Yɛrɛmaya 4:7 - ALLALA KUMƐ

⁷ Sibolenuta kasara-kɛlɛ ara fɔlɔla nala iko yarɛ wa bɔ faran la. A ara a warɛ boloka ka na wola nyamanɛ tinya-tinɛ. Wola soenu si tii mɛmɛ! Hali mɔgɔ-den-kelan, a ti to wonu tɔ.

Yɛrɛmaya 4:7 Iomraidhean Croise

2 Mansɛnu 24:1

Yahoyakim ye mansayɛ la tumɛ min, Babilɔn Mansa Nɛbukanasa tara bui Yuda nyamanita-mɔgɛnu ma. San sawa Mansa Yahoyakim ye Mansa Nɛbukanasa kɔrɔ. Wo kɔma, a murutiyara a ma.

2 Mansɛnu 25:1

Wo le ya a ma, Mansa Nɛbukanasa nara ala kɛlɛ-dannu na ka bui Yerusalɛm soe ma. Wo mara Sɛdɛkayala mansayɛ san kɔnɔntɔ, a karɛ tan, tele tan nyɔgɛ ma. Anu ya anu daga makɛ nun Yerusalɛm soe tarɛ kɔma. Anu ya bɔnkɛ ladɛn a nyɔgɔn kuma tala tarɛ kɔma alako anu ni ke kilɛ sɔrɔnna so-burɔ-mɔgɛnu ma.

Aiseya 1:7

Wole Isirɛla mɔgɛnu, wola nyamanɛ kasaranɛ. Wola soenu bara mintan gburr! Sibolo-gbɛrɛnu bi wola sɛnita-fannu dɔnna wo yala ka wo kasaranɛ to.

Aiseya 5:9

N bara a lamɔɛn ko Mari Sɛnbɛ-Bɛɛ-Tigi ye a fɔla ko, “Wola bon-belebele-hakikɛnu si kasara pɔ!

Aiseya 6:11

N ya Mari manyinika. N ko, “Kɛ si to a la ha wati nyamintan?” A ya a fɔ n ye ko, “Kɛ si to a la ha soenu ta ni kolonya ka tii mɛmɛ! Ha bɔnnu na ni kolonya filili! Fɔ nyamanɛ bɛrɛn ni kasara pɔ!

Yɛrɛmaya 2:15

Wole Isirɛla mɔgɛnu, wo yogenu bi bɔrɔndɔ-bɔrɔndɔla wo la iko yarɛ. Wo yogenu bi wo rakilanna. Anu bara Isirɛla nyamanɛ tii. Isirɛla soe bɛɛ ara mintan. Anu tonɛ tonbonyɛ la.

Yɛrɛmaya 22:6

Mari ko Yuda mansɛla bolɔnta kinyɛ manɛ iko Kaliyadi nyamanɛ anubɛ Lɛbanan kɔnkɛnuna kinyɛ. Kɔnɔ a ko hali wo, a si a tinya ka a ma tonbɔn la.

Yɛrɛmaya 22:7

A ko a si mɔgɛnu nata minnu si a kasara. Anu si na anuna tɛgɛrannu na anu bolo alako anu ni bolɔn kɛ sɛnbɛrɛn-kɔnnu nabui ka wonu nakɛ tɛ rɔ hali anu nadanta fɛrɛn-hakikɛnu na.

Yɛrɛmaya 25:38

Mari ara ala nyamanɛ boloka iko yarɛ wa bɔ faran la dɔnta-nyini-tinɛ a yisi ma. Mari ara wola nyamanɛ bɛɛ tinya a fondo-bɔnɛ la, ado yan bara ma nyamani-makilannɛ la ka a tɛgɛ kɛlɛ ma.

Yɛrɛmaya 25:9

a si kantɔ-mɔgɛ bɛɛ kele wo kan ma katarala Babilɔn Mansa Nɛbukanasa ma, ata wɔli-kɛlɛ, kɔni. A ko mansɛ wo si na wole Yuda nyamanita-mɔgɛ bɛɛ kɛlɛ anubɛ wo dan-masa-nyɔgɛnu. Anu ba ban wo kɛlɛla, anu si wola nyamanɛ kasaranɛ to. Mɔgɛ min ba nyɔ yen, wo kuma si tɛgɛ.

Yɛrɛmaya 26:9

I ya a fɔ Mari baraka rɔ ko Bato-Bɔn kɛ si tinya iko Sailotɛ. I ko soe kɛ si kasara, hali mɔgɔ-den-kelen-bɛrɛn kunyɛ ti to-a-rɔ. I ya i tui kɛ fɔla nfenna ko la?” Wo ya kurɔn don n ma.

Yɛrɛmaya 27:8

Nde, Yɛrɛmaya ya n sara kilayɛ wonu na ka ta a fɔ anuna mansɛnu ye ko ni nyamanɛ min ma sɔn a kunyɛ ladonna ale Nɛbukanasata kanma-kɔlɔma rɔ, Mari ko a si nyamanɛ wo tɔrɔ kɛlɛ anubɛ kɔnkɔ-fitinɛ anubɛ kirayɛ la. Nɛbukanasa si nyamanɛ wo halaki pɔ!

Yɛrɛmaya 33:10

Mari ko mɔgɛnu bi a fɔla ko yan bara ma wula-da-rakolɔn la. Mɔgɔ sa yan, kolo-fan sa yan. Mari ko anu ya tonyɛ le fɔ wo la. Yerusalɛm soe anubɛ Yuda nyamani-toe ra ara kolonya filili! Hali mɔgɔ-den-kelan sa anu tɔ tun. Kɔnɔ sewɛ-yerelen-tɛgɛ-kan si fɛrɛn nyɔnu tɔ tun. Mɔgɛ si sewa-tolɔn anubɛ kɔnyɔ-masɔ-tolɔn lamɔɛn tun nyɔ rɔ. Mɔgɛnu tenbi nala baraka-bira-sarakɛnu na Mari ye, mɔgɛnu bi bɛti-sufa kɛnu namɔɛnna ka le. “Ma ni baraka bira Mari Sɛnbɛ-Bɛɛ-Tigi ye bawo a nyimayanɛ, ado ala keninteyɛ ti ban.” Ale Mari ko a si nyamanɛ kɛ lata yarɔ iko a ye nya min nun, yɔ! Ale Mari kan le kɛ la.

Yɛrɛmaya 34:22

A ko a wa wo kɛlɛ-koe fɔ wo yogenu ye tumɛ min, wonu si ta wo kɛlɛ-tinɛ ka wola soe bira ka a mintan gburr! A ko a si Yuda soenu ma wula-da-rakolɔn la, mɔgɔ sa kan min. Ale Mari kan le kɛ la.

Yɛrɛmaya 4:29

A ko so-burɔ-mɔgɛnu si so-laburilɛnu anubɛ kalabɛn-kan lamɔɛn tumɛ min, anu si soe raka sɔi! Donu si anu nagbesi fɔgbɛ la. Donu si yɛlɛ fara-kolo-wɛnu ma. Yuda so-mɛsɛ bɛɛ ra si kolonya. Wonu si ma tonbɔn la.

Yɛrɛmaya 44:2

Mari Sɛnbɛ-Bɛɛ-Tigi Isirɛlata Alla ko a ara kasarɛ min lana Yerusalɛm anubɛ Yuda soenu ma, a ko wo ara wo rayen, ado ha bi, soe wonu tinyanɛ nyɔ. Mɔgɔ-wo-mɔgɔ sigini sa anu tɔ tun

Yɛrɛmaya 46:18

Mari ko mansɛ le ale Mari Sɛnbɛ-Bɛɛ-Tigi la. A ko Alla-nimɛ le ale la. Iko Tebɔ kɔnkɛ layan kɔnkɛ bɛɛ ko nya min, iko Kamɛli kɔnkɛ dunnɛ kɔgɔ-yi kuma nya min, Iyipiti yogenu sɛnbɛ kolo Iyipititɛ ko wo nya na le.

Yɛrɛmaya 49:19

Mari ko a si a ma, Idɔm kɛnu ni anu buri iko yarɛ wa bɔ Yorodan-ba-gbɔngbɔn rɔ ka ta a kun nabɔ kolo-fen de-nyini-tinɛ ma. Wo kɔma, Mari wa mɔgɛ min yabɔ, wo le ye Idɔm kɛnuna nyamanɛ wo marala. Mari ko ale Mari nyɔgɔn sa nyɔ. Yon si a kɔgɔ raka a ye? Kun-tigi yon si ke a rasɛla?

Yɛrɛmaya 5:6

Wo si a ma, yarɛ do si bɔ firɛ rɔ ka anu faga. Suluki do si bɔ wula-da-rakolɔn rɔ ka anu halaki. Kuli si to a dogonna anuna soenu kɔma ka anu napɛrɛn. Min ba a taran nyɔ, a si wo rafarafara. Kɛ dama ye mala le bawo anu bara hakɛ lawara. Anu bara anu kan-kɔ sɔ Mari la iko siyaman.

Yɛrɛmaya 50:17

Mari ko Isirɛla mɔgɛnu mani de iko yarɛ wa sagɛnu tanyɛnsɛn. Asiriya mansɛ fɔlɔn ya anu dɔn dabira. Wo kɔma, Babilɔn Mansa Nɛbukanasa tora anu kolenu masusunna.

Yɛrɛmaya 50:44

Mari ko a si a ma, Babilɔn kɛnu ni anu buri iko yarɛ wa bɔ Yorodan-ba-gbɔngbɔn rɔ ka a kun nabɔ kolo-fen de-nyini-tinɛ ma. Wo kɔma, Mari wa mɔgɛ min yabɔ, wo le ye nyamanɛ marala. Mari ko ale nyɔgɔn sa nyɔ. Yon si a kɔgɔ raka a la? Kun-tigi yon si ke a rasɛla?

Yɛrɛmaya 8:16

Ma yogenu bara ke Dan soe ma kantɔ pan! Ma ye ma yogenuna kɛlɛ-kɛ-soeenu sun-tafɛ-kan lamɔɛnna. Dugi ye yɛrɛyɛrɛnna soeenu na-kan bolo. Ma yogenu bi dugi kɛ anubɛ a fan bɛɛ tinya-tinɛ le kɛ la. Anu bi Yerusalɛm soe anubɛ a mɔgɛnu halaki-tinɛ le.”

Yɛrɛmaya 9:11

Mari ko a si Yerusalɛm soe ma iko sundu-kunyɛ. Nyɔ si ma fira-wulinu barɛ la. A ko a si soenu bunden Yuda nyamanɛ rɔ ha mɔgɔ ti sigi nyɔ tun.

Isikiyɛli 12:20

So-kunbɛ minnu nafanɛ mɔgɛ la, wonu si kasara pɔ! Nyamanɛ ra si kolonya iko wulɛ. Wo kɔma, anu si a lɔn ko Mari le nde la.”

Isikiyɛli 21:31

N ba nna diminyɛ labɔ wo ma iko ta-mɛlan, wo si a lɔn. N si wo kunyɛ don yisi-gbɛlɛtenu bolo minnu si wo faga boloko-yogomɛ-kɛ.

Isikiyɛli 32:2

A ko, “Ile hadama-dan, n sɛbɛna-kumɛ kɛ latenbi Iyipiti mansɛ ma. A fɔ a ye ko a ara a nyɛrɛ lɔn yarɛ la sibole doinu tɛma. Kɔnɔ a mani de dɔrɔn iko banbɛ min si yi ragbesi bɛ rɔ ka dundi tugu a kian la.

Daniyɛli 5:19

Ala mansaya-sɛnbɛ kolo, duninya-mɔgɛ bɛɛsi kilanta a la. Ni mɔgɔ-faga-sɔgɛ ya a bira, a si wo ma. Ni a ye min tola a niyi la, a si wo fanan ma le. Ni mɔgɛ min gbiliya-sɔgɛ ya a bira, a si wo tigi gbiliya. Ni mɔgɛ min yarabi-sɔgɛ ya a bira, a si wo tigi layarabi.

Daniyɛli 7:4

N ya a fɔlɔtɛ min yen, wo mani de iko yarɛ kɔnɔ a kanbannu bi a ma iko kokɛ. N bi a mafɛlan wo kun na, n ya fan do yen a kanban wonu wurunnɛ a ma. Fan do ya a bi ka a sɔ a kin filɛ kun na iko hadama-dan. Hadama-den-miriya dira a ma wati wo rɔ.

Saraka-Masɔlɛnuta Tɔnnu 26:31

N si wola soenu bira ka anu kasara. N si wola bɛsi-kɔ-tinɛ bɛɛsi tinya fanan. Hali wo ya sarakɛnu bɔ n ye, n ti sɔn anu na. Anu mintan-sumɛ ti diya n ye muk!

Saraka-Masɔlɛnuta Tɔnnu 26:33

N si wo yogenu nana ka wo kɛlɛ ka wo bira ka ta wo la nyamanɛ siyamɛnu tɔ. Wola nyamanɛ rakolɔn si to. Wola soenu si ma iko tonbon-kɔrɛnu.