1 Chɔɔn 4:1 - Ku̍o̍ Delee 1999

¹ Ǎn tìh kma nyɔ̍, mɔ̀ bɔ̌ nyɔ̍ kli̍hgbɛ̍ ùh la̍ ùh blě-a Nyɔsoa-a Sùù-ɛ wlùh gbaɛ. Mɔ̀ tɛ̀n u̍h-u pò u̍h sɔ dě Nyɔsoa we̍-ɛ. Dɛ̍nu̍ɛ, Nyɔsoa-a tu̍owli po̍ nyɔ̍-a si̍h naɛ dɔu-a sì la̍ blǔh we̍.

1 Chɔɔn 4:1 Iomraidhean Croise

Pɔ̀n Chɛ̀ Maɛ To-a La 13:21

“Nɛ̀ pò nyɔ̍ la̍a̍ dě mɔ̀ we̍, ‘Mɔ̀ gbɛ̀n-e, Nyɔsoa-a Chèɛ̀ Tba̍ju la da̍a,’ àe̍e̍, ‘Mɔ̀ gbɛ̀n-e, ɔ̍-ɔ nɛ-a dě de̍à,’ nɛ̀ mɔ̀ bɔ̌ i̍h tìh chɛ̀ po̍-ɛ.

Pɔ̀n Chɛ̀ Luu To-a La 12:57

“Dɛ̍nu̍ mɔ̀-ɔ pu̍e̍e i̍ slɛ̌ dɛ̍ nu̍ tìh dǒ mɔ̀-a chɛ̀ wlì ɛ?

Pɔ̀n Chɛ̀ Luu To-a La 21:8

Iě Jusu la̍a̍, “Mɔ̀ nu̍ mɔ̀-a chɛ̀-a nɛnɛ̌ wɛ̀ nyɔ̍-ɔ je̍e mɔ̀ i̍ boe. Dɛ̍nu̍ɛ, nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka nu̍, ‘Mɔ̍ bo ɔ̀ nu̍ Chèɛ̀ Tba̍ju. Bɔ̌ɛ-o ti̍ kɔǎn we̍ wɛ̀.’ Jɛ mɔ̀ bɔ̌ dǒ u̍h de̍e̍ gbǎ-a.

Nu̍-dɛ̍ᵻ 17:11

Sɔ Juu nyɔ̍ juh nɛ-a doǒ-ɛ, u̍h nu̍ nyɔ̍ chɛ̀ ɛ̍ sìì juh nɛ-a dǒ Tɛsolonaika-a, dɛ̍nu̍ɛ, u̍h gbɛ̍n-ɛ tu̍owli laa̍ sɔ̍nᵻ sɔɔ̌n i̍. Nɛ̀ ka sɔ̀n-a sɛ̀n-aɛ, kǎ u̍h-a slè Nyɔsoa-a wlu̍ u̍h iě jě pò dɛ̍ Pɔɔ-a bla̍-aɛ, tìh-a taǐn bo kɔ̌ɔ.

Nu̍-dɛ̍ᵻ 20:29

Ǐn juo ɛ̍-ɛ pò ǐn sɔ da̍a-ɛ, gbɛ̍n-nmi̍i̍ ìh kma-a wɔ̍n-ɛ, i̍h-a mu̍ mɔ̀ nynɛ̌ gbǎ. Nɛ̀ i̍h se̍-o blawɛ̌ᵻ la i̍h-a dɛ̍ i̍ sie mu̍.

1 Kɔwlɛntiɔn 12:10

Nɛ̀ ɛ̍ nyǐ nyɔ̍ dɔɔ jbaɛdih po̍-ɛ, nɛ̀ dɔɔ-ɛ, ɛ̍ nyǐ ɔ̍ Nyɔsoa-a tu̍owli po̍-ɛ. Nɛ̀ ɛ̍ nyǐ dɔɔ gbǐh ɔ̍ iě Nyɔsoa-a Sùù ke jeědih we̍ sèàɛ̍. Iě ɛ̍ nyǐ dɔɔ gbǐh ɔ̍ iě wlu̍ diih po̍, iě ɛ̍ nyǐ dɔɔ gbǐh ɔ̍ iě wlu̍ diih-a chɛ̀ we̍ i̍ sèàɛ̍.

1 Kɔwlɛntiɔn 14:29

Nyɔsoa-a tu̍owli po̍ nyɔ̍-a sɔɔ̌n àe̍e̍ ta̍a̍n kɔn u̍h iě wlu, wɛ̀ juh sie-a dode̍-ɛ, u̍h iě dɛ̍ᵻ u̍h-a bla̍-aɛ we̍ i̍ chlɛ̌.

1 Tɛsoloniɔn 5:20

Mɔ̀ bɔ̌ Nyɔsoa-a tu̍owli wɔ̍n blaɛ-ɛ.

1 Tɛsoloniɔn 5:21

Mɔ̀ tɛ̀n dɛ̍ᵻ kli̍hgbɛ̍-ɛ, nɛ̀ mɔ̀ gbɛ̍n jii̍ nmɔ naɛ i̍.

2 Tɛsoloniɔn 2:2

pò mɔ̀ wɔ̌n wlu̍ àe̍e̍ nyɔ̍ poe ɛ̍ gbànwli, iě nyɔ̍ duuh iě ɛ̍ chlǐh wɛ̀ u̍h iě ka nu̍ ɛ̍ sɔ nɔ̌ à we̍-ɛ, mɔ̀-a ku̍ bɔ̌ tlɛ̍-ɛ. Pò u̍h la̍ Joi-a ji̍-i weɛ̍ nyni̍ wɛ̀-oɛ, ɛ̍ bɔ̌ mɔ̀-a ku̍ tlɛ̍-ɛ. Wɛ̀ mɔ̀-a wlùh wɔ̍ bɔ̌ dě de̍i̍ gbǎ-a ke dǒ ɛ̍ we̍.

1 Timote 4:1

Nyɔsoa-a Sùù sà ɛ̍-ɛ te̍gbe̍i̍n ka nyɔ̍ duuh-a mu̍-a wlùh gbaɛ kɛ̍n i̍ poe dě nya̍-ɛ, wɛ̀ u̍h iě kǔ sùù ìh-a boe-a nyɔ̍ i̍-ɛ dounᵻ we̍ po̍, u̍h iě i̍h-a nǎ po̍ wlu̍ de̍e̍ gbǎ.

2 Timote 3:13

Nɛ̀ dɛ̍ᵻ sɔ̀nᵻ nyɔ̍ ke de̍ sì nyɔ̍-a mu̍ dě de̍i̍ gbǎ. U̍h-a boe nyɔ̍ɔ i̍, iě u̍h-a boe u̍h-a chɛ̀ i̍ ke.

2 Pitɛ 2:1

Ka Nyɔsoa-a tu̍owli po̍ nyɔ̍-a si̍h naɛ nu̍-a nyɔ̍ɔ nynɛ̌ gbǎ-a tɛin-ɛ, kǎ nǎ po̍ nyɔ̍-a si̍h naɛ-a mu̍ mɔ̀ nynɛ̌ gbǎ-a nu̍ ke ti̍laa. Nɛ̀ si̍h ɛ̀ gbɔ̀lɔ-a dɛ̍ɛ̍-ɛ, ɛ̍ bo u̍h-a mu̍ nyɔ̍gbei nǎ poe. Wɛ̀ Dlǔtu jɔ pùhbɔ-a u̍h kɛ̍ɛ̍n-ɛ, u̍h iě ɔ̍ chla tba̍. Wɛ̀ i̍-i gbɔ̀lɔ-ɛ ɛ̀ kèè-a nyɔ̍ kɛ̍n-ɛ, u̍h iě ɛ̍ u̍h-a chɛ̀ we̍ ja.

1 Chɔɔn 2:18

Ǎn nynuu̍, ti̍-a dlǔ i̍ chlà-a kɔǎn we̍ wɛ̀. Mɔ̀ wɔ̌n i̍h se̍e̍ ka Klai-a Nyɛ̌-nyɔ̍-a mu̍-a ji̍-ɛ. Kaka la̍ u̍h-a dɔu ji̍ wɛ̀. Ɛ̍-ɛ bo à juo i̍ ka ti̍-a chlà-a la̍ dlǔ i̍-ɛ.

1 Chɔɔn 2:7

Ǎn tìh kma nyɔ̍, telě la ɛ̀ kɔn tìh ǎn chlǐh-a mɔ̀ we̍-ɛ, ɛ̍ se̍ telě delee. Dɛ̍ soa bo, mɔ̀ wɔ̌n ɛ̍-ɛ se̍e̍ sɔ dě tɔ̀blɔ̍ɔ̍. Telě soa la, ɛ̍ bo ɛ̀ nu̍ wlu̍ mɔ̀ wɔ̌n-a se̍e̍-ɛ.

2 Chɔɔn 1:7

Nyɔ̍ i̍ boe nyɔ̍ dɔu-a sì la̍ blǔh we̍. Ka Jusu Klai ji̍-a dě nyi̍ɔ̍tu di̍i̍-ɛ, nyɔ̍ ùh se̍-a ɛ̍ tìh i̍ wɔ̌ɛn-ɛ, nɛ̀ nyɔ̍ i̍ boe nyɔ̍ ke Klai-a nyɛ̌-nyɔ̍ bo.

3 Chɔɔn 1:11

Ǎn tìh kma nyɔ̍, bɔ̌-e dɛ̍ sɔ̀n-a wɔ̀ɔ̀ i̍ sà-a, jɛ dɛ̍ chɛ̀-a wɔ̀ɔ̀ bo ìè-e i̍ sà. Nyɔ̍ jɔ nu̍-a dɛ̍ chɛ̀-ɛ, nɛ̀ ɔ̍ sɔ dě Nyɔsoa we̍. Jɛ nyɔ̍ ɔ̀ nu̍-a dɛ̍ sɔ̀n-ɛ, nɛ̀ ɔ̍-ɔ se̍a Nyɔsoa jě.

Wlɛfeleseɔn 2:2

Ǐn juo mɔ̀-a nu̍-dɛ̍ᵻ ke mɔ̀-a kmu-u dbo̍ nu̍-ɛ ke wlùh i̍ gbɛ̍n-ɛ. Ǐn juo ka mɔ̀ faɛn-a dɛ̍ᵻ sɔ̀nᵻ nyɔ̍-ɛ. Mɔ̀ tɛ̀n nyɔ̍ ùh-a dǎɛ-a u̍h-a chɛ̀ Klai-a gba̍tòà jɛ nɛ̀ ɛ̍ se̍-a u̍h mɔ-ɛ. Wɛ̀ mɔ̀ juo u̍h-a si̍h tmɔ̌ tìh. Ǐn ju̍o̍e i̍h we̍ i̍ kli̍hgbɛ̍.