2 तिमुथियुस 2:18 - बिलासपुरी नौआं नियम

¹⁸ तिन्हेंजे सच्चाईया जो छड्डीतरा, सै बोलां ये भई मूईरयां चते जिऊंदा हूणा हुई चुक्कीरा, कने सै किछ विश्वासियां रे विश्वासा जो नाश करी राँये।

2 तिमुथियुस 2:18 Iomraidhean Croise

मत्ती 15:13

यीशुये जबाब दित्या, “मेरे स्वर्गीय पिता तिन्हां सब्बीं जो लग करी देणा सै जे तिसरियां गल्लां ते बखरी शिक्षा दें।

मत्ती 22:29

यीशुये तिन्हाजो जबाब दित्या, “तुहें पवित्रशास्त्रा कने परमेशरा रिया सामर्था जो नीं जाणदे; इसा वजह ने तुहें भूला च पैईरे।

लूका 8:13

किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये। पर वचन तिन्हांरे दिलां री गहराईया तक नीं जान्दा, काँह्भई सै सिर्फ थोड़े इ वगता तक विश्वास कराँ ये; सै तिन्हां पौध्यां साई ये तिन्हांरियां जड़ां जे डुग्गियां नीं हुन्दियां। ताहली जे परमेशरा रे सन्देशा पर विश्वास करने रिया वजह ने तिन्हां पर दुख कने तकलीफां औईयां, तां सै विश्वासा ते भटकीने पाप कराँ ये।

प्रेरितां 5:39

पर जे परमेशरा खा ते हये, तां तुहें इन्हांजो कदीं मनी खत्म करी सकदे। किति येढ़ा नीं हो भई तुहें परमेशरा ने बी लड़ने औल़े बणो।”

1 कुरिन्थियों 11:19

पर बटवारा बी तुहां च जरूर हुंगा, इस खातर भई सै लोक जे तुहां च खरे निकली रे सै सामणे आई जाओ!

1 कुरिन्थियों 15:12

हुण जे मसीह रा ये प्रचार कित्या जां, भई मसीह मूईरयां चते ज्यूंदा हुईरा, तां तुहां चते कितणे कियां बोल्ली सक्कां ये, भई मूईरयां रा भीं ते जिऊंदा हूणा इ नींआ?

कुलुस्सियां 3:1

काँह्भई परमेशरे तुहांजो मसीह ने सौगी मूईरयां चा ते जिऊंदा करीने खड़ा कित्या, तां तिन्हां चिज़ां रे खातर कोशिश करदे रौआ, सै जे स्वर्गा च मौजूद इयां तित्थी जे मसीह परमेशरा रे सज्जे पास्से बैठिरा।

1 तिमुथियुस 1:19

कने तिज्जो मसीह पर लगातार विश्वास करना चाहिन्दा कने तू सैई कर सै जे तू जाणाँ भई ये सही आ। किछ लोकें इस पर ध्यान नीं दित्या तिसरा नतीजा जे ये हुया भई हुण सै मसीह पर विश्वास नीं करदे।

1 तिमुथियुस 6:10

काँह्भई पैसे रा लालच सारियां बुराँईयां री जड़ इ, किछ लोक तिस्सो पाणे रे खातर कोशिश करदे हुये विश्वासा ते भटकी चुक्कीरे कने तिन्हें अप्पूँजो कई तरीकयां ने दुखां च पाईलरा।

1 तिमुथियुस 6:21

काँह्भई किछ लोक इसजो ग्रहण करीने विश्वासा ते भटकी गरे। तुहां सब्बीं पर परमेशरा रा अनुग्रह हुन्दा रौ।

2 तिमुथियुस 2:14

विश्वासियां जो इन्हां गल्लां री याद दिलान्दा रै कने तिन्हांजो परमेशरा रिया हजूरिया च चेतावनी दे भई सै शब्दां जो लईने झगड़ा नीं करो इसते कोई फायदा नीं हुन्दा, पर इसजो सुणने औल़े नाश हुई जांये।

तीतुस 1:11

इन्हां लोकां जो शिक्षा देणे खातर इजाज़त मत देआं, काँह्भई ये लोक नीच कमाईया खातर गल़त गल्लां सखाई ने पूरे परिवारा रे विश्वासा जो बगाड़ी देआंये।

इब्रानियों 3:10

इस वजह ते हऊँ तिन्हां लोकां ते गुस्से था, कने गलाया, इन्हांरे मन सदा भटकदे रैं, कने इन्हें मेरे हुक्मा रा पालन करने ते इन्कार कित्या।

याकूब 5:19

हे मेरे साथी विश्वासियो, तुहां चते जे कोई सच्चाईया ते भटकी जाओ कने तिस्सो कोई भीं मोड़ी ने रस्ते पर ली औआं,

1 यूहन्ना 2:19

सै मसीह रा बरोध करने औल़े अहांरा साथ छड्डी ने चली गरे, पर सै अहांरे अपणे नीं थे। जे सै अहांरे अपणे हुन्दे, तां अहांने सौगी रैहन्दे। पर सै अहांजो छड्डी गरे ताकि परमेशर अहांजो ये दस्सी सक्को भई तिन्हां चते कोई बी अहांरा निआं।