Éfeso 1:5 - O Novo Testamento na língua Kaingáng

⁵ Jesus Cristo tugrĩn ẽg tóg tỹ ti krẽ nỹtĩ. Ti hã ne vẽsóg ki ẽg kuprẽg ke to jykrén ja nĩgtĩ',

Éfeso 1:5 Iomraidhean Croise

Mateus 1:25

Hã ra tóg ver fi mré nỹ tũ nĩgtĩ. Kejẽn fi tóg fi kósin vég mũ. Kỹ tóg ti jijin kỹ ti mỹ: Jesus, he mũ. Tag pãte tóg vãhã fi mré nỹ mũ sir.

Mateus 11:26

“Hỹ, hã vẽ. Hã ra tóg há tãvĩ nĩ, jóg',” he tóg.

Lucas 10:21

Kỹ tóg ti mỹ sér tĩ, óra ẽn kã. Topẽ kuprĩg tỹ ti krĩn kỹ tóg: “jóg',” he mũ. “Tỹ ã tóg kanhkã tãn ag kãfór kar nĩ, kar ã tóg tỹ ẽprã ke ag kãfór nĩ gé,” he tóg. “Inh mỹ tóg há tĩ, ã tỹ nén han mũ ti. Ũ tỹ: “ki kanhró mág inh nĩ,” he mũ ag mỹ ã tóg ã jykre ven ja tũ nĩ. Ũ tỹ ki kagtĩg ag hã mỹ ã tóg ã jykre nĩm ja nĩ. Kỹ tóg há tãvĩ nĩ, jóg',” he tóg.

Lucas 11:32

“Kỹ Topẽ tóg Nínive tá ke ag ve kỹ ãjag mỹ vĩ kónãn ke mũ gé, kurã tỹ ẽgno ẽn kã, ha vem nĩ. Nínive tá ke ag tỹ Jonas vĩ mẽ kỹ ag tóg ag jykre tugvãnh ja nĩgtĩ. Tỹ sóg Jonas kãfór nĩ, hã ra ãjag tóg ãjag jykre tugvãnh jãvãnh nỹtĩ, sỹ ãjag mỹ tó mũ ra,” he tóg.

Lucas 12:32

“Kamẽg tũg nĩ, ãjag pipir nỹtĩ ra. Ẽg jóg tỹ Topẽ vỹ ãjag to há nĩ, hã kỹ tóg ãjag mỹ kanhkã ti ven sór mũ, ha mẽ.

João 1:12

Ũ ag tóg hã ra ti ki ge mũ. Ẽn ag to tóg: “Topẽ krẽ,” he mũ, ũ tỹ ti ki ge kỹ nỹtĩ tãvĩ ag hã to.

João 11:52

Hã ra Judeu ag tãvĩ jagfy ke pijé'. Topẽ krẽ kar jagfy ke ja vẽ. Ti tỹ vẽnh kar tỹ ũn pir han sór ja vẽ, Jesus ti, hã jé tóg ẽg jagfy ter ja nĩ, ũ tỹ povo kar kã mĩ ti ki genh ke mũ ag kar jagfy.

João 20:17

Hã ra tóg fi mỹ: “inh vóg tũg nĩ ver,” he mũ. “Isỹ inh panh ra tãprynh ke vẽ. Inh kanhkã ag mỹ tónh tĩg nĩ, hã ra. Ag mỹ: “isỹ inh panh venh tĩg ke vẽ, hã ra tóg tỹ ãjag panh nĩ gé, he tóg,” hem nĩ. “Isỹ inh Topẽ to tãprynh ke vẽ, hã ra tóg tỹ ãjag Topẽ nĩ gé, he ti,” hem nĩ, ag mỹ,” he tóg Jesus ti, Maria Madalena fi mỹ.

Han Kãme 13:48

Fóg ag tỹ tag mẽ kỹ tóg ag mỹ sér tĩ sir. Kỹ ag tóg Topẽ vĩ to há nỹtĩ, ti mỹ vĩ há han kỹ. Kỹ ag tóg Jesus ki ge mũ, Topẽ tỹ ũn kuprẽg mũ ag, ag tỹ ẽg rĩr krỹg ja tũ ve jé.

Roma 8:23

Nén ũ kar tag vẽnhkrẽr ri ke han ẽg tóg tĩ gé, ẽg tỹ ti jagy ven kỹ, ẽg tỹ ti kuprĩg tỹ jagrẽ nỹtĩ ra. Ẽg jagrẽ to ẽg tóg ki kanhró nỹtĩ, ẽg tỹ tá tỹ ũn mág nỹtĩnh ke ti. Ge ra tóg ver ẽg mỹ jagy tĩ, tag ti ki. Kỹ ẽg tóg ti mré nỹtĩ sór mũ. Kỹ ẽg tóg venh ke mũ sir, ti tỹ ti krẽ pẽ mỹ nén nĩm ke mũ ti. Hã jãvãnh ẽg tóg mũ.

1 Corinto 1:1

Paulo tỹ rá vẽ. Isỹ ẽmã tỹ Corinto tá ke ag mỹ rán hã vẽ. Kỹ ẽg régre tỹ Sóstenes vỹ inh mré rán mũ gé. Topẽ hã ne inh kuprẽg', kỹ tóg inh jé prẽr, Jesus Cristo tỹ inh fẽg jé, sỹ tỹ ti apóstolo jẽ jé sir. Hã kỹ sóg ãjag mỹ rán mũ.

1 Corinto 1:21

Topẽ tỹ nén to jykrén mũ vỹ ge nĩ, ha mẽ. Ẽg tỹ vẽsóg ki Topẽ to jykrén sór mũ ra ẽg tóg ti ki kanhrãn ja tũ nĩgtĩ, ẽg tỹ ga kri mũn kỹ. Hã kỹ Topẽ tóg ẽg tỹ ti vĩ mẽ kỹ kri fi kỹ ẽg kren han mũ. Hã kỹ Topẽ tóg ag mỹ krĩ tũ nĩ ve nĩ, ũ tỹ ki kagtĩg ag mỹ.

2 Corinto 6:18

“Ãjag jóg vỹ tỹ inh nĩnh mũ, kỹ ãjag tóg tỹ inh krẽ nỹtĩnh mũ, he tóg, ẽg Senhor ti, ũ tỹ nén ũ kar han ki kanhró ẽn ti,” he ja tóg nĩgtĩ, Topẽ vĩ rán ki.

Galácia 3:26

Topẽ krẽ vỹ tỹ ẽg nỹtĩ ha, ẽg tỹ Jesus Cristo ki ge kỹ nỹtĩn kỹ.

Éfeso 1:11

Ẽg tỹ Cristo ki ge kỹ nỹtĩn kỹ ẽg tóg tag venh ke mũ gé. Hã jé Topẽ tóg ẽg kuprẽg ja nĩ. Nén kar to tóg jykrén há han tĩ, vẽsóg ki, kỹ tóg ẽg kuprẽg to jykrén ja nĩ gé.

Éfeso 1:9

Vãsỹ tóg to jykrén ja nĩgtĩ, kỹ tóg ũri ẽg mỹ tó mũ sir, ti tỹ Cristo tugrĩn nén han sór mũ ti.

Filipos 2:13

Ti hã ne tóg ãjag krĩn há han tĩ', ti jykre tỹ ãjag mỹ sér tĩn jé, ãjag tỹ hã mĩ hã mũn jé.

Colossos 1:19

Topẽ mỹ tóg sér tĩ, ti kósin tỹ ti ri ke pẽ nĩn kỹ, ti tỹ tỹ ti ve hã pẽ nĩn kỹ.

2 Tessalônica 1:11

Hã jé sóg ãjag to Topẽ mré vĩ tĩ, kurã kar ki. Ti mỹ sóg: “ag tar han nĩ,” he tĩ. “Ã jykre han sór ag tóg mũ. Kỹ ag tar han nĩ, ag tỹ kygnẽg tũ nĩ jé. Ag kuprẽg ã tóg, ag tỹ kurã ẽn ve jé,” he sóg tĩ mỹr, Topẽ mỹ.

Hebreu 2:4

Kỹ Topẽ vỹ ũ tỹ ẽg mỹ ti vĩ tó mũ ẽn ag vĩ to: “há ti nĩ,” he ja nĩ gé. Hã kỹ tóg ag tar han, ag tỹ ẽg tỹ nén han vãnh ẽn hynhan jé, milagre ti, ẽg tỹ vẽsóg ki nén han ki kagtĩg ẽn. Kỹ tóg ag mỹ ti kuprĩg jẽnẽ gé. Ti hã ne to jykrén kỹ: “tag tar han jé sóg ke mũ, ẽn to. Kỹ sóg ũ ẽn tar han ke mũ, ũ to,” he ja nĩ, ti vĩ tó tĩ ag to.

1 João 3:1

Ha vé, ẽg jóg mág tóg ẽg to há tãvĩ nĩ, hã kỹ tóg ẽg to: “inh krẽ,” he mũ sir. Ti krẽ vỹ tỹ ẽg nỹtĩ, Jesus jãvy ag, ti ve fag. Hã kỹ ẽprã ke ũ ag vỹ ẽg jykre ki kagtĩg nỹtĩ. Ag pijé Topẽ ki kanhró nỹtĩ'. Hã kỹ ag tóg ẽg jykre ki kagtĩg nỹtĩ gé, ẽg tỹ tỹ ti krẽ nỹtĩn kỹ.

Nén Venh Ke 21:7

Ũ tỹ isovãnh tũ ẽn mỹ sóg nĩm ke mũ, presente tag ti, ha mẽ: ti Topẽ vỹ tỹ inh nĩnh mũ, kỹ tóg tỹ inh kósin nĩnh mũ gé,” he tóg inh mỹ, ũ tỹ nĩgja kupri kri nĩ ẽn ti.