Yɛrɛmaya 49:3 - ALLALA KUMƐ

³ Hɛsibɔn kɛnu ni di sɔɛɛ! Eyai soe si na halaki. Raba musinu ni anu dɛ bolobɔ. Anu ni kasa-kurɛnu kɛ anu ma di-kɛ-tinɛ. Anu ni to yigi-ni-yɛlɛ kɛla kɔndɔfili bolo. A ko anu yogenu si ta anuna bɛsi Molɛki anubɛ a kɔlɛnu anubɛ anuna mɔgɔ-banu na.

Yɛrɛmaya 49:3 Iomraidhean Croise

2 Samuwɛli 11:1

Mansɛnuna kɛlɛ-kɛ-wati kenɛ, Mansa Dawuda ya Yohabu anubɛ ala mɔgɔ-banu anubɛ ala kɛlɛ-dan bɛɛsi lata. Anu ya Amonnu nɔ ha ka ta anuna so-karantan Raba soe lafoo ka ta bui anu ma. Kɔnɔ Mansa Dawuda tora Yerusalɛm soe burɔ.

1 Mansɛnu 11:33

Mari ko ni i ya a yen, a ye bɔnsɔn kelen pe tola Mansa Silamɛni bolo, a ye wo mala bawo mansɛ ara a kan-kɔ sɔ a la. A ko Saidon kɛnuna bɛsɛ min tɔgɛ Asitɔra, a ye wo kɔla. A ko Mohabu kɛnuna bɛsɛ min tɔgɛ Kimasi, a ye wo fanan kɔla. Amonnuna bɛsɛ min tɔgɛ Molɛki, a ye wo kɔla ka a madu wo kɔrɔ. Mari ko Mansa Silamɛni ara ala tɔn tinya. A ma sɔn ata tɔn-bira-koe ma iko a fa Mansa Dawuda duruta a mala nya min.

1 Mansɛnu 11:5

A donta Saidon kɛnuna bɛsi Asitɔra kɔ-koe rɔ min nadannɛ musila muninyɛ rɔ. A kɛnɛna Amonnuna bɛsɛ fanan kɔla min tɔgɛ Molɛki. Wo wara-koe sɔgɔ labɔnɛ Alla la lass!

2 Mansɛnu 23:13

Yuda mɔgɛnu kɛnɛna Saidon kɛnuna bɛsɛ do kɔla nyɔ min tɔgɛ Asitɔra. Anu kɛnɛna Mohabu kɛnuna bɛsɛ do kɔla nyɔ rɔ min tɔgɛ Kimasi. Anu kɛnɛna Amon kɛnuna bɛsɛ do kɔla nyɔ rɔ min tɔgɛ Molɛki. Isirɛla Mansa Silamɛni ya bɛsi-kɔ-tina-mayɛlɛnɛ minnu nadan Yerusalɛm tele-bɔɛ wara la, Kasara kɔnkɛ dugula wara la, ale Mansa Yosaya ya wo damasi latinya.

Ɛsira 2:28

Mɔgɔ kɛmɛ fila ani mɔgɔ mogan-ni-sawa (223), wonu denu sɛgira anu benba soenu burɔ, Bɛtɛli soe anubɛ Eyai soe.

Aiseya 13:6

Wo ni kurun dumɛ bolo. Marita lɔgɔ-latɛgɛnɛ ara gbɛrɛn. Mari Sɛnbɛ-Bɛɛ-Tigi si kasarɛ lana tele wo ma.

Aiseya 14:31

“Wole Filisiti so-burɔ-mɔgɛnu, wo ni wo dɛ sa-a-rɔ wo dɛnbɛn-koe la. Wo kun ma ni kɔ. Kirindinu bi nala gbangban tugula ka bɔ bolo-maran wara la, ado kɛlɛ-dan minnu bi nala wonu na, yuto-wo-yuto sa wonu tɔ.”

Aiseya 15:2

Dibon so-burɔ-mɔgɛnu ye tala anuna bɛsi-kɔ-tinɛ kɔnkɛ kuma kesi-koe la. Mohabu kɛnu ya Nibɔ anubɛ Midaba so-tinyanɛ yen min kɛ, anu donta anu sɔnsɔn rɔ diyi-kɛ bolo. Anu ya anu kunyɛ gbanna ka anu dɛ masii ka a yira ko anu yisi tinyanɛ.

Aiseya 16:7

Mohabu kɛnu si di ka a tɛgɛ anuna tɔrɔyɛ ma. Anu ba anu miri dɔn-fen-diyamɛnu bara-koe ma anu duruta min dɔnna Kiri-Harɛsɛti soe burɔ, wo si a ma, anu yisi ma ni gboya dɔgɔma-ma-de!

Aiseya 23:1

Sarakanɛ le kɛ la Taya kɛnuna ko la. Wole kulun-tawɔli-kɛlɛ minnu bi kɔgɔ-yi kuma, wo ni wo dɛ bolobɔ di-kɛ-tinɛ. Wo bɔra Taya soe min tɔ, wo ara kasara pɔ! Nyɔ-bɔnnu wo, a kulun-nasɔ-tinɛ wo, wo bɛɛ ara tinya pɔ! Wo wa sɛgi ka bɔ Saiparasi tumɛ min, wo si a mankan lamɔɛn.

Aiseya 23:6

Wole Tasisi kɛnu, wo ni wo dɛ sa-a-rɔ di-kɛ-tinɛ ka a tɛgɛ Taya bu-koe ma. Wo sɛgi wo warɛ Sipeni nyamanɛ rɔ.

Yɛrɛmaya 4:8

Wo ni kasa-kurɛ bila wo kan na. Wo ni di biribiri, ka wo dɛ sa-a-rɔ bawo Marita diminyɛ ma a kan-kɔ sɔ wɛ wo la.

Yɛrɛmaya 46:25

Mari Sɛnbɛ-Bɛɛ-Tigi Isirɛlata Alla ko a sa mɛla tun, a ye tɔrɔyɛ lanala Tibisi kɛnuta bɛsɛ ma min tɔgɛ Amuna. A si Iyipiti kɛnuna mansɛnu anubɛ ala mɔgɛnu anubɛ anuta bɛsɛnu tɔrɔ anu nyɔgɔn fɛ. A ko a si Iyipiti mansɛ wurun anubɛ min bɛɛsi lanɛ ale mansɛ la.

Yɛrɛmaya 48:2

ado Mohabu kɛnuta so-nyimɛ si tinya pɔ! A yogenu bi nala Hɛsibɔn soe birala. Anu bi yanfɛ kirila nyɔ le gbɛ alako anu si Mohabu nyamanɛ toe bira nya min. Madena so-burɔ-mɔgɛnu tadenɛ si to don bawo faan ye nala anu sagaranna.

Yɛrɛmaya 48:20

Anu si anu yabi ko, “Mohabu kɛnu miliyanɛ nyamanɛ tinyala ko la. Arɔra kɛnu ni gbele-gbelen ka di. Wo ni a fɔ Anɔn bɛ dafɛ. Mohabu nyamanɛ ara halaki pɔ!”

Yɛrɛmaya 48:37

Bɛɛ si a kunyɛ gbana ka anu buyɛ matɛgɛ. Bɛɛ ye nala a bole matɛgɛ-tɛgɛla di-kɛ-tinɛ ka kasa-kurɛ kɛ a ma.

Yɛrɛmaya 48:7

Mohabu kɛnu yili-latɛgɛnɛ anu sɛnbɛ anubɛ anuna nɔnfuli ma, anu si ta biralɛ rɔ. Anuna bɛsi Kimɔsi fanan si ta biralɛ rɔ. Anu yogenu si ta bɛsɛ wonubɛ a kɔlɛnu anubɛ ala mɔgɔ-banu na.

Yɛrɛmaya 49:1

Mari ya kɛ le fɔ Amonnuna ko rɔ. A ko kurusi-tigi sa Isirɛla mɔgɛnu tɔ min si anuna nyamanɛ kumafunfan? Nfenna Molɛki kɔlɛnu ya Kadi bɔnsɔnta nyamanɛ bi anu yala ka sigi nyɔ, anu ma fenfen fɔ?

Yɛrɛmaya 51:8

Tiriyante wo rɔ, Babilɔn soe si na bui ka tinya pɔ! Bɛɛ ni di ka a tɛgɛ bui-koe wo ma. Anu ni a tɛlɛnu makiri. Tumado a si kɛndɛya.

Yɛrɛmaya 6:26

Mari ko wole, ata mɔgɛnu ni kasa-kurɛ kɛ wo ma. Wo ni wo nyɛrɛ maforongban gbangban rɔ yisi-tinyala ko la. Minnu bara lakiraya, wo ni wo dɛ sa-a-rɔ wonuna ko la. Wo ni wo dɛ bolobɔ iko mɔgɔla den kelan wa bɔ a bolo. Wo ni wo bɛɛ ma bawo kasarɛ sa mɛla kɛla wo ma.

Emɔsi 1:15

Wola mansɛ anubɛ ata mɔgɔ-banu si anu buri ka ta anu niyi latanka tinɛ.”

Sɛfanaya 1:5

Mɔgɔ-wo-mɔgɔ yɛlɛta kan-tina-layan-bɛ kuma alako a ni tele anubɛ karɛ anubɛ lole bato nyɔ, Mari ko a si wo tigi kasara pɔ! Minnu bi Mari batola ka telenbagaya-lanyiri kiri a ye, wo kɔma, a ni ta a gboro bɛsɛ wo rɔ min tɔgɛ Molɛki, Mari ko a si wonu fanan kasara.

Yemesi 5:1

Nba, wole nɔnfulu-tiginu, wo ni wo tole masɔ bɛrɛkɛ! Wo ni gbele-gbelen ka di yakɔrɔ-mamɔɛ wola ko la min bi nala wo yarɔ!

Yasowa 7:2

Yasowa ya mɔgɛ donu nata Eyai ka bɔ Yɛrikɔ. Eyai soe ye Bɛtɛli soe tele-bɔɛ wara la. A ma fɛ-yan Bɛti-Efɛn soe la. Yasowa ya a fɔ mɔgɛ wonu ye ko, “Wo ta ka Eyai mafɛlɛn.” Anu tara wati min,

Yasowa 8:1

Mari ya a fɔ Yasowa ye ko, “Ila kɛlɛ-dannu bi ka ta Eyai kɛlɛ tinɛ. I kana kilan. I yisi gbɛlɛya ka i sɛbɛ don. N si sɛnbɛ di i ma Eyai mansɛ kuma. Ala mɔgɛnu anubɛ ala soe anubɛ ala dugi bɛɛ si ma wotɛ la.

Yasowa 8:28

Yasowa ya Eyai mintan. Ha bi, a ye tonbonyɛ la.