Yɛrɛmaya 5:31 - ALLALA KUMƐ

³¹ Nɛbinu sa fenfen fɔla foninyɛ kɔma. Saraka-masɔlɛnu bi anu nyɛrɛta fanka le lawɔlila, ado wole, Mari nyɛrɛta mɔgɛnu diyana-koe le wo la. Kɔnɔ kɛ damasi laban si ma wo bolo nfen na?

Yɛrɛmaya 5:31 Iomraidhean Croise

1 Mansɛnu 22:6

Wo le ya a ma, Mansa Ehabu ya ala nɛbi mɔgɔ kɛmɛ nani nyɔgɔn sufa kele ka wonu manyinika, a ko, “N ni ta Ramɔti kɛnu kɛlɛ, ka, n ka ta?” Nɛbi wonu ko, “Ta anu kɛlɛ. Mari si a ma, i ni nɔ-ko sɔrɔn anu ma.”

Hɛnkilimaya-Kumɛnu 17:4

Karagbɛlɛ si a tole masɔ a karagbɛlɛ-nyɔgɛ kuman-kan la. Foninya-fɔlɛ si a tole masɔ a foninya-fɔ-nyɔgɛ la.

Aiseya 10:3

Alla wa a lasɔ wole tɔrɔla, wo si nfen ma gbɛ? A wa kasarɛ lana wo kuma ka bɔ nyamani-yan rɔ, wo si na nfen ma? Wo burimatoe si ta yon bara wo dɛnbɛn-koe rɔ? Wo si wola fen-da-gbɛlɛnu dogon mintɔ?

Aiseya 20:6

Wo wati wa ke, mɔgɛ minnu siginɛ Filisiti nyamanɛ rɔ kɔgɔ-yi dafɛ, Mari ko wonu si a fɔ ko, “Ma lanɛ minnu na ko anu si ma lakanan Asiriyanu masibɛ ma, wo ni wo yɛ lata anu bi nya min kaka. Male si ke kisila kama gbɛ?”

Aiseya 33:14

Yerusalɛm hakɛ-tiginu bi yɛrɛyɛrɛnna kilan bolo. Anu bi a fɔla ko, “Marita kiti mani de iko tɛ min ti sa mumɛ! Ta-sufa wo si male do to a niyi la?”

Aiseya 43:27

Ma benba-fɔlɔfɔlɛnu ya hakɛ kɛ. A ko mala kun-tiginu murutiyara a ma fanan.

Aiseya 47:7

Ile Babilɔn miri ko i ye tola musu-mansayɛ le la tolon, ado i miri ma ke ko su kɛnu ma nun. I miri ma ke ko a si a laban i bolo ka.

Yɛrɛmaya 12:4

Nyamanɛ kɛ si to diyi kun na ha muntuma? Nyamanɛ kɛ bin-nafɔsɔnɛ ni to ha muntuma? Ka a tɛgɛ mɔgɛnuna karagbɛlɛyɛ ma, sogenu anubɛ konanu bara ban fagala. N yogenu bi a fɔla ko, “Ma wara-koe ye nya min, ma ma la a la ni Alla ye wo kalama.”

Yɛrɛmaya 14:14

Wo kɔma, Mari ya a fɔ n ye tun ko nɛbi wonu bi foninya-wɔlɔyiyɛ kɛla a tɔgɛ rɔ. A ko ale ma anu nata. A ma anu sɔ, ado a ma a sara anu na. A ko anuna ko-rayen wo, anuna yi-kɔrɔ-fɛlan wo, anuna bolo-tafɛlanyɛ wo, wo bɛɛ foninya. Anu nyɛrɛ miriya dɔrɔn, anu bi wo le wɔlɔyiya-kumɛnu fɔ-tinɛ.

Yɛrɛmaya 26:7

Kumɛ wo fɔɛ nde, Yɛrɛmaya bolo Bato-Bon-kata burɔ, wole saraka-masɔlɛnu wo, wole nɛbinu wo, anubɛ wole mɔgɛ donu ya wo lamɔɛn.

Nimisa Koe 1:9

Ala sɛninyabɛlitayɛ wo mani de iko musi min wulita ala kurɛ ratinyana kɔnɔ a ma a miri nun ko a si a laban wo nya na. A labui-koe ya mɔgɛnu tɛrɛna. Mɔgɔ-den-kelen sa nyɔ min si a madiya. A ye dila ko, “E, Mari, i wara n nɔ-nya yen n yogenu bolo, wa? N dɛnbɛ.”

Nimisa Koe 2:14

Ila nɛbinu sa fenfen fɔla i ye fɔ foninyɛ gbansan! Anu ma sɔn ila mɔgɛnu hakɛ yirala anu na min si a ma nun, anu kana ta biralɛ rɔ. Ka wo sɔn wo hakɛ la, anu bi a mala wo bɔrɔbɔnɛ wo ye.

Nimisa Koe 4:13

Kɔnɔ mala saraka-masɔlɛnu anubɛ mala nɛbinu bara hakɛ kɛ min kɛ, woletɔ ma yogenu donta a burɔ. Minnu ma ko tinya, anu denu ya a ma, wonu bara faga fu!

Nimisa Koe 4:18

Ma yogenu bi ma lapɛrɛnna ha ma ti ke ma kunyɛ labɔla luyi ma tun. Tele-dande le tonɛ gbɛ ma niyila ko la.

Isikiyɛli 13:10

“Anu bi nna mɔgɛnu bɔla nta kilɛ fɛ bawo anu bi a fɔla ko yisi-kimɛ ye yan, ado yisi-kima sa kan-tinɛ wo rɔ. Ndeta mɔgɛnu bi tarɛ sɔla min ta ma gbɛlɛ. Foninya-nɛbi kɛnu bi nala bɔnku-gbɛ layɛlɛla tarɛ wo ma alako a ni kinya dɔrɔn.

Isikiyɛli 13:6

Anuna ko-rayirɛ anubɛ anuna wɔlɔyiya-kumɛnu, wo bɛɛ foninya-kuma. Anu kɛnɛna nyɛrɛmankola-kumɛnu fɔla ko nde, Mari le ya anu sɔ. Kɔnɔ anu denu mirinɛ ko anu kan wo si bɔ-a-la.

Isikiyɛli 22:14

N ba anu tɔrɔ, anu si la a la ko anu si anu kerinteya ka sɛnbɛ sɔrɔn wo rɔ tun, ba? Nde, Mari kan le kɛ la, ado n ti n nyɛrɛ sɔsɔ.

Hoseya 4:9

Mɔgɛ wonu bi tɔrɔya sufa min sɔrɔnna, wole saraka-masɔlɛnu bi wo le su sɔrɔnna. N si wo tɔrɔ ka wola ko-yogomɛ bɛɛ yili sara wo la.

Hoseya 6:10

N bara koe min tayen Isirɛla nyamanɛ rɔ, wo ma daga. Wole nna mɔgɛnu, wo ara wo nyɛrɛ latinya bɛsi-kɔ-koe fɛ. A ma bɛn defan, wo ni a bato.

Hoseya 9:5

Ladiya-wati wa ke Mari ye, wo si nfen ma wo rɔ gbɛ?

Maika 2:11

“Mari ko wole kensuntenu bi nyinina foninya-nɛbinu ma minnu si wo mayuwaya. Wonu si belenna a fɔla wo ye ko, ‘Baan-feremɛnu bi wola ko la duk!’

Maika 2:6

“Mɔgɛnu bi kumala n ma ko n kana kuma-su kɛnu fɔ anu ye. Anu ko, ‘Alla si male lamiliya, wa?’ Anu bi n manyinikala ko,

Maika 3:11

Anu bi dogonta-fannu dila wole kun-tiginu ma kiti-tɛgɛ-tinɛ. Tɔn-karan-mɔgɛnu bi wodi makelela mɔgɛnu bolo tɔn-karan-koe la. Wola nɛbinu bi kuntɔ-kumɛnu fɔla tɔnɔ-nyini-koe la mɔgɛnu bolo. Nɛbi-su kɛnu bi tɔgɛ sala Mari la ko Mari ye anu fɛ. N ba a fɔ ko, ‘tɔrɔyɛ ye nala,’ anu ni n sɔsɔ ko, ‘wo ti ma.’ Anu ko Mari ye anu fɛ.

Sɛfanaya 3:4

Fenfen sa yan-nɛbinu da rɔ fɔ nyɛrɛ-matɔgɔ-kumɛnu. Anu bi min fɔla, mɔgɔ ti la wonu na. Fan minnu dantɛgɛnɛ Mari ma, saraka-masɔlɛnu bi wo latinyana, ado Allata tɔnnu minnu sɛbɛnɛ, anu bi wonu tadula alako anu ni fen bɔ mɔgɛnu bolo.

Tɔn-Fɔɛ-Fila-Nyɔgɛ 32:20

A ko a ti wo dɛnbɛ hali! Wole tolo-gberenu anubɛ wole mɔgɔ-murutiyanɛnu, a ni a yen wo ye nala min mala wo kɔma gbɛ!

Tɔn-Fɔɛ-Fila-Nyɔgɛ 32:29

Wo ma ke a lɔnna wo yogenu ya wo nɔ nya min. Wo ma a lɔn min mara wo la.