Yɛrɛmaya 7:20 - ALLALA KUMƐ

²⁰ Ma Tigi Mari ya a fɔ ko a si ata fondo-bɔɛ labɔn kan-tinɛ kɛ ma. A hadama-den wo, a sogo wo, a kɔlɔma wo, a fui-fen wo, a si ata fondo-bɔɛ rawuya wonu dama ma. A ko ata fondo-bɔɛ si ma iko tɛ, ado mɔgɔ-wo-mɔgɔ ti ke tɛ wo ladufenna.

Yɛrɛmaya 7:20 Iomraidhean Croise

2 Mansɛnu 22:17

Yerusalɛm kɛnu ya anu ban ale Mari la ka sarakɛ bɔ anubɛ ka isɛnti mintan anuna bɛsɛnu ye. Woletɔ Mari fonde ara bɔ. A ko fenfen sa nyɔ min si ala fondo-bɔɛ makimɛ.

Aiseya 10:17

Alla min bi kala-malanyɛ la Isirɛla mɔgɛnu ye, wo ko a si ma ta-wɔnkɔrɔmɛ la. Isirɛla mɔgɛnuta Mari-sɛnimɛ si yɛlɛman ta-mɛlan la. A ko a si fan bɛɛ mintan tele kelen kɔrɔ hali wɔnɔ-firɛ.

Aiseya 42:25

Woletɔ a ya a ma, ma ara ata diminya-makawanɛ lɔn anubɛ ka kɛlɛ-masibɛ lɔn fanan. Ata diminyɛ ya mintannɛ kɛ Isirɛla nyamanɛ rɔ iko tɛ kɔnɔ ma sa a kalama. Ma ma hɛnkili sɔrɔn wo fenfen ma.

Aiseya 66:24

Minnu bi Mari kan ma, Mari-batolɛnu si ta wonu furinu bolokanɛ yen belenna soe kɔma. Tunbi minnu bi wonu dɔnna, wonu ti faga. Tɛ min bi furi wonu mintanna, wo ti dufen. Furi wonu mafɛlan ti a diya don mɔgɛ rɔ.

Yɛrɛmaya 11:16

Mari le ya wole kele ko ɔlifi-kɔn-yigirikiri-wɛ min gbɔɛ tɔntɔnnɛ a la, ado a mafɛlɛn di. Kɔnɔ ni Mari ya tɛ sɔgɔ a la a mintan-kan si ta pon! A bolɔnnu si mintan gburr!

Yɛrɛmaya 12:4

Nyamanɛ kɛ si to diyi kun na ha muntuma? Nyamanɛ kɛ bin-nafɔsɔnɛ ni to ha muntuma? Ka a tɛgɛ mɔgɛnuna karagbɛlɛyɛ ma, sogenu anubɛ konanu bara ban fagala. N yogenu bi a fɔla ko, “Ma wara-koe ye nya min, ma ma la a la ni Alla ye wo kalama.”

Yɛrɛmaya 14:16

A ko nɛbi wonu bi kumala minnu ye, wonu furinu na si kɛ a rɔ Yerusalɛm kila-kunyɛnu na. Anu tɔgɔ si to kɔnkɛ anubɛ anu yogenuna faan la. Anuna musu wo, anuna den wo, anu togonna-wo-togonna ti taran. A ko a si anu tɔrɔ feu, iko a bɛnta, anu ni tɔrɔ nya min.

Yɛrɛmaya 17:27

Ni wo ya wo tui ka to dunɛnu madununa Sulen-Tele ma ka tenbi anu na Yerusalɛm don-dɛnu na, Mari ko a si ta fitinɛ layigi Yerusalɛm don-dɛnu na min ti dufen muk! Hali wola kan-tina-latankanɛnu si mintan gburr!

Yɛrɛmaya 17:4

A ko a ara nyamanɛ min di wo ma, wo si foo wo la, ado wo gbɛ le wo la. A ko a si a ma, wo yogenu ni wo ma yɔɔn la. Wo si taran yɔɔnyɛ wo rɔ nyamanɛ do rɔ wo ma min lɔn mumɛ! Ni wo ara a yen wo ye mala, wo mara bawo a fonde kaliyanɛ iko tɛ min si to mintanna kudai!

Yɛrɛmaya 18:23

Mari, ile ya n faga-koe lɔn anu bolo. I ka kinikini anu ma anuna ko-yogomɛnuna ko la. I kana anu hakɛ makoto. I ni anu nabɔ anuna sɔ-tinɛnu tɔ. Anu tɔrɔ i fondo-bɔnɛ la.

Yɛrɛmaya 42:18

“Mari Isirɛlata Alla ko iko a fonde bɔra Yerusalɛm kɛnu kuma nya min, ni wo tara Iyipiti nyamanɛ rɔ, a fonde ye bɔla wo kan ma wo nya na le. A ko min ba wo yen, wo kuma si tɛgɛ. Mɔgɛnu si wo bira boloko-yogomɛ-kɛ ka wo tɔgɛ ma dankali-kɛ-fan la. A ko wo ti kan-tinɛ kɛ yen tun!

Yɛrɛmaya 44:6

Woletɔ a ko a ya a fonde labɔn Yuda soenu anubɛ Yerusalɛm soe burɔ ka soe wonu mintan gburr! Ha bi, soe wonu bi tonbonyɛ la.

Yɛrɛmaya 6:11

Kɔnɔ n dɛ la ara fa Marita fondo-bɔɛ la. N ti ke a birala n tɔ tun. Mari ko ala fondo-bɔɛ ni bon dennɛnu ma minnu bi tolonna soe tɔnkɔnnu tɔ. A ni bon kemini-mɛsɛnu ma minnu nadɛnnɛ kan-tina-kelen. Ala fondo-bɔɛ si keinubɛ ala nyaganɛ bira anu nyɔgɔn fɛ. A si kɛmɔgɛnu anubɛ musu-kɔrɛnu fanan bira.

Yɛrɛmaya 6:12

Wo halala-bɔnnu si to mɔgɔ-gbɛrɛnu bolo. Wola musinu anubɛ wola wɔli-kɛ-tinɛnu si di mɔgɔ-gbɛrɛ ma. A ko a wa a kɔɛn kɔrɔbi, a si wole, Yuda mɔgɛnu tɔrɔ.

Yɛrɛmaya 8:13

Mari ko a si wola ki-fannu bi wo bolo. Wola ki-fen-gbɔ-wo-gbɔ ti taran a la. Toro-gbɔ-wo-gbɔ ti taran a la. Hali anu yanba-kunyɛ si yalan. Mari ko a ara min bɛɛ di wo ma nun, a si wo bɛɛ toronde wo la.

Nimisa Koe 4:11

Mari ya ata diminyɛ bɛɛ labɔ ma kan ma. A ya tɛ tugu Yerusalɛm soe la ka a mintan gburr!

Isikiyɛli 22:22

Anu si lee Yerusalɛm soe burɔ bandin, iko wodi-gbɛ si lee nya min sulubondɔn rɔ. Anu bi a lɔnna wo le ma ko nde, Mari ara kɔrɔtɔ anu ma.”

Isikiyɛli 7:12

“Wati ye nala kɔɔ! Fen-sannɛnu kana nyagalen anuna tɔnɛla ko la. Fen-mayiralɛnu yisi kana tɔrɔ anuna bɔnɛla ko la bawo nde, Marita tɔrɔyɛ si taran anu bɛɛ kuma nya-kun-kelen.

Isikiyɛli 7:14

Hali kɛlɛ-buri wa fɛ alako kɛlɛ-dannu ni anu tabɛn yɔnyɔn, mɔgɔ-wo-mɔgɔ ti ta kɛlɛ rɔ bawo nna diminyɛ ye Isirɛla mɔgɛ bɛɛ kuma nya-kun-kelen.”

Daniyɛli 9:11

Male Isirɛla mɔgɛ bɛɛsi ya ila tɔnnu tinya. Anu ma sɔn ila kumɛ birala mumɛ! Ma ara hakɛ kɛ i la, woletɔ ita wɔli-kɛla Nɛbi Musa ya dankɛ minnu sɛbɛ ata buku rɔ, ile le ya a ma, dankɛ wonu ya ma dama bira.

Saraka-Masɔlɛnuta Tɔnnu 26:28

n fonde si bɔ wo kuma ka tenbi a nani nyɔgɛ wo la.

Nehami 1:6

Alla fonde wa bɔ tumɛ min, yon si to a niyi la worɔ? A fondo-kaliyanɛ ye tɛ min nabɔla, yon si ke wo rakɔnɔna? Mari wa fondo-magboyɛ labɔ iko ta-mɛlan, farɛnu si ma gbangban la a kɔrɔ.

Sɛfanaya 1:2

Mari ya a fɔ nde, Nɛbi Sɛfanaya ye ko a si na duninya rakolonya feu!

Sɛfanaya 1:3

A ko a si nima-fan bɛɛ ban fegba, a hadama-den wo, a sogo wo, a koni wo, anubɛ a yɛgɛnu. A ko a si karagbɛlɛnu wara-koe ka-a-la. Hali mɔgɔ-den-kelen ti to a niyi la. Ale Mari kuman-kan le kɛ la.

Sakaraya 7:12

ka wo yisi gbɛlɛya iko kuri bawo a ko ale Mari Sɛnbɛ-Bɛɛ-Tigi ya ala nɛbinu nana ka wo karan min ma ata Niyi baraka rɔ, wo ma sɔn wo bira-koe ma. Woletɔ ale fonde bɔnɛ.

Malakayi 4:1

Mari Sɛnbɛ-Bɛɛ-Tigi ya a fɔ ko wati ye nala, mɔgɔ-wasinɛnu anubɛ karagbɛlɛ damasi si mintan gburr iko bin-gbalɛ.

Matiyu 3:12

Ala fɛrɛ labɛnnɛ ka ala fui-fan bɛɛ rafɛ gbere-kole ma. A si a bɛrɛ ladɛn ka a layɛlɛ birɛ la kɔnɔ a si a fofe anubɛ a fɔrɔn mintan tɛ la, ado tɛ wo ti dufen dɛɛ!”

Lankɛnimayɛ 14:10

Allata diminyɛ si wo bira iko baan. Ala diminyɛ min manɛ iko baan-sɛnbɛmɛ, a ara wo wuya ala diminya-yi-lafɛ rɔ. Min bɛɛ ye wo minna, wonu si nyankankantan sɔrɔn tɛ anubɛ munku-gbɛ bolo melika-sɛnimɛnu anubɛ saga-dan-yakɔrɔ.