João 10:3 - O Novo Testamento na língua Kaingáng

³ Jãnkã ki rĩr tĩ ẽn vỹ ti mỹ ró nón tĩ, jãnkã ti. Kỹ tóg carneiro jygji tó kãn mũ sir. Ti vĩ ki kanhró fag nỹtĩ.

João 10:3 Iomraidhean Croise

João 10:14

Ti jãvo sóg carneiro ki rĩr há han tĩ. Inh mẽg ki kanhró sóg nĩ, kỹ fag tóg inh ki kanhró nỹtĩ gé.

João 10:16

Inh mẽg ũ vỹ nỹtĩgtĩ gé ver, inh mẽg tỹ hẽ tá ke fag. Ãjag povo kã mĩ ke pijé'. Ẽn jé prẽr jé sóg ke mũ gé, kỹ fag tóg inh mré kãmũnh ke mũ gé. Inh vĩ mẽ jé fag ke mũ gé. Kỹ fag tóg tỹ tag ki inh mẽg fag mré ke nỹtĩnh mũ. Kỹ sóg fag kar jy ró pir han ke mũ, inh pir mỹ sóg fag ki rĩr ke mũ,” he tóg.

João 10:4

Kỹ tóg fag jo tĩ mũ, re ra. Kỹ tóg ti mẽg fag jé prẽr kãn mũ sir, kỹ fag tóg ti nón mũ mũ, fag tỹ ti ki kanhró nỹtĩn kỹ.

João 10:9

Inh hã vỹ fag mỹ jãnkã ri ke nĩ. Ũ tỹ inh ki rã mũ vỹ kren ke mũ, kỹ tóg ti tỹ jãnkã ra rã ri ke nĩ. Kã ra tóg rã tĩ. Kar kỹ tóg tá kãkutẽ tĩ gé, ti tỹ vẽjẽn há ve je.

João 6:37

Inh panh vỹ ũ ag kuprẽg mũ, ag tỹ tỹ isũ nỹtĩ jé. Ũ tỹ iso kãmũ kar vỹ inh mỹ há nỹtĩ. Inh pijé ũ mỹ: “inh mré kãtĩ tũg,” henh ke mũ'.

João 6:45

Topẽ vĩ tó tĩ ũ vỹ tag rán ja nĩ, ha mẽ: “Topẽ vỹ vẽnh kar kanhrãn ke mũ,” he ja ti nĩ. Hã kỹ ũ tỹ inh panh vĩ mẽg mũ ag hã tóg iso kãmũnh ke mũ.

Roma 8:30

Hã jé tóg ẽg kuprẽg. Kỹ tóg ẽg mỹ vẽnh vĩ jẽnẽ. Ti tỹ ẽg mỹ vẽnh vĩ jẽnẽ kỹ tóg ẽg mỹ vẽnh pãte fón gé. Ẽg mỹ vẽnh pãte fón kỹ tóg ẽg tỹ ũn mág hynhan ke mũ gé, ti mré, tá.

1 Corinto 16:9

Tag ki ke ag tóg mẽ há han mũ, inh vĩ ti, ũ tỹ hẽn ri ke ag. Hã ra tag ki ver ũ tỹ inh kato vãsãnsãn mũ ag vỹ e nỹtĩ. Hã kỹ sóg Éfeso tag kã nĩg mág sĩ han sór mũ, sỹ kar ãjag venh tĩg jé.

Filipos 4:3

Kỹ sóg ã mỹ ke mũ gé, vỹ. Inh mré ã tóg ẽg Senhor rãnhrãj han tĩ. Kỹ fag jyvẽn nĩ, fag tỹ jagnẽ to há nỹtĩ jé. Clemente ag mré fag tóg Topẽ vĩ ti tó tĩ gé, vẽnh kar mỹ. Fag jigji vỹ ránrán kỹ nỹtĩ, Topẽ livro ki. Hã kỹ tóg vẽnhmỹ nĩ, fag tỹ jagnẽ to jũ ti.

Colossos 4:3

Kỹ ti mré iso vẽmén nĩ gé. Topẽ vĩ tó sóg tĩ. Kỹ ti mỹ to vĩm nĩ, ag tỹ inh vĩ mẽ há han jé, sỹ ag mỹ Cristo kãmén kỹ, sỹ ag mỹ Topẽ tỹ nén han sór mũ ẽn kãmén kỹ. Tag tugrĩn sóg se kỹ jẽ.

2 Timóteo 2:19

Ẽg tỹ ĩn han kỹ ẽg tóg ti nũna ẽn tar han tĩ. Ẽn ri ke ti nĩ, Topẽ jykre ti. Kỹ tóg tũ' henh ke tũ nĩ, ũ ag tỹ ón kỹ to vĩ mũ hã ra. Ẽg tỹ ti ki ge kỹ nỹtĩn kỹ tag vỹ ẽg to rán kỹ nĩ, ha mẽ: “ẽg Senhor vỹ ti tũ ag ki kanhró nĩ,” he tóg mũ. Kar kỹ tóg: “vẽjykre pãno tovãnh kãn ra, ãjag tỹ: inh Senhor vỹ tỹ ti nĩ, Jesus ti, he jé,” he mũ.

1 Pedro 1:12

Hã ra Topẽ tóg ag mỹ: “inh pijé ãjag hã mỹ tag ven ke mũ',” he ja nĩ. “Ãjag nón ke ag hã mỹ ke vẽ,” he ja tóg nĩ, vãsỹ ti vĩ tó tĩ ag mỹ. Ti tỹ ag mỹ ãjag tó jan hã vẽ. Hã kỹ ãjag tóg hur mẽ, ti mré ke ũ ag tỹ ãjag mỹ Jesus kãme sér kãmén kỹ. Topẽ kuprĩg vỹ ag tar han ja nĩ, hã kỹ ag tóg ãjag mỹ ti kãmén kãmũ ja nĩ. Ha vé, Topẽ tỹ jẽnẽ jafã ag tỹ ki kanhrãn há tóg tĩ, ãjag tỹ ti kãme mẽg mũ tag ti, hã ra ag tóg ver ki kagtĩg nỹtĩ.

1 João 4:6

Ag jãvo ẽg tóg tỹ Topẽ tũ nỹtĩ. Kỹ ũ tỹ Topẽ ki kanhró nĩ ẽn vỹ ẽg vĩ mẽnh mũ. Ti tũ tũ ag vỹ ẽg vĩ mẽ sór tũ nĩgtĩ. Hã ki ẽg tóg ki kanhró nỹtĩ, vẽjagrẽ tỹ vẽnh vĩ há tó mũ ti, vẽjagrẽ tỹ ag tỹ kygnẽ han tĩ ẽn ti ke gé.

3 João 1:14

Kãnhmar sóg ã venh tĩg mũ. Kỹ ẽg tóg jagnẽ mré vẽmén ke mũ.

Nén Venh Ke 20:15

Kỹ ũn jygji tỹ Topẽ livro ki ránrán kỹ nỹtĩ tũ ẽn ag vỹ pĩ gru fir ẽn kã ki vár kãn ke mũ.

Nén Venh Ke 3:20

Mẽ há han nĩ, sỹ ãjag mỹ nén tó mũ tag. Re tá inh jẽ nĩ, jãnkã tá, kỹ sóg tỹ tórón' tórón' ke mũ. Ũ tỹ inh vĩ mẽg mũ mỹ tóg há tĩ. Kỹ tóg inh mỹ nón ke mũ, jãnkã ti. Kỹ sóg ti ĩn kã ra rãnh ke mũ. Kỹ sóg ti mré jẽn ke mũ. Kỹ tóg inh mré jẽn ke mũ gé, ha mẽ.

Nén Venh Ke 7:17

cordeiro tỹ ag ki rĩr kỹ, ũ tỹ nĩgja sĩnvĩ tá jẽ ẽn ti. Ag tatĩ tĩg jé tóg ke mũ, goj nĩhỹg ja ra. Goj tỹ ag rĩnrĩr han mũ ẽn ra tóg ag tatĩ tĩg ke mũ. Topẽ vỹ ag kygfỹ tỹ tũ' henh ke mũ,” he tóg inh mỹ, kófa ti, ũn e ẽn ag to.