Lucas 11:36 - O Novo Testamento na língua Kaingáng

³⁶ Ãjag jo kurã nĩn kỹ tóg há tãvĩ nĩ. Ãjag jykre há tãvĩ nĩn kỹ tóg, ãjag jo kurã ri ke nĩ sir. Kỹ ãjag tóg sir néj gru ri ke nỹtĩ gé. Néj gru mág nĩn kỹ tóg ẽg kanẽ jo jẽngrẽ há han tĩ. Ge ẽg nỹtĩ, ẽg jykre há tãvĩ nĩn kỹ,” he tóg Jesus ti.

Lucas 11:36 Iomraidhean Croise

Mateus 13:52

Kỹ tóg ag mỹ: “kỹ tóg há tĩ,” he mũ. “Ũ tỹ Topẽ vĩ to ẽg kanhrãn tĩ ẽn, ti tỹ kanhkã tá nĩ ẽn jykre han kỹ tóg ge nĩ, ha mẽ. Ẽg panh ri ke ti nĩ. Kejẽn tóg ẽg mỹ ti tỹ nén sĩnvĩ ven tĩ, ti tỹ ũri mãg mũ ti, ti tỹ vãsỹ mãn ja ẽn ke gé,” he tóg. Ti tỹ ẽg tỹ Topẽ vĩ to vẽnh kanhrãn mág han tón hã vẽ.

Mateus 5:15

Ri ke ti nĩ, néj gru ti. Ẽg tỹ grug kỹ ẽg pijé lata krẽm fẽg tĩ'. Ti fẽg jafã hã kri ẽg tóg fẽg tĩ. Kỹ ĩn kã tá nỹtĩ kar tóg ẽn vég tĩ sir.

Lucas 11:35

Kỹ vẽnh kanhrãn nĩ. Ke tũ nĩ mũ ra tóg, ãjag jo kuty ri ke nĩ. Vẽjykre kórég hã vẽ. Kỹ vẽjykre kórég han sór tũg nĩ.

Lucas 11:37

Ti tỹ ag mré vẽmén kar kỹ Fariseu ũ tóg ti mỹ: “inh mré jẽn kãtĩg,” he mũ. Kỹ tóg ti mré tĩ mũ.

2 Corinto 4:6

Ha vé, ũ tỹ kutyg mũ ra kurãg han mũ ẽn tóg ẽg ki kurã han mũ gé sir, hã vỹ: Topẽ he mũ. Ẽg tỹ Cristo ve kỹ ẽg tóg Topẽ ki kanhrãn tĩ. Topẽ ve hã pẽ ti nĩ. Ẽg ki kurã to ken hã vẽ, hã vỹ: Topẽ ki kanhró, he mũ.

Éfeso 4:14

Ẽg tỹ gĩr ri ke nỹtĩn kỹ tóg ti mỹ há tũ nĩ. Gĩr ag tóg, ag tỹ nén ũ mẽ kỹ kãnhmar nén ũ nón tĩ', nén ũ nón tĩ', he tĩ. Ẽg tỹ ti vĩ to gĩr tỹ ki kagtĩg ẽn ri ke nỹtĩn kỹ tóg ẽg tỹ ũn ón mũ vĩ kri nĩm ja há tĩ, ẽg tỹ ki kagtĩg nỹtĩn kỹ. Ũ ag tóg Topẽ vĩ to ón tĩ. Ag tỹ ẽg tỹ ag mré kygnẽ han sór vẽ.

Colossos 3:16

Cristo vĩ hã tỹ jagnẽ mỹ tóm nĩ, hã ki kanhrãn sórm nĩ. Tag tỹ jagnẽ jyvẽn nĩ, tag hã to krĩ há han nĩ. Ti mỹ jãn nĩ. Ti jé hã tóm nĩ, ti kuprĩg tỹ ãjag mỹ nén tó mũ ti. Ti hã mỹ vĩ há han nĩ. Ti mỹ: “inh mỹ tóg há tĩ, ã tỹ inh mỹ nén han mũ ti,” hem nĩ.

Hebreu 5:14

Ẽg tỹ to jykrén há han kỹ ẽg tóg ũn sanh há ri ke nỹtĩ. “Tag vỹ há nĩ, tag vỹ há tũ nĩ. Tag vỹ kuryj nĩ, jãvo tag vỹ kygnẽ kỹ nĩ,” he jé ẽg tóg ke mũ, ẽg tỹ ki kanhrãn há han kỹ.

Tiago 1:25

Ẽg tỹ ti vĩ to jykrén mág kỹ tóg hã ra ẽg mỹ sér tĩnh mũ. Topẽ vĩ vỹ há nĩ, ti jykre ti. Ẽg jykre pãno tỹ tũ' he tóg tĩ, ẽg tỹ han mãn tũ nĩn jé. Kỹ ẽg tóg ẽg tỹ ti vĩ mẽ kỹ kã jatun ke tũ nĩ. Kỹ ẽg tỹ ki króm kỹ Topẽ tóg ẽg mỹ vĩ há han ke mũ sir, ẽg tỹ nén han mũ kar to.

2 Pedro 3:18

Ẽg Senhor ki kanhrãn ke hã to tar nỹtĩm nĩ. Ti tỹ ẽg tar han mũ tag hã ve sórm nĩ, ẽg kren han tĩ tỹ Jesus Cristo ti. Ti hã mỹ ẽg tóg vĩ há han ke mũ, ũri, kar kỹ kanhkã tá ke gé. Kỹ tóg tũ' henh ke tũ pẽ nĩ. Hã vẽ.