1 Corinto 4:1 - O Novo Testamento na língua Kaingáng

¹ Ãjag tỹ ẽg to jykrén kỹ tag to jykrén nĩ, ha mẽ. Cristo mỹ rãnhrãj tĩ vỹ tỹ ẽg nỹtĩ. Topẽ jykre tó ẽg tóg tĩ, ẽg tỹ vẽsóg ki nén to jykrén vãnh ẽn.

1 Corinto 4:1 Iomraidhean Croise

Mateus 13:11

Kỹ tóg ag mỹ: “ãjag hã ne, ũ tỹ kanhkã tá nĩ ẽn tỹ tỹ ẽg pã'i nĩ ẽn ki kanhró nỹtĩnh mũ',” he mũ. “Jãvo ũn e ẽn ag vỹ, ki kanhrãn kãn ke tũ nĩ.

Mateus 24:45

Kỹ tóg ag mỹ ti kãtĩg mãn ke tó mãn mũ. “Kejẽn patrão tóg hẽn ra tĩg sór mũ. Kỹ tóg ti camarada ag kã ũ kuprẽg mũ, ti tỹ ti jo ti mré camarada ag ki rĩr jé, ag mỹ vẽjẽn ven jé, vẽjẽn ke horan ki.

Marcos 4:11

Kỹ tóg: “ãjag hã tóg Topẽ tỹ tỹ ẽg pã'i nĩ ki kanhró nỹtĩnh mũ, ijo tó ja tũ ẽn ki,” he mũ. “Hã ra sóg ẽn ag mỹ: tag ri ke ti nĩ, he tãvĩ han mũ.

Lucas 1:2

Ũ tỹ ti vég mũ ag tóg ẽg mỹ ti kãmén ja nĩgtĩ, ũ tỹ ti vĩ tó tĩ ag, ũ tỹ ti mré mũ ja ẽn ag.

Lucas 12:42

Kỹ tóg: “kejẽn patrão tóg hẽn ra tĩg sór mũ. Kỹ tóg ti camarada ag kã ũ kuprẽg mũ, ti tỹ ti jo ag ki rĩr jé. Ũ tỹ ti rãnhrãj ki rĩr há han tĩ ẽn kuprẽg tóg mũ, ti tỹ ag mỹ vẽjẽn ven jé.

Lucas 8:10

Kỹ tóg ag mỹ: “ãjag hã mỹ sóg, kãmén há han ke mũ, Topẽ tỹ tỹ ẽg pã'i nĩ ti,” he mũ. “Hã ra sóg ũ ag mỹ: tag ri ke ti nĩ, he tãvĩ han mũ, ũ tỹ ón kỹ mẽg mũ ag mỹ. Kỹ ag tóg mẽg mũ ra ki kagtĩg nỹtĩnh mũ. To jykrén ke tũ ag nĩ gé,” he tóg.

Roma 11:25

Isỹ ãjag mỹ nén ũ kãmén sór vẽ, ãjag tỹ mẽ ja tũ ũ, ha mẽ, ãjag tỹ Judeu ag to é he tũ nĩ jé. Ha vé, Judeu ũ ag vỹ ver mẽ sór tũ nĩgtĩ. Ũ ag tóg mẽ sór mũ. Kejẽn vẽnh kar tóg hã ra mẽ kãn ke mũ, fóg ag kar, kanhgág ag kar ke gé, Judeu ag kar ke gé.

Roma 16:25

Ha mẽ, ẽg jé Topẽ mỹ vĩ há han. Ẽg tar han ki kanhró tóg nĩ, ẽg tỹ ti ki rã kar krónh ke tũ nĩn jé. Sỹ ãjag mỹ Topẽ vĩ sér tó mũn hã vẽ, Jesus Cristo kãmén kỹ. Vãsỹ ẽg tóg mẽ ja tũ nĩ, ti vĩ sér tag ti. Ẽg tỹ vãhã mẽ vẽ, Topẽ tỹ ẽg mỹ to vẽjykre nĩm kỹ. Prỹg tỹ hẽn ri ke ki ag tóg mẽ ja tũ nĩ, ẽg jo ke ag.

1 Corinto 2:7

Topẽ vĩ hã tó sóg tĩ mỹr'. Ẽn tỹ ẽg vẽsóg ki ki kanhrãn ke tũ nĩ. Hã ra Topẽ tóg vãsỹ to jykrén mũ. Ga tỹ kã nĩ to hã tóg to jykrén mũ, ẽg tỹ ti vĩ ki kanhrãn jé, ẽg tỹ ti jykre ki kanhró tugrĩn tỹ ũn mág nỹtĩ jé.

1 Corinto 3:5

Ũ nỹ tỹ Apolo nĩ', jo ũ nỹ tỹ inh nĩ', hã vỹ: Paulo, he mũ? Topẽ mỹ rãnhrãj tĩ vỹ tỹ ẽg nỹtĩ. Kỹ ãjag tóg ẽg vĩ kri fi kỹ Jesus ki ge ja nĩgtĩ, ẽg Senhor tỹ ãjag krĩn kỹ. Ti hã vỹ ẽg mỹ ẽg rãnhrãj nĩm ja nĩ.

1 Corinto 4:13

Ag tỹ iso féfé he mũ ra sóg komẽr hã ag mỹ vĩ tĩ, ag jũ tỹ tũ' he jé. Vãfár ri ke inh nĩ, vẽnh kar mỹ, ag tỹ nén fón tĩ kar ri ke inh nĩ.

1 Corinto 4:2

Kỹ ẽg patrão tóg nén ũ pir ve sór nĩgtĩ, ẽg tỹ ti tũ ki rĩr mũn kỹ, hã vỹ: ẽg tỹ ki rĩr há han mũ, he mũ. Ge ti nĩ, Topẽ tỹ ẽg ki nén ve sór mũ ti. Ti tũ ki rĩr há han jé ẽg tóg ke mũ.

2 Corinto 11:23

Cristo camarada vỹ tỹ ag nỹtĩ. Tag to sóg ag kãfór nĩ hã ra. Ha vé, krĩ tũ pẽ nĩ ve inh nĩ, sỹ tỹ ag kãfór nĩ tag tón kỹ. Ha mẽ, isỹ tỹ Cristo camarada nĩ ti. Inh rãnhrãj e tag hã to sóg ag kãfór nĩ. Ise kỹ nĩ e ja hã to sóg ag kãfór nĩ gé. Inh mrãnmrãn kãfór han ag tóg tĩ gé. Ter kren tỹ hẽn ri ke han inh, ag kãfór ke gé.

2 Corinto 12:6

Isỹ ũn mág nĩ tag tó kỹ sóg ki hã tó tĩ. Vẽnh ó pijé'. Inh jykre vég ãjag tóg mũgtĩ. Inh vĩ mẽg ãjag tóg mũgtĩ. Kỹ tag hã to jykrén nĩ. Tag hã to ãjag tóg inh jykre ki kanhrãn ke mũ.

2 Corinto 4:5

Inh pijé inh jykre kãmén tĩ'. Jesus Cristo hã kãmén sóg tĩ, ti tỹ tỹ ẽg Senhor nĩ ti. Jãvo sóg tỹ ãjag camarada ri ke nĩ, isỹ Jesus to há nĩn kỹ.

2 Corinto 6:4

Vẽjykre há mĩ sóg tĩ mỹr, isỹ tỹ Topẽ camarada jẽn kỹ. Kỹ inh jykre tóg vẽnh kar mỹ ve há tĩ. Isỹ nén ũ jagy vég mũ ra sóg ti to krónh ke tũ nĩgtĩ, ijagtar nĩ ra, inh kanẽ jur mũ ra.

Éfeso 1:9

Vãsỹ tóg to jykrén ja nĩgtĩ, kỹ tóg ũri ẽg mỹ tó mũ sir, ti tỹ Cristo tugrĩn nén han sór mũ ti.

Éfeso 6:19

Kỹ inh jagfy ti mré vẽmén nĩ gé. Topẽ vĩ tó sóg tĩ. Kỹ inh mré to vĩm nĩ, isỹ inh kato vãsãnsãn mũ ag kamẽg tũ nĩ jé, isỹ vẽnh kar mỹ Topẽ tỹ nén han sór mũ ẽn kãmén há han jé, vẽnh vĩ sér ẽn.

Colossos 2:2

“Ag tỹ inh vãsãn tag mẽ kỹ ag hỹn tóg nén ũ kamẽg ke tũ nĩ. Kỹ ag hỹn jagnẽ to há kar nỹtĩnh mũ,” he sóg tĩ. Inh mỹ tóg ãjag tỹ tag ki kanhrãn kãn há tĩ. Topẽ tỹ nén to jykrén jan hã vỹ tỹ Cristo nĩ.

Colossos 4:3

Kỹ ti mré iso vẽmén nĩ gé. Topẽ vĩ tó sóg tĩ. Kỹ ti mỹ to vĩm nĩ, ag tỹ inh vĩ mẽ há han jé, sỹ ag mỹ Cristo kãmén kỹ, sỹ ag mỹ Topẽ tỹ nén han sór mũ ẽn kãmén kỹ. Tag tugrĩn sóg se kỹ jẽ.

1 Timóteo 3:16

Ha vé, Topẽ tỹ ũri ẽg mỹ nén tó mũ tag vỹ tỹ nén ũ há tãvĩ nĩ. Vãsỹ ag tóg mẽ ja tũ nĩ. Ti jykren hã vẽ, ha mẽ: Jesus Cristo vỹ ẽg ri ke mur, ga kri, kỹ Topẽ tóg ti tỹ ũn mág han, tá, ti tỹ jykre kuryj nĩn kỹ. Kỹ tóg ti tỹ jẽgnẽ jafã ag mỹ ti ven. Kỹ ti mré mũ tĩ ag vỹ povo kar mỹ ti tó. Hã kỹ ga kri mũ ag vỹ ti ki ge mũ, Ẽg tỹ Jesus kãmén hã vẽ.

1 Timóteo 3:6

Ũ tỹ Jesus ki rã tãg tóg tỹ, kófa jẽnh ke tũ nĩ ver. Ke tũ nĩ mũ ra tóg inh mỹ ti tỹ: “tỹ sóg ũn mág nĩ,” henh ha mẽ tĩ. Kỹ tóg inh mỹ ti tỹ Japo jykre han ha mẽ tĩ, Japo tỹ ti krĩn kỹ.

1 Timóteo 3:9

Topẽ vỹ ẽg mỹ vẽnh vĩ jẽnẽ, ẽg tỹ ti ki ge jé, ẽg tỹ ti vĩ tag to krónh ke tũ nĩ jé, ẽg tỹ ẽg fe kavénh tũ nĩ jé gé. Ag tỹ ti vĩ tag to tar nỹtĩnh ke vẽ.

Tito 1:7

Ha vé, ũ tỹ tỹ igreja to kófa jẽ sór kỹ tóg tỹ ũn jykre há nĩnh mũ. Ti tỹ ti mré ke ag to: “ag kãfór vỹ tỹ inh nĩ,” henh ke tũ vẽ. Ũn fe tỹ gỹm ke (ka)mẽ vỹ há tũ nĩ, ũ tỹ vinho kron (ka)mẽ ti, ũn jũ (ka)mẽ ti. Kỹ tóg ti tỹ riko nĩnh ke hã to én ke tũ nĩ gé.

1 Pedro 4:10

Kỹ Topẽ vỹ ẽg tar han tĩ. Ũ tóg nén ũ to tar nĩ. Jãvo ũ tóg nén ũ ũ to tar nĩgtĩ gé. Ãjag tỹ nén ũ to tar nỹtĩ ẽn hã ki rĩrm nĩ, vẽnh kar tỹ ãjag tugrĩn tar nỹtĩ jé. Tag vỹ Topẽ mỹ há nĩ.