tỹ ti tén mũ ẽn to. Jãvo tóg ti tỹ Jesus kyvénh ven kỹ ẽg mỹ vẽnh pãte fón mũ. Hã kỹ tóg Moisés jykre kãfór nĩ, Jesus ti.

Hebreu 13:20

Topẽ mré sóg vẽmén tĩ ãjag to. Ẽg krĩ kuprãg ti tĩ. Kỹ tóg Jesus ti rĩn mãn ja nĩ gé, ti tỹ ẽg jagfy ter kar kỹ. Kỹ tóg ũ tỹ mé ki rĩr tĩ ẽn ri ke nĩ. Hã ra tóg ẽn kãfór nĩ gé, ti tỹ ẽg ki rĩr há han nĩn kỹ. Ẽg mỹ tóg vẽjykre tãg ẽn nĩm ja nĩ, ũ tỹ tũ' he vãnh ẽn.

Hebreu 9:15

Cristo vỹ, ẽg mỹ vẽjykre tãg nĩm. Ter ja tóg nĩ, Topẽ tỹ ẽg mỹ vẽnh pãte fón jé. Ti ter kar kỹ Topẽ tóg ũ ag kuprẽg, ag tỹ Topẽ tỹ kanhkã tá ẽg mỹ nén ven ke mũ ẽn ki kanhrãn jé. Jesus tỹ ẽg mỹ han hã vẽ.

Hebreu 9:17

Ti tỹ ver ter tũ nĩn kỹ ag tóg vẽnh rá ẽn venh ke tũ nĩ. “Iser kar kỹ,” he tóg, hã kỹ ũ tóg ver ti tũ mãg tũ nĩ.