João 1:51 - O Novo Testamento na língua Kaingáng

⁵¹ “Ha vé, ki hã sóg tó mũ, ha mẽ. Kanhkã nor kỹ nĩ ve jé ãjag tóg ke mũ. Tá Topẽ tỹ jẽgnẽ jafã ag vỹ kãrenh ke mũ, iso, kar kỹ ag tóg ra mũ mãn ke mũ gé. Tỹ sóg ẽprã ke fi kósin nĩ mỹr,” he tóg.

João 1:51 Iomraidhean Croise

Mateus 25:31

Kỹ Jesus tóg ag mỹ: “ẽprã ke fi kósin kãtĩg mãn kỹ tóg ge nĩnh mũ, ha mẽ,” he mãn mũ. “Isỹ jẽgnẽ jafã ag vỹ inh mré kãmũnh ke mũ. Kỹ sóg inh nĩgja sĩnvĩ ẽn kri nĩnh ke mũ sir, kỹ inh jykre tar vỹ vẽnh ven ke mũ.

Mateus 26:24

“Tĩg jé sóg ke mũ, isỹ tỹ ẽprã ke fi kósin nĩn kỹ, hã kỹ tóg rán kỹ nĩ. Hã ra Topẽ tóg ũ tỹ ag mỹ inh fẽg ke mũ ẽn mỹ vĩ kónãn pẽ han ke mũ. Ti mur tũ nĩ ra tóg ti mỹ há tĩ vẽ,” he tóg.

Mateus 3:16

Ti tỹ Jesus kype kar kỹ ag tóg, goj kã tá kãpa mũ sir. Kỹ Jesus tóg, kanhkã ki ẽvãnh kỹ ti nor nĩ ẽn vég mũ, ha mẽ, kỹ tóg Topẽ kuprĩg kãtére ẽn vég mũ. Sórãg tẽ ri ke tóg nĩ, ti kãtére ti. Jesus kri tóg góm ke mũ.

Mateus 4:11

Kỹ Japo vỹ tóg tĩ mũ sir, ti tovãnh kỹ. Kỹ Topẽ tỹ jẽgnẽ jafã ag tóg ti tá junjun mũ sir, Jesus ki rĩr jé. Ti jóg vĩ mranh ja tũ tóg nĩ.

Mateus 8:20

Hã ra Jesus tóg ti mỹ: “hã ra tóg jagy tĩ,” he mũ. “Ðn tũ sóg nĩ. Mĩg vỹ kré nỹgtĩ. Sẽsĩ vỹ jagfe nỹgtĩ gé. Ag jãvo isỹ hẽ tá nũr ke tóg tũ tĩ. Tỹ sóg ẽprã ke fi kósin nĩ,” he tóg.

Mateus 9:6

“Isỹ ãjag mỹ inh jykre ven sór vẽ. Tỹ sóg ẽprã ke fi kósin nĩ. Tá sóg krỹg ke mũ, Topẽ vĩ mranh tỹ vẽnh pãte fón ke tá. Hã kỹ sóg ũn kãnhgrĩ mỹ: nĩ ra, jẽg ra, ã kur gé tĩg, ã ĩn ra, he mũ,” he tóg.

Marcos 1:10

Ti tỹ goj kãtá kãkutẽ kỹ kanhkã vỹ nor' he mũ sir vẽsỹmér. Kỹ Jesus tóg Topẽ kuprĩg vég mũ. Sórãg ri ke tóg kãtére mũ. Kỹ tóg Jesus kri góm ke mũ sir.

Marcos 14:62

Kỹ Jesus tóg ti mỹ: “hỹ, inh hã vẽ,” he mũ. “Ẽprã ke fi kósin ẽn vỹ tỹ inh nĩ. Inh ve jé ãjag tóg ke mũ ha. Ũ tỹ nén kar han mũ ẽn pẽgja tá sóg nĩnh ke mũ. Kanhkã góg kã mĩ sóg kãtérenh ke mũ gé,” he tóg.

Lucas 2:13

Kỹ ũ tỹ hẽn ri ke ag vỹ vãhã vẽnh ven mũ sir, kanhkã tá. Ẽn ag vỹ Topẽ mỹ vĩ há han mũ.

Lucas 2:9

Hã ra vãhã Topẽ tỹ jẽnẽ jafã vỹ ag mỹ vẽnh ven mũ, kanhkã tá. Topẽ tỹ jẽngrẽ vỹ ag kri rũm ke mũ. Kỹ ag tóg kamẽg kỹ jũrũn ke mũ sir.

Lucas 22:43

Kỹ Topẽ tỹ jẽnẽ jafã ũ vỹ ti mỹ vẽnh ven mũ sir, kanhkã tá, kỹ tóg ti tar han mũ.

Lucas 22:69

“Hã kỹ ẽprã ke fi kósin vỹ Topẽ pẽgja tá nĩnh ke mũ ha. Topẽ vỹ tar nĩ. Sỹ ti pẽgja tá nĩnh ke vẽ ha,” he tóg.

Lucas 24:4

Kỹ tóg fag fe kaj tĩ sir. Kỹ vãhã ũn régre ag vỹ kãge mũ gé, kur kupri rĩnh kỹ, kur kókov. Topẽ tỹ jẽnẽ jafã ag vẽ.

Lucas 3:21

Ti tỹ ver se kỹ jẽ tũ nĩn kỹ tóg ag kygpe kãn mũ. Kỹ tóg kejẽn Jesus kypég mũ gé. Kỹ Jesus tóg Topẽ mré vĩ mũ, ti tỹ ti kype kar kỹ. Kỹ vãhã kanhkã tóg nor' he mũ.

João 1:50

Kỹ tóg: “isỹ ã mỹ: ã ve ja inh nĩ, ã tỹ ka krẽm jẽ ra, hen kỹ tóg ã mỹ e tĩ,” he mũ. “Hã ra tóg ver tỹ nén ũ tũ nĩ. Isỹ kar kỹ nén han ke mũ vỹ ã mỹ e pẽ tãvĩ tĩnh mũ, ha vem nĩ,” he tóg.

João 10:1

Kỹ Jesus tóg: “ha mẽ,” he mũ. “Ẽg tỹ ẽg mẽg tỹ carneiro jy ró han kỹ ẽg tóg, ti jãnkã ra rã tĩ. Jãvo ũ tóg kejẽn, ró to tãpry kỹ pãte rã sór tĩ, ti tỹ carneiro péju sór kỹ.

João 10:7

Hã ra Jesus tóg ag mỹ: “ki hã sóg tó mũ,” he mãn mũ. “Carneiro jy ró jãnkã ri ke inh nĩ,” he tóg.

João 13:16

Ki hã sóg tó mũ, ha mẽ. Camarada pijé ti patrão kãfór nĩ'. Kỹ ẽg tỹ ũ jẽnẽn kỹ tóg ũ tỹ ti jẽnẽg mũ ẽn kãfór tũ nĩ gé.

João 13:38

Hã ra tóg: “vó, ũri ã tóg ón kỹ iso: ti ki kagtĩg sóg nĩ, he tãgtũ han ke mũ, galo kynkyr ke to hã. Ki hã sóg tó mũ, ha vem nĩ,” he mũ.

João 14:12

Ki hã sóg tó mũ, ha mẽ. Ũ tỹ inh ki rã há han mũ ẽn vỹ isỹ nén han mũ ri ke han ke mũ gé, hã ra tóg isỹ nén han mũ kãfór han ke mũ, ha vem nĩ, isỹ ũri inh panh venh tĩg ken kỹ.

João 16:20

Ki hã sóg tó mũ. Kygfỹ jé ãjag tóg ke mũ. Vẽsỹrénh jé ãjag tóg ke mũ. Hã ra tóg ũ tỹ inh ki ge tũ ag hã mỹ sér tĩnh mũ. Tag pãte tóg ãjag mỹ sér tĩ mãn ke mũ gé.

João 16:23

Ẽn kã ãjag tóg inh mỹ nén ũ to vĩ mãn ke tũ nĩ ha, isỹ ãjag mré nĩn kỹ. Ki hã sóg tó mũ mỹr. Ãjag tỹ inh panh mỹ nén ũ to vĩn kỹ tóg ãjag mỹ vin kãn ke mũ, ãjag tỹ tỹ inh mré ke nỹtĩn kỹ.

João 21:18

“Ã mỹ sóg ki hã tó mũ, ha mẽ. Ã kyrũ kã ã tóg ã kur rĩnh kỹ ã tỹ hẽn ra tĩg sór mũ ẽn ra tĩ' he ja nĩgtĩ. Kejẽn ã kófa nĩnh ke mũ. Ẽn kã ã tóg ag mỹ ã nĩgé tỹ vẽnh kri tỹ tam kenh mũ, kỹ ag tóg ã senh mũ, ha vem nĩ, kỹ ag tóg ã pére mũnh mũ, ã tỹ hẽ ra tĩg sór tũ ẽn ra,” he tóg, Pedro mỹ.

João 3:3

Kỹ Jesus tóg: “ũn mur mãn kỹ nỹtĩ ag hã vỹ Topẽ tỹ tỹ ẽg pã'i nĩ venh ke mũ. Ki hã sóg tó mũ mỹr,” he mũ.

João 3:5

Hã ra tóg: “vó,” he mũ. “Ẽprã ke ag krẽ vỹ tỹ ẽprã ke nỹtĩ, ag mỹnh fag ri ke. Jãvo Topẽ kuprĩg tỹ ũ han kỹ tóg Topẽ kuprĩg tỹ jagrẽ nĩ. Mur mãn to ken hã vẽ, hã vỹ: inh ki rã, he mũ. Goj tỹ ke vẽ, Topẽ kuprĩg tỹ ke vẽ gé. Ũ tỹ gen kỹ mur mãn ja tũ nĩn kỹ tóg Topẽ tỹ tỹ ẽg pã'i nĩ venh ke tũ pẽ nĩ.

João 5:19

Kỹ tóg ag mỹ vẽnh kãmén mũ. “Ki hã sóg tó mũ, ha mẽ. Ẽg jóg mág kósin vỹ ti pir mỹ nén ũ han ki kagtĩg nĩ. Ti panh vég ti tĩ, kỹ tóg ti tỹ ti panh ki nén vég mũ ẽn hã han tĩ. Ẽg jóg mág tỹ nén han mũ ẽn hã han tóg tĩ gé.

João 5:27

Kỹ tóg inh mỹ: “ẽprã ke kar jykre tugnỹm nĩ,” he ja nĩgtĩ, isỹ tỹ ẽprã ke fi kósin nĩn kỹ.

João 6:26

Kỹ tóg: “ha mẽ, ãjag tỹ ẽmĩ ko ja tugrĩn ãjag tóg inh ve sór mũ. Sỹ milagre hynhan tĩ ẽn vég ãjag tóg tĩ, hã ra ãjag tóg to jykrén há han tũ nĩgtĩ. Ãjag tógá nỹtĩ tag hã ve sór ãjag tóg mũ.

João 6:32

Kỹ tóg: “Moisés pijé ãjag mỹ kanhkã tá ẽmĩ pẽ nĩm ja nĩ',” he mũ. “Ki hã sóg tó mũ, ha mẽ. Ũ tỹ ãjag mỹ kanhkã tá ẽmĩ pẽ nĩm mũ ẽn vỹ tỹ inh panh nĩ.

João 6:47

“Sỹ ãjag mỹ ki hã tó mũn hã vẽ. Ũ tỹ inh ki rã mũ ẽn vỹ rĩr krỹg ja tũ ẽn venh ke mũ.

João 6:53

Kỹ tóg: “isỹ ãjag mỹ ke há vẽ,” he mũ. “Ãjag tỹ inh nĩ ko sór tũ nĩn kỹ, ãjag tỹ inh kyvénh kron sór tũ nĩn kỹ ãjag rĩnrĩr ke tũ pẽ nĩ. Tỹ sóg ẽprã ke fi kósin nĩ,” he tóg.

João 8:34

Hã ra tóg: “ki hã sóg tó mũ,” he mũ. “Ãjag tỹ Topẽ vĩ mranh kỹ ãjag tóg tỹ ti vĩ mranh jafã nỹtĩ, kỹ tóg ẽg tỹ patrão kórég vég mũ ri ke nĩ.

João 8:51

Ki hã sóg tó mũ, ha mẽ. Ãjag tỹ inh vĩ kri fi kỹ ãjag kãgter ke tũ pẽ nĩ,” he tóg.

João 8:58

Hã ra tóg: “ki hã sóg tó mũ, ha mẽ,” he mũ. “Abraão mur tũ ra sóg nĩ nĩ,” he tóg.

Han Kãme 10:11

Kỹ tóg kanhkã nor kỹ nĩ vég mũ. Tá nén ũ tóg kãtére mũ. Tỹ tóg kur mág ve nĩ. Ti péno tóg kygje kỹ nỹtĩ. Ẽn tóg ga kri kãtére mũ.

Han Kãme 7:56

Kỹ tóg: “ha vé,” he mũ. “Kanhkã tá sóg vég mũ, kỹ ẽprã ke fi kósin tóg Topẽ pẽgja tá jẽ nĩ,” he tóg.

2 Tessalônica 1:7

Ag jãvo tóg ãjag tar han mũ sir, ãjag jagtar mũ hã ra. Kỹ tóg sir ãjag jagtar tỹ tũ' he mũ gé sir, ẽg kar mỹ, ẽg Senhor tỹ Jesus tỹ kanhkã tá kãtĩg kỹ. Kanhkã tãn ag mré tóg kãtĩg ke mũ. Kỹ ẽg tóg ti venh mũ sir.

2 Tessalônica 1:9

Ag vóg kónãn jé tóg ke mũ. Kỹ ag vẽsỹrénh vỹ tũ' henh ke tũ nĩ. Ẽg Senhor mré ag nỹtĩnh ke tũ nĩ sir. Ti jykre há ẽn venh ke tũ ag nĩ, ti tỹ tỹ pã'i mág pẽ nĩ ẽn ti.

1 Timóteo 3:16

Ha vé, Topẽ tỹ ũri ẽg mỹ nén tó mũ tag vỹ tỹ nén ũ há tãvĩ nĩ. Vãsỹ ag tóg mẽ ja tũ nĩ. Ti jykren hã vẽ, ha mẽ: Jesus Cristo vỹ ẽg ri ke mur, ga kri, kỹ Topẽ tóg ti tỹ ũn mág han, tá, ti tỹ jykre kuryj nĩn kỹ. Kỹ tóg ti tỹ jẽgnẽ jafã ag mỹ ti ven. Kỹ ti mré mũ tĩ ag vỹ povo kar mỹ ti tó. Hã kỹ ga kri mũ ag vỹ ti ki ge mũ, Ẽg tỹ Jesus kãmén hã vẽ.

Hebreu 1:14

Ti tỹ jẽgnẽ jafã ag vỹ vẽnh kuprĩg ri ke nỹtĩ. Topẽ vỹ ag jẽgnẽg tĩ, ag tỹ ti tũ ag jy nĩgãn jé, ũn krenkren ke mũ ẽn ag jy.

Judas 1:14

Ag hã to tóg rán ja nĩ, Enoque ti. Adão krẽ tỹ ki krẽg mãn tỹ 7 (ke) vỹ tỹ ti nĩ, Enoque ti. Ti hã vỹ ag to: “ha vé, ẽg Senhor vỹ jun ke mũ, ti tỹ jẽgnẽ jafã ag mré,” he ja nĩ. “E tãvĩ ag nỹtĩ, ti tỹ jẽgnẽ jafã ag.

Nén Venh Ke 19:11

Kỹ sóg kanhkã nón kỹ nỹ vég mũ. Kãvãru kupri vỹ tá jẽ nĩ. Ũ tỹ ti kri nĩ jijin hã vỹ: “ũn ón vãnh, ũ tỹ nén ũ há to krónh ke vãnh,” he mũ. Ti hã vỹ jykre kuryj nĩ. Kỹ tóg ki hã tó tĩ gé. Nén ũ há hã to tóg vãsãn ti gé.

Nén Venh Ke 4:1

Kỹ sóg kynhmỹ ẽvãnh, kỹ sóg kanhkã jãnkã vé. Hã ra tóg nor kỹ jẽ nĩ. Kỹ sóg vẽnh vĩ ẽn mẽ mãn, vẽnh vĩ tỹ trombeta kyr ri ke ẽn. Kỹ tóg inh mỹ: “ha kãtãpry,” he mũ. “Ã mỹ sóg ven sór mũ, ãjag tỹ kar kỹ nén venh ke mũ ti,” he tóg, vẽnh vĩ ti.