Yɛrɛmaya 2:25 - ALLALA KUMƐ

²⁵ Mari ko wole, Isirɛla mɔgɛnu kana wo buri ha wo kian ma ni wulen kɔli-fannu-nyinɛ bolo, ado wo kana wo buri ha wo niyi tɛ ni tɛgɛ kɔli-fannu-sɔrɔn-koe la. Wo ye a fɔla wo bɛɛ rɔ ko bɛsɛ wonu denu di wo ye. Wo ko fɔ wo wa anu kɔ le serr!

Yɛrɛmaya 2:25 Iomraidhean Croise

2 Ko-Kɔrɔta-Karan 28:22

Tɔrɔyɛ fafara Mansa Ehasi kuma tumɛ min, wo ya a ma, a ya hakɛ kɛ Mari la ka a dan-natenbi.

2 Ko-Kɔrɔta-Karan 28:23

Siriyanu bara to Mansa Ehasi nɔla kɛlɛ rɔ min kɛ, wo le ya a ma, ale donta saraka-bɔɛnu tɔ wonuna bɛsɛnu ye. A ya a fɔ ko, “Siriyanuna bɛsɛnu bi anuna mansɛnu dɛnbɛna. Ni nde fanan ya sarakɛnu bɔ bɛsɛ wonu ye, anu si nde fanan dɛnbɛ.” Wo le ya a ma, kasarɛ nara anubɛ ala mɔgɛnu kuma.

Aiseya 2:6

E, Alla, i wara i ban ila mɔgɛnu na, Yakoba kegeyɛnu, kɔni. Nyamanɛ kɛ lafanɛ nya-nyini-kɛlɛnu na ka bɔ tele-bɔɛ wara la anubɛ Filisiti nyamanɛ rɔ. Ila mɔgɛnu bi sibolo-gbɛrɛnuna namunyɛ bila.

Aiseya 57:10

Wo ye wo kunyɛ donna bɛsi-kura-nyinɛ rɔ, ado wo sa bandanna. Wo ye a yenna min kɛ, kisimiriya-bɛsɛ wonu bi wo dɛnbɛna, woletɔ wo kan ta ma kun.

Yɛrɛmaya 13:21

Wo ye a fɔla minnu ma ko wo diyana-mɔgɛ le, wonu ba sigi wo kun na, wo si nfen fɔ? Wo ti yakɔrɔ-mamɔɛ anubɛ dumɛ sɔrɔn? Wo dumɛ si ma wo bolo iko musi buyi wa a lamaga.

Yɛrɛmaya 13:22

Wo ni wo nyɛrɛ manyinika, wo ni a fɔ ko, “Nfen bi a tola, kɛnu bi mala ma la?” Wo hakɛ le ye a mala, wonu bi sigila ma ma, yɔ! Ka a tɛgɛ wo hakɛ wonu ma, anu ya wola kurɛ tɛgɛ wo la. Woletɔ anu buira wo ma ka digin wo ma.

Yɛrɛmaya 14:10

Mari ya kɛ le fɔ wole, Yuda mɔgɛnuna ko la. A ko ka to wo masɛgila ale Mari la, wo di min ye kati! Fan min si wo masɛgi a la, wo ye wonu da kun tɔ. A ko ale Mari ti sɔn wole la. Wo ye ko-yogomɛ min da kun tɔ, a ya wonu lɔn. A ko wo si tɔrɔ wo hakɛla ko la.

Yɛrɛmaya 18:12

Kɔnɔ Mari ko wole, Yuda mɔgɛnu si na a fɔ worɔ ko wo ti wo dɛ bila wo rɔ. Wo si a fɔ fanan ko wo ye tola wo sako le tɔ. Wo si to wola yisi-gbɛlɛya-koe anubɛ wola tengberenya-koenu kun na.

Yɛrɛmaya 2:31

Wole Isirɛla mɔgɛnu, wo ni wo tole masɔ ale Mari kan la! A ko a mani ma wo ye nun iko wula-da-rakolɔn. A ko a mani ma wo ye iko nyamani-makilanni-tapinpini-bɛ. A ko nfenna wo rɔ wo ye a fɔla ko min di wole ye, wo ye wo le mala? Nfenna wo ye a fɔla ko wo ti sɛgi a ma tun?

Yɛrɛmaya 22:20

Wole Yerusalɛm kɛnu, wo ta Lɛbanan nyamanɛ rɔ ka wo dɛ bolobɔ. Wo ta di Basan nyamanɛ rɔ. Wo ni wo kuli mayɛlɛ di-kɛ-tinɛ Mohabu kɔnkɛnu ma bawo wo yogenu bara wo dɛnbɛnɛnu nɔ.

Yɛrɛmaya 22:21

Fen bi wo bolo wati min, Mari kumara wo ye kɔnɔ wo ma wo tole masɔ a la, ado kebi wo dennɛ pɔipɔi, wo tora a mala wo nya. Lun kelen, lun tala, wo ma Mari sako kɛ.

Yɛrɛmaya 3:13

Alako tun, wo ara wo sɔ wo hakɛ la bawo wo ara wo kan-kɔ sɔ wota Mari Alla la. Wo ara sibolo-gbɛrɛnuta bɛsɛnu kɔ. Wo ma ale sako kɛ fɔ ka bɛsɛnu kɔ kɔlɔma-kuru-wɛnu kɔrɔ. Ale Mari kan le kɛ la.

Yɛrɛmaya 44:17

Ma wa ma dato min na, ma ye wo le mala. Ma benbanu anubɛ mala mansɛnu, anubɛ mala kun-tiginu bi isɛnti mintanna ka minni-sarakɛnu nabon mala bɛsɛ ye min tɔgɛ Arinyɛnɛ Musu-Mansɛ Yerusalɛm soe anubɛ Yuda nyamanɛ toe rɔ. Wonu ya a ma nya min, male fanan bi a mala wo nya na le. Dɔn-fen-siyaman taranta ma bolo nun. Ma ara ma-a-la nun, ado nanparan sa ma ma nun.

Nimisa Koe 1:2

A ye kila dila min kɛ kudu, woletɔ a ya-denkɛ rakimanɛ a ya-yi bolo. Mɔgɔ-den-kelen sa tun ala kemini-kɔrɛnu tɔ minnu si a madiya alako a ni a rade. A diyana-mɔgɛnu bara anu kan-kɔ sɔ a la ka ma a yoge la.

Nimisa Koe 4:4

Ka a tɛgɛ kan-nagbalɛ ma, wola dannu nagan si gbaran anu naganagannu na. Hali anuna dannu bi anu tarala kɔnɔ anu ti anu kɔ bawo dɔn-fen-koe ma anu tabɔ.

Isikiyɛli 20:32

Anu bara a latɛgɛ ko anu ni ma iko sibolo-gbɛrɛnu ka kɔlɔmanu anubɛ kurinu kɔ. Kɔnɔ wo ti ma mumɛ!

Hoseya 2:3

Ni a ma sɔn, n si a makolonya iko a na ya a sɔrɔn nya min. A si ma iko dugu-magbalanɛ anubɛ gbangban. Kan-nagbalɛ si a faga.

Malakayi 3:14

A ko wo ya a fɔ ko, “Ka Alla bato, fufafuyi le wo la. Ni ma ya ala kumɛnu bira ka a yira ale Mari Sɛnbɛ-Bɛɛ-Tigi la ko ma ara nimisa mala ko-yogomɛnuna ko la, wo si nfen nyinya ma ma?”

Luka 15:22

Kɔnɔ a fa ya ala wɔli-kɛlɛnu kele. A ko, ‘Wo ni na duruku-nyima-ba la ka a bila a kan na tiriya! Wo ni dɛɛn don a bolo-nɔlɔnɛ la ka sanbarɛ don a kian rɔ.

Luka 16:24

Woletɔ a gbele-gbelenta, a ko, ‘N fa Iburayima! Kinikini n ma. I ni Lasarasi sɔ alako a ni a bolo-nɔlɔnɛ don yi rɔ ka n nagan makima bawo n bi duma-ba rɔ tɛ kɛ burɔ.’

Romu 8:24

Ma ara ma yili-madiyɛ sa Alla kuma min kɛ, wo le ya ma lakisi. Ma yili-madiyɛ sanɛ fan min kuma, ni ma ara ban wo sɔrɔnna, ma ti wo kele tun, “Yili-madiyɛ.” Yon si a nyɛrɛ yili-madiya fan do kuma, a ara ban min sɔrɔnna?

Tɔn-Fɔɛ-Fila-Nyɔgɛ 28:48

woletɔ Mari ye wo yogenu natuntunna wo ma. Wo si tɔrɔ anu ye, wo kannu na si gbala, wo si ma kɔnkɔtoenu na, fɛriyɛ si wo bira, wo si to bolo-kolonyɛ rɔ. Mari si a ma, wo yogenu ni yɔlɔkɛnu sɔ wo kannu na. Ha wo si faga, yɔlɔkɛ wo ye wo kannu na.

Tɔn-Fɔɛ-Fila-Nyɔgɛ 32:16

Wola bɛsi-kɔ-koenu bi a mala, Mari ye wo makeliyala. Wo ye Mari gboyana-koenu nadanna woletɔ a ara kɔrɔtɔ wo ma.