Yɛrɛmaya 48:10 - ALLALA KUMƐ

¹⁰ Dankɛ ye wo tigi ma min sa sɔnna Marita wɔlɛ kɛla a sɛnbɛ la. Dankɛ ye wo tigi ma min ti sɔn yele ni don ala faan ma.

Yɛrɛmaya 48:10 Iomraidhean Croise

1 Mansɛnu 20:39

Mansɛ wo tenbimatoe a la, ale nɛbi ya mansɛ wo rakele, a ko, “N tigi, wo tumɛ ma ye kɛlɛ rɔ, kɛlɛ-dan do nara ma yoge do la ka a don n bolo ko n ni a makandan. A ko ni wo ya a buri n bolo, a ko, n si faga a gbɛ rɔ. Ni wo ma, n ni wodi-gbɛ labɔ a niyila ko la minna gbiliyɛ anubɛ fui-fan bɔrɔ-talɛ rakɛn de!

1 Mansɛnu 20:40

Kɔnɔ a ya a taran, n bi koe do mala, wo ya a buri n bolo.” Mansa Ehabu ya a fɔ a ye ko, “Nba, i wara ban i nyɛrɛ kiti tɛgɛla. Fɔ i wa a sara le gbɛ!”

1 Mansɛnu 20:42

Nɛbi wo ya a fɔ mansɛ ye ko, “Mari ko bawo ale ya a fɔ i ye ko i ni mɔgɛ min faga, ile ara wo kɛndɛ boloka, wo ara ta, Mari ko fɔ i wa faga mɔgɛ wo gbɛ rɔ. Min sanɛ wo kuma bawo ila kɛlɛ-dannu bara anu yogenu kɛndɛ boloka, Mari ko fɔ ila kɛlɛ-dan wonu ba kasara pɔ!”

2 Mansɛnu 13:19

Wo ya a ma, Nɛbi Ilaisa fonde bɔra. A ya a fɔ mansɛ ye ko, “Hali i ya a lakɛ iko loli, ni wo ma, wɔrɔ, wo si a ma, i ni nɔ-ko-bɛrɛbɛrɛ sɔrɔn Siriyanu kuma. Kɔnɔ kaka gbɛ, i si anu nɔ iko sawa pe.”

Yɛrɛmaya 11:3

A ko ale Isirɛlata Mari Alla ko ni min ma ata sarama-kan latɔnbagaya, a si wo tigi tɔrɔ.

Yɛrɛmaya 47:6

Filisitinu bi gbunyala ko, “E, Marita faan, i si to pelen-pelenna ha tumɛ nyamintan? Don i lɛɛ rɔ ka i sulen nyɔ.”

Yɛrɛmaya 47:7

Kɔnɔ Mari ko, “A si ke a sulenna kama? Wɔlɛ ye a bolo.” Mari ara Asikilɔn anubɛ kɔgɔ-yi dafɛ mɔgɛ toenu kɛlɛ-koe latɛgɛ.

Yɛrɛmaya 50:25

Mari ko a ara ala kɛlɛ-kɛ-miran-bɔn laka anu kan ma. A ko a fonde ara bɔ ha a si na ala kɛlɛ-kɛ-fan bɛɛsi labɔ anu kan ma bawo ale Mari Sɛnbɛ-Bɛɛ-Tigi ko wɔlɛ ye ata kɛlɛ-dannu ye Babilɔn nyamanɛ rɔ.

Yɛrɛmaya 50:27

Anu ni Babilɔn kɛlɛ-dan damasi kan natɛgɛ. Gbalo ye Babilɔn kɛnu ma. Anu kasara-wati ara ke.

Yasowa 10:19

kɔnɔ wo dama kana to nyɔ. Wo ni ta ka ma yogenu kɛlɛ alako anu kana sɛgi anu barɛ bawo mata Mari Alla ara fɛrɛ di ma ma ka anu nɔ.”

Kɛlɛ-Kurugbɛnu 5:23

Marita melika ko, ‘Merɔsi so-burɔ-mɔgɛnu si gbalo sɔrɔn bawo anu ma ta Marita mɔgɛnu dɛnbɛn tinɛ kɛlɛ rɔ.’ ”

1 Samuwɛli 15:3

A ko wo ni ta bui Amalɛkinu ma ka anu nato dogbe! Wo ni anu bolo-fan bɛɛsi halaki pɔ! Kei wo, musu wo, den wo, anubɛ anuna kolo-fannu, wo ni wo damasi halaki.”

1 Samuwɛli 15:9

Mansɛ wo kɛndɛ tora Mansa Sɔli anubɛ ala kɛlɛ-dannu bolo. Amalɛkinuna saga-hakikɛnu anubɛ anuna ninki-hakikɛnu fanan kɛndɛ tora. Anu bolo-fan minnu kin, anu ya wonu namara anu nyɛrɛ ye. Anu bolo-fan minnu ma kin dɔrɔnfan, anu ya wonu kasara.