João 13:5 - O Novo Testamento na língua Kaingáng

⁵ Goj tỹ tóg pénky kã ki kujẽg mũ, kỹ tóg ti mré mũ tĩ ag pẽn kugpég mũ. Vẽnh péfĩn jafã ẽn tỹ tóg ag pẽn kykũg mũ.

João 13:5 Iomraidhean Croise

Lucas 7:38

Kỹ fi tóg ti pẽn rã hã jẽ kỹ fỹ mũ sir, fi tỹ Topẽ vĩ mranh ja ẽn tugrĩn. Fi kynhme tỹ fi tóg ti pẽn kupég mũ. Kỹ fi tóg fi gãnh tỹ ti pẽn kykũg mũ gé. Ti pẽn ki fi tóg nhun ke mũ gé. Kỹ fi tóg ti pẽn tãg mũ sir, garrafa ki jẽ ẽn tỹ.

Lucas 7:44

Kỹ tóg ũn tỹtá kórég ẽn fi jé vĩrĩn ke kỹ Simão mỹ: “ã mỹ fi vég mũ'?” he mũ.“Fi kynhme tỹ fi tóg inh pẽn kugpég mũ, kar fi tóg fi gãnh tỹ inh pẽn kykũg mũ gé. Fi jãvo ã tóg inh mỹ goj ven tũ nĩ, isỹ inh pẽn kugpe jé.

João 13:10

Hã ra tóg ti mỹ: “ẽg mro kar kỹ ẽg jãnhkri nỹtĩ, kỹ ẽg tóg ẽg pẽn hã kugpég tĩ,” he mũ. “Jãnhkri ãjag nỹtĩ, hã ra ãjag kã mĩ ũn pir vỹ jãnhkri tũ nĩ,” he tóg.

João 13:6

Kỹ tóg Simão tá jun mũ gé, ti pẽn kugpe jé. Hã ra tóg ti mỹ: “ã pijé inh pẽn kugpenh mũ',” he mũ.

João 13:8

Hã ra Simão tóg ti mỹ: “vó, inh pẽn kugpenh ke tũ ã tóg nĩ,” he mãn mũ. Kỹ Jesus tóg ti mỹ: “isỹ ã pẽn kupég tũ nĩn kỹ ã pijé tỹ isũ nĩnh mũ',” he mũ.

João 19:34

Kỹ soldado ũ tóg ti rógro tỹ ti jẽn'yr ki kusón mũ, kỹ ti kyvénh tóg ki kãkutẽ mũ, kyvénh jãpri mré.

Han Kãme 22:16

Kỹ ẽmẽ kã nĩ tũg nĩ. Jẽgnẽ ra, ã tỹ kype kỹ jẽ jé, Topẽ tỹ ã tỹ ti vĩ mranh tỹ tũ' he jé. Ti mré vĩ, ti jiji tó kỹ,” he tóg inh mỹ, Ananias ti,” he tóg, Paulo ti.

1 Corinto 6:11

Ãjag kã mĩ ũ tóg vẽjykre tỹ ge han ja nĩgtĩ, vãsỹ. Hã ra ãjag tóg vẽnh kugpe kỹ nỹtĩ, ũri. Kykũnh kỹ ãjag tóg nỹtĩ. Kỹ Topẽ tóg ãjag mỹ vẽnh pãte fón ja nĩ sir, ẽg Senhor tỹ Jesus Cristo tugrĩn, Topẽ kuprĩg tugrĩn.

Éfeso 5:26

ẽg kar tỹ tỹ ti tũ nỹtĩ jé, fag ke gé. Goj tỹ ẽg kygpe kỹ nỹtĩ. Ti vĩ tỹ tóg ẽg jyvẽn tĩ, ẽg há nỹtĩ jé.

1 Timóteo 5:10

à tỹ ũn jiji rán ke mũ fi jykren hã vẽ, ha mẽ. Fi mỹ fi krẽ ki rĩr há han ja nĩ'? Fi mỹ fi ĩn krẽm Topẽ tũ ag ki rĩr há han ja nĩ'? Fi mỹ ũn vẽsỹrénh mũ fag jagãgtãn ja nĩ'? Fi mỹ nén ũ há kar to tar nĩ?' Kỹ fi jiji rán nĩ.

Hebreu 10:22

Kỹ jatun mỹ Topẽ mré vẽmén nĩ. Ti ki rã há han nĩ. Ãjag fe tỹ ti ki gem nĩ, ãjag tỹ ti nĩgja tá junjun jé. Ón kỹ ti ki ge sór tũg nĩ. Ẽg jykre pãno kar tỹ tóg tũ' hé, ẽg tỹ to jykrén mãn tũ nĩ jé. Ẽg jãnhkri han tóg, ẽg tỹ goj jãpri tỹ vẽnh kype ẽn ri ke. Kỹ ẽg há nỹtĩ.

1 João 1:7

Ẽg tỹ ti kóm kurã ki vẽjykre há ẽn han kỹ ẽg tóg jagnẽ to há nỹtĩnh mũ. Jagnẽ mré ke vỹ tỹ ẽg nỹtĩ, ẽg tỹ vẽjykre há han kỹ. Kỹ ti kósin tỹ Jesus vỹ ẽg kykũnh ke mũ sir, ti kyvénh tỹ, ẽg tỹ ti vĩ mranh ja hã ra.

1 João 5:6

Jesus Cristo tỹ ga kri tĩg kỹ tóg goj tỹ vẽnh kype kỹ jẽ. Kỹ ti kyvénh tóg ti ki kãkutẽ gé, ti ter kỹ. Kỹ tóg nén ũ régre han ja nĩ. Nén ũ pir pijé'. Ti vẽnh kype tãvĩ pijé'. Ti vẽnh kype vỹ nĩ, kar kỹ ti kyvénh ti ke gé, ti tỹ ẽg jagfy ter tag ti. Kỹ Topẽ kuprĩg vỹ ẽg mỹ ti kãmén tĩ gé. Ti pijé ón tĩ', Topẽ kuprĩg ti.

Nén Venh Ke 1:5

Jesus vỹ Topẽ vĩ tó há han ja nĩgtĩ. To tóg krónh ke ja tũ nĩgtĩ. Kỹ tóg ti ter kar kỹ rĩr mãn ja nĩ. Kỹ tóg ẽprã pã'i ag kri tỹ ũn mág jẽ gé. Ẽg to há tãvĩ ti nĩ, Cristo ti. Ti kyvénh tóg ẽg jagfy ti ki kãkutẽ. Tỹ tóg ẽg krenkren han, ẽg tỹ Topẽ vĩ mranh ja to.

Nén Venh Ke 7:14

Kỹ sóg ti mỹ: “inh pijé ki kanhró nĩ',” he mũ. “Ã hỹn tóg ki kanhró nĩ,” he sóg ti mỹ. Kỹ tóg inh mỹ: “nén ũ jagy mág pẽ ve ja ag tóg nĩ, cordeiro tugrĩn,” he mũ. “Ag vóg kónãn jagy han ag tóg. Ag kur kygfa ag, cordeiro kyvénh tỹ, kỹ tóg kupri nỹtĩ, ag kur ti.