2 थिस्सलुनीकियां 2:2 - बिलासपुरी नौआं नियम

² तुहें सानिया ने किसी भविष्यवाणी, किसी उपदेश यनि किसी येढ़िया चिट्ठिया ते अपणे मना च दुखी नीं हुयां कने मत डरयां तिसाजो जे अहांरे जरिये लिखिरा समझया जान्दा हो कने तिसच जे इस तरिके ने दस्या गया हो भई प्रभुये रे औणे रा दिन आई चुक्कीरा।

2 थिस्सलुनीकियां 2:2 Iomraidhean Croise

मत्ती 24:24

“काँह्भई झूट्ठे मसीह कने झूट्ठे भविष्यवक्ते उट्ठीने आई जाणे, कने बड़े हैरान करने औल़े नशाण दसणे, कने अजीब काम्म करने, भई जे हुई सक्को तां चुणी रयां जो बी चकमा देई दो।

मरकुस 13:7

कने तंजे तुहें लड़ाईयां, कने लड़ाईयां री चर्चा सुणो, तां घबरान्दे देखां; काँह्भई इन्हांरा हूणा जरूरी आ, पर तिस वगत संसारा रा अन्त नीं हूणा।

लूका 21:19

जे तुहें सब्र रखीने विश्वासा च बणीरे रैहन्गे तां तुहां सदा जीवित रैहणा।

लूका 21:9

कने ताहली जे तुहें लड़ाईयां कने दंगयां री चर्चा सुणो, तां डरी नीं जायों; काँह्भई इन्हां गल्लां रा पैहले हूणा जरूरी आ; पर तिस बगत इकदम अंत नीं हूणा।”

यूहन्ना 14:1

“तुहांरे दिल दुखी नीं हो, परमेशरा पर विश्वास रखा कने मेरे पर बी विश्वास रखा।

यूहन्ना 14:27

हऊँ तुहांजो शान्ति देआं, तेढ़ी नीं, तिस तरिके री जे संसार देआं; पर हऊँ तुहांजो अपणी शान्ति देआं तिसते जे तुहांरा मन नांत घबराओ कने न डरो।

1 कुरिन्थियों 1:8

तिस तुहांजो आखिर तक मजबूत रखणा ताकि तुहें अहांरे प्रभु यीशु मसीह रे दिन निर्दोष हुन्गे।

1 कुरिन्थियों 14:32

कने भविष्यवक्तयां री आत्मा भविष्यवक्तयां रे वशा ची।

1 कुरिन्थियों 7:26

हऊँ समझां भई अजके कलेशा रिया वजह ने माहणुये रे खातर ये अच्छा भई सै तेढ़ा जे हया तेढ़ा इ रौ।

इफिसियां 5:6

कोई तुहौं बेकार गल्ला ने धोखा नीं देओ, काँह्भई इन्हां गल्लां रिया वजह नेई परमेशरा रा गुस्सा आज्ञा नीं मनणे औल़या लोकां पर भड़कां।

1 थिस्सलुनीकियां 3:3

ताकि कोई अजकयां इन्हां कलेशां रिया वजह ने विचलित नीं हुई जाओ। काँह्भई तुहें त जाणाँ इ हाये भई अहांजो त कल़ेशां रेई खातर भेज्जिरा।

1 थिस्सलुनीकियां 4:15

काँह्भई अहें प्रभु यीशुये रे वचना रे मुतावक तुहांजो येढ़ा बोलां ये भई अहें त जिऊंदा ये कने प्रभु यीशुये रे वापस औणे तक बची रयां रैहणा, तां पक्का सै तिन्हां विश्वासियां ते पैहले तिसने नीं मिलणे सै जे पहले मरी चुक्कीरे।

1 थिस्सलुनीकियां 5:2

काँह्भई तुहें खुद जाणाँ ये भई तियां जे राति जो चोर औआं, तियां इ प्रभु यीशुये रे वापस औणे रा दिन औणे औल़ा।

2 थिस्सलुनीकियां 2:15

इस खातर अरे साथी विश्वासियो, मजबूत रौआ; कने सै शिक्षां जे तुहें वचना ते या चिट्ठियां रे जरिये अहांते सिखियां तिन्हां पर लगातार विश्वास करदे रौआ।

2 थिस्सलुनीकियां 3:17

हऊँ, पौलुस, अपणे हत्था ते ये नमस्कार लिखां। हरेक चिट्ठिया च हऊँ इस तरिके ने लिखां, ताकि सारे लोक जाणी सक्को भई ये चिट्ठी मेरिया तरफा तेई।

प्रकाशितवाक्य 19:20

सै पशु कने झूट्ठे भविष्यवक्ते जो सै जे तिसरे सामणे येढ़े नशाण दस्से थे, तिन्हांरे जरिये तिने तिन्हांजो भरमाया, तिन्हां पर जे पशुये री छाप थी, कने सै जे तिसरी मूर्तियां री पूजा कराँ थे। इन्हां दुईं जो जीते जी तिसा अग्गी रिया झीला च, सै जे गन्धका ने जल़ां इ, पाये गये।