Yɛrɛmaya 52:8 - ALLALA KUMƐ

⁸ Kɔnɔ hali wo, Babilɔn kɛlɛ-dannu ya anubɛ anuna mansɛ sagaran. Anu ya Mansa Sɛdɛkaya bira gbɛkole do ma Yɛrikɔ soe dafɛ. Ala kɛlɛ-dannu ya a boloka ka a to a yogenu bolo la.

Yɛrɛmaya 52:8 Iomraidhean Croise

Yɛrɛmaya 21:7

Kɔnɔ Mari ya a fɔ fanan ko ale Sɛdɛkaya wo, ala mɔgɔ-banu wo, hali kiraya-fitinɛ anubɛ kɛlɛ-fitinɛ anubɛ kɔnkɔ-fitinɛ foora wole minnu na wo, Mansa Nɛbukanasa faga-sɔgɛ ye mɔgɛ minnu na, wonu denu si ta wo la, ado ale mansɛ ti kinikini wo ma ka wo fenfen yamasansan. A si wo damasi faga tɛrr! Mari nyɛrɛ kan le kɛ la.

Yɛrɛmaya 34:21

Ale Yuda Mansa Sɛdɛkaya anubɛ ala mɔgɔ-banu faga-sɔgɛ ye a yoge Babilɔn kɛlɛ-dan minnu na, a ko a si wonu don wonu bolo. Wonu bara anu fara wo kɛlɛ la, a ko a si wo kunyɛ don wonu bolo.

Yɛrɛmaya 37:17

Wati-tenbinɛ, Mansa Sɛdɛkaya ya n kele ala bolɔn la. N ke, a ya n kele n dan na ka n manyinika ni Marita sarakanɛ ye n bolo. N ya a fɔ a ye, n ko, “Ɔn. Mari si a ma, Babilɔn mansɛ ni i bira.”

Yɛrɛmaya 37:18

Wo kɔma, n ya a manyinika ko, “N bara nfen tinya wobɛ ila mɔgɔ-banu anubɛ mɔgɛ kɛnu ma gben, min bara a ma, wo ara n sa yele la?

Yɛrɛmaya 38:23

N ko, “Min sanɛ wo kuma, anu bi tala ila musinu anubɛ ila dannu na Babilɔn kɛnu bara. Ile nyɛrɛ-nyɛrɛ kunyɛ ti bɔ anu bolo. Babilɔn mansɛ si ta i la. Anu si soe kɛ mintan gburr!”

Yɛrɛmaya 39:5

Kɔnɔ Babilɔn kɛlɛ-dannu ya anu sagaran ka ale Mansa Sɛdɛkaya bira gbɛkole do ma Yɛrikɔ soe dafɛ. Anu tara a la Nɛbukanasa wara Ribila soe burɔ Hamati nyamanɛ rɔ. Nɛbukanasa ya a yiliki-koe latɛgɛ nyɔ le.