Éfeso 5:3 - O Novo Testamento na língua Kaingáng

³ Topẽ tũ vỹ tỹ ãjag nỹtĩ. Hã kỹ vẽjykre pãno tỹ vẽmén sór tũg nĩ, ãjag tỹ han sór tũ nĩ jé. Ẽg prũ tũ mré nỹ, ẽg mén tũ mré nỹ, tỹ vẽmén sór tũg nĩ. Ãjag tỹ nén e hã tỹ vãsãn mẽ tỹ vẽmén sór tũg nĩ gé.

Éfeso 5:3 Iomraidhean Croise

Mateus 15:19

Nén tỹ ẽg ki kãpa mũn hã vẽ, ha mẽ: jykrén kónãn, ũ tén, ti prũ tũ fi mré nỹ, fi mén tũ mré nỹ, ũn mén tũ fag to én, nén ũ péju, ũ to ón, ũ to vĩ kónãn.

Lucas 12:15

Kỹ tóg ag kar mỹ: “ker nén ũ to én hẽ',” he mũ. “Ẽg tỹ nén kar nĩ pijé ẽg rĩr han ke mũ'. Ẽg tũ mág nĩ tugrĩn ẽg pijé mũ há han ke mũ',” he tóg.

Lucas 16:14

Hã ra Fariseu ag tóg mẽg mũ. Jãnkamy mág hã to ag tóg há nỹtĩ. Hã kỹ ag tóg ag tỹ Jesus vĩ mẽ kỹ ti to é he mũ.

Han Kãme 15:20

“Ẽg tỹ ag mỹ tónh ken hã vẽ, ha mẽ: vẽnh kãgrá to fénhta ko tũg nĩ, ã prũ tũ fi mré nỹ tũg nĩ, nén ũ tỹ vẽsógki ter mũ ko tũg nĩ, nén ũ kyvénh ko tũg nĩ gé,” he tóg.

Han Kãme 20:33

“Inh pijé ãjag mỹ: inh mỹ jãnkamy nĩm, inh mỹ kur nĩm, he mũ'.

Roma 1:29

Vẽjykre pãno tỹ ag tóg fór nỹtĩ ha, ti kórég tãvĩ tỹ. Nén kar to én (ka)mẽ ag nỹtĩ. Vẽjykre kuryj han vãnh ag nỹtĩ. Jagnẽ tũ to én, jagnẽ kãgtén, jagnẽ vĩ kafãn, jagnẽ mỹ un'ón, jagnẽ krĩn kónãn, jagnẽ to vĩ kónãn,

Roma 16:2

Fi tỹ kejẽn ãjag ki jun kỹ fi mỹ: “ha kãrã,” hem nĩ. Kỹ fi mỹ nén tỹ fi mỹ tũ ẽn ven kãn nĩ. Ũ tỹ hẽn ri ke jagãgtãn fi huri, inh ke gé.

Roma 6:13

Kejẽn ãjag tóg ãjag pẽn tỹ, ãjag nĩgé tỹ, ãjag nũnẽ tỹ, ãjag há ki nỹtĩ kar tỹ Topẽ vĩ mranh sór mũ. Ãjag tỹ mranh kỹ ãjag tóg ãjag há tỹ vẽjykre pãno han tĩ. Topẽ kato tẽ ãjag tĩ. Kỹ ke tũg nĩ. Topẽ jykre hã han sórm nĩ, ãjag jykre tỹ, ãjag há ki nỹtĩ kar tỹ. Ẽg tỹ ti mỹ vẽnh fẽg kỹ ẽg tóg ti jykre há han kãn ke mũ sir.

1 Corinto 10:8

Kỹ ẽg ũn mén tũ fag mré nỹnh ke tũ nĩ gé. Tag han ja ag tóg nĩgtĩ gé, ẽg jógjóg ve ag. Kỹ kurã pir ki ũ tỹ 23 mil (ke) ag vỹ kãgter ja nĩgtĩ, Topẽ tỹ ag tũg kỹ.

1 Corinto 5:1

Nén ũ tóg mẽ há tĩ ãjag to. Nén ũ vẽnh mỹ han ãjag nẽji tĩ. Hã ra tóg kórég pẽ nĩ. Tag mẽ inh, ha mẽ: ãjag kã mĩ ũ tóg nẽji ti panh prũ fi tỹ prũg mũ. Ũ tỹ Topẽ jykre ki kagtĩg ag pijé ti ri ke han tĩ', ti jykre kórég tag ti'.

1 Corinto 6:13

“Vẽjẽn vỹ tỹ ẽg nug tũ nĩ, kỹ ẽg nug vỹ tỹ vẽjẽn né nĩ,” he ãjag tóg tĩ. Hỹ, hã ra Topẽ vỹ tỹ tũ' henh ke mũ, vẽjẽn tỹ, ẽg nug tỹ ke gé. Ẽg han ja tóg nĩgtĩ. Hã ra ti pijé ẽg tỹ tỹ ũn mén tũ mré nỹ jafã han'. Ẽg Senhor tũ vẽ, ẽg. Kỹ ẽg Senhor vỹ tỹ ẽg tãn nĩ sir.

1 Corinto 6:18

Ẽg tỹ ũn mén tũ mré nỹ kỹ, ẽg tỹ ũn prũ tũ mré nỹ kỹ ẽg tóg vẽnh kavénh tĩ sir, ẽg tỹ Topẽ vĩ mranh tag tỹ. Ẽg tỹ nén ũ ũ ki Topẽ vĩ mranh kỹ ẽg tóg vẽnh kavénh tỹ ge han tũ nĩgtĩ. Hã kỹ ũn mén tũ mré nỹ tovãnh kãn nĩ, ũn prũ tũ mré nỹ tovãnh kãn nĩ gé.

2 Corinto 12:21

Kỹ tóg inh mỹ'a tĩnh mũ, sỹ ãjag ki jun kỹ. Topẽ tỹ isỹ ũn sĩ han ri ke vẽ sir. Inh fỹnh ke vẽ, ãjag tỹ ãjag jykre pãno si ẽn tovãnh tũ nĩn kỹ, nén ũ kavéj ẽn ti, ti prũ tũ fi mré nỹ, fi mén tũ mré nỹ, fag to én tĩ ẽn mỹr. Ke mãn tũg nĩ.

Éfeso 5:12

Vẽnh péju kỹ ag tóg han tĩ, vẽjykre kórég ti. Ẽg mỹ'a tóg tĩ, ẽg tỹ ag tỹ nén han tĩ ẽn ve kỹ.

Éfeso 5:5

Tag to jykrén, ha mẽ: ũ tỹ ti prũ tũ fi mré nỹ mũ ẽn ti, ũ fi tỹ fi mén tũ mré nỹ mũ ẽn fi pijé Cristo venh ke mũ'. Ũ tỹ ti tỹ nén e hã tỹ vãsãn mũ ẽn pijé venh ke mũ'. Ẽg tỹ vẽnh kãgrá to jãn ẽn ri ke ti nĩ, ẽg tỹ ẽg tỹ nén e hã tỹ vãsãn mũ ẽn ti. Ũ tỹ ge pijé Cristo venh ke mũ', ti tỹ tỹ ẽg pã'i nĩ ẽn ti.

Filipos 1:27

Ha vé, Cristo jykre hã han nĩ. Tag hã to vãsãnsãn nĩ. Hẽn ri ke mũn sóg ãjag venh kãtĩg ke mũ. Hẽn ri ke mũn sóg ãjag venh kãtĩg ke tũ nĩ. Inh kãtĩ tũ ra jagnẽ mré vẽjykre pir han kỹ nỹtĩm nĩ. Jesus kãme hã tóm nĩ. Ti ki ge kỹ nỹtĩm nĩ. Sỹ tag mẽnh há tóg tĩ, ãjag to.

Colossos 3:5

Ãjag jykre pãno tovãnh nĩ. Ãjag tỹ nén to én mũ ẽn mỹ vẽnh nenh nĩ. Ẽg jykre pãno hã vẽ, ha mẽ: ẽg prũ tũ mré nỹ, ẽg mén tũ mré nỹ, nén vẽnh mỹ kar han, Topẽ tỹ nén ũ to: “han tũg nĩ,” he mũ ra to én mũ, ẽg tỹ nén e hã tỹ vãsãn mẽ. Vẽnh kãgrá to jãn ẽn ri ke ti nĩ, ẽg tỹ ẽg tỹ nén e hã tỹ vãsãn sór kỹ.

1 Tessalônica 4:3

Topẽ vỹ ãjag to jykrén, ãjag tỹ ti jykre hã han jé. Kỹ ãjag prũ tũ fag mré nỹ tũg nĩ, ãjag mén tũ ag mré nỹ tũg nĩ gé.

1 Tessalônica 4:7

Ẽg tỹ vẽnh kavénh kỹ ẽg tóg Topẽ jykre han tũ nĩgtĩ mỹr. Ti jykre vỹ kuryj nỹ. Ẽg tỹ tỹ ti tũ nỹtĩ hã jé tóg ẽg kuprẽg.

1 Timóteo 2:10

Fag tỹ kur tỹ jagnẽ kãfór han sór mũ pijé há nĩ', fag gãnh tỹ ke gé. Fag jé vẽjykre kuryj hã tỹ vẽnh sĩnvĩ han.

1 Timóteo 3:3

ũ tỹ goj fa kron vãnh, ũ tỹ ti fe tỹ gỹm ke vãnh, ũ tỹ vẽnh kar mỹ komẽr hã vĩ tĩ, ũ tỹ vẽnh kar krĩ kuprã nĩ ve sór tĩ, ũ tỹ riko nĩ sór vãnh,

1 Timóteo 6:10

Ẽg tỹ jãnkamy mág to én kỹ ẽg tóg nén ũ kórég kar han sór tĩ. Vẽjykre kórég vẽ. Tag to ũ ag tóg Jesus ki rã tovãnh huri, kỹ ag tóg vẽsỹrénh mũ ha, ag tỹ jãnkamy mág to há nỹtĩ tugnĩn.

2 Timóteo 3:2

Ag jykre hã han sór jé ag tóg ke mũ. Nén ũ kar to én jé ag tóg ke mũ, ag riko nỹtĩ jé. Jagnẽ to vĩ kónãn jé ag tóg ke mũ. Ag panh vĩ ki hã han ke tũ ag tóg nĩ. “Kórég ti nĩ,” he jé ag tóg ke mũ, ũ tỹ ag mỹ nén ũ há nĩm mũ ra. Topẽ to ag é henh ke mũ gé.

Tito 1:11

Ẽg tỹ ag vĩ tỹ tũ' henh ke vẽ. Ha vé, ũ fag ne ag vĩ kri fi sór mũ', kỹ fag tóg Topẽ vĩ tovãnh sór mũ, fag mén mré hã, fag krẽ mré hã. Un'ón ag tóg tĩ, ũ tỹ fag kanhrãn sór mũ ag. Hã ra ag tóg hã to jãnkamy ve sór mũ, ag tỹ riko nỹtĩ jé.

Tito 1:7

Ha vé, ũ tỹ tỹ igreja to kófa jẽ sór kỹ tóg tỹ ũn jykre há nĩnh mũ. Ti tỹ ti mré ke ag to: “ag kãfór vỹ tỹ inh nĩ,” henh ke tũ vẽ. Ũn fe tỹ gỹm ke (ka)mẽ vỹ há tũ nĩ, ũ tỹ vinho kron (ka)mẽ ti, ũn jũ (ka)mẽ ti. Kỹ tóg ti tỹ riko nĩnh ke hã to én ke tũ nĩ gé.

Tito 2:3

Kỹ kófa fag jyvẽn nĩ gé. “Vẽso jykrén nĩ,” hem nĩ fag mỹ. “Ũ to vĩ kónãn tũg nĩ. Vinho to én sór tũg nĩ. Vẽjykre há hã han nĩ, vẽnh kar tỹ ve jé.

Hebreu 12:16

Vẽnh ki rĩr há han nĩ gé, ãjag kã mĩ ũ tỹ Esaú jykre kórég ẽn ri ke han tũ nĩ jé, ũ tỹ Topẽ kato vãsãn tũ nĩ jé. Esaú vỹ Topẽ to é he ja nĩgtĩ, kỹ tóg vẽjẽn tugrĩn ti panh tỹ ti mỹ vĩ há han ke ẽn kren. Ti jãvy mỹ tóg tovãnh, ti panh tỹ ti mỹ vĩ há han ke ẽn ti. Ti tỹ ti panh tỹ ti mỹ vĩ há han ke ẽn to é hen hã vẽ.

1 Pedro 5:2

Kỹ sóg ãjag mỹ tag tó sór mũ, ha mẽ. Ãjag krẽm ke ag ki rĩr há han nĩ. Ũ tỹ carneiro ki rĩr tĩ ẽn tỹ ti mẽg ki rĩr há han ẽn ri ke han nĩ. Topẽ tỹ ãjag mỹ vẽnh rãnhrãj nĩm jan hã vẽ. Kỹ ãjag gỹj mĩ ẽkrén sór tũg nĩ gé. Topẽ tũ vẽ, ãjag rãnhrãj ti, hã kỹ ki rĩr há han sórm nĩ.

2 Pedro 2:10

Ũ ag vóg kónãn mág pẽ han jé tóg ke mũ, hã vỹ: ũ tỹ ag tỹ nén to én mũ han tĩ ẽn ag, he mũ, ũn vẽnh kavénh tĩ ag, he mũ, ũ tỹ: “Topẽ pijé tỹ ẽg Senhor nĩ',” he mũ ẽn ag, he mũ. Ón kỹ Topẽ vĩ tó tĩ tag ag vỹ ẽg vĩ kafãn tĩ. “Inh hã tóg ki kanhró nĩ,” he ag tóg tĩ. Kỹ ag tóg kanhkã tãn ag kamẽg vãnh nỹtĩ gé. Ag to ag tóg vĩ kónãn tĩ.

2 Pedro 2:14

Ũn tỹtá fag kar to ag tóg én tĩ, fag ki ẽvãnh kỹ. Topẽ vĩ mranh sór ag tóg tĩ. Ti vĩ mranh to ag tóg krónh ke tũ nĩgtĩ. Ũn krój ag krĩn kónãn ag tóg tĩ, ag tỹ ag mré mranh jé. Ag topẽ vỹ tỹ jãnkamy nĩ. Topẽ vỹ ag vóg kónãn ke mũ, ha vem nĩ.

2 Pedro 2:3

Ag tỹ jãnkamy mág ve sór vẽ, hã kỹ ag tóg ón kỹ vẽme sĩnvĩ tó sór mũ, ag tỹ ãjag lograr he jé. Hã ra ũ tỹ ag vóg kónãn ke mũ ẽn tóg ag vég tĩ. Ag tỹ tũ' he jé tóg ke mũ, kãnhmar, ha vem nĩ.

Nén Venh Ke 2:14

Hã ra sóg nén ũ tó sór mũ gé, ãjag mỹ, ti tỹ inh mỹ há tũ nĩn kỹ. Ãjag kã mĩ ũ ag tóg Balaão jykre han sór mũ. Balaão vỹ Balaque mỹ ti tỹ Israel krẽ ag krĩn kónãn ke kãmén ja nĩ, Topẽ vĩ mranh ke to. Kỹ ag tóg ón kỹ vẽnh kãgrá to fénhta ko ja nĩgtĩ. Ẽn ko kỹ ag tóg ag prũ tũ fag mré nỹgnỹ' he ja nĩgtĩ gé. Tag han sór ag tóg mũ gé, kỹ tóg inh mỹ kórég nỹ.

Nén Venh Ke 2:21

Fi tovãnh isóg mũ vẽ, fi tỹ fi jykre tugnỹm jé, hã ra fi tóg fi jykre kórég tovãnh sór tũ nĩ.

Nén Venh Ke 21:8

Hã ra ũ ag tóg pĩ gru fir kã ki vár ke mũ, hã vỹ: ũ tỹ isovãnh mũ ag, ũ tỹ vẽjykre pãno han tĩ ag, ũ tỹ ũ tén tĩ ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ mré nỹgnỹ mũ fag, kujá ag, curandeiro ag, ũ tỹ vẽnh kãgrá jykre mĩ mũ mũ ag, ũn ón mũ ag, he mũ. Pĩ gru fir kã ki tóg ag vãm kãn ke mũ. Kỹ tóg ag kãgter pẽ han ri ke nĩ sir,” he tóg, ũ tỹ nĩgja kupri kri nĩ ẽn ti.

Nén Venh Ke 22:15

Hã ra ũ ag tóg ẽn ra genh ke tũ nĩ, hã vỹ: ũ tỹ vẽjykre pãno tỹ vẽnh kavénh tĩ ag, kujá ag, curandeiro ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ ag mré nỹgnỹ mũ fag, ũ tỹ ũ tén mũ ag, ũ tỹ vẽnh kãgrá jykre mĩ mũ mũ ag, ũn ón mũ ag, ũ tỹ ũ ag lograr he mũ ag, he mũ. Ẽn ag vỹ ẽmã ẽn ra genh ke tũ pẽ nĩ,” he tóg, Jesus ti.

Nén Venh Ke 9:21

Ag pijé ag jykre tovãnh sór mũ', ẽprã ke krenkren mũ ẽn ag. Jagnẽ kãgtén ag tóg mũgtĩ. Kujá jykre han ag tóg mũgtĩ. Ag prũ tũ fag mré ag tóg nỹgnỹ mũgtĩ. Fag mén tũ ag mré fag tóg nỹgnỹ mũgtĩ gé. Jagnẽ tỹ nén ũ pigju ag tóg mũgtĩ gé, ẽprã ke ag.