Yɛrɛmaya 23:3 - ALLALA KUMƐ

³ A ko ala mɔgɛ toe minnu tonɛ, a si wonu kundɛn ka bɔ nyamani-gbɛrɛnu tɔ, a ya anu nakɛ a rɔ kan min. A ko a si anu nana anu benbanuna nyamanɛ rɔ. Anu si yiri furr, ka nyamanɛ kɛ lafa pen!

Yɛrɛmaya 23:3 Iomraidhean Croise

Yaburi 106:47

E, mata Mari Alla, ma lakisi. Ma bɔ sibolo-gbɛrɛnu yala, i ni na ma la tun, woletɔ ma si i wɔli-nyimɛ lɔn ka i tɔgɔ-sɛnimɛ tanto.

Yɛrɛmaya 16:15

Kɔnɔ wo si a kele ko, “Alla min ya ma bɔ kantɔ-nyamanɛnu tɔ anubɛ nyamanɛ doinu a ara ma ranyɛnsɛn kan min,” ado Mari ko a si a ma, a ya nyamanɛ kɛ min di wo benbanu ma, wo ni sɛgi nyɔ rɔ tun, yɔ!

Yɛrɛmaya 29:14

A ko a si a ma, wo ni a yen. A si wo bɔ biralɛ rɔ ka sɛgi wo la wo halala-nyamanɛ rɔ yan. A ko hali a ara wo fɔrɔsɛ ko wo ni bɔ Yerusalɛm, a si wo yatɔnbɔn sibolo-gbɛrɛnu tɛma. A ya wo lata biralɛ rɔ kan tinɛ minnu tɔ, a ko a si wo kundɛn kan-tina-kelen ka na wo la Yerusalɛm yan. Ale Mari kan le.

Yɛrɛmaya 30:10

A ko wole, ata mɔgɛnu, wo kana kilan. Wole Isirɛla mɔgɛnu, wo kuma kana kɔ. A ko a si wo kunyɛ bɔ nyamani-yan wo rɔ wo ye biralɛ rɔ kan min nun, kɔni. A ko wo si sɛgi wo warɛ. Wo ni sigi nyɔ wo fanbolo. Wo si to sigini lafɛrɛ rɔ. Mɔgɔ ti wo rakilan.

Yɛrɛmaya 30:3

A ko tumɛ do ye nala, a si koe bɛɛ lakinya iko a ye nya min nun fɔlɔ. Isirɛla mɔgɛnu wo, Yuda mɔgɛnu wo, a si sɛgi wonu na anu barɛ ka bɔ biralɛ rɔ. A ko a ya dugi min di anu benbanu ma, a si wo lasɛgi anu denu ma. A si to anu halalayɛ la. Mari nyɛrɛ kan le kɛ la.

Yɛrɛmaya 31:7

Mari ko bɛɛ ni sewa ka sigi sa wole, Isirɛla mɔgɛnuna ko la. Anu ni anu kuli mayɛlɛ Isirɛla nyamanɛla ko la min makawanɛ nyamanɛ bɛɛ ko. Anu ni matɔgɔ-bɛtinu bɔ ko, “Mari ara ala mɔgɛnu nakisi. A toe min tonɛ, a ara wo bɛɛ kunka.”

Yɛrɛmaya 31:8

A si bɔ wo la kantɔ-wara la. A si wo kundɛn ka bɔ duninya-tonko-nanɛ bɛɛ rɔ. Fiyɔnnu anubɛ namarɛnu si taran wo tɛma. Donu kolomɛ ye wo rɔ. Donu buyi la ara maga. Wo siyaman si na duk!

Yɛrɛmaya 32:37

A ko a ara ata mɔgɛnu tanyɛnsɛn nyamanɛ minnu tɔ ata fondo-bɔ-belebele la, a si wonu kundɛn tun. A ko a si na anu na soe kɛ rɔ tun. Anu ni sigi yan yisi-kimɛ rɔ.

Yɛrɛmaya 46:27

Mari ko wole, ala mɔgɛnu kana kilan. Isirɛla mɔgɛnu kuma kana kɔ. A ko a si wo labɔ wula-yan-nyamanɛ rɔ wo ye biralɛ rɔ kan min nun. A ko a si na wo la ka wo sigi wo fanbolo. A si wo kandan. Mɔgɔ-wo-mɔgɔ ti wo lakilan.

Yɛrɛmaya 50:19

A ko a si Isirɛla mɔgɛnu nasɛgi anu halala-nyamanɛ rɔ. Dɔn-fan min bi bɔla Kamɛli kɔnkɛ kuma wo, anubɛ min bi bɔla Basan nyamanɛ rɔ wo, a ko anu si to wonu dɔnna. Ifɛrɛm bɔnsɔn nyamanɛ dɔn-fan wo, Kaliyadi bɔnsɔn nyamanɛ dɔn-fan wo, anu ni to fala wonu na.

Yɛrɛmaya 8:3

Mari Sɛnbɛ-Bɛɛ-Tigi ko wole, mɔgɔ-yogomɛ toe minnu tonɛ, a si wo gben wola nyamanɛ rɔ, ado gbɛlɛyɛ si karagbɛlɛ wonu bira nyamanɛ wonu tɔ ha saya-sɔgɛ ni wo bira a ye wo ranyɛnsɛnna kan min.

Isikiyɛli 11:17

“Woletɔ a fɔ anu ye ko nde, anu Tigi Mari ko n si anu nabɔ nyɔnu tɔ ka anu kundɛn. N si Isirɛla nyamanɛ don anu bolo tun.

Isikiyɛli 36:11

A mɔgɔ wo, a ninki wo, n si a ma, wo bɛɛ ni yiri tun bui! Anu si siyaya ka tenbi a fɔlɔtɛ la. N si a ma, anu ni sigi nyɔ lafɛrɛ rɔ iko anu bi nyɔ nya min kɔrɔma la. N si anu nasabati ka tenbi a fɔlɔtɛ la. Wo kɔma, anu si a lɔn ko Mari le nde la.

Isikiyɛli 36:24

N si anu bɔ sibolo-gbɛrɛnu tɛma kan-tinɛ bɛɛ rɔ ka anu nasɛgi tun anu halala-nyamanɛ rɔ.

Isikiyɛli 36:37

“Nde, i Tigi Mari si sɔn Isirɛla mɔgɛnu ni n madiya tun. N si a ma, anu ni to siyayala iko saga wɔrɛ.

Saraka-Masɔlɛnuta Tɔnnu 26:9

N si to duwala wo ye alako wo ni yiri bui! Ma ara lanyiri min kiri ma nyɔgɔn tɛma wona, nde si n baralɛ latɔnbagaya.

Maika 2:12

“Mɔgɔ-toe minnu tora Isirɛla nyamanɛ rɔ, Mari ko a si wonu kundɛn iko sagɛ minnu bi donna kulɛ rɔ. Wola nyamanɛ kɛ si fa mɔgɛnu na tun iko sagɛnu si saga de-nyini-tinɛ lafa nya min.”

Maika 7:12

Wo na-kelen-nyɔgɛnu si na ka bɔ Asiriya nyamanɛ rɔ anubɛ Iyipiti nyamanɛ rɔ ha ka ta ke Yufereti bɛ ma ka anu sigi wo tɛma. Anu si na ka bɔ duninya-tonko-nanɛ bɛɛ rɔ.