Lucas 13:28 - O Novo Testamento na língua Kaingáng

²⁸ Ãjag tỹ ra mũnh ke tá ãjag tóg vẽsỹrénh ke mũ, tá ãjag tóg ãjag jã tỹ gángán kenh ke mũ. Kór há tá ãjag tóg Abraão venh ke mũ, tá, Isaque ke gé, Jacó ke gé, Topẽ vĩ tó tĩ ag kar ke gé. Ẽn ag kar vỹ, Topẽ tỹ tỹ ẽg pã'i nĩ venh mũ sir, ãjag jãvo.

Lucas 13:28 Iomraidhean Croise

Mateus 13:42

Ag génh kỹ ag tóg, pĩ gru mág ẽn ki ag vãm ke mũ sir. Tá ag tóg vẽsỹrénh tãvĩ han ke mũ. Ag jã tỹ ag tóg gyngyn kenh ke mũ, jũ kỹ, vẽsỹrénh kỹ ke gé.

Mateus 13:50

Ũn jykre pãno ag vãvãm jé ag tóg ke mũ, pĩ gru mág ẽn ki. Tá ag vẽsỹrénh ke vẽ sir. Ag jã tỹ ag tóg gyngyn kenh ke mũ, tỹ ag gangan kenh ke mũ, jũ kỹ, vẽsỹrénh kỹ,” he tóg, Jesus ti.

Mateus 22:13

Kỹ tóg: “ti mrĩnh ra, ti pẽn, ti nĩgé. Re tá ti fón,” he mũ. Re tán kuty nĩ. Tá ag tóg jagtar tĩ. Ag jã tỹ ag tóg gángán ke tĩ sir, vẽso jũgjũ kỹ.

Mateus 24:51

Ti kãtĩg kỹ tóg ti kapãn mũ sir, kỹ tóg ti fón ke mũ gé, ũn jykre régre ag mré. Tá ag tóg jagtar ke mũ, ag jã tỹ ag tóg gyngyn kenh mũ, jũ kỹ, ũn jykre kórég ẽn ag,” he tóg, Jesus ti. Ti tỹ ũ tỹ ti rãnhrãj han kónãn mũ kãmén hã vẽ.

Mateus 25:30

“Kỹ inh camarada kórég tag fón, kutyg ja ẽn kã tá. Tá ag tóg jagtar tĩ, ag jã tỹ ag tóg gangan ke tĩ, vẽso jũ kỹ,” he tóg, patrão ti,” he tóg, Jesus ti, ti tỹ ti kãtĩg mãn ke kãmén kỹ.

Lucas 10:15

Kỹ tóg: “sỹ ẽmã tỹ Cafarnaum ki ke ag mỹ tag tó sór vẽ gé, ha mẽ,” he mũ. “Ũri tóg ver ãjag mỹ sér tĩ. “Kanhkã ve jé ẽg tóg ke mũ,” he ãjag tóg tĩ, ón kỹ. Hã ra ãjag tóg nũgme ki vár ke mũ,” he tóg.

Lucas 14:15

Kỹ tóg tá ti mré jẽg nĩ ũ mỹ mẽ há tĩ, ti vĩ tag ti. Kỹ tóg ti mỹ: “ũ tỹ Topẽ tỹ tỹ ẽg pã'i nĩ vég mũ mỹn hỹn sér pẽ tĩnh mũ, ũ tỹ tá fénhta vég mũ ẽn mỹ,” he mũ.

Lucas 16:23

Hã ra tóg nũgme ki kutẽ mũ, ti kuprĩg ti. Inferno tá ti vẽsỹrénh jagy han mũ sir. Kejẽn tóg kanhkã ki ẽvãnh mũ, kỹ tóg tá Abraão vég mũ, Lázaro ke gé, kuvar há tá.

2 Tessalônica 1:5

Hã tugrĩn ẽg tóg Topẽ jykre kuryj ki kanhró nỹtĩ, ãjag tỹ ti tovãnh tũ nĩn kỹ. Jagtar ãjag tóg mũ, hã ra ãjag tóg ti tovãnh tũ nĩgtĩ. Ti tỹ tỹ ẽg pã'i nĩ ve jé ãjag tóg ke mũ, ha vem nĩ.

2 Pedro 1:11

Kanhkã ve jé ãjag tóg ke mũ, ha vem nĩ, ẽg Senhor tỹ Jesus Cristo tũ ti, ẽg krenkren han tĩ ẽn tũ ti. Tũ' henh ke tũ ti nĩ, ti tỹ tá tỹ ũn mág nĩ ti.

Nén Venh Ke 21:8

Hã ra ũ ag tóg pĩ gru fir kã ki vár ke mũ, hã vỹ: ũ tỹ isovãnh mũ ag, ũ tỹ vẽjykre pãno han tĩ ag, ũ tỹ ũ tén tĩ ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ mré nỹgnỹ mũ fag, kujá ag, curandeiro ag, ũ tỹ vẽnh kãgrá jykre mĩ mũ mũ ag, ũn ón mũ ag, he mũ. Pĩ gru fir kã ki tóg ag vãm kãn ke mũ. Kỹ tóg ag kãgter pẽ han ri ke nĩ sir,” he tóg, ũ tỹ nĩgja kupri kri nĩ ẽn ti.

Nén Venh Ke 22:15

Hã ra ũ ag tóg ẽn ra genh ke tũ nĩ, hã vỹ: ũ tỹ vẽjykre pãno tỹ vẽnh kavénh tĩ ag, kujá ag, curandeiro ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ ag mré nỹgnỹ mũ fag, ũ tỹ ũ tén mũ ag, ũ tỹ vẽnh kãgrá jykre mĩ mũ mũ ag, ũn ón mũ ag, ũ tỹ ũ ag lograr he mũ ag, he mũ. Ẽn ag vỹ ẽmã ẽn ra genh ke tũ pẽ nĩ,” he tóg, Jesus ti.