Yɛrɛmaya 7:23 - ALLALA KUMƐ

²³ A ko a ma dan wo dɔrɔn ma de! A ya a fɔ anu ye fanan ko ni anu ya ata kumɛ bira, ale si ma anuta Alla la. Anu denu fanan si ma ata mɔgɛnu na. A ko ni anu ya ala tɔn bɛɛ bira, ko-nyimɛ si to mala anu ye.

Yɛrɛmaya 7:23 Iomraidhean Croise

Yobu 36:11

Ni anu ya Allata kumɛ bira ka ata wɔlɛ kɛ, a si a ma, anu ni taran anu diya yisi-kimɛ rɔ.

Yaburi 119:3

Anu ti ko-yogoma ma. Anu bi tagamana Marita kilɛ le fɛ.

Yaburi 40:6

Ile sa nyinina sarakɛnu anubɛ kɔ-fannu ma ma bolo. I sa ma matarala saraka-mintantɛnu ma, ma si minnu gbuya mintan saraka-mintan-tinɛ kuma. Hali sarakɛ minnu si mala hakɛ bɔ ma ma, i ma ma matara wonuna ko ma. Kɔnɔ min kolo wo dama ko, i wara n tole laka alako n ni ita kumɛ lamɔɛn.

Yaburi 81:13

E, nta mɔgɛnu Isirɛla, alako nun wo ya wo tole masɔ n na, wo si diya n ye. Alako nun wo ya nna kumɛnu bira nun.

Bɔ-Koe-Iyipiti 15:26

Mari ko, “Wo ni wo tole masɔ n kuman-kan la a kin na! Koe minnu telennɛ nde, Mari Alla yala, wo ni wonu ma ka nta tɔn bɛɛ bira. Ni wo ya wo ma, n ya kirayɛ minnu sigi Iyipiti kɛnu ma nun, n ti wo fenfen sigi wole ma bawo nde, Mari le wo rakɛndɛyalɛ la.”

Bɔ-Koe-Iyipiti 16:32

Musa ya Mari kuman-kan latenbi Isirɛla mɔgɛnu ma ko, “Mari ko ma ni dɔn-fan kɛ pani-kunbɛ-nya kelen namara mala dannu anubɛ ma kegeyɛnu yarɔ. Mari ko a ya ma labɔ Iyipiti nyamanɛ rɔ tumɛ min, a ya ma de-nyini dɔn-fan min na wulɛ rɔ, anu ni wo yen anu yɛ la.”

Aiseya 3:10

Mɔgɔ-telennɛnu si sewa, ado anu bara-koe si ta yarɔ. Anu si anu tɔrɔ-gbɛnu tɔnɛ sɔrɔn.

Yɛrɛmaya 11:4

A ko a ye kumala sarama-kan wara-koe la ale Mari anubɛ ma benbanu ya min kiri. Anu bɔɛ Iyipiti, anubɛ Alla nara to sarama-kan kirila anu nyɔgɔn tɛma. A ko Iyipiti manɛ wo ye iko sulubondɔn. A ya a fɔ Isirɛla mɔgɛnu ye ko ni anu ya a kan to a gbɛ rɔ, ale si ma anuta Alla la, anu denu fanan si ma ata mɔgɛnu na.

Yɛrɛmaya 11:7

A bɔɛ wo benbanu na Iyipiti, a ya anu makawandi ko anu ni a kan to a gbɛ rɔ. A ko a mɛra anu makawandi-siyaman kɛla ha bi!

Yɛrɛmaya 13:11

Iko kufama gbɛrɛnnɛ mɔgɛ ma nya min, Mari ko a ye a fɛ nun wole, Isirɛla mɔgɛnu anubɛ Yuda mɔgɛnu ni wo gbɛrɛn a ma wo nya na le. A ko a ya wo ma le alako wo ni ma a halalɛ la. Mankan wo, gbiliyɛ wo, matɔgɛ wo, anu si a ma, ale Mari ni wo bɛɛ sɔrɔn mɔgɛnu bolo. Kɔnɔ a ko wole, ata mɔgɛnu ma sɔn wo tole masɔla a la.

Yɛrɛmaya 22:21

Fen bi wo bolo wati min, Mari kumara wo ye kɔnɔ wo ma wo tole masɔ a la, ado kebi wo dennɛ pɔipɔi, wo tora a mala wo nya. Lun kelen, lun tala, wo ma Mari sako kɛ.

Yɛrɛmaya 22:3

Mari ko wo ni ko-latelennɛ kɛ. A ko mɔgɛ min kensunnɛ, wo ni wo tanka a kensunte ma. A ko a sundan wo, a kelenni wo, a kɛɛ-musu wo, wo kana anu bira boloko-yogomɛ-kɛ. Min ma ko-yogomɛ kɛ, wo kana wonu faga kan-tinɛ kɛ rɔ.

Yɛrɛmaya 24:7

A ko a si a ma, ale Mari-lɔn-sɔgɛ ni anu bira. Anu si ma ata mɔgɛnu na. Ale fanan si ma anuta Alla la. A ko ni i ya a yen, a ye wo mala bawo anu ba sɛgi anuna nyamanɛ rɔ tumɛ min, anu si sɛgi ale ma anu yisi bɛɛ la.

Yɛrɛmaya 31:33

A ko sarama-kan-kurɛ min bi taranna anubɛ wole, Isirɛla mɔgɛnu tɛma, wo le kɛ la. A ko a si ata tɔnnu sɛbɛ wo yisi rɔ. Ale si ma wota Alla la. Wole si ma ata mɔgɛnu na.

Yɛrɛmaya 32:23

Nyamanɛ kɛ sɔrɔn anu bolo, anu ma ita tɔnnu bira. Anu ma i kan-wo-kan bira. Wo le ya a ma, i ya kasarɛ latugun anu ma.

Yɛrɛmaya 38:20

N ya a fɔ a ye ko, “Anu ti i don anu bolo. I yandi, Mari kan kɛ bira. Ni i ya wo ma, i wara-koe bɛɛ si ta a kilɛ fɛ. I si to i niyi la.

Yɛrɛmaya 42:6

A diyara ma ye wo, a ma diya ma ye wo, fɔ ma wa Mari Allata kumɛ bira le ma ya min madiya-koe fɔ ile Yɛrɛmaya ye. Koe bɛɛ ra si bɛn ma ma, ni ma ya ma Mari Allata tɔnnu bira.”

Sɛfanaya 3:2

Yerusalɛm kɛnu sa anu tole masɔla Mari la. Anu ti sɔn ka kolo a ma. Anu ma anu yigi sa Mari rɔ. Anu ti a matara anu dɛnbɛn-koe la.

Sakaraya 6:15

A ko minnu bi wula-yan la pon, wonu si na wo dɛnbɛ Mari Bato-Bon-sɔɛ la. A ko Bato-Bɔn kun ba don tumɛ min, wo ye a lɔnna wo le ma ko Mari Sɛnbɛ-Bɛɛ-Tigi ya nde, Sakaraya sɔ wo ma. Kɛnu si ma, ni wo ya wota Mari Alla kan to a gbɛ rɔ.

Sakaraya 7:7

Wo tumɛ Yerusalɛm sabatinɛ, ado a lafanɛ mɔgɛnu na, Mari ya kuma kelan kɛ le fɔ ala fɔlɔ-nɛbinu ye nun. Wo wati rɔ, mɔgɛnu sigini ma soela foolɛ dɔrɔn tɔ. Anu siginɛ tala ha Iyipiti nyamanɛ dan la anubɛ gburukulinu bi kan min tele-yigi wara la.

Romu 16:26

kɔnɔ kaka, tonyɛ wo ara bɔ gbɛ rɔ nɛbinuna sɛbɛlɛnu tɔ. Sibole bɛɛ nara ke gbundi wo lɔnna Allala kumɛ fɛ, ado Alla ye nyɔ habadan! Woletɔ mɔgɛnu ni dɛnkɛninya a ma ka ala kumɛ bira.

2 Kɔrɛnti 10:5

anubɛ anu wasinɛ fan min bɛɛ la, minnu si a ma, mɔgɔ kana na Alla lɔn, ma ye wonu kasarala le pɔ! Ma ye kɛlɛ-kɛ-fan wonu nawɔlila ka miriya bɛɛ ladon Kirasitita marɛ kɔrɔ alako anu ni ala kumɛ bira nya min.

Tɔn-Fɔɛ-Fila-Nyɔgɛ 11:27

Wota Mari Alla ya tɔn min di wo ma bi, ni wo ya wo bira, wo si duwɛ kɛ sɔrɔn.

Tɔn-Fɔɛ-Fila-Nyɔgɛ 13:4

Wo si bila wota Mari Alla fɛ ka a gbiliya bɛrɛkɛ ka ata kumɛnu anubɛ ata tɔnnu bira. Wo ni ale bato ka ma lanaya-mɔgɛnu na ale ye.

Tɔn-Fɔɛ-Fila-Nyɔgɛ 13:5

Ni wɔlɔyi anubɛ kiyo-kɔrɔ-takarannɛ do ya wo labila kɛwuyɛ do la alako wo ni murutiya Alla ma, wo si wo tigi faga. Wota Mari le ya wo kunka ka wo labɔ Iyipiti nyamanɛ rɔ. Maritɛ le wole la gbɛ! Mɔgɔ-sufa wo yogo. A sɔgɛ ye mɔgɔ-sufa wo la ka wo labɔ Allata kilɛ fɛ. Wo si a faga alako ka ko-yogoma-sufa wonu nabɔ wo tɛma.

Tɔn-Fɔɛ-Fila-Nyɔgɛ 30:2

Ni wobɛ wo kegeyɛnu sɛgira wota Mari ma wo sɔndɔmɛ bɛɛ la ka ata tɔnnu bira n bara min bɛɛsi fɔ wo ye kɛ la bi,

Tɔn-Fɔɛ-Fila-Nyɔgɛ 30:20

Wo ni wota Mari Alla keni wo sɔndɔmɛ bɛɛ la ka ma telenbagɛnu na Alla ye ka ata kumɛnu bira. Wo le si a ma, Mari ya nyamanɛ min lanyiri kiri wo benbanu ye, Iburayima anubɛ Isiyaka anubɛ Yakoba, kɔni, wobɛ wo kegeyɛnu si simayɛ sɔrɔn ka mɛ sigini nyɔ rɔ.”

Tɔn-Fɔɛ-Fila-Nyɔgɛ 30:8

N bara wota Mari Allata kumɛ minnu di wo ma bi, wo si to wonu birala.

Tɔn-Fɔɛ-Fila-Nyɔgɛ 4:40

N bi tɔn minnu dila wo ma bi, wo ni wonu bira a kila-bɛrɛbɛrɛ fɛ. Ni wo ya wo ma, ka a bi wole ma ka a sigi wo kegeyɛnu na, koe bɛɛ si bɛn wole ma. Wota Mari Alla ye nala nyamanɛ min natenbila wo ma kɛ la, wo si simayɛ sɔrɔn wo rɔ. A si to wo bolo habadan!”

Tɔn-Fɔɛ-Fila-Nyɔgɛ 5:16

“Wota Mari Alla ko wo ni wo fanu anubɛ wo nanu gbiliya, woletɔ a ye nala nyamanɛ min dila wo ma, wo si simayɛ sɔrɔn ka sigi hɛrɛ rɔ nyɔ rɔ.

Tɔn-Fɔɛ-Fila-Nyɔgɛ 5:29

Ni a taranta, anu bi kilanna ka le tuma-wo-tuma ka nna tɔnnu bira, wo si diya n ye. Wo si a ma, anuta koe bɛɛ ni ta a kila-bɛrɛbɛrɛ fɛ, hali ka a sigi anu mamanɛnu na. Kɛ si ma habadan-koe la anu ye.’

Tɔn-Fɔɛ-Fila-Nyɔgɛ 5:33

Wo ni a bɛɛsi bira a kilɛ fɛ, woletɔ wo ye tala nyamanɛ min tɔ Mari ye nala min dila wo ma, wo si simayɛ sɔrɔn nyɔ. Koe bɛɛ si ta a kilɛ fɛ wo bolo.”

Tɔn-Fɔɛ-Fila-Nyɔgɛ 6:3

Wole Isirɛla mɔgɛnu, ni wo si tɔn kɛnu lɔn de a kila-bɛrɛbɛrɛ fɛ ka anu bira, koe bɛɛ si ta a kilɛ fɛ ka diya wo la. Wo bɔnsɔn si siyaya nyamani-hakikɛ wo rɔ iko wo benbanuta Alla kɛ ya lanyiri kiri anu ye nya min nun.

Hiburunu 5:9

ado kuma-birɛ wo kanbalinɛ min kɛ, minnu bi ale fananta kumɛ birala, a si ke wonu kisila habadan!

1 Samuwɛli 15:22

Samuwɛli ya a fɔ a ye tun ko, “Nfen si Mari hɛnɛ? Kɔ-fannu anubɛ saraka-mintantɛnu ka ata kuma-birɛ, wa? Yanni i ni saga-hakikɛnu ma sarakɛ la Mari ye, a fisa, i ni Marita kumɛ bira.