Iblu 3:1 - Ku̍o̍ Delee 1999

¹ Nɛ̀ɛ̍, ǐn de̍di̍i̍ᵻ, mɔ̀ɔ̍ Nyɔsoa dǎ-a dě ɔ̍ dɛ di̍i̍ iě ɔ̍ tè-ea pɔ̌-ɛ, mɔ̀ fèàɛ̀ mɔ̀-a wlùh dě Jusu we̍. Ɔ̍-ɔ bo ɔ̀ nu̍ Gba̍tòà ke Slaǎ Sà Nyɔ̍-a Dlǔtu ɔ̀ gbǎ-a à we̍ dě à wlùh gbaɛ blě-ɛ di̍i̍-ɛ.

Iblu 3:1 Iomraidhean Croise

Chɔɔn 17:3

Ɛ̀ nu̍-a kmɔ̌ sie feɛ-ɛ, ɛ̍ nu̍ u̍h iě mɔ̀ due gbài̍ ɔ̀ nu̍-a tìh-a taǐn Nyɔsoa-a juo, ɛ̍ ke Jusu Klai ìn dbo̍-a ke.

Chɔɔn 20:21

Wɛ̀ Jusu la̍a̍ dě u̍h we̍ dɛ, “Wlùh-a i̍ tè-ɛ dǒ mɔ̀ we̍. Ka Baa dbo̍-a m-ɛ, ǎn dbo̍ la̍ mɔ̀ ke.”

Chɔɔn 20:27

Wɛ̀ ɔ̍ la̍a̍ dě Tɔmɔ we̍, “Gbɛ̀n dě ǐn kwa̍a̍ ìè-e i̍ tǔh, nɛ̀ ìn slɛ̌-ɛ sɔ̍n i̍ ìè dǒ ǐn gbèɛ̀n we̍ i̍ tǔh. Dě ìn di̍i̍ iě-e i̍ gbe-e tìh bɔ̌, ìè wlùh gbaɛ blě.”

Nu̍-dɛ̍ᵻ 1:15

Ɛ̍ bo u̍h nu̍ dǒ wǐh gbɔ̍ di̍i̍, iě Pitɛ nyna i̍ dě u̍h nynɛ̌ ɔ̍ iě wlu. Nyɔ̍ ùh gbèɛ̀ɛn-a dǒ tà-a chɛ̀-ɛ, u̍h wɛ̀ kmɛ due kwela sɔɔ̌n (120) nu̍-ɛ.

Wloma 11:17

Ɔle-tu̍ u̍h tù-a dě klè-ɛ, pò ɛ̍ chɛ̍n bu̍hᵻ ja̍-ɛ, nɛ̀ u̍h poe i̍h wɔ̀ɔ̀ dǒ kwlǎ ɔle-a bu̍hᵻ we̍. Nɛ̀ kwlǎ ɔle bu̍h-a mu̍ buǒᵻ chɛ̀ po̍-ɛ bɛ̌ɛ, dɛ̍nu̍ɛ, ɛ̍ ke ɔle-tu̍ chɛ̀ tùi i̍ wɛ̀. Kǎ ɛ̍ nu̍ mɔ̀ɔ̍ ùh se̍-a Juu nyɔ̍-ɛ dɛ̍kɛ̍n po̍-ɛ ke dě Juu nyɔ̍ ja̍a̍.

Wloma 15:27

U̍h-a wlùh tè i̍ u̍h iě ɛ̍ nu̍. Jɛ nɛ̀ u̍h nɛ ɛ̍ ka̍ dǒ u̍h ba̍ᵻ Nyɔsoa nyɔ̍ we̍. Dɛ̍nu̍ɛ, pò ùh se̍-a Juu nyɔ̍-ɛ u̍h ja la̍ pɔ̀ìě ɛ̀ Nyɔsoa nyǐ-a Juu nyɔ̍-ɛ kwa̍a̍ i̍ klɛ̀ɛ̀n-ɛ, nɛ̀ u̍h-a kɔn-dɛ̍ᵻ u̍h blě-aɛ, u̍h nɛ i̍h Juu nyɔ̍ we̍ gbǎ-ɛ ka̍.

Wloma 15:8

Ǎn sèàɛ̍ mɔ̀ wlùh, Klai nu̍ Juu nyɔ̍-a pòi̍ju wɛ̀ ɛ̍ iě ɛ̍ to ka Nyɔsoa-a gblìh-a wlu̍ kɛ̍n-ɛ. Iě wlu̍ ɔ̍ po̍-a tɔ̀ma̍a̍ tɛin dě Juu nyɔ̍ baaᵻ we̍-ɛ, i̍h iě chɛ̀-ɛ gbǎ.

Wloma 9:24

Àɔ̀ bo à nu̍ nyɔ̍ ùh ɔ̍ dǎ-a ke-ɛ. À nyɔ̍ duuh nu̍ Juu nyɔ̍ iě à duuh se̍ Juu nyɔ̍.

1 Kɔwlɛntiɔn 1:2

Ǎn chlǐh ɛ̍ Nyɔsoa-a chɔchi̍h nyɔ̍ ùh nɛ-a dě Kɔwlɛn wlɔ̀ di̍i̍-ɛ we̍, ùh Jusu Klai tba̍-a chèɛ̀-ɛ. Mɔ̀ dǎ-ɛ mɔ̀ iě Nyɔsoa-a nyɔ̍ nu̍, ɛ̍ ke nyɔ̍ ùh nɛ-a tà kli̍hgbɛ̍ ùh-a dǎ-a à Joi Jusu Klai-a nynɛ̌ i̍-ɛ ke, ɔ̀ nu̍-a u̍h ke à Joi-ɛ.

1 Kɔwlɛntiɔn 10:17

Blèe̍ gba̍n nɛ due, wɛ̀ àɔ̀ dɔu la iě à nu̍ nyɔ̍ due, dɛ̍nu̍ɛ, à kli̍hgbɛ̍ à gblè-e blèe̍ gba̍n due kwa̍a̍ i̍.

1 Kɔwlɛntiɔn 9:23

Pɔ̀n chɛ̀-a tìh bo ǎn nu̍ ìh kli̍hgbɛ̍ la, wɛ̀ pɔ̀ìě ɛ̍ mu̍-a ja-ɛ, iě-o dɛ̍ jě.

2 Kɔwlɛntiɔn 1:7

À ku̍-e klì i̍ dǒ mɔ̀ wlì tè-ɛ we̍. Dɛ̍nu̍ɛ, ka à nu̍-a we̍ gbǎ-ɛɛ, kǎ mɔ̀-a nu̍ we̍ gbǎ-ɛ ke. À juo ɛ̍ ka à nu̍-a jua̍i̍ sàɛ̀-ɛ kǎ mɔ̀-a nu̍ jua̍i̍ sàɛ̀ ke.

2 Kɔwlɛntiɔn 9:13

Dbo̍ la ɛ̍ mu̍ ɛ̍ to ka mɔ̀ blě-a Nyɔsoa gblɛ̍n-ɛ. Mɔ̀-a pɔ̀n chɛ̀ ɛ̀ kɔ̍-a dǒ Klai pùn i̍-ɛ dɛ̍ɛ̍ jě-ɛ ke mɔ̀-a gblɛ̍n-ɛ nmɔ-ɛ dǒ u̍h ke nyɔ̍ kli̍hgbɛ̍ duuh we̍-ɛ, ɛ̍ mu̍ ɛ̍ nu̍ nyɔ̍ dɔu iě Nyɔsoa-a nynɛ̌ i̍ bɛ̌-ɛ.

Ɛfɛsɔ 3:6

Ɛ̀ nu̍-a sìle dɛ̍-a chɛ̀-ɛ, ɛ̍ nu̍ Jusu Klai ke ùh se̍-a Juu nyɔ̍-ɛ nɛ due dě pɔ̀n chɛ̀ di̍i̍. Ɛ̍ bo ɛ̀ nu̍ ɛ̍ iě u̍h blě ka fɔ̌ wɛ̀ dǒ dɛ̍ᵻ Nyɔsoa tè-a i̍ dǒ Juu nyɔ̍ we̍-ɛ we̍. Ɛ̍-ɛ due laa̍ bo ɛ̀ nu̍ ɛ̍ iě u̍h ke Juu nyɔ̍ nu̍ nyɔ̍ due wɛ̀, iě u̍h kɔn dɛ̍ ɛ̀ kɔn wlu̍ Nyɔsoa po̍-a tɔ̀ma̍a̍-a ke.

Ɛfɛsɔ 4:1

Nɛ̀ɛ̍, mɔ̍ ɔ̀ tù-a Joi tìh wɛ̀ ɔ̀ nu̍-a gbɛ̍n-nyɔ̍-ɛ, ǐn gbɛ̍n mɔ̀-a bu̍hᵻ i̍, mɔ̀ iě dě kmɔ̌ ɛ̀ kɔn tìh Nyɔsoa dǎ-a mɔ̀-ɛ di̍i̍ nɛ.

Ɛfɛsɔ 4:4

Mɔ̀ɔ̍ ku̍ due ɛ̀ kɔn-a dǒ Klai we̍-ɛ, iě mɔ̀ blě Nyɔsoa-a Sùù ɛ̀ nɛ-a due-ɛ ke. Wɛ̀ Nyɔsoa dǎ mɔ̀ mɔ̀ iě wlùh kɛ̍n i̍ kɔ̍ dɛ̍ due blě.

Felepai 3:14

Ɛ̍ kɔn ǎn fɔ̀n dɛ̍ we̍ iě sìla̍ ɛ̀ nɛ-a dě ja̍i̍wlɔ̀ ɛ̀ kɔn tìh Nyɔsoa dǎ-a m dě Jusu Klai ja̍a̍-ɛ jɛɛ.

Kalase 1:12

Wɛ̀ mɔ̀ iě Baa Nyɔsoa tlɔ̌ po̍, ɔ̀ jɔ nɛ-a kmɔ̌ wɛ̀ mɔ̀ iě-a ɔ̍ nyɔ̍ nynɛ̌ gbǎ, iě dɛ̍ ɔ̍ tè-a i̍ dě sɔ̀npli di̍i̍-ɛ mɔ̀ kɔn-a ɛ̍ fɔ̌ wɛ̀-ɛ.

Kalase 1:22

Jɛ kaka la̍ ɔ̍ Jǔ ɔ̀ mɛ̌-a dě nyi̍ɔ̍ku di̍i̍-ɛ, ɛ̍-ɛ nɛ kmɔ̌ iě Nyɔsoa ke mɔ̀-a kmɔ̌ gbe̍ɛ̍ɛn i̍ wɛ̀. Mɔ̀ wɛ̀ nɛi̍ iě mɔ̀ nɛ wlaǎwla, mɔ̀-a nu̍-dɛ̍ᵻ wɛ̀ gblɛ̍ja̍i̍ dě ɔ̍ jlǐh.

Kalase 3:12

Nɛ̀ɛ̍, ka mɔ̀ nu̍-a Nyɔsoa-a tìh kma nyɔ̍, iě ɔ̍ tba̍-a mɔ̀ chèɛ̀, wɛ̀ ɔ̍ nu̍-a mɔ̀ ɔ̍ chɛ̀-a nyɔ̍ we̍i̍-ɛ, nɛ̀ mɔ̀-a chɛ̀ wlù ja-a ke, gba̍n gbɛ̍n-ɛ ke, wlùh i̍ gbɛ̍n-ɛ ke, wɔɛ kɔn-ɛ ke, gblɛ̍n-ɛ nmɔ-ɛ bo mɔ̀ iě dǒ pùn tù la̍ sǔh.

1 Tɛsoloniɔn 2:12

À fùka mɔ̀-a wlùh, iě à tù mɔ̀ gbàì. Wɛ̀ à gbɛ̍n-ɛ mɔ̀ wɔ̍i̍n, mɔ̀ iě dě kmɔ̌ ɛ̀ po̍-a Nyɔsoa gbǐh-ɛ di̍i̍ nɛ. Ɔ̍ dǎ mɔ̀ mɔ̀ iě dě ɔ̍ kmɔ̌ wlu̍ i̍ kɔn-ɛ ke ɔ̍ tìh-a i̍ bɛ̌-ɛ di̍i̍ ji̍.

1 Tɛsoloniɔn 5:27

Ǐn gbɛ̍n mɔ̀-a bu̍hᵻ i̍ dě Joi-a gbǐh di̍i̍, chlǐh-dɛ̍ la ɛ̍ iě slè-ɛ dě de̍di̍i̍ᵻ kli̍hgbɛ̍ we̍.

2 Tɛsoloniɔn 1:11

Ɛ̍ kɔn tìh à ba̍le dǒ mɔ̀-a tàà ti̍ kli̍hgbɛ̍ we̍. À ba̍le-e à Nyɔsoa-a mɔ̀ dǎ-a la mɔ̀ iě ɛ̍ ka̍ nɛ. Wɛ̀ ɔ̍ iě dɛ̍ᵻ chɛ̀ kli̍hgbɛ̍ mɔ̀-a pɔ̀n-a nu̍-ɛ i̍-ɛ ke mɔ̀-a dbo̍ mɔ̀ nu̍-a dě wlùh gbaɛ di̍i̍-ɛ i̍ wɔ̀ dě ɔ̍ gbǐh di̍i̍.

2 Tɛsoloniɔn 2:14

Ɛ̍ kɔn tìh bo ɔ̍ jii pɔ̀n chɛ̀ à ja-a dě mɔ̀ we̍-ɛ, iě ɔ̍ dǎ mɔ̀. Wɛ̀ mɔ̀ iě fɔ̌ kɔn dě à Joi Jusu Klai-a tìh-a i̍ bɛ̌-ɛ di̍i̍.

1 Timote 6:12

Fɔ̀n chɛ̀ka dǒ wlùh gbaɛ we̍. Kmɔ̌ sie feɛ kɔn tìh Nyɔsoa dǎ-a m̀ wɛ̀ àn wlu-a àn wlùh gbaɛ blě tìh gbài̍gbài̍ dǒ sàànsi̍i̍h dɔu jǔ-ɛ, ɛ̍-ɛ bo ìè sɔ̍nᵻ sɔɔ̌n i̍ gbɛ̍n-ɛ.

1 Timote 6:2

Kèi̍ jɔ kɔn dlǔtu nu̍-a Nyɔsoa wlùh gbaɛ nyɔ̍-ɛ, nɛ̀ ɛ̍ bɔ̌ ɛ̍ nu̍-ɛ wɛ̀ ɔ̍ bɔ̌ ɔ̍ wɔ̍n blaɛ-ɛ, ɔ̍ ɔ̍ de̍di̍i̍ nu̍ tìh. Jɛ nɛ̀ dǒ ɔ̍ iě ɔ̍ jǔ dbee nmɔ jii̍. Dɛ̍nu̍ɛ, nyɔ̍ ùh-a jě-a u̍h-a dbo̍ nu̍-ɛ dɛ̍ we̍-ɛ, u̍h gbaɛ Nyɔsoa wlùh iě ɔ̍ kma u̍h-a tìh. Poe u̍h ìh la nǎ wɛ̀ ìè u̍h wɔ̍i̍n gbɛ̍n-ɛ dǒ i̍h we̍.

2 Timote 1:9

Ɔ̍ sèìe àɔ̀, iě ɔ̍ dǎ àɔ̀ à iě ɔ̍ nyɔ̍ nu̍. Ɛ̍ se̍ à nu̍-dɛ̍ᵻá tìh ɔ̍ se̍ àɔ̀ dǎ, jɛ ɔ̍ chɛ̀-a wlùh dɛ̍ ke blɛ nɛ-ɛ bo ɛ̀ nu̍ ɛ̍ iě ɔ̍ dǎ àɔ̀. Ɔ̍ iě-a à blɛ la we̍ nu̍ dě Jusu Klai ja̍a̍-ɛ, nɛ̀ kmɔ̌ se̍ nui-ɛ ke̍.

2 Timote 2:7

Dɛ̍ ǎn sà-aɛ, naɛ ɛ̍ wlùh i̍, dɛ̍nu̍ɛ, Joi-a mu̍ ɛ̍ nu̍ ìè ɛ̍ kli̍hgbɛ̍ i̍ wɔ̌n.

Iblu 10:19

Ǐn de̍di̍i̍ᵻ, Jusu-a nymɔ̍ ɛ̀ wlǎ-a i̍-ɛ, ɛ̍ nu̍ ɛ̍ iě à ku̍ di̍i̍ i̍ à iě dě Nɛi̍ Wɛ̀ Tà Klaa pa̍.

Iblu 10:21

À blě slaǎ sà nyɔ̍ ɔ̀ ku̍-a wɔ̍n-ɛ wɛ̀, ɔ̀ nu̍-a ka Nyɔsoa-a gbò-a Dlǔtu-ɛ.

Iblu 10:23

Nɛ̀ wlì tè dɛ̍ kɔn tìh à bla̍-aɛ, mɔ̀ à gbɛ̍n ɛ̍ i̍ klìmàtàìn. Dɛ̍nu̍ɛ, Nyɔsoa ɔ̀ po̍-a wlu̍ tɔ̀ma̍a̍-ɛ, ɔ̍-ɔ gblìh wlu̍ kɛ̍n.

Iblu 13:22

Ǐn de̍di̍i̍ᵻ, ǐn gbɛ̍n mɔ̀-a bu̍hᵻ i̍ ǎn slɛ̌n tù wlu̍ la mɔ̀ iě ɛ̍ dounᵻ we̍ po̍. Ɛ̍ kɔn chlǐh-dɛ̍ la ǐn chlǐh-a mɔ̀ we̍-ɛ, ɛ̍ se̍ dlǔ tɛn.

Iblu 2:11

Nyɔ̍ jɔ tè-ea nyɔ̍ pɔ̌ dǒ Nyɔsoa we̍-ɛ ke juh ɔ̍ tè-ea pɔ̌-ɛ, u̍h sɔ dě chɛ̌tu due i̍. Ɛ̍ kɔn Jusu se̍ tɛ̀n ple̍ ɔ̍ iě u̍h de̍di̍i̍ᵻ dǎɛ.

Iblu 2:17

Ɛ̍ kɔn ka ɔ̍ de̍di̍i̍ᵻ nɛ-aɛ, nɛ̀ ɔ̍ kɔn ɔ̍ iě laǎn nɛ ke tà kli̍hgbɛ̍. Ɔ̍ nu̍ ɛ̍-ɛ, wɛ̀ ɔ̍ iě u̍h-a Slaǎ Sà Nyɔ̍-a Dlǔtu nu̍ ɔ̀ kɔn-a wɔɛ iě ɔ̀ nu̍-a wlì tè nyɔ̍ dě Nyɔsoa jǔ dbee dɛ di̍i̍-ɛ. Wɛ̀ ɔ̍ nu̍ ɛ̍ iě nyɔ̍ɔ-a gblɛ̍n sɔ̀ɛ̀n-a tìh tǎli-ɛ i̍.

Iblu 3:12

Nɛ̀ɛ̍, ǐn de̍di̍i̍ᵻ, mɔ̀ nu̍ nɛnɛ̌ mɔ̀-a nyɔ̍ je̍e wlùh sɔ̀n blě wɛ̀ ɔ̍-ɔ se̍-e wlùh gbaɛ blě, ɔ̍-ɔ je̍e dǒ kmɔ̌ nɛ Nyɔsoa-a wìè kɛ̍n sɔ.

Iblu 3:14

Pò di̍i̍ i̍ ku̍-ɛ due à blě-a sɔ dǒ ti̍ à gbaɛ-a Klai wlùh-ɛ we̍-ɛ, pò à gbɛ̍n ɛ̍ i̍ klìmàtàìn te̍e̍ wɛ̀ à kmɔ̌ iě dlǔ i̍ chla-ɛ, nɛ̀ à ke Klai-a nu̍ dbo̍ due.

Iblu 6:20

Jusu mu̍ à jǔ iě ɔ̍ pa̍ dě gbòju laa̍ di̍i̍ dǒ à tàà. Wɛ̀ ɔ̍ nu̍ ka slaǎ sà nyɔ̍-a dlǔtu nɔ̌ kmɔ̌-a kmɔ̌, ka slaǎ sà nyɔ̍ Mɛokeslɛ-ɛ.

Iblu 7:26

Jusu laa̍ bo ɔ̀ nu̍ ka Slaǎ Sà Nyɔ̍-a Dlǔtu à kɔn à iě blě. Ɔ̍ wɛ̀ nɛi̍. Nyɔ̍ se̍ ɔ̍ kɔ̌-ɛ nynɛ̌ blě, ɔ̍ se̍ gblɛ̍n sɔ̀ɛ̀n nu̍. Ɔ̍ tè-ɛ pɔ̌ dě gblɛ̍n sɔ̀ɛ̀n nyɔ̍ nynɛ̌, iě ɔ̍ dǔ-iɛ ja̍i̍ dě ja̍i̍wlɔ̀.

Iblu 7:28

Telě-a tba̍ wlɔ̀ nyɔ̍ ùh kɔn gbǐh-a nu̍-a sɔɔn-ɛ chèɛ̀ u̍h iě slaǎ sà nyɔ̍-a dlǔtuᵻ nu̍. Jɛ Nyɔsoa-a slɛ̀ɛ̀n wlu̍ ji̍-a telě kɛ̍n i̍-ɛ, ɛ̍ tba̍ Jǔ ɔ̀ bɛ̌ɛ-a Nyɔsoa-a wlùh nu̍-ɛ nɔ̌ kmɔ̌-a kmɔ̌-ɛ chèɛ̀, ɔ̍ iě Slaǎ Sà Nyɔ̍-a Dlǔtu nu̍.

Iblu 9:11

Jɛ dɛ̍ᵻ chɛ̀ jih à juo-a ka i̍-ɛ, Klai bo ɔ̀ nu̍ slaǎ sà nyɔ̍-a dlǔtu dǒ i̍h we̍ ɔ̀ ji̍. Nyɔsoa-a wɛ̀ɛ̀ sɔ̍n wlù ɛ̀ ku̍-a wɔ̍n iě ɛ̀ wɛ̀-a kwlǎ ɛ̀ sìì-a sàǐtòò naɛ-ɛ, dě ɛ̍ di̍i̍ bo ɔ̍ dbee Nyɔsoa jǔ. Nyi̍ɔ̍-a sɔ̍n se̍ ɛ̍ nu̍, iě ɛ̍ se̍ da̍a kmɔ̌ la we̍ kɔn.

Iblu 9:15

Ɛ̍ tìh-ɛ, Klai bo ɔ̀ nu̍ tùna̍-i̍-tu̍ dǒ ku̍o̍ delee la we̍, wɛ̀ nyɔ̍ ùh Nyɔsoa dǎ-aɛ, u̍h iě kmɔ̌ sie pɔ̀ìě la ɛ̀ kɔn wlu̍ ɔ̍ po̍-a tɔ̀ma̍a̍-ɛ jě. Kaka la̍, ɔ̍ mɛ̌-ɛ, wɛ̀ ɔ̍ iě nyɔ̍ ùh nu̍-a gblɛ̍n sɔ̀ɛ̀n dě sàǐtòò ku̍o̍-a ti̍ di̍i̍-ɛ sèìe.

1 Pitɛ 2:9

Jɛ mɔ̀ɔ̍ Nyɔsoa-a chèɛ̀ tba̍ nyɔ̍, Blǔh Baa-a slaǎ sà nyɔ̍, mɔ̀ɔ̍ nɛi̍ wɛ̀ bloa̍. Mɔ̀ɔ̍ Nyɔsoa-a chɛ̀-a nyɔ̍, ɔ̍ dǎ mɔ̀ mɔ̀ iě dě kwile-e sɔ mɔ̀ iě ɔ̍ nyɔ̍ wɔ̍n flɔn sɔ̀npli we̍ ji̍. Ɔ̍ tba̍ mɔ̀ chèɛ̀ mɔ̀ iě nyɔ̍ wɔ̍n flɔn-ɛ dɛ̍ᵻ ɔ̍ nu̍-aɛ bla̍.

1 Pitɛ 3:5

Tɛin-ɛ, nynɔ̌gbaɔᵻ ùh gbaɛ-a Nyɔsoa wlùh wɛ̀ ùh tè-a ɔ̍ wlì-ɛ, u̍h-a jě u̍h-a kɔanᵻ dɛ̍ɛ̍, ɛ̍-ɛ bo ɛ̀ nmɔ-ɛ u̍h jii̍.

1 Pitɛ 5:1

Ǐn ba̍ᵻ Nyɔsoa nyɔ̍ klaaᵻ nɛ-a dě mɔ̀ nynɛ̌ dě chɔchi̍h-iɛ, ǐn gbɛ̍n u̍h-a bu̍hᵻ i̍. Mɔ̍ la mɔ̍ sàànsi̍i̍h dǒ Klai-a jua̍i̍ sàɛ̀ dɛ we̍. Ɔ̍ tìh-a i̍ bɛ̌-ɛ ɛ̀ mu̍-a ji̍-ɛ, ǎn mu̍ ɛ̍ dɛ̍ di̍i̍ nyǐ-ɛ ke. Ǐn gbɛ̍n mɔ̀-a bu̍hᵻ i̍,

1 Pitɛ 5:10

Jɛ pò mɔ̀ wɔ̀ jua̍i̍ sàɛ̀-ɛ dǒ ti̍ gbɔ̍ di̍i̍-ɛ, Nyɔsoa ɔ̀ blě-a blɛ kli̍hgbɛ̍-ɛ, ɔ̍ chɛ̀-a mu̍ mɔ̀ dǒ ta̍i̍ po̍ dode̍, ɔ̍ iě mɔ̀ gbǐh nyǐ, wɛ̀ ɔ̍ iě ɛ̍ nu̍ mɔ̀ iě i̍ ku̍. Ɔ̍ dǎ mɔ̀ mɔ̀ iě ɔ̍ kmɔ̌ sie tìh-a i̍ bɛ̌-ɛ kwa̍a̍ i̍ klɛ̀ɛ̀n dě Klai ja̍a̍.

1 Chɔɔn 1:3

Dɛ̍ kɔn tìh à wɔ̌n-a iě à tba̍-a jlǐhɛ̍-ɛ, ɛ̍ bo à sèàɛ̍ mɔ̀ wlùh ke. Wɛ̀ mɔ̀ iě à kɛ̍n gbǎ iě à ke Baa Nyɔsoa ke ɔ̍ Jǔ Jusu Klai iě we̍ nɛ̍aɛ.

Judi 1:1

Mɔ̍ Chiin de̍di̍i̍ Judi ɔ̀ nu̍-a Jusu Klai-a pòi̍ju-ɛ. Ǎn chlǐh chlǐh-dɛ̍ la dě nyɔ̍ ùh Nyɔsoa dǎ-aɛ we̍, ɛ̍ ke ùh Baa Nyɔsoa jbɛɛ-aɛ iě Jusu Klai pe̍ɛ-ɛ ka u̍h kɛ̍n i̍-ɛ.

Wlɛfeleseɔn 17:14

I̍h-a mu̍ Blawɛ̌ Jǔ tu̍h we̍ pa̍-ɛ, wɛ̀ Blawɛ̌ Jǔ iě i̍h du̍. Dɛ̍nu̍ɛ, ɔ̍ nu̍ Joi dǒ joi kli̍hgbɛ̍ kɛ̍n, wɛ̀ ɔ̍ nu̍ Blǔh Baa dǒ blǔh baaᵻ kli̍hgbɛ̍ kɛ̍n. Nyɔ̍ ke ɔ̍ na-aɛ u̍h dǎ-ɛ, iě u̍h tba̍-ɛ chèɛ̀, wɛ̀ u̍h gbaɛ ɔ̍ wlùh.”

Wlɛfeleseɔn 18:20

Ja̍i̍wlɔ̀, nmɔ dǒ ɔ̍-ɔ gbɔ̀lɔ-ɛ we̍. Nyɔsoa-a nyɔ̍ ke, ɔ̍ tu̍owli po̍ nyɔ̍ ke, Klai-a gba̍tòà, mɔ̀ nu̍ mɔna̍ ke o. Dɛ̍nu̍ɛ, Nyɔsoa gbɛ̍n ɔ̍ kàn wɛ̀ dǒ dɛ̍ ɔ̍ nu̍-a mɔ̀ pùn-ɛ we̍ o.