Yɛrɛmaya 4:1 - ALLALA KUMƐ

¹ Mari ko ni sɛgi-sɔgɛ ye wole, Isirɛla mɔgɛnu na a ma, nba, wo sɛgi a ma. Kɔnɔ a ko wo ni wola bɛsɛnu nakɛ a rɔ bawo anu gbo a ye. Wo kana ta wo kun fɛ.

Yɛrɛmaya 4:1 Iomraidhean Croise

Ko-Dabirɛnu 35:2

Yakoba ya a fɔ ala denbayɛnu anubɛ ala wɔli-kɛlɛnu ye ko, “Wo ye bɛsɛ minnu kɔla, wo ni wonu nakɛ a rɔ. Wo ni wo ku ka wo sɛninya. Wo ni wo mayɛlɛma kura-kunɛnu na alako ka a yira ko wo ara wo kan-kɔ sɔ wola bɛsɛnu na.

2 Mansɛnu 23:13

Yuda mɔgɛnu kɛnɛna Saidon kɛnuna bɛsɛ do kɔla nyɔ min tɔgɛ Asitɔra. Anu kɛnɛna Mohabu kɛnuna bɛsɛ do kɔla nyɔ rɔ min tɔgɛ Kimasi. Anu kɛnɛna Amon kɛnuna bɛsɛ do kɔla nyɔ rɔ min tɔgɛ Molɛki. Isirɛla Mansa Silamɛni ya bɛsi-kɔ-tina-mayɛlɛnɛ minnu nadan Yerusalɛm tele-bɔɛ wara la, Kasara kɔnkɛ dugula wara la, ale Mansa Yosaya ya wo damasi latinya.

2 Mansɛnu 23:24

Wo kɔma, a yi-kɔrɔ-fɛlɛnna wo, a bolo-tafɛlɛnna wo, a bɛsɛ min namaranɛ mɔgɛnu bolo bɔn la wo, anubɛ bɛsɛ wonu kɔ mirannu wo, Mansa Yosaya ya wonu wara-koe ban Yerusalɛm soe anubɛ Yuda nyamanɛ bɛɛ rɔ. A ya wo ma alako mɔgɛnu ni tɔn sɛbɛnɛ wonu bira, Saraka-Masɔla-Kun-Tigi-Wɛ Helikaya ya min yen Mari Bato-Bɔn la.

2 Ko-Kɔrɔta-Karan 15:8

Mansa Esa ya nɛbiya-kumɛ kɛ lamɔɛn Nɛbi Asaraya bolo tumɛ min, wo ya a diya don a rɔ. A ya bɛsɛnu tinya Yuda nyamanɛ anubɛ Bɛnyamɛ nyamanɛ rɔ. Soe minnu biranɛ a bolo nun Ifɛrɛm kɔnkɔ-nyamanɛ rɔ, a ya nyɔ-bɛsɛnu tinya. Saraka mintan tinɛ min bi Mari Bato-Bɔn kata burɔ, a ya wo mabɛn.

2 Ko-Kɔrɔta-Karan 33:8

Ni Isirɛla mɔgɛnu ya nna tɔn bɛɛsi bira, n bara min di nna wɔli-kɛla Nɛbi Musa ma, n ti sɔn mɔgɔ ni anu gben nyamanɛ kɛ rɔ, n bara min di anu benbanu ma nun.”

2 Ko-Kɔrɔta-Karan 34:33

Wo le ya a ma, Mansa Yosaya ya kisimiriya-bɛsɛ wonu tinya Isirɛla nyamanɛ wo mumɛ bɛɛ rɔ. Ale ye a niyi la wati min, a ya a ma, mɔgɛnu ya anu benbanuta Mari Alla bato.

Aiseya 31:6

Mari ya a fɔ n ye ko wole Isirɛla mɔgɛnu bara hakɛ kɛ a la ka anu kan-kɔ sɔ a la. Kɔnɔ a ko wo ni sɛgi a ma kaka.

Yɛrɛmaya 15:19

Mari ya nde, Yɛrɛmaya yabi ka le ko ni n sɛgira a wara la, a ko a si n yisi kurakuraya. Wo kɔma, a ko n si ke ata wɔlɛ kɛla le worɔ. A ko ni a sɔgɛ ye n na ka ma nɛbi-bɛrɛbɛrɛ la, fɔ n ba n fara kun-takolonya-kuma-fɔɛ la ka don hɛnkilimaya-kuma-fɔɛ rɔ. A ko a bɛnta, wole Yuda kɛnu ni na nde wara la kɔnɔ a ma bɛn, nde ni ta wole wara la.

Yɛrɛmaya 15:4

A ko a si a ma, wole Yuda kɛnu si ma mɔgɔ-makawanɛ la duninya-mɔgɛ bɛɛ ye. Mari ko a si kɛ ma ka a tɛgɛ Yuda Mansa Hɛsakayala den Mansa Manasa sɔn ma Yerusalɛm soe burɔ.

Yɛrɛmaya 18:11

A ko n ni a fɔ wole, Yerusalɛm anubɛ Yuda nyamanita-mɔgɛ toe ye ko a ye kasarɛ rabɛn-tinɛ wo ye kaka. A ko wo ni wo fara wola karagbɛlɛya-koenu na wo ye min kun na kaka. Wo ni wola kɛ-nyanu yɛlɛma ka ko-latelennɛ kɛ.

Yɛrɛmaya 24:9

A ko a ye kasarɛ min sigila wo ma, wo si a ma, duninya mumɛ bɛɛ ni kilan. Mɔgɛnu si wo mayɛlɛn. Anu si wo ma yɛlɛnma-fan la. Anu si wo tɔgɛ ma dankali-kɛ-fan la.

Yɛrɛmaya 25:5

Anu ko wo ni fara wola ko-yogomɛnu na. Wo ni tɔn sigi wola karagbɛlɛyɛnu na alako wo siginɛ ni to wo halala-nyamanɛ rɔ Mari ya min di wobɛ wo benbanu ma.

Yɛrɛmaya 3:1

Ni mɔgɛ ya a ban ala musi la ka a yili bɔ, ado musi wo ni ta sunburi ma kei-gbɛrɛkɛ wara, ala kei-kɔrɛ kana a bole sigi a kɔrɔ tun. Ni a sɛgira a ma tun, nyamanɛ la si tinya. Kɔnɔ Mari ko wole Isirɛla mɔgɛnu, wolebɛ wo kenintenu bara yɛlɛnyɛ kɛ siyaman. Nba, kaka, a sɔgɛ ye wole la, wo ni sɛgi ale Mari ma, wa?

Yɛrɛmaya 3:12

A ko n ni ta kilayɛ lake kantɔ-wara la Isirɛla mɔgɛnu bi kan min. Mari ko wole, Isirɛla mɔgɛ minnu telenni ma, wo ni sɛgi ale Mari ma. A ko a ti a kolan firindi wo ma tun! A ko a kinikinite, a fondo-bɔnɛ ti to wo kan ma tun.

Yɛrɛmaya 3:14

Mari ko wole telenbɛlɛnu ni na a ma tun. A ko wo ye ale le bolo. A si mɔgɔ kelen-kelen bi soe bɛɛ rɔ ka mɔgɔ fila-fila bi kebilɛ bɛɛ la. A ko a si na wonu na Yerusalɛm soe burɔ tun.

Yɛrɛmaya 3:22

Wole telenbɛlɛnu ni sɛgi a ma tun. Wo ni sɛgi a ma. A si wo makoto wola telenbɛlitayɛla ko la. A bɛnta wo ni a fɔ ko, “Ma namatoe le. Mata Mari Alla le ile Mari la.

Yɛrɛmaya 35:15

A ko a ara mɛ ala wɔli-kɛlɛnu sɔla wo wara ala nɛbinu, kɔni, alako wo ni wo fara karagbɛlɛyɛ la ka don ko-latelenni-kɛ rɔ. Anu ya wo lasɛgi bɛsi-kɔ-koe ma alako wo ni a laban nyamanɛ kɛ rɔ, a ya min di wobɛ wo benbanu ma, kɔni. Kɔnɔ a ko hali wo, wo ti wo tole masɔ a la ka a kan to a gbɛ rɔ.

Yɛrɛmaya 36:3

A ko tumado, a ara kasarɛ min tabɛn Yuda kɛnu kan ma, ni anu suira wo ma ka anu bɔ anu sɔn-yogomɛ da-kun tɔ, a si anu makoto anu sɔn-yogomɛ anubɛ anu hakɛ la.

Yɛrɛmaya 4:4

Wo ni wo nyɛrɛ dantɛgɛ Marita wɔlɛ ma. Wo ni ala kumɛ bira wo yisi bɛɛ la. Wole Yerusalɛm kɛnu anubɛ Yuda nyamanta-mɔgɛ bɛɛ, Mari ko wo ni kɛnu ma. A ko ni wo tantanta kɛ do ma, a si wo halaki ata fondo-bɔɛ la min manɛ iko tɛ, ado mɔgɔ ti ke tɛ wo ladufenna ka a tɛgɛ wo sɔn-yogomɛla ko ma.

Yɛrɛmaya 7:3

Mari Sɛnbɛ-Bɛɛ-Tigi, Isirɛlata Alla, kɔni, wo ye a fɔla ko wo ni yɛlɛma ka don ko-latelenni-kɛ rɔ. Ni wo ya wo ma, a si sɔn wo ni to sigini yan.

Yɛrɛmaya 7:5

Wo ni yɛlɛma ka don ko-latelenni-kɛ rɔ. Wo ni wo telen wo nyɔgɔn ye.

Yɛrɛmaya 7:7

Ni wo ya tɔn kɛnu bira, Mari ko nyamanɛ kɛ ti bɔ wo bolo, ado a ya nyamanɛ kɛ le di wo benbanu ma tolon!

Isikiyɛli 11:18

Anu ba sɛgi Isirɛla nyamanɛ rɔ tumɛ min, anu bi bɛsi-makɔsɔnɛ minnu taranna nyɔ rɔ, fɔ anu ni wo bɛɛ kasara pɔ!

Isikiyɛli 18:13

A ye mɔgɛnu dɔndɔla a tɔnɔ-koe le la. Wo mɔgɔ-sufa si to a niyi la, wa? Ade. Wo ti to a niyi la bawo a ya n gboyana-koe gbansan le ladan, ado a tɔgɔ si to a nyɛrɛ la.

Isikiyɛli 43:9

Fɔ anu ba anu fara bɛsi-kɔ-koe la. Fɔ anu ni fara anuna mansɛnu togon-koe la nta Bato-Bɔn dala. Ni anu ya wo ma, n si to anu tɛma burubukai!”

Hoseya 14:1

Wole Isirɛla mɔgɛnu, wo ni wo sɛgi wota Mari Alla ma bawo wo hakɛ ara wo tonko-tankan ka wo labui.

Hoseya 2:2

Nna dannu, wo ni wo na makawandi bawo nna musu ma a la tun, ado ala kei ma n na tun. Wo ni wo na madiya alako a ni fara kei-gbɛrɛ-makiyi anubɛ yɛlɛnyɛ la.

Hoseya 7:16

Wo ye wo kan-kɔ donna n na ka ta bɛsɛnu bara la, sɛ sa minnu ye. Ni mɔgɛ si la kalabɛn tadunɛ la, mani mɔgɛ si la wole la. Wola kun-tiginu mɔnima-faga si kɛ bawo mankan-tugu-kan le ye anu da rɔ, ado Iyipiti kɛnu si na wo mayɛlɛn.”

Yowɛli 2:12

Mari ko wo ni sunyɛ don ka di. Wo ni tubi bɛrɛbɛrɛkɛ kaka ka wo fan nasɛgi a ma.

Sakaraya 1:4

Mari ko wo kana wo benbanu kɛ-nya bi. A ko wati do ara tenbi nun, a ya ata nɛbinu sɔ anu bara alako anu ni anu fara ko-yogoma-kɛ la kɔnɔ anu ma anu tole masɔ a la ka a kan to a gbɛ rɔ.

Tɔn-Fɔɛ-Fila-Nyɔgɛ 27:15

“ ‘Alamɛ Allata dankɛ taranta wo mɔgɛnu kuma minnu bi fannu lɛsɛla bɛsɛnu muninyɛ rɔ ka anu kɔ hali dogɔn rɔ bawo bɛsɛnu ma di Alla ye.’ “Minnu bi danka-kɔnkɛ wo bu la, wonu si a labira ko, ‘Amina.’

Tɔn-Fɔɛ-Fila-Nyɔgɛ 4:30

Wo tenbi yakɔrɔ-mamɔɛ kɛ rɔ tumɛ min, ado koe kɛ bɛɛ ni ma wo la kɔnɔ tɔ-a-la, wo si wo yɛ lamunun Mari la ka ata kumɛ latɔnbagaya,

Yasowa 24:14

Woletɔ Yasowa ya a fɔ Isirɛla mɔgɛnu ye ko, “Wo ni mata Mari gbiliya ka a bato wo yisi bɛɛ la ka wo telen a ye wati bɛɛ. Wo benbanu ya bɛsi-fuyi minnu kɔ Yufereti bɛ kɔma anubɛ Iyipiti nyamanɛ rɔ, wo ni wonu nakɛ a rɔ. Wo ni mata Mari kelen pe le bato.

Kɛlɛ-Kurugbɛnu 10:16

Tiriyante wo rɔ, Isirɛla mɔgɛnu bara don bɛsɛ minnu kɔ-koe rɔ nun, anu bara wonu tinya. Anu donta Mari kelen pe batoe rɔ tun. Mari ara a fonde layigi anuna tɔrɔyɛla ko la.

1 Samuwɛli 7:3

Samuwɛli ya a fɔ Isirɛla mɔgɛnu ye ko, “Ni wole ya wo ya-lamunun Mari la wo yisi bɛɛ la, fɔ ni wo ya wola bɛsɛnu nakɛ a rɔ katarala wola bɛsɛ ma min nadannɛ musila muninyɛ rɔ min tɔgɛ Asitɔra. Wo ni wo nyɛrɛ dantɛgɛ Mari kelen pe le ma ka ale kelen pe bato. Ni wo ya wo ma, ale si wo tanka Filisitinu masibɛ ma.”