Yɛrɛmaya 7:16 - ALLALA KUMƐ

¹⁶ Kɔnɔ Mari ya a fɔ n ye ko nde, Yɛrɛmaya kana madiyali kɛ wole, Yuda kɛnu ye. A ko n kana di wola ko la. N kana fenfen matara wo ye. A ko n kana a madiya wo dɛnbɛn-koe la bawo a ti a wɔlɔ matɔlɔ wola ko la mumɛ!

Yɛrɛmaya 7:16 Iomraidhean Croise

2 Samuwɛli 8:18

Yɛhoyadala den Bɛnaya, wo le ye Mansa Dawuda makandannɛnu kun na. Mansa-makawandilɛ le mansɛla den-keinu na.

Bɔ-Koe-Iyipiti 32:10

Woletɔ i kana n nakala. Nta diminyɛ si wara anu kuma ka anu ban sa! N si ile ma bɔnsɔn kurɛ dabirɛ la.”

Aiseya 1:15

Wo tenbi wo bolenu sigila a tɛrɛna madiyali-kɛ-tinɛ tumɛ min, Mari ko a ti wo mafɛlɛn defan! A ti a wɔlɔ matɔlɔ wo la bawo mɔgɔ-yele ye wo bole ma.

Yɛrɛmaya 11:14

Mari ko nde, Yɛrɛmaya kana madiyali kɛ wole ye. A ko n kana n dɛ sa-a-rɔ wola ko la, ni wo ma, ka tarali kɛ wo ye. Wo wa Mari rakele tɔrɔyɛla ko la, a ko a ti a wɔlɔ matɔlɔ wo la.

Yɛrɛmaya 15:1

Wo kɔma, Mari ya a fɔ nde, Yɛrɛmaya ye ko hali Nɛbi Musa anubɛ Samuwɛli ya madiyali-kɛ wole, Yuda mɔgɛnu ye, a ko a ti kinikini wo ma. A ko wole ni wo masɛgi a la fasi! Wo ni wo mata pon!

Yɛrɛmaya 15:6

Mari ko wole, Yerusalɛm mɔgɛnu bara wo ban a la, ado wo ye tola tala le tun. Wo sa wo yɛ lasɛgila. Woletɔ a ko a ye wo dan labirala ka wo tɔrɔ. A ko wola koe min nakɔlɔn-kɔlɔnnɛ a burɔ, a ti ke wo birala-a-rɔ tun.

Yɛrɛmaya 18:20

A ma kin, mɔgɛ ni ko-nyimɛ yili sara ko-yogomɛ la. Anu bara ban denkɛ sinna n kɔrɔ n faga-koe la. Mari, i miri. Nde le sɔra i yakɔrɔ nun. N ya i madiya alako i ni ko-nyimɛ kɛ mɔgɛ kɛnu ye. N ya i madiya alako i fonde kana bɔ anu kuma.

Yɛrɛmaya 4:28

Nyamanita-mɔgɛnu si anu dɛ sa-a-rɔ lungbɔn! San-kole si fin. Mari ko kɛ ye mala le bawo ale ti a kuman-kan dɔn. A ara ban a latɛgɛla, ado a ti a miriya yɛlɛma.

Yɛrɛmaya 7:17

A ya n manyinika ni n sa a yenna wo ye min kun na Yerusalɛm luyinu ma anubɛ Yuda soe toenu burɔ.

Maika 3:4

Kɔnɔ wo wati si na, wo si di Mari dala kɔnɔ a ti a wɔlɔ matɔlɔ wola madiyalɛnu na. A si a kolonkɛ dogon wo ma bawo wo ara ko-yogomɛnu dan-natenbi.

Tɔn-Fɔɛ-Fila-Nyɔgɛ 9:14

I kana n nakala de! N si mɔgɛ kɛnu faga kelenna! Mɔgɔ-wo-mɔgɔ ti anu miri anu ma tun! N si anu bara-koe lato yen!’ Wo kɔma, Mari ya a fɔ ko, ‘N si a ma, ile ni bɔnsɔn-kurɛ dabira fanka ye minnu na, ado wonu si siyaya kɛnu ko.’

1 Yɔni 5:16

Min ba a na-kelen-nyɔgɛ yen hakɛ kɛla, min ti a ma, a ni foo habadan-nimayɛ la, a ni Alla madiya mɔgɛ wo ye. Alla si niyi di hakɛ-tigi wo ma. Minta hakɛ ti a ma, a ni foo habadan-nimayɛ la, n bi wonu denu ma. Kɔnɔ hakɛ do ye nyɔ min si a ma, a ni foo habadan-nimayɛ la. N ma a fɔ ko wo ni Alla madiya wola ko la.