João 1:1 - O Novo Testamento na língua Kaingáng

¹ Topẽ tỹ nén ũ kar han tũg ki tóg nĩ ja nĩ, ẽg tỹ ũ to: Topẽ vĩ, he mũ ẽn ti. Hã to ẽg: Jesus, he mũ. Topẽ mré tóg nĩ nĩ. Topẽ vỹ tỹ ti nĩ gé.

João 1:1 Iomraidhean Croise

Mateus 1:23

“ũn mén ja tũ fi vỹ kufy nĩnh mũ. Fi tỹ ti ve kỹ ag tóg ti to: Emanuel, henh ke mũ,” he ja nĩ. Emanuel to ken hã vẽ, hã vỹ: Topẽ vỹ ẽg ki rĩr há han ke mũ, he mũ.

Lucas 24:53

Kurã kar ki ag tóg Topẽ ĩn ra mũ tĩ, tá Topẽ mỹ vĩ há han jé, ti mỹ nén ũ há kar tó jé, ti tỹ ag mỹ sér tĩn kỹ, fag mré hã. Hã vẽ.

João 1:14

Ẽg tỹ ũ to: Topẽ vĩ, he mũ ẽn vỹ ẽg ri ke mur, kỹ tóg tỹ ẽprã ke jẽ sir. Ẽg mré tóg tĩ ja nĩgtĩ. Hã kỹ sóg ti vé. Pã'i mág vỹ tỹ ti nĩ, ũn tar, tag ve inh. Ẽg to há tãvĩ ti nĩ. Kỹ tóg ki hã tó tĩ gé. Tỹ tóg Topẽ kósin pir nĩ.

João 1:18

Ẽg pijé Topẽ vég tĩ'. Kỹ ẽg kã mĩ ke ũ vỹ ti ve ja tũ nĩ gé. Ti kósin pir hã vỹ ẽg mỹ ti kãmén tĩ. Ti hã vỹ ti jóg mré nĩ nĩ, Topẽ mré.

João 1:2

Nén kar han to hã tóg Topẽ mré nĩ nĩ.

João 16:28

Ti tỹ inh jẽnẽn hã kỹ sóg ga tag ki jun mũ. Hã ra sóg ũri inh mur ja ré kỹ tĩg ke mũ ha, inh panh kukãm,” he tóg.

João 17:5

Vãsỹ, ẽg tỹ ga tag han tũg ki sóg ã mré nĩ ja nĩgtĩ, ẽn kã sóg tỹ ũn mág pẽ nĩ ja nĩgtĩ, ã mré. Ẽn han mãn nĩ, inh mỹ. Isỹ tỹ ũn mág pẽ nĩ han mãn nĩ, panh'.

João 20:28

Kỹ Tomé tóg ti mỹ: “inh Senhor,Topẽ',” he mũ.

João 8:58

Hã ra tóg: “ki hã sóg tó mũ, ha mẽ,” he mũ. “Abraão mur tũ ra sóg nĩ nĩ,” he tóg.

Roma 9:5

Ẽg jógjóg ve ag, ũ tỹ vãsỹ Topẽ mré vẽmén tĩ ag vỹ jógjóg ve nỹtĩ gé. Kỹ Cristo vỹ tỹ ag kã ũ nĩ gé, ag kanhkã, ti tỹ ga kri tĩg kỹ. Ẽg kri ke kar vẽ, Cristo ti. Topẽ vỹ tỹ ti nĩ. Ti hã mỹ ẽg vĩ há han to krónh kenh ke tũ nĩ, ga kri, kanhkã tá ke gé. Hã vẽ.

Éfeso 3:9

Vẽnh kar mỹ sóg kãmén tĩ, ti tỹ nén han ke ti. Vãsỹ tóg to: “tag han jé sóg ke mũ,” he ja nĩgtĩ. Ti tỹ nén kar han tũg ki tóg to jykrén ja nĩgtĩ. Ti hã ne nén kar han'. Ge ra tóg ũ mỹ tó ja tũ nĩ ver.

Filipos 2:6

Topẽ hã pẽ ja ti nĩ mỹr, Jesus ti, ti tỹ ti mré nĩn kỹ. Hã ra tóg tá nĩ kỹ: “isũ vẽ, kanhkã ti. Hã kỹ sóg ẽprã ke ag to tĩg ke tũ nĩ,” he ja tũ nĩ.

Colossos 1:15

Topẽ ri ke pẽ ti nĩ, ti kósin ti. Ẽg pijé Topẽ vég tĩ'. Ẽg tỹ ti kósin ve kỹ ẽg tóg Topẽ ki kanhró nỹtĩ. Ti panh kósin ve vỹ tỹ ti nĩ. Topẽ tỹ nén ũ kar hynhan kỹ tóg ti panh mré nĩ nĩ.

Colossos 1:17

Nén kar tỹ vẽnh ven tũg ki tóg kã nĩ nĩ, Cristo ti. Ti tugrĩn nén kar tóg vãhã vẽnh ven kãn.

1 Timóteo 3:16

Ha vé, Topẽ tỹ ũri ẽg mỹ nén tó mũ tag vỹ tỹ nén ũ há tãvĩ nĩ. Vãsỹ ag tóg mẽ ja tũ nĩ. Ti jykren hã vẽ, ha mẽ: Jesus Cristo vỹ ẽg ri ke mur, ga kri, kỹ Topẽ tóg ti tỹ ũn mág han, tá, ti tỹ jykre kuryj nĩn kỹ. Kỹ tóg ti tỹ jẽgnẽ jafã ag mỹ ti ven. Kỹ ti mré mũ tĩ ag vỹ povo kar mỹ ti tó. Hã kỹ ga kri mũ ag vỹ ti ki ge mũ, Ẽg tỹ Jesus kãmén hã vẽ.

Tito 2:13

Ti kãtĩg ve sór ẽg nỹtĩ, hã kỹ tóg ẽg mỹ sér tĩ. Tỹ ti pã'i mág tãvĩ nĩ, Topẽ ti. Tar tãvĩ ti nĩ, ẽg kren han tĩ tỹ Jesus Cristo ti ke gé. Ti ve jé ẽg tóg ke mũ. Kỹ tóg sér tãvĩ tĩnh mũ.

Hebreu 13:8

Jesus Cristo hã vỹ tũ' henh ke tũ nĩ. Ti tỹ vãsỹ nén to jykrén mũ ẽn hã han ti tĩ, ũri. Kỹ tóg kurã krỹg ja tũ nĩ gé.

Hebreu 7:3

Panh tũ ti nĩ, mỹnh tũ ke gé, jógjóg ve tũ ti nĩ gé. Ũ ki mur ja tũ ti nĩ, kỹ tóg ter ja tũ nĩ gé. Topẽ kósin ri ke ja ti nĩ. Topẽ tũ ki rĩr kỹ tóg nĩ nĩ, ti kurã vỹ krỹg ja tũ nĩ, Melquisedeque kurã ti.

2 Pedro 1:1

Simão Pedro tỹ ãjag mỹ carta rán hã vẽ. Jesus Cristo tỹ inh fẽ vẽ, sỹ ti rãnhrãj han jé, sỹ tỹ ti apóstolo jẽ jé. Isỹ ũ tỹ inh mré Jesus Cristo ki ge kỹ nỹtĩ kar ag mỹ rán hã vẽ. Topẽ vỹ ẽg kuprẽg, ũn jykre kuryj ẽn, ẽg tỹ ẽg krenkren han mũ tỹ Jesus Cristo ki ge jé.

1 João 5:20

Topẽ kósin vỹ kãtĩg ja nĩgtĩ, ẽg tỹ ti ki kanhrãn jé. Tag ki kanhró ẽg tóg nỹtĩ. Jesus Cristo ki ge kỹ ẽg nỹtĩ. Kỹ ti hã vỹ tỹ ẽg jykre nĩ. Ti panh hã vỹ tỹ Topẽ pẽ nĩ. Ti hã vỹ ẽg tỹ ẽg rĩr krỹg ja tũ venh ke han tĩ.

1 João 5:7

Kỹ ẽg ũ tãgtũ tugrĩn ti tỹ tỹ Topẽ kósin nĩ ki kanhró nỹtĩ,

Nén Venh Ke 1:11

Kỹ tóg inh mỹ: “rán nĩ, ã tỹ nén vég mũ tag ti,” he ja nĩ. “Livro ki rán nĩ. Inh mré ke ag mỹ jẽnẽm nĩ, ẽmã tỹ Éfeso ra, ẽmã tỹ Esmirna ra, ẽmã tỹ Pérgamo ra, ẽmã tỹ Tiatira ra, ẽmã tỹ Sardes ra, ẽmã tỹ Filadélfia ra, ẽmã tỹ Laodicéia ra ke gé,” he ja tóg nĩ, vẽnh vĩ ẽn ti.

Nén Venh Ke 1:17

Sỹ ti ve kỹ sóg ti pẽn krẽm kutẽ mũ, ga kri. Ter ve inh. Hã ra tóg ti pẽgja tỹ inh mẽ kỹ inh mỹ: “inh kamẽg tũg nĩ,” he mũ. “Ũn ve vỹ tỹ inh nĩ, ẽgno ke gé.

Nén Venh Ke 1:2

João vỹ, Topẽ tỹ ti mỹ nén ven mũ ti ve kãn ja nĩ, Jesus Cristo tỹ ti mỹ nén ven mũ ẽn ti ke gé. Ti tỹ ve kỹ tóg rán ja nĩ. Hã vỹ nĩ.

Nén Venh Ke 1:8

“Ũn ve vỹ tỹ inh nĩ. Hã ra sóg tỹ ẽgno nĩnh ke mũ gé,” he tóg, ẽg pã'i mág ti. Vãsỹ tóg nĩ ja nĩgtĩ. Kỹ tóg ver ũri nĩ gé. Kỹ tóg kãtĩg ke mũ gé, ũ tỹ nén kar han ki kanhrãn mũ ẽn ti.

Nén Venh Ke 19:13

Ti kur vỹ kyvénh nĩ. Ti to ag tóg: “Topẽ vĩ,” he tĩ.

Nén Venh Ke 2:8

Kỹ tóg: “ũ tỹ ẽmã tỹ Esmirna tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ tỹ ũn ve nĩ. Hã ra tóg tỹ ẽgno nĩ gé,” hem nĩ. “Ter ja ti nĩ, hã ra tóg rĩr mãn,” hem nĩ iso.

Nén Venh Ke 21:6

Kỹ tóg: “hỹ, vẽnh ven kãn ti huri,” he mũ gé. “Ũn ve vỹ tỹ inh nĩ, kỹ sóg tỹ ẽgno nĩ gé. Isỹ nén ũ kar han to hã sóg nĩ nĩ. Kỹ sóg nén ũ kar tũg mũ ra nĩnh mũ gé. Ũ tóg goj kron sór mũ. Ẽn mỹ sóg ven tĩ, fagrĩnh mỹ. Isỹ ti mỹ goj ven mũ ẽn vỹ ti ter ke tũ han ke mũ.

Nén Venh Ke 22:13

Topẽ vĩ kar han sóg tĩ. Ũn ve vỹ tỹ inh nĩ, ũn tỹ ẽgno vỹ tỹ inh nĩ gé. Isỹ nén kar han to hã sóg nĩ, kỹ sóg nén kar tỹ tũ' he mũ ra ẽgno kã nĩnh ke mũ gé,” he tóg, Jesus ti.

Nén Venh Ke 3:14

Kỹ tóg: “ũ tỹ ẽmã tỹ Laodicéia tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ jijin hã vỹ: “ki hã tó tĩn hã vẽ,” he mũ, hem nĩ,” he tóg. “Ti hã tugrĩn Topẽ tóg nén ũ kar han ja nĩgtĩ, hem nĩ iso,” he tóg.