2 Ǎn po̍ mɔ̀ tìhwe̍, dɛ̍nu̍ɛ, mɔ̀-a blě-e ǎn tìh dǒ wlùh kɛ̍n te̍e̍, iě mɔ̀-a jě nǎ po̍ wlu̍ ǐn ja-a dě mɔ̀ we̍-ɛ dɛ̍ɛ̍.
U̍h nɛ-a sɔɔ̌n-ɛ, u̍h-a nu̍-dɛ̍ slɛ̌ i̍ dě Nyɔsoa jlǐh. U̍h-a tè-o Joi-a telě kli̍hgbɛ̍ i̍.
Jɛ ǎn ji̍-a bla̍ la̍ dě mɔ̀ we̍-ɛ, ǐn se̍ mɔ̀ tìhwe̍ po̍ la̍ ji̍. Dɛ̍nu̍ɛ, mɔ̀-a gbèɛ̀ɛn-ɛ blě dɛ̍ sɔ̀n ɛ̍ sìì dɛ̍ chɛ̀.
Mɔ̀ se̍ mɔ̀-a chɛ̀-a gbòᵻ blě mɔ̀ iě-e dɛ̍ di̍-i mɔ̀ iě nǎ ae? Àe̍e̍ mɔ̀ se̍ Nyɔsoa-a chɔchi̍h dɛ̍ dǎɛ iě mɔ̀-a po̍ nyɔ̍ ùh se̍-a dɛ̍ blě-ɛ tɛ̀n-ɛ i̍ ae? Ka iě dǎ dě mɔ̀ we̍ ɛ? Iě mɔ̀ tìhwe̍ po̍ ɛ̍ tìh ae? Iěe, ǐn se̍ ɛ̍ nu̍ mu̍.
Ɛ̍ nu̍ pɔ̀n chɛ̀ la ǎn bla̍-a dě mɔ̀ we̍-ɛ, pò mɔ̀ gbɛ̍n-ɛ ɛ̍ sɔ̍nᵻ sɔɔ̌n i̍-ɛ, nɛ̀ ɛ̍ mu̍ mɔ̀ pǔh-i. Pò mɔ̀ se̍ wlùh gbaɛ blě nɔ̀ɔ̍-ɛ, nɛ̀ ɛ̍ kɔn tɛ̀ ǐn sà-o.
Nɛ̀ɛ̍, Timote ɔ̀ nu̍-a ǎn jǔ dě Joi-a dbo̍ nu̍-ɛ di̍i̍ iě ǐn kma-a ɔ̍ tìh wɛ̀ ǐn tè-a ɔ̍ wlì-ɛ, ɔ̍-ɔ bo ǐn dbo̍ dě mɔ̀ we̍. Ǐn dbo̍ ɔ̍ ɔ̍ iě mɔ̀ tìh wlì i̍ sǐi ka ǎn kmɔ̌ nɛ-a dě Klai ja̍a̍, iě ǎn poe-a ɛ̍ nyɔ̍ nǎ dě chɔchi̍h nyɔ̍ kli̍hgbɛ̍ nynɛ̌-ɛ.
Kmɔ̌ kɔn di̍i̍ Joi Jusu po̍-a jɔ-ɛ, nɛ̀ dě ɔ̍ iě nɛ, ɛ̍ ke ka ɔ̍ nɛ-a wɛ̀ Nyɔsoa dǎ-a ɔ̍-ɛ ke. Ìh la bo ìh nu̍ ǎn telě ǎn poe nǎ dě chɔchi̍h nyɔ̍ kli̍hgbɛ̍ we̍.
Ɛ̍ kɔn mɔ̀-a sà-e à ke Joi-a wɔ̀ɔ̀ i̍. Mɔ̀ sàɛ̀ jua̍i̍ kaa̍ gbɛɛ, jɛ mɔ̀ gbɛ̍n tu̍owli la i̍ dǒ mɔna̍ ɛ̀ Nyɔsoa-a Sùù-a nyǐ-a nyɔ̍-ɛ we̍.
Jɛ Timote sɔ-a dě mɔ̀ we̍ wɛ̀ ɔ̍ ji̍-a nɔ̌ à we̍-ɛ, ɔ̍ ja à pɔ̀n chɛ̀ dǒ mɔ̀-a wlùh gbaɛ ke jbɛɛ blě-ɛ we̍. Ɔ̍ sèàɛ̍ à wlùh ka pò à tìh sǐ dǒ mɔ̀ wlì i̍-ɛ, wɛ̀ mɔ̀-a nu̍-a mɔna̍ ti̍ kli̍hgbɛ̍ we̍-ɛ. Ɔ̍ la̍ ka mɔ̀-a tɔ̌n-a nu̍-a à nu̍-ɛ à iě-a mɔ̀ jě-ɛ, kǎ à tɔ̌n-a nu̍ mɔ̀ nu̍-ɛ ke.
Ɛ̍ tìh-ɛ, à de̍di̍i̍ᵻ, mɔ̀ ku̍-e klì i̍, mɔ̀ iě dɛ̍ᵻ à poe-a mɔ̀ nǎ dǒ à wɔ̍i̍n wlu̍ ke chlǐh-dɛ̍ we̍-ɛ i̍ gbɛ̍n.
À de̍di̍i̍ᵻ, à po̍ mɔ̀ telě i̍ dǒ à Joi Jusu Klai-a nynɛ̌ kɛ̍n. De̍di̍i̍ jɔ nɛ-a dě flàn-dɛ̍ di̍i̍-ɛ, nɛ̀ mɔ̀ ti̍ɛ̍ɛn ɔ̍ we̍ i̍, ɛ̍ ke nyɔ̍ ùh-u nu̍-a dɛ̍ à poe-a mɔ̀ nǎ-ɛ ke.