1 तिमुतियूस 3:16 - Korwa Bible

¹⁶ अरूबू कबुलाःता हना बिसवास मुरुक गहीर सताय इदा। होड़कूराः सुरइत मुरइतरेय जनमावनेना, बेगर गारबारते इदानिया माःआन सुद बिरुवा कता उदुःतेरा सेरमो देसरिकुःआ बराहीलकू हाँयकू ञेलतेरा, होड़कू हाँय बदीरे जमा जइत होड़कू एचेरेकू परसार उदुःतेरा, चउंदीसरिकुःआ होड़कू हाँय एचेरेकू बिसवासतेरा, अरू मान मरजइत सुदा सेरमो देस अगी भगवान रेम गोःयडिया।

1 तिमुतियूस 3:16 Iomraidhean Croise

मती ओजाःतेरा भगवानराः नपाय सरवन 1:23

“मी होड़ डिंडा धंगड़ी भरी-पाव जुवाःता, अरू हाँय मी होड़ हेरेल होने हेवेगेयता। अरू हाँयराः ञाव दोहोनता, इमानुएल।” अरू हनाराः मतलोब नाःआ हवे, भगवान अबू सुदा इदानिया, माःआन।

मती ओजाःतेरा भगवानराः नपाय सरवन 13:11

दो ईसू कतातेड, “भगवानराः राइजराः ओकोत कताकून सुदी लगा अपे लगा भगवान कनहूने एमेकेरा, मनदो हँकुःआ होड़कू लगा कोवान।

मती ओजाःतेरा भगवानराः नपाय सरवन 28:2

दो ओहेन हंडा ओत मुरुक डोलाःआ अरू सेरमो देस अते परबू भगवानरीग बराहील मड़गट अगीय उतराव वेजेडा। अरू हना मरंग दिरि, दुवारते कोलोंग चलाःतेडखन हना दिरि चोटरेय दुड़ुःयान।

मती ओजाःतेरा भगवानराः नपाय सरवन 3:16

ईसू बतिसमा गोःतेडखन दाः अतेय उडुंगगुः मेला सेरमो देस गीगयान अरू भगवानराः बिरुवा, पेरवाँ तितीग इया ईसू चोटरे उतराव वेगनेना, हना अनँयग ञेलतेरा।

मती ओजाःतेरा भगवानराः नपाय सरवन 4:11

हनते हाँयग कलउ ईसूय अड़ाःगोतेडीग अरू ओहेन सेरमो देसरिकुःआ बराहीलकू ईसू एचेरे वेजेडखनकू सेवातिरिया।

मरकूस 1:13

हंडा हाँय चालीस दिने दोहोना अरू कलउ ईसूय अंदजावतेरा। ईसू हना ततेररे पहाड़ जानरकू सुदाय दोहोना। मनदो सेरमो देसरिकुःआ बराहीलकू ईसूकू सेवागोड ञवना।

मरकूस 16:19

दो परबू ईसू हँकू सुदा बड़रानेन तयोमरे सेरमो देस अगी भगवान रेम गोःयाडीग अरू आँयग खउना तिःई गतररेय दुड़ुःयना।

मरकूस 16:5

मड़गट लात पेंदारेकू बोलोनेन दो हंडा मी होड़ डिंघा उजड़ सोनहे तुसिंगतो खउना गतर दुड़ुःतोकू ञेलतिरिया अरू मुरुककू बयावयान।

लूका 2:32

नाँय बेगर एहूदाकू एचेरे भगवानराः दूर उदुःवाकू लगा मरसल इयाय होयाःता, अरू नाँय अते इसराएल होड़कूके मान मरजइत होयाःता।”

लूका 20:44

दाऊद राजा हों हाँय परबू माःआने कतावायता दो हाँय करा इया दाऊदरीग नइड़-बाँस होड़े होयाः?”

लूका 22:43

हनते मीटोंग सेरमो देसरीग बराहील ईसू एचेरेय एचे ञेलयान अरू हाँये बड़ियाड़ा।

लूका 24:4

हँकुःआ अइमीकू बोरोनेनखनकू बयावयान। दो हनमेला असाका, टेडेगतो सोनहे तुसिंगतो बार होड़ होड़किन हँकू मड़ंगरेकिन चड़ाँयान।

लूका 24:51

हनन इया एचेकेडखन ईसू हँकूय पइड़घावतेरा अरू हँकू ञेनेल ञेला मेला, हाँय सेरमो देस अगी भगवान रेम गोःयाडीग।

एहुना 1:14

दो हना सरवन मनुवाराः सुरइत मुरइतरे होड़कू तलारेय डेरानेना। हाँय अपांग भगवानरीग मिनी होड़ बेटात इदानिया अरू अबू हाँय तुमिन मरंग इदानिया हनाबू ञेलतेरा। हाँयराः जीवरे जनामा सतायते अरू मयाते पेरेगतो दोहोना।

एहुना 13:3

अपांग जमाकूनराः हातपात ईंग एचेरेय जिमाकेरा अरू ईंग भगवान अतेयिंग वेगकिया अरू भगवान एचेरेयिंग कुदा सेनता माःआन ईसू सुदीकेडखन,

एहुना 15:26

मनदो संघरादार, ईंग अपांग अगीते अपे एचेरेयिंग वारेयता, हाँय अपे एचेरेय वेग मेला ईंग बदीरेय कता उदुःगेता। हाँय भगवान अगीतेय वेगता हान सतायराः बिरुवा हवे।

एहुना 16:28

ईंग अपांग अगीते नाःआ चउंदीसरेयिंग वेगकिया। ईंग नाःआ चउंदीस अड़ाःकेडखन ईंग अपांग एचेरे अरूयिंग सेनता।”

एहुना 17:5

दो ने अपांग, चउंदीसमे तुला अते मड़ंगरे ईंग आम सुदायिंग दोहोना, हनन मेलाःआ मान मरजइत नुँहू एमेवायिंगमे।

एहुना 20:12

दो हंडा उजड़ सोनहे तुसिंगतो बार होड़ सेरमो देसरिकिनाः बराहीलकिन, ईसूराः मुरदाकू मंडावतेरा हंडा मी होड़ बोः अगी अरू मी होड़ काट अगी दुड़ुःतोकिन दोहोना।

एहुना 6:62

अपे मनुवारीग बेटात सेरमो देस अगी देगतोपे ञेलेय दो करजुःतापे?

मूक चेलाकू 1:19

एरुसलेमरिकुःआ जमा होड़कू नाःआ कताकू अयूमतेरा। हनालगा हँकू अँकू भासीरे हना दोहोड़ अकलदामा माःआनकू कतावातेरा। हना लबदराः मतलोब बलंगीराः दोहोड़ माःआन हवे।)

मूक चेलाकू 10:34

हनते पतरस परसारगे लगाय बुँहड़ीतेरा, “नुँहूयिंग सुदीकेरा भगवान तोनोंगीग होड़ एचेरे मेरेय पाचपटीता,

मूक चेलाकू 14:27

हंडाकिन सोदोरनेन दो हँकिन जमा बिसवासी होड़कूकिन एचे जुमावतेडकुःआ अरू हँकिनते भगवान एचेतेरा अरू भगवान बेगर एहूदाकू ईसू एचेरे करा उड़ीकू बिसवासतेरा हना जमाकूनकिन कता उदुःतेरा।

मूक चेलाकू 20:28

हनालगा अपे अँननपेराः जीवपे अगुरागे अरू अपेराः आड़रे इदानकुःआ हँकुःआ होड़कू होँपे तिहाकू। भगवान अनँयग बेटातराः बलंगीतेय किजाकेडकुःआ भगवानराः कलसियारिकुःआ होड़कू नपाय अगुवा होड़कू इयापे तिहाकू।

रूमी 10:12

भगवानराः ओंगोलरे एहूदाकू अरू बेगर एहूदाकू जमाकू मिनी इदानकुःआ, अरू तोनोंगीग एटाः कोवाकुःआ। जमाकू लगा मिनीटोंग परबू इदानिया अरू हाँय एचेरेकू अरजीता, हँकुःआ होड़कू मिनी जीवकियानखने सडावकूता।

रूमी 10:18

मनदो ईंग होंबरेतना, हँकू सरवन मेरकू अयूमगाड जा? हाव, अयूमकेराकू। “हँकूराः अरो जमा चउंदीसरिकुःआ होड़कू अयूमकेरा, अरू हँकूराः सरवन जमा चउंदीसरे सेड़यावयना।”

रूमी 16:25

भगवानराः जाग होयाः। हाँय ईसू मसीराः नपाय सरवन ईंग अरू एटाःकू परसारकेड अते अपेराः जीव बिसवासरेय एचे बड़ियाड़ अवेपेता। नाःआ नपाय सरवन मड़ंग जूग वरीते जमा जइत होड़कू लगा ओकोत इया दोहोना।

रूमी 16:26

मनदो नुँहू हना सरवन भगवान अनँयगराः बड़रा कता होड़कूते अरू सगर सइट वरीय दोहोनता हाँयग भगवानराः हुकुमते जमा जइत होड़कू एचेरेय एचे उदुःवाडकुःआ, जेमहा जमा होड़कू हाँय एचेरे बिसवासकेडखन हाँयराः हुकुम मनाः होड़कूकू बड़ाँव जुवाः।

रूमी 3:4

नाःआ इया कहियो ओरो होयानेना। जमा होड़कू लबराकू बड़ाँव जुवाःता हों, भगवानराः कागदरे ओजाःतो इदा हनन इया, हाँय सनाताये दोहोनता। “ने परबू, आमराः जमा कताकून सनाताय इदा, अरू होड़कू आमकू फड़ियाव हों आम जितावबाः जुवाःताम।”

रूमी 8:3

दो अबू मोसेसराः नियमकून जमालेःआ मनाः लगाबू कुरनिसगे। हनते हों अबूराः कसूर लूर-नेवन मेर टुटीगगुःता। मनदो भगवान अबूय सडाव अवेता। हनालगा जमा होड़कूराः कसूर बराव एंडागे लगा, हाँय अनँयगरीग मिनी होड़ बेटात ईसू मसी, कसूरतो मनुवाराः सुरइत मुरइतरे, नाःआ चउंदीसरेय वारगोतेडीग। हनते हाँय जमाकूराः कसूर लगा डंडियावतेडखन ईसूय एचे बलिदानगोतेडीग।

रूमी 9:5

इबराहीम, इसहाक अरू एकूब हँकूरिकुःआ खुटिपरिया होड़कू हवे अरू जमाकूरीग भगवान ईसू मसी होड़राः सुरइत मुरइतरे, हँकूरीग नइड़-बाँस होड़तेय जनमावनेना। सगर सइट होड़कू हाँयकू जागगोड ञवन। आमीन!

1 कुरिंती 15:47

भगवान मड़ंगीग मनुवा आदम हासतेय तुलातिडिया, मनदो एटाःयीग मनुवा, ईसू सेरमो देसरीग भगवान अगीतेय वेगनेना।

1 कुरिंती 2:7

मनदो अले, चउंदीस बुँहड़ीन अते मनाड़ंग अबूराः मान मरजइत होयाः लगा, भगवान ओंगोल दोहोकेरा हनानाः ओकोत कनहूनले परसार उदुःगेतना।

2 कुरिंती 1:19

दो ईंग अरू सिलवानूस अरू तिमुतियूस अपे एचेरेले परसारतेरा हाँयग भगवानरीग बेटात ईसू मसी बार जीवकियानखन हाव अरू ओरो मेरेय कतायता, मनदो हाँय जमा बेला हनाव हावे कतायता।

गलातिया 2:8

एहूदाकू एचेरे मूक चेलाराः सेवागे लगा भगवान पतरसे वारकेरा। अरू हनाँयग भगवान बेगर एहूदाकू एचेरे मूक चेलाराः सेवागे लगा ईंग होंय वारकेरा।

गलातिया 4:4

मनदो भगवान तोल दोहोतेरा हना बेलारे हाँय अनँयग बेटात नाःआ चउंदीसरेय वारतिरिया अरू हाँय मी होड़ अइमी एचेरेय जनमावनेना अरू नियम मनाः घड़ीने दोहोना।

इपीसी 1:9

भगवान अनँयगराः ननपाय ओंगोल इया ईसू मसीते एचेय लगाय ओंगोल दोहोतेरा अनँयगराः ओकोत दोहोना हनानाः हिछा अबूय एचे सुदीकेडबुःआ।

इपीसी 6:19

ईंग भगवानराः नपाय सरवन कताय मेला, डीड़ते हना सरवनराः ओकोत कताकूनिंग कता अवे लगा, ईंग लगा होँपे अरजी।

कुलूसी 1:23

मनदो मसीरे अपेराः बिसवास निठा अरू बनड़ियाड़गोड ञवन लगा इदा। अरू नपाय सरवनतेपे पवावकिया, हना असरा अपे अहापे अड़गे। अपे अयूमकेरा हनानाः नपाय सरवन चउंदीसरिकुःआ मुरुक होड़कू होंकू अयूमकेरा। अरू ईंग पउलूस ननानाः सरवन परसारगे लगा भगवानरीग सेवकिया होड़िंग बड़ाँवनेना।

कुलूसी 1:27

अरू बेगर एहूदाकू एचेरे हों भगवानराः अगम नपाय बुइद, उदुःवाकू लगा भगवान ओंगोल दोहोतेरा। हना बुइद नाःआ हवे; मसी अबू जीवरेय दोहोनता अरू हनाते ओरो टुटीगनेना हना जीवराः असराबू पनावावकिया।

कुलूसी 1:6

अपे भगवानराः सरवनपे अयूमकेरा, अरू जमालेःआ सतायते हाँयराः मयापे बुझावकिया, अरू हना वरीते अपेराः जीवरे नफा होयाकिया। ननन इया नाःआ नपाय सरवन, चउंदीसरिकुःआ जमा होड़कू एचेरे सेड़यावयना, अरू हँकू लगा हों नफा होया ञवनतना।

कुलूसी 2:2

हँकूराः जीव हड़ियाड़कियानखन अलार-दुलारते मिनी जुमूटगे लगायिंग चहाःतना, जेमहा भगवानराः ओकोत बुइद, ईसू मसी बदीरे, नपायते बुझावकियानखनकू सुनुदीबाःगे।

2 तिसलूनिका 1:10

ईसू मसी अनँयग एचेरेकू बिसवासकेरा अरू सुद इदानकुःआ हँकुःआ होड़कू एचेरे मान मरजइत जुवाः लगा, अरूकू बयाव जुवाः लगाय कुदा वेगता हना दिन, नाःआ जमाकून होयाःता। अरू अपे अलेराः हिदइतरेपे बिसवासकेरा। हनलगा अपे हों हना गउदारेपे दोहोनता।

2 तिसलूनिका 2:7

नुँहू वरी होड़कू सोटो बोटो होड़ेंगतनाकू अरू हँकू भगवान मेरकू मनवेयतना। रोरोंकावीग दोहोन वरी हाँयग रबूद होड़ रोनोंकावतोय दोहोनता। मनदो रोरोंकावीग चलाः जुवाः दो,

1 तिमुतियूस 3:9

भगवान अबूय उदुःवातेरा हना बिसवास बदीराः सताय चेडतो हँकुःआ होड़कू नपाय इंदरीतेकू बिसवास हड़ाःगे लगा इदा।

इबरानी 1:3

भगवान तुमिन मरंग इदानिया हना हाँयग बेटात उदुःगेता अरू हाँय सिरामइत भगवान बरोबइर इदानिया। हाँय जमा जिया-जइतकून अनँयगराः अगम जंगर सरवनतेय संभाड़गोड ञवनता। हाँय होड़कूराः कसूर बराव एंडाकेडखन सेरमो देसरे इदानिया हाँयग मरंग भगवानराः खउना गतररे हातपात सुदाय दुड़ुःयना।

इबरानी 12:2

अबूराः बिसवासे बुँहड़ीता अरूय उडु-बुडूगेता, हाँयग ईसू अगी सिरढीटबू ञेलगोड ञवन। हाँय कुरूसराः गुजुः बदीरे एचे बेग-हतान लगा मेरेय ओंगोल एरंगगान, मनदो हाँय दरवाःआ हना बहालराः कताकून लगा हना कटसियाय सहावतेरा। अरू हना तयोमते भगवानराः गदीराः खउना तिःई गतर हाँय दुड़ुःकिया।

इबरानी 7:7

मरंगीग होड़ हुडिंगीग होड़ भलावातेडखने कतायता, आमराः जीव-जहनकून नपाय जुवाः, माःआन। नाःआ कता बदीरे अबूके तोनोंगाः जाः कोवानेःआ।

इबरानी 8:1

दो मनइद कता ननानाः हवे। अबू लगा सेरमो देसरे भगवानराः खउना तिःई गतररे दुड़ुःतो मरंग मूक पुजउरी ईसू हवे।

1 पतरस 1:12

हँकू अँननकूराः नफा लगा कोवान, मनदो नपाय सरवनकू अयुमेता हँकुःआ होड़कू लगाकू सेवाःआ, माःआन भगवान हँकूय एचे सुदीवातेडकुःआ। अरू नाःआ बेलारे, भगवान सेरमो देस अतेय वारकेरा हाँयग सुद बिरुवाराः जंगरते पपरसार होड़कू अपे एचेरे, सेरमो देसरिकुःआ बराहीलकू हों बुझाः लगाकू तरसाःतना, हना नपाय सरवनकू परसारकेरा।

1 पतरस 1:20

भगवान चउंदीस तुला अते मड़ंग, ईसू मसीय सुनाव दोहोतिरिया, मनदो चउंदीस टुटीगगुःता हना अते मड़ंग दिनरे, अपे लगा भगवान हाँये उदुःवातेडपेःआ।

1 पतरस 1:21

भगवान ईसू मसी गोएगतो होड़कू अते जियाव रेमकेडखने मान मरजइतकिडिया, जेमहा अपेराः बिसवास अरू असरा, भगवान एचेरे टक-टकावतो दोहोन।

1 पतरस 3:18

भगवानराः ओंगोलरे अबू बेगर गारबार होड़कूय बड़ाँवबू लगा, बेगर गारबारीग इनीसू मसी मिनी जूदा अबू जमा कसूर होड़कू लगा, कटसिया सहावतेडखने गोएगनेना। हाँय देनेह देहरेय गोएगनेना मनदो भगवान हाँयराः बिरुवाय जियाव रेमगोतेडा।

1 पतरस 3:22

दो ईसू मसी सेरमो देस अगी तोराया अरू नुँहू हाँय भगवानराः खउना तिःई गतररेय दुड़ुःकिया। सेरमो देसरिकुःआ बराहीलकू अरू जमा हातपातदारकू अरू अबू मेरबू ञेल अवेकूता हँकुःआ जंगरदार भूतकू, हँकू जमाकू हाँयराः आड़रेकू सलाःतना।

1 एहुना 1:2

अरू हनानाः जीव अनँयग आँयगते एचे ञेलयान अरूले ञेलतेरा अरू हिदइतदारकूले बड़ाँवयना। नननलगा अपात भगवान सुदा दोहोना, अरू नुँहू अबू लगा एचे ञेलकेरा ओरो टुटीगनेना हना जीव बदीरे अपे एचेरेले कतायतना।

1 एहुना 3:5

अपे सुदीयतना ईसू मसी अबूराः कसूर चलाःगे लगा नाःआ चउंदीसरेय वेजेडा अरू हाँय एचेरे तोनोंगाः कसूर कोवानेःआ।

1 एहुना 3:8

कलउ दो मनाड़ंग जूग वरीतेय कसूरगोड ञवानतना। नानलगा कसूरगेता हँकुःआ होड़कू कलउरिकुःआ होड़कू हवे। अरू भगवानरीग बेटात कलउराः जमा बुता लाय एनेंडागे लगा चउंदीसरेय वेजेडा।

उदुःतो कताकून 17:5

अरू हाँयराः समांगरे नाःआ ओकोत इयाःआ ञाव ओजाःतो दोहोना, मरंग सहर बाबील, जमा चउंदीसरिकुःआ सनही अइमीकूरीग एंगात अरू जमा बरानाः एरंगवाताकू हना जिनिसकूनराः सूती।

उदुःतो कताकून 17:7

हनते हाँयग बराहील ईंग एचेरेय होंबोरतेरा, “आम चिला लगाम बयावयना? सातगोटोंग बोः अरू दसगोटोंग देरेंग इदा हाँयग जानर बदीराः अरू, हाँय चोटरे दुड़ुःतो इदानिया हाँयग अइमी बदीराः ओकोत कता, ईंग एचे बुझावगोडमेता।

उदुःतो कताकून 7:9

हनते ईंग मुरुक बगरा होड़कूयिंग ञेलतेरा। हँकू तोनोंगीग ओरोय गँड़ाव अवेकेकुःआ। हँकू जमा जइतरिकुःआ, अरू जमा गोतोररिकुःआ, अरू जमा राइजरिकुःआ, अरू जमा भासीरिकुःआ होड़कू दोहोना। हँकू उजड़ सोनहेकू तुसिंगतेरा अरू किताराः डइड़ साबतेडखन गदी अरू भेड़ा होन मड़ंगरेकू चड़ाँकुःआ।