Yɛrɛmaya 23:11 - ALLALA KUMƐ

¹¹ Mari ko nɛbinu anubɛ saraka-masɔlɛnu bara kisimiriya-koe dan-natenbi. A ko hali a nyɛrɛta Bato-Bɔn, a ara anu bira sɔn-yogoyɛ la nyɔ.

Yɛrɛmaya 23:11 Iomraidhean Croise

2 Ko-Kɔrɔta-Karan 33:5

Bato-Bɔn wo kata burɔ, a ya saraka-mintan-tinɛnu nadan nyɔ rɔ alako ka wonu ma lolenu bato-fan la.

2 Ko-Kɔrɔta-Karan 33:7

A ya bɛsɛ do sigi Mari Bato-Bɔn la, ado Mari ara a fɔ Mansa Dawuda anubɛ ala den Mansa Silamɛni ye nun ko, “N bara Yerusalɛm soe kan-tina-kelan kɛ le yabɔ Isirɛla bɔnsɔn tan-ni-filɛ tɛma anu si to n batola kan min.

2 Ko-Kɔrɔta-Karan 36:14

Min sanɛ wo kuma, kun-tiginu anubɛ saraka-masɔlɛnu anubɛ Isirɛla mɔgɛnu tora ko yogomɛ mala iko sibolo-gbɛrɛ minnu bi anuna foolɛnu tɔ. Mari nyɛrɛ ara a Bato-Bɔn min sɛninya nun, anu ya wo latinya.

Ɛsira 10:18

Sibolo-gbɛrɛkɛ-musi ye saraka-masɔlɛ minnu bolo, wonu tɔgɛ le kɛnu na. Yɛhosadakila den Saraka-Masɔla Yɛsuwa wo, anubɛ a na-kelen-nyɔgɔ mɔgɔ nanɛ, Meyaseya anubɛ Ɛliyesa anubɛ Yaribu anubɛ Kɛdalaya.

Yɛrɛmaya 11:15

Mari ko wole, a diyana-mɔgɛnu bi nfen kun na a Bato-Bɔn la, wa? Wo ye ko-yogoma-siyaman tabɛnna. Wo lanɛ a la ko kolo-fen-sarakɛ si kasarɛ poro wo ma le, wa? Wo tenbi karagbɛlɛyɛ kɛ kun na, a manɛ iko wo ye a diya donna wo rɔ.

Yɛrɛmaya 23:15

Woletɔ Mari Sɛnbɛ-Bɛɛ-Tigi ye kɛ fɔla ka a tɛgɛ Yerusalɛm nɛbinuna ko la. A si dɔn-fen-kunanɛnu di anu ma. Wo kɔma, a si dawara-yi di anu ma. A ko a ye wo mala le bawo anu bara nyamanɛ mumɛ bɛɛ latinya anuna wunduyogoyɛ la.

Yɛrɛmaya 32:34

Bato-Bɔn min sɔnɛ a bato-tinayɛ la, a ko anu bara anuna kisimiriya-bɛsɛnu nadon nyɔ ka nyɔ latinya.

Yɛrɛmaya 5:31

Nɛbinu sa fenfen fɔla foninyɛ kɔma. Saraka-masɔlɛnu bi anu nyɛrɛta fanka le lawɔlila, ado wole, Mari nyɛrɛta mɔgɛnu diyana-koe le wo la. Kɔnɔ kɛ damasi laban si ma wo bolo nfen na?

Yɛrɛmaya 50:6

Mari ko ala mɔgɛ kɛnu mani de nun iko sagɛ minnu bara tunu. Anuna kun-tiginu denu ya anu nasama kilɛ ma. Anuna kun-tiginu bara anu nayilan-yilan iko sagɛ minnu bara ta anu kun fɛ kɔnkɛnu ma. Anu ma anu bɔ-tinɛ lɔn, anu ma anu ta-tinɛ lɔn.

Yɛrɛmaya 6:13

A mɔgɔ-ba wo, a fɛlɛteni wo, wo bɛɛ sokesoke wodi-sɔrɔn-koe rɔ. A nɛbi wo, a saraka-masɔla wo, wo bɛɛ siginɛ foninyɛ le ma.

Yɛrɛmaya 7:30

Mari ko fenfen min yogo, wole Yuda kɛnu diyana-koe le wo la. Ale ya a bato-tinɛ min yabɔ wole, ata mɔgɛnu ye, wo ara ta wola kisimiriya-bɛsɛnu sɔla nyɔ. Wo ara kan-tinɛ wo latinya feu!

Yɛrɛmaya 8:10

Mari ko a si anuna musinu di kei-gbɛrɛkɛnu ma. A si anuna wɔli-kɛ-tinɛnu di mɔgɔ-gbɛrɛkɛnu ma. A mɔgɔ-ba wo, a fɛlɛteni wo, anu dama sokesoke wodi-sɔrɔn-koe rɔ. A nɛbi wo, a saraka-masɔla wo, wo bɛɛ siginɛ foninyɛ le ma.

Nimisa Koe 2:20

E, Mari, i kolan lata mɔgɛ kɛnu ma. Ha bi, i wara yon tɔrɔ iko kɛnu? I ma a yen, musinu bi anu diyana-dannu soge dɔnna? Ma yogenu bi saraka-masɔlɛnu anubɛ nɛbinu fagala ita Bato-Bɔn la.

Isikiyɛli 23:39

Anu ya nna dannu faga ka anu bɔ sarakayɛ la tele min nyɛrɛ ma, anu nara ka nna Bato-Bɔn fanan natinya tele wo le ma.

Isikiyɛli 44:10

Mari ya a fɔ n ye ko, “N bi Lifayi bɔnsɔn kɛnu tɔrɔla anubɛ Isirɛla mɔgɛ minnu bara anu ban nde la ka don bɛsi-kɔ-koe rɔ.

Isikiyɛli 7:20

Wati donu tɔ nun, anu wasinɛ anuna dugu-kɔrɔ-nɔnfulinu tɔ kɔnɔ anu ya wonu denu bi ka wonu ma anuna bɛsi-yogoyanɛnu makiri-fan la. Woletɔ Mari ara a ma, anuna fen-kolomɛnu bara gboya anu ye.”

Isikiyɛli 8:11

Isirɛla bɔnsɔn-mɔgɔ-ba bi-wɔrɔnfila ye nyɔ. Safanla den Yeyasanaya ye anu tɛma. Isɛnti-mintan-fannu bi anu kelen-kelennamɛ bolo. Ta-sisi ye bɔla isɛnti wonu tɔ min sumɛ diyanɛ.

Isikiyɛli 8:16

A tara n na kata burɔ. N ya mɔgɔ mogan-ni-loli yen saraka-mintan-tinɛ anubɛ Bato-Bɔn don-dɛ tɛma. Anu kan-kɔ sɔnɛ Bato-Bɔn la. Anu yɛ lamununnɛ tele-bɔɛ la ka tele bato.

Sɛfanaya 3:3

Yan-mɔgɔ-banu anubɛ yan-kiti-tɛgɛlɛnu mani de iko yara-kɔnkɔtoenu. Anu ba fenfen sɔrɔn, anu si wo kunyɛ lagbana. Anu ti sinan sigi.

Sɛfanaya 3:4

Fenfen sa yan-nɛbinu da rɔ fɔ nyɛrɛ-matɔgɔ-kumɛnu. Anu bi min fɔla, mɔgɔ ti la wonu na. Fan minnu dantɛgɛnɛ Mari ma, saraka-masɔlɛnu bi wo latinyana, ado Allata tɔnnu minnu sɛbɛnɛ, anu bi wonu tadula alako anu ni fen bɔ mɔgɛnu bolo.