Yɛrɛmaya 49:18 - ALLALA KUMƐ

¹⁸ Kasarɛ min nyɔgɔn sigira Sɔdɔm anubɛ Kɔmɔra anubɛ anu dafɛ-soenu ma, wo nyɔgɔn si na sigi Idɔm kɛnu fanan ma. Hadama-den fenfen ti sigi nyɔ tun! Mari kan le kɛ la.

Yɛrɛmaya 49:18 Iomraidhean Croise

Yaburi 11:6

Mari si tɛ anubɛ munku-gbɛ layigi karagbɛlɛnu kuma. A si anu tɔrɔ fɔn-kalamɛ la.

Aiseya 34:10

Tɛ si to sigini a la dɔnkɔnyɔ, su-ni-tele. A sisi si to yɛlɛla kulakula! Nyamanɛ tinyanɛ si to burubukai! Mɔgɔ-wo-mɔgɔ ti tagama nyamanɛ wo rɔ tun!

Yɛrɛmaya 23:14

Kɔnɔ nɛbi minnu bi Yerusalɛm, wonuna sɔn-yogoyɛ tenbira Samariya kɛnutɛ la. Anu sa fenfen kun na fɔ yɛlɛnyɛ anubɛ foninya-fɔɛ. Anu sa fenfen kun na fɔ ka mɔgɛnu nadon ko-yogoma-kɛ rɔ. Mɔgɔ-wo-mɔgɔ sa nyɔ min si a fara ko-yogoma-kɛ la. Mari ko anu yogo a yala iko mɔgɛ minnu siginɛ Sɔdɔm anubɛ Kɔmɔra soenu burɔ nun.

Yɛrɛmaya 49:33

Hesɔ soe si ma wula-da-rakolɔn la. A si ma sulukinu sigi-tinɛ la. Hadama-den ti sigi nyɔ tun. Mari kan le kɛ la.

Yɛrɛmaya 50:40

Koe min sigira Sɔdɔm anubɛ Kɔmɔra anubɛ nyɔ-dafɛ-so-mɛsɛnu ma, wo nyɔgɔn si sigi Babilɔn kɛnu ma. Mɔgɔ ti sigi nyɔ tun. Mari kan le kɛ la.

Emɔsi 4:11

Mari ko ale le ya wole, Isirɛla mɔgɛ donu kasara iko a ya Sɔdɔm anubɛ Kɔmɔra soenu tɔrɔ nya min. Mɔgɔ-toe minnu tora anu niyi la, wonu mani de iko ta ma sɔgɔ kundi. Kɔnɔ hali wo, wo ma sɔn sɛgila Mari ma.

Sɛfanaya 2:9

Isirɛlata Mari Sɛnbɛ-Bɛɛ-Tigi ya a keli ko a si Mohabunu anubɛ Amonnu kasara iko a ya Sɔdɔm kɛnu anubɛ Kɔmɔra kɛnu kasara nya min. A ko a si a ma, dɔn-fen ti ma-a-la anuna nyamanɛ wo rɔ muk, fɔ wɔnɛ anubɛ kɔgɛ gbansan! A ko ata mɔgɛ minnu bi tola anu niyi la, wonu si ta bui Mohabunu anubɛ Amonnu ma ka anu bolo-fannu anubɛ anuna nyamanɛ bi anu bolo.

Romu 9:29

Iko Aiseya ya a fɔ nya min fɔlɔ-nun, a ko, “Ni Mari Sɛnbɛ-Bɛɛ-Tigi ma mɔgɛ donu to anu kɛndɛ la nun, ma si kasara nun pɔ iko Sodom anubɛ Kɔmɔra soenu mara nya min.”

Tɔn-Fɔɛ-Fila-Nyɔgɛ 29:22

“Ni wo ma lanyiri kɛ tɔnnu bira, wo kegeyɛnu anubɛ sibolo-gbɛrɛkɛ-mɔgɛnu ba sɔ wula-yan la ka sɛgi wola nyamani-kɔrɛ mafɛlɛn tinɛ tumɛ min, anu si wola nyamanɛ kasara-nya yen Mari bolo.

Tɔn-Fɔɛ-Fila-Nyɔgɛ 29:23

Wola sɛni sa tinɛnu si ma kɔgɔ-dugi la. Fenfen ti ma-a-la wo bolo. Hali binyɛ ti ma-a-la nyɔ. Wola nyamanɛ si ma iko Sɔdɔm wo, Kɔmɔra wo, Adima wo, anubɛ Sebom mara nya min. Marita fondo-bɔ-belebele kɛra min kɛ, a ya soe wonu tinya.

2 Pita 2:6

Alla ya Sɔdɔm anubɛ Kɔmɔra soenu kiti ka anu halaki tɛ la. A ya anu ma misalɛ la min si ma ko-yogoma-kɛlɛnu na ka wo yira anu na yarɔ.

Yude 1:7

Wo ni wo hɛnkili to Sɔdɔm anubɛ Kɔmɔra anubɛ anu dafɛ-soenu ko. Nyɔ-mɔgɛnu ya a ma iko melikanu ya a ma nya min. Anu ya yɛlɛnya-su kɛ min ma daga mumɛ! Anu bi tɔrɔla habadan-tɛ le tɔ alako anu ni ma misali-bɛrɛ la mɔgɛ bɛɛ ye.