Yɛrɛmaya 7:3 - ALLALA KUMƐ

³ Mari Sɛnbɛ-Bɛɛ-Tigi, Isirɛlata Alla, kɔni, wo ye a fɔla ko wo ni yɛlɛma ka don ko-latelenni-kɛ rɔ. Ni wo ya wo ma, a si sɔn wo ni to sigini yan.

Yɛrɛmaya 7:3 Iomraidhean Croise

2 Mansɛnu 17:13

Mari ya kilayɛnu anubɛ nɛbinu sɔ Isirɛla kɛnu anubɛ Yuda kɛnu makawandi tinɛ nun. A ya a fɔ anu ye nun ko, “Wo ni wo sɔn-yogomɛnu boloka ka nta kumɛnu bira. N bara nna tɔnnu di wo benbanu ma nun, ado nna nɛbinu bara wo bɛɛ fɔ wo ye nun.”

Ɛsira 10:11

Woletɔ wa wo sɔ wola hakɛ la ma benbanuta Mari Alla ye. Wo ni a sakorɔ-koe ma. Wo ni sibolo-gbɛrɛkɛ-musi kɛnu boloka ka fara nyamanita-mɔgɛ kɛnu na feufeu!”

Hɛnkilimaya-Kumɛnu 28:13

Mɔgɛ min si a hakɛ dogon, wo tigi ti ta yarɔ. Kɔnɔ mɔgɛ min bi a hakɛ bɛɛ labɔla gbɛ ma ka anu boloka, Mari si kinikini wo tigi ma.

Aiseya 55:7

Karagbɛlɛ bɛɛ ni a kɛ-nya boloka ka anu miriyanu yɛlɛma. Anu ni anu ya-lamunun mata Mari Alla la, a si kinikini anu ma ka anu makoto feu!

Yɛrɛmaya 17:25

A ko ni wo ya ata sereya kɛnu bira, min bi mala, wo le kɛ la. Mansɛ minnu bi sigila Mansa Dawuda gbɛ rɔ, wonu si to tenbila Yerusalɛm don-dɛ kɛnu na anubɛ anuna mɔgɔ-banu. Wonu si to kirindinu anubɛ soeenu naburila. Anu si to tala wole, Yuda anubɛ Yerusalɛm nyama tɛma yan. Mɔgɛnu si to sigini Yerusalɛm soe burɔ yan tolon!

Yɛrɛmaya 18:11

A ko n ni a fɔ wole, Yerusalɛm anubɛ Yuda nyamanita-mɔgɛ toe ye ko a ye kasarɛ rabɛn-tinɛ wo ye kaka. A ko wo ni wo fara wola karagbɛlɛya-koenu na wo ye min kun na kaka. Wo ni wola kɛ-nyanu yɛlɛma ka ko-latelennɛ kɛ.

Yɛrɛmaya 18:8

Kɔnɔ ni sibole wo ya a kan-kɔ sɔ a hakɛ la, a ko a si a fonde yɛlɛma. Kasarɛ min tabɛnnɛ sibole wo kan ma nun, a ko a ti wo sigi a ma tun.

Yɛrɛmaya 26:13

Fɔ wo ni wo kɛ-nya anubɛ wola ko-ladan-nya yɛlɛma. Wo ni wota Mari Alla sako kɛ. Ni wo ya wo ma, ale Mari si a miriya yɛlɛma wo wara la. A ye kasarɛ min nanala wo kan ma, a si tɔn sigi wo la.

Yɛrɛmaya 35:15

A ko a ara mɛ ala wɔli-kɛlɛnu sɔla wo wara ala nɛbinu, kɔni, alako wo ni wo fara karagbɛlɛyɛ la ka don ko-latelenni-kɛ rɔ. Anu ya wo lasɛgi bɛsi-kɔ-koe ma alako wo ni a laban nyamanɛ kɛ rɔ, a ya min di wobɛ wo benbanu ma, kɔni. Kɔnɔ a ko hali wo, wo ti wo tole masɔ a la ka a kan to a gbɛ rɔ.

Yɛrɛmaya 35:16

A ko Yonadabu mamanɛnu bara anu benba kan to a gbɛ rɔ kɔnɔ wole, Isirɛla mɔgɛnu ma sɔn ale Mari kan tola a gbɛ rɔ.

Yɛrɛmaya 4:1

Mari ko ni sɛgi-sɔgɛ ye wole, Isirɛla mɔgɛnu na a ma, nba, wo sɛgi a ma. Kɔnɔ a ko wo ni wola bɛsɛnu nakɛ a rɔ bawo anu gbo a ye. Wo kana ta wo kun fɛ.

Yɛrɛmaya 6:16

Mari ko wole, ata mɔgɛnu sɔnɛ kila-faran rɔ. Wo ni wo yɛ lakalan. Wo ni ata kila-kɔrɛ manyinika. A ko wo ni kila-nyimɛ manyinika alako wo ni ta wo fɛ nya min, ado ni wo bɔra kilɛ wo fɛ, wo yisi la si fɛrɛ. Kɔnɔ hali wo, wo bannɛ bɔla kila-nyimɛ wo fɛ.

Yemesi 4:8

Wo ni wo gbɛrɛn Alla ma. A si a gbɛrɛn wo ma. Hakɛ-tiginu, wo ni wo bole laku feu! Wole nafiginu, wo ni ko-yogomɛ bɔ wo sɔndɔmɛ rɔ feu!