इपीसी 4:11 - Korwa Bible

¹¹ दो मसी, कलसियारिकुःआ होड़कू सेवा लगाय एमेकेरा हना दहिनकून नाःआ इया इदा। तोनोंग तोनोंग होड़कू ईसूरिकुःआ मूक चेलाकू होयाः लगा, तोनोंग तोनोंग होड़कू भगवानराः बड़रा कता होड़कू होयाः लगा, तोनोंग तोनोंग होड़कू नपाय सरवन परसार उदुः होड़कू होयाः लगा, तोनोंग तोनोंग होड़कू कलसियारिकुःआ अगुवा होड़कू बड़ाँः लगा अरू तोनोंग तोनोंग होड़कू चेडदार होड़कू होयाः लगाय जिमाकेडकुःआ।

इपीसी 4:11 Iomraidhean Croise

मती ओजाःतेरा भगवानराः नपाय सरवन 28:20

ईंग अपेयिंग हुकुमवारा हना जमा कताकून मनाः लगा हँकूपे चेडकू। अयुमेपे, नाःआ जूग अरीन टुटीगगुः वरी, ईंग सगर सइट अपे सुदायिंग दोहोनता।”

मूक चेलाकू 13:1

अंतकियाराः कलसियारे तोनोंग तोनोंग भगवानराः बड़रा कता होड़कू अरू चेडदार होड़कू होंकू दोहोना। हँकूराः ञाव दोहोना बरनाबास, निगर माःआन एटाः ञाव दोहोना हाँयग सिमोन, कुरेनरीग लुकियूस, हरदोस सुदा मिनी सउंगताकिन दोहोना हाँयग मनाहेम अरू साहूल।

मूक चेलाकू 20:28

हनालगा अपे अँननपेराः जीवपे अगुरागे अरू अपेराः आड़रे इदानकुःआ हँकुःआ होड़कू होँपे तिहाकू। भगवान अनँयग बेटातराः बलंगीतेय किजाकेडकुःआ भगवानराः कलसियारिकुःआ होड़कू नपाय अगुवा होड़कू इयापे तिहाकू।

मूक चेलाकू 21:8

एटाः दिन अले कइसरियाले सोदोरनेना अरू भगवानराः नपाय सरवन परसारीग होड़ पिलिपराः ओड़ाःरेले दोहोना। हाँय एरुसलेमरे ईसूरिकुःआ मूक चेलाकू संघरा एमेवा लगाय सुनावतेडकुःआ हँकुःआ सातगोटोंग सेवकियाकू अते मी होड़े दोहोना।

रूमी 12:7

तोनोंगीग होड़कू सेवा लगा दहिने पवावकियान दो हाँय नपायतेय सेवागोड ञवन, अरू तोनोंगीग चेडकू लगा दहिने पवावकियान दो हाँय नपायतेय चेडगोड ञवन।

1 कुरिंती 12:4

दहिनकून एटाः एटाः बरानाः इदा। मनदो नाःआ जमाकून मिनीटोंग सुद बिरुवा एमेयता।

इपीसी 2:20

अरू अबू हना ओड़ाःराः फड़ा इयाबू बड़ाँवयना। इनीसू मसी हना ओड़ाः तलाराः बड़ियाड़ खुंटा इया इदानिया अरू मूक चेलाकू अरू भगवानराः बड़रा कता होड़कू, ओड़ाःराः धरी खुंटाकून इया इदानकुःआ।

इपीसी 3:5

भगवान नाःआ कता मनाड़ंग जूगरिकुःआ तोनोंगीग होड़ एचेरे मेरेय एचे उदुःगाड। मनदो नुँहू सुद बिरुवाते भगवानरिकुःआ बड़रा कता होड़कू अरू सुद मूक चेलाकू एचेरेय एचे उदुःगोतेडा।

इपीसी 4:8

भगवानराः कागदरे नाःआ इया ओजाःतो इदा, हाँय अनँयगराः उनुसूल ततेररेय रकबयान, अरू तोलतो होड़कू गुतु गुतुय गोःयाडकुःआ। अरू अनँयगरिकुःआ होड़कू लगा दहिनकूने एमेवाडकुःआ।

2 तिमुतियूस 4:5

मनदो तिमुतियूस, जमा बेला ओंगोल समझाव घड़ीन कटसिया सहावकेडखन नपाय सरवन परसारराः बुताम बुता अरू भगवानराः सेवाम सेवा पुराव।

इबरानी 5:12

नाःआमिन दिन वरीते अपे चेडदारकूपे बड़ाँव जुवाःकुःआ, मनदो भगवानराः सरवनराः रिता-रिता कताकून हों तोनोंगीग नुँहू वरी अपेके अरू चेचेड पराःतना। अपे केटेग जिनिस जोम जुकूरपे होया जुवाःकुःआ, मनदो नुँहू वरी दुनूदपे ञूगोड ञवनतना।

जूदा 1:17

मनदो ईंग अजी बोपोहकूतिंग, अबूरीग परबू ईसू मसीरिकुःआ मूक चेलाकू, मड़ंगरेकू कता उदुःतेरा हना कतापे उहियारगोड ञवन।

उदुःतो कताकून 18:20

ने सेरमो देसरिकुःआ, अरू भगवानरिकुःआ सुद होड़कू, ईसूरिकुःआ मूक चेलाकू अरू भगवानराः बड़रा कता होड़कू, हाँय अपे सुदाय एचेतेरा, हनन इया भगवान हँकूय एमे बदलावारा। हनालगा अपे बनाहालतेपे दोहोन।”

उदुःतो कताकून 21:14

हना सहरराः हता बारहगोटोंग नेवरे तुलात दोहोना। अरू हना मेमेडटोंग नेवरे हाँयग भेड़ा होनरिकुःआ बारहगोटोंग मूक चेलाकूराः ञाव ओजाःतो दोहोना।