EFESIŊ 4:1 - JAA TƏMARWAŊ

¹ Bədoona ta, ten bə minti a daŋgaya gud joŋre kə Barkaŋaŋ, ten bə jəŋ kamkama minti: ɗe dəŋ jəə la bə tapə-tepe də mante bə minti Pepeŋ mantənaŋ da duuruŋ ha'aŋ ana gəm.

EFESIŊ 4:1 Iomraidhean Croise

JOŊRE 9:31

Giidə seŋka də Zudeŋa, də Galileŋa, daana Samariŋa keɗeŋ, kaa kə Tapiŋ nuutu bə anə kəkaɓi zugi, walka paapa bə jiya pəda. Tiiru Cetcetaŋ bə kəyəya səm moŋ, yə bə si a de neeteŋa, bə humi kosoŋa cəərə Barkaŋa, daana yə əsəŋ bə zuli ablaw gəm.

ROMEŊ 11:29

Gud maa mo Pepeŋ kole ɗiki du cəərə karman bə minti wə əyuŋ daana cəərə kaa gə minti wə məntənəy wəra a kusruŋ ba.

ROMEŊ 12:1

Bədoona ana kəsaananti, gud giidu pəsaŋ gə ablaw-ablaw gə minti Pepeŋ jiiniy sar áŋaŋ, ten bə jəŋ kamkama minti: aŋ ayə kusrəŋ la wəra soki məna a Pepeŋ damdi karman bə minti yə əwu bə keere ana, bə minti dədərgə, wəra bə zee-ze dəra'i a nuunuŋ daana bə minti daw duruŋ faɗi. Haa kəya kəkəy bə gəəzə-gəəzi bə minti aŋ kir ke awalna a Pepeŋ duuru ku tarməyaŋaŋ.

I KOREŊTƏŊ 4:16

Bədoona ana ta, ten bə jəŋ kamkama, aŋ haa la haa ɗe nin.

II KOREŊTƏŊ 10:1

Hebkəna də manteŋ sarəŋa haa ten Pol də kusrən, ten bə minti yə waatan səman minti: «Wə jəəne aduubə də áŋaŋ, kel paapa ku ba, wə jəəne paapaŋ, kel nuutuŋ də cəwaŋ.» Ten waataŋ dəŋ hebkəna haa də sããya diŋ daana də pisi kə Kristuŋ faɗi.

II KOREŊTƏŊ 5:20

Are haa kaa gə minti Kristu vaŋ are warda bə bi a əsti a kuɗuŋ. Kel teŋ haa minti Pepeŋ mantaŋ də kel gə ku areŋ haa tó. Gud sam Kristu, are jəŋ kamkam, aŋ ayə kusrəŋ la a Pepeŋ bə tepe aduubə dəŋ duuru.

II KOREŊTƏŊ 6:1

Are a joŋreŋa də kumsə are də Pepeŋ tə bə moŋ, are jəŋ kamkam minti pisi bə minti wə jəənəŋ dəŋ sarəŋaŋ, aŋ a boome duuru ba anə ceki.

GALATIŊ 4:12

Kəsaananti, bə minti ten a jəŋ dəərəŋ daŋ, ten a koloŋ haa damdi aŋ gə minti paapa gə Ziwifi baŋ ana gəm. Bədoona ta, ten bə jəŋ kamkama minti aŋ kolə la akas tena ana gəm. Bə minti ten a jəŋ aduubə dəŋ daŋ, aŋ jəənən baymele ba.

EFESIŊ 2:10

Gud maa mo, hel də minti Pepeŋ jəənə gilaŋ keɗeŋ, cəərə awaŋ haa áŋ: gud tepe náŋa də Yeesu Kristu, wə jəŋ áŋ kir minti áŋ jəə la haa joŋre pisi bə minti wə a ɗəmpunu warda hãã ajew da minti áŋ daw ku la wəraŋ.

EFESIŊ 3:1

Gud teŋa ta, ten Pol, ten toose nin haa Pepeŋ. Ten a daŋgaya gud joŋre kə Yeesu Kristuŋa gud aŋ gə minti paapa gə Ziwifi baŋ.

EFESIŊ 4:17

Bədoona ana, day ta'i kənaŋ haa karman bə minti ten jəŋ kamkam cuuru gud sam Barkaŋaŋ minti: aŋ a ji kusrəŋ damdi kaa gə minti Pepeŋ paapa də diri baŋ ana pəda. Ɗiki neete bə minti yə bə ɗe guuduŋ wəra haa ko bə boobo.

EFESIŊ 4:4

Kusrə Kristu haa ɗaaməna, Tiiru Cetcetaŋ haa ɗaaməna gəm, damdi karman bə minti Pepeŋ waatənaŋ minti aŋ malə ɗiki dəŋ la cuuruŋ ana a ko bə minti wə mantənaŋ wəra minti aŋ jəə la kə tó, karman toŋ wə ɗaaməna faɗi gəm.

EFESIŊ 5:2

Ɗe dəŋ haa la gud beleŋa tew-tew, damdi ɗe də Kristu a haŋ guuduŋ ana gəm. Gud maa mo, wə bəlaŋ áŋ ablaw daana wə ayaŋ kusru wəra a Pepeŋ gud áŋa damdi karman bə ayə-aye daana keere bə minti siisi duŋ siisunu warna fərəy-fərəy ana.

FILIPIŊ 1:27

Səma, ɗe dəŋ jəə la bə tapə-tepe haa də *Kel pəsaŋ kəmarwaŋ kə Kristuŋ. Bədoona ta, jəəne minti ten bə ɗe yaŋ na a goloŋ, kumundu ten ɗe na baŋ, ten əskəŋ səmaŋ la haa minti aŋ yaŋ gə əsə-isi saksaki ŋəŋ də ɗiki dəŋ məna'i, daana aŋ bə duuri haa də ku tarməyaŋ tapi gud de bə minti fəlaŋ kəsar du a Kel pəsaŋ kəmarwaŋ daŋ.

FILIPIŊ 3:14

Bədoona ta, ten kəm haa a tara bə ɗe a tuli wəra cəərə karman bə minti ten a məlaŋ dərən warna cuuru naŋ, kir minti ten daw la. Pepeŋ bə mantan da apəy da minti ten ɗee la a daw gud tapi nina də Yeesu Kristuŋ.

KOLOSIŊ 1:10

Bədoona ta, aŋ ji yaŋ wəra gə nakə-neke a ɗe dəŋa damdi kə Barkaŋ ana, bə daw duru wəra cəərə kara keɗe gəm. Gud maa mo, ɗe dəŋ ɗe a awe cuuru haa cəərə gidiirə pisiŋa keɗe, aŋ zeede yaŋ pisi zeeda bə ase Pepeŋa wəra gəm.

KOLOSIŊ 2:6

Bədoona ana, aŋ doŋ haa də Kristu Yeesu minti wə Barkaŋ nəətiŋ, ɗe dəŋ jəə la bə kə kaa gə minti gə tapə-tepe duuruŋ ana.

KOLOSIŊ 4:12

Epafrasi, hulum nəətiŋ, bə mirkiŋ na gəm. Wə haa hulum bə joŋre kə Yeesu Kristuŋ, wə bə kuuri də tooseŋ guudəŋa kir minti aŋ əsə la ŋəŋ a deŋa, aŋ jəə la wəra gə naa-ne daana aŋ jəə la wəra máŋ gə ayə-aye ɗiki dəŋ bə ji karman bə minti giidə Pepeŋ bəluŋ keɗe.

1 TESALONIKIŊ 2:12

Are aynaŋ səɓaki, are teŋneŋ dərəŋ, daana are jəənəŋ kamkam saksaki minti ɗe nəəti jəə la bə nakə-neke gud kə Pepeŋa, gud bə minti wə mantənaŋ bə isi duuru a kumna daana dər məyan nuutuŋa.

II TESALONIKIŊ 1:11

Gud teŋa ta, are bə toose Pep náŋa saksaki cəərəŋa minti wə koloŋ la wəra gə nakə-neke agal də dədərgə dəŋ də minti wə mantənaŋ warda cəərəŋ. Are bə toose pa minti, pisi bə minti aŋ gə ayə-aye ɗiki dəŋ bə jəw, wə kəyaŋ la də səɓaki nuutuŋ bə daw ku wəra, daana minti de nəəti jəə joŋre laŋ.

II TIMOTE 1:9

Pepeŋ seereŋ áŋ wəra haa tó, daana wə mantaŋ áŋ wəra minti áŋ kolə la wəra kaa kə tó. Wə jəŋ teŋ gila keɗe haa paapa gud joŋre náŋ pisi bə minti áŋ a juunu ba, səma gud minti wə bəlaŋ bədoona ana daana wə jəŋ pisiŋ sar áŋa. Wə jəŋ giidu pəsaŋ wəra cəərə áŋa gud Kristu Yeesu wəra hãã ajew də mele bə gud koŋa.

TITI 2:10

Wəətəy la minti yə a ji dəgaaya guudi ba anə ceki. Yə jəə la saksaki bə ji ɗaw haa joŋre pisiŋ daana ɓetiŋ kir minti hate náŋ cəərə Pep Hulum bə seere áŋ kolə la bə doy diri guudi.

HEBEREŊ 13:21

Pep toŋ koloŋ la gə nakə-neke bə ji gidiirə pisiŋ wəra keɗe, kir minti aŋ jəə la haa karman bə minti giidu bəluŋ. Də Yeesu Kristu, wə jəə joŋre nuutu la cəərə áŋa bə kole áŋ wəra bə ji karman bə minti daw duruŋ. Aŋkeŋ jəə la kə Yeesu Kristu bə faɗnə-faɗna! *Amen.

HEBEREŊ 3:1

Gud teŋa aŋ kəsaanan gə minti Pepeŋ mantənaŋ wəra minti aŋ kolə la kaa kə toŋ, aŋ malə dərəŋ la cəərə Yeesu, hulum bə minti Pepeŋ gəənuŋ. Wə haa *kumna boblo bə keere bə minti tepe aduubə də áŋ də Pepeŋ, áŋ gə doo-de gud kel teŋaŋ.

I PIYER 2:11

Gədaarənti, aŋ gə minti cəərə seŋkaŋa kəna bə kə irku ana, bə kaa gə minti bəŋ cəərə a gəryi ana'iŋ, ten bə waataŋa wəra anə kaŋkaŋ minti: aŋ a yaake kusrəŋ a kar gə minti giidəŋ bələy pəda, gud maa mo, kar teŋ bə golde haa minti té awe dədərgə də minti Pepeŋ aynaŋ dəŋ wəra.

I PIYER 3:9

Hulum jəŋ sərkə ne nuutu sarəŋaŋ, aŋ a jəw sərkə du ba. Wə sartənaŋ ne nuutu, aŋ a sərtu bə gəm. Ana ɗaw ha'aŋ, aŋ gaw pisi la cuuru gud bə minti Pepeŋ mantənaŋ haa bə bi a gaŋ pisiŋ cəərəŋa gəm.

I PIYER 5:10

Aŋ hebkəna bə se gəəliŋa nuutu gəəzi, səma paapa bə hiti ablaw pəda. Pep bə minti bə ji pisiŋa sarəŋa saksakiŋ, bə minti mantənaŋ warda bə ɗe a vaŋ dər məyan nuutu də bay teweŋaŋ gud tepe nəətiŋa də Kristuŋ, wə də kusru, wə hare yaŋ bə ɗompoŋa adordə lasiŋa. Wə jeŋeŋ yaŋ wəra, wə ayaŋ səɓaki yaŋ, wə ji yaŋ kir minti aŋ a daɓye ba.

II PIYER 1:3

Gud səɓaki kə Pepeŋa, Yeesu ayaŋ kar gə minti keye áŋ a ɗe də áŋa guuduŋ, bə kole áŋ bə aye kusrə áŋa wəra keɗe a Pepeŋ. Wə jəŋ kel teŋ haa də bə minti wə gaŋ dər áŋ wəra cəərə Pepeŋaŋ, Pep tó bə minti a mantaŋ áŋ minti áŋ tapə la bə hame boblo kə toŋa daana a joŋre pisi kə toŋaŋ.

II ZAŊ 1:5

Bədoona ana, həlgə katənti, ten wəətəy minti áŋ balə kumsə áŋ la aduubə də kumsə áŋa. Kel teŋ ha'aŋ paapa ku gili kimirwi ba, haa ku gili bə minti áŋ a uskunu warda hãã a mele bə gud de náŋ bə gud Pepeŋ daŋ.