Yɛrɛmaya 7:33 - ALLALA KUMƐ

³³ Wo kɔma, furi-bolokanɛ si taran dugi ma nyɔ. Anu si ma konanu de-nyini-fan la. Kɔnkɛ ti nyɔ-sogenu bira. Mɔgɔ-wo-mɔgɔ ti taran nyɔ min si fan wonu gben furinu ma.

Yɛrɛmaya 7:33 Iomraidhean Croise

Aiseya 18:6

Anuna kɛlɛ-dannu furi si ma soge anubɛ konanu beli-fan la. Telemɛ rɔ, konanu si wonu dɔn. Samɛ rɔ, sogenu si wonu dɔn.

Yɛrɛmaya 12:9

Nta mɔgɛnu mani de iko bibi-siyamɛ wa kɛ kona-manyɛganni kelan ma. Soge bɛɛ kun ni dɛn. Anu ni na anu kasayogoya-dɔn kɛ.

Yɛrɛmaya 14:16

A ko nɛbi wonu bi kumala minnu ye, wonu furinu na si kɛ a rɔ Yerusalɛm kila-kunyɛnu na. Anu tɔgɔ si to kɔnkɛ anubɛ anu yogenuna faan la. Anuna musu wo, anuna den wo, anu togonna-wo-togonna ti taran. A ko a si anu tɔrɔ feu, iko a bɛnta, anu ni tɔrɔ nya min.

Yɛrɛmaya 15:3

Mari ko a si kasara-su nani natugu wole, Yuda kɛnu kan ma. A ko a si kɛlɛ lana min si wo lato. Wo kɔma, a si wulinu nana minnu si wo furi sagan. Wo kɔma, a si konanu anubɛ firarɔ-sogenu nana minnu si furi wonu tafarafara anu dɔn-tinɛ.

Yɛrɛmaya 16:4

A ko kiraya-fitinɛ si ta anu na. Anu kunyɛ si to kɛlɛ rɔ, ni wo ma, kɔnkɛ si anu firan dugu-kole kuma. Anu dila-wo-dila ti taran, ado anu togonna-wo-togonna ti taran. A ko anu furi-bolokanɛ si taran dugi ma iko ninki-nyɛ. Anu furinu si ma konanu de-nyini-fan la, ni wo ma, firarɔ-sogenu.

Yɛrɛmaya 19:7

Mari ko a si wole, Yuda mɔgɛnu anubɛ Isirɛla mɔgɛnu miriya bɛɛ tinya kan-tina-kelan kɛ rɔ ka a ma, wo yogenu ni wole, Yuda kɛnu faga tɛrr! A ko a si a ma, wo furinu ni ma konanu anubɛ sogenu de-nyini-fan la.

Yɛrɛmaya 22:19

Yerusalɛm kɛnu si i furi sagan dugi la. Anu si a lakɛ a rɔ Yerusalɛm soe tarɛ kɔma iko sofɛlɛ.”

Yɛrɛmaya 25:33

Wati wo, Mari ara minnu faga a fondo-bɔnɛ la, wonu furi-bolokanɛ si to belenna duninya-tonko-nanɛ bɛɛ rɔ. Mɔgɔ-wo-mɔgɔ ti anu di. Anu togonna ti taran. Anu bolokanɛ si to belenna iko ninki-nyɛ.

Yɛrɛmaya 34:20

Wo faga-sɔgɛ ye wo yoge minnu na, a ko a si wo don wonu bolo. Sogenu anubɛ konanu si to wo suyi dɔnna.

Yɛrɛmaya 9:21

Sayɛ ara don wundan la. A ara don mala so-latankanɛnu tɔ. Mala dan minnu bi tolonna luyinu ma, sayɛ ara ban wonu matɔnbɔnna ma kɔrɔ. Keminɛ minnu bi kundɛnna barɛnu tɔ, ale sayɛ ara ta wonu na pon!

Yɛrɛmaya 9:22

Mari ko n ni a fɔ wo ye ko furinu bolokanɛ ye tala iko ninki-nyɛ. Anu bolokanɛ ye tala gbɛ ma iko fui-fen-tɛgɛlɛ ye bolofɛ tola a kɔma nya min. A madɛnna fenfen ti taran.

Isikiyɛli 29:5

Wo kɔma, n si anubɛ yɛgɛ wonu nafili wulɛ rɔ pirr! A si to sani dugu ma wo nya tasakara, ka a togonbɛlɛ to! N si a latenbi soge anubɛ konanu ma. Wonu si to a dɔnna nyɔ.

Isikiyɛli 39:4

Ale Mansa Kɔgi anubɛ ala kɛlɛ-dannu anubɛ a dɛnbɛnɛnu si faga Isirɛla kɔnkɛ wonu tɔ. N si a ma, anu suyi wonu ni ma soge anubɛ konanu beli-fan la.

Tɔn-Fɔɛ-Fila-Nyɔgɛ 28:26

Wo furinu si ma konanu anubɛ sogenu dɔn-fan la. Mɔgɔ ti taran nyɔ min si wonu gben wo furinu ma.

Tɔn-Fɔɛ-Fila-Nyɔgɛ 8:20

Ni wo ma Marita kumɛ bira, wo ye sibole doi kɛnu fagala nya min, wole fanan bi fagala wo nya na le.”