Yɛrɛmaya 13:27 - ALLALA KUMƐ

²⁷ Mari ko wo ye kinsin-kansan-koe minnu kun na, a ara wo bɛɛ yen. A ko wo ye bɛsi-kɔ-koe min bɛɛ kun na min manɛ iko yɛlɛnyɛ, a ya wo bɛɛ lɔn. Wo ye miliya-koe min bɛɛ la, a ye wonu kalama. Wo ye sɔn-yogoyɛ min kun na sɛnɛnu tɔ anubɛ kɔnkɛnu ma, a ko wo bɛɛ ragbɛnɛ le a bolo. Mari ko gbalo ye wole, Yerusalɛm kɛnu ma. Wo kɔsɔnɛ si to ha muntuma?

Yɛrɛmaya 13:27 Iomraidhean Croise

Yaburi 94:4

Ko-yogoma-kɛlɛnu si to anu wasila a la ha wati nyamintan? Anu bi anu wasila anuna ko-yogomɛnu na tolon!

Yaburi 94:8

Wole ko-yogoma-kɛlɛnu, nfenna hɛnkili sa wo bolo? Wole ye hɛnkili sɔrɔnna muntuma?

Hɛnkilimaya-Kumɛnu 1:22

A ye a fɔla ko, “Wole kun-takolɔnnu! Wole si hɛnkili sɔrɔn muntuma ka wo bɔ wo gba-yogomɛnu dala? Wole si wo fara lɔnnɛ lafɛyala muntuma?

Aiseya 57:7

Wo ye tala sarakɛnu bɔla kɔnkɔ-layan-bɛnu kuma ka wola sɔn-yogoyɛ kɛ nyɔnu tɔ.

Aiseya 65:7

Ka a tɛgɛ wo benbanu hakɛ anubɛ wo hakɛ ma, Mari ko a si wo tɔrɔ. Wo benbanu ya isɛnti mintan bɛsɛnu ye kɔnkɛnu kun tɛma. Anu ya a ma, a miliyara kɔnkɛnu ye. Woletɔ a ye anu tɔrɔla iko a bɛnta, anu ni tɔrɔ nya min.

Yɛrɛmaya 11:15

Mari ko wole, a diyana-mɔgɛnu bi nfen kun na a Bato-Bɔn la, wa? Wo ye ko-yogoma-siyaman tabɛnna. Wo lanɛ a la ko kolo-fen-sarakɛ si kasarɛ poro wo ma le, wa? Wo tenbi karagbɛlɛyɛ kɛ kun na, a manɛ iko wo ye a diya donna wo rɔ.

Yɛrɛmaya 3:6

Mansa Yosaya ye Yuda nyamanɛ kun na wati min, Mari kumara nde, Yɛrɛmaya ye. A ko, “Yɛrɛmaya, Isirɛla mɔgɛnu bara min ma nun, i wara wo ragbɛ i nyɛrɛ yɛ la, wa? Anu bara ta bɛsi-kɔ-tinɛ kɔnkɛ bɛɛ kuma anubɛ kɔlɔma-kuru-wɛnu kɔrɔ. Wo mara yɛlɛnyɛ la nde, Mari yala.

Isikiyɛli 16:23

“ ‘Nde, i Tigi Mari ko i ban karagbɛlɛyɛ kɛ damasi mala, i ya bɛsi-kɔ-tinɛnu nadan ka yɛlɛnya-kɛ-tinɛnu fanan nadan kila-kunyɛnu na. Gbalo ye ile Yerusalɛm soe ma ka a tɛgɛ i sɔn-yogomɛ wonuna ko ma!

Isikiyɛli 2:10

Bole wo ya gbole wo rafulen n yakɔrɔ. N ya sɛbɛli kɛnɛ yen a ya filɛ bɛɛ ma. Fenfen sɛbɛnɛ sa a rɔ fɔ di-kɛ-kumɛnu, gbalo-kumɛnu anubɛ yisi-lafin-kumɛnu.

Isikiyɛli 20:28

N ya anu yili-madiya nyamanɛ minna ko la, n tara anu na nyɔ rɔ. Anu ya kɔnkɔ-layan-bɛnu anubɛ kɔlɔma-kuru-wɛnu yen nyɔ min kɛ, anu ya sarakɛnu bɔ wonu ye. Anu ya sarakɛ minnu mintan, anu ya baan minnu ma kɔ-fan la nyɔnu tɔ, wonu ya a ma, n diminyara kosɛbɛ!

Isikiyɛli 24:12

“Hali n ya wo dama ma, tɛ ti ke nɔgɛ wo damasi mintanna ka a ban.

Isikiyɛli 24:13

Yerusalɛm soela sɔn-yogomɛ ara a kɔsɔ feu! Hali n ya n karan ka a sɛninya, a kɔsɔnɛ si to. A ti ban sɛninyala fɔ n ba nna diminya-wɛ bɛɛ labɔ a ma.

Isikiyɛli 24:6

“Nde, wo Tigi Mari ko mɔgɔ-fagalɛnuta soe dankani de! Soe wo mani de iko dagɛ min tanɔgɔnɛ kɔtikɔti! Woletɔ i ni sogo-kundi wonu nabɔ dagɛ wo rɔ kelen-kelenyɛ ma ka a rakolonya filili!

Isikiyɛli 36:25

N si yi-sɛnimɛ purupuru anu ma alako anu ni sɛninya bɛsi-kɔ-koe anubɛ anu kɛ-nya-yogomɛ bɛɛ ma min bara anu natinya.

Isikiyɛli 36:37

“Nde, i Tigi Mari si sɔn Isirɛla mɔgɛnu ni n madiya tun. N si a ma, anu ni to siyayala iko saga wɔrɛ.

Isikiyɛli 6:13

Anu bi isɛnti mintanna anuna bɛsɛnu ye kan min bɛɛ rɔ, a kɔnkɔ-layan-ba kuma wo, a gburukulu kuma wo, a kɔlɔma-kuru-wa kɔrɔ wo, a kɔlɔma-nɔrɔnni kɔrɔ wo, furinu ta si nyɛnsɛn bɛsɛ wonu damala foolɛ rɔ. Wo wa ma, bɛɛ si a lɔn worɔ ko Mari le nde la.

Hoseya 1:2

Mari ya kumɛ fɔlɔtɛ min don Nɛbi Hoseya bolo, a ko, “I ni musu-yɛlan furu bawo nyamanɛ bɛɛ ara ma yɛlan la ka a tɛgɛ anuna lanayabɛlitayɛ ma nde, Mari ye. Wobɛ musu-yɛlan kɛ ni dannu sɔrɔn.”

Hoseya 4:2

A ko wo ye mɔgɛnu dankala. Wo sa wola lanyirinu natɔnbagayala. Wo ye mɔgɔ-fagɛ kɛla, wo ye kankanyɛ kɛla, wo ye yɛlɛnyɛ kɛla. Wo ara wunduyogoyɛ dan-natenbi. Yanni do ni kimɛ, wo ara do faga.

Hoseya 8:5

Sɛnɛ min nadannɛ tura-danla muninyɛ rɔ, Samariya kɛnu bi min batola, wo batoe gbo n ye dɔgɔma-ma-de! Wo ara n yisi kɔrɔtɔ n ma kosɛbɛ! Wo si wo fara wola bɛsi-kɔɛ kɛ la muntuma?

Sɛfanaya 3:1

Yerusalɛm soe kɛ lafanɛ mɔgɔ-murutiyanɛnu anubɛ karagbɛlɛnu na. Yan-mɔgɔ-banu bi anuna mɔgɛnu nyagbala. Wola ko la, fɔ soe kɛ wa kasara serr!

Matiyu 11:21

A ko, “Ile Koresin so-burɔ-mɔgɛnu, gbalo ye wo kuma! Ile Bɛti-Sayida so-burɔ-mɔgɛnu, gbalo ye wole fanan kuma bawo kabana-koe minnu bara kɛ wo rɔ, ni wo nyɔgɔn kɛra Taya anubɛ Saidon soenu tɔ nun, nyɔ-mɔgɛnu bara tubi nun, bi ma! Anu si kasa-kurɛ don anu kan na nun ka ta-gbangban kɛ anu kunyɛ rɔ ka a yira ko anu bara anu kɛ-nyanu yɛlɛma!

2 Kɔrɛnti 12:21

N kilannɛ fanan ko n ba ta tumɛ min, nta Alla si n nafɛya wolela ko la. Wo siyaman bara hakɛ kɛ fɔlɔn. N kilannɛ, wo ti sɔn tubila ko-kɔsɔnɛ wonuna ko la. Wo ya min kɛ, wola yɛlɛnya-hakɛnu anubɛ nata-kɛwɔlɛnu si a ma, n ni di biribiri wo siyamanna ko la.

2 Kɔrɛnti 7:1

N diyana-mɔgɛnu, lanyiri kɛ bɛɛ kirinɛ male le ye! Woletɔ koe min bɛɛ si fɛrɛ-bɔnkɛ anubɛ niyi latinya, ma ni ma nyɛrɛ sɛninya wonu ma. Ma ni ko-sɛnimɛ nyini ka to kilanna Alla la.

Yemesi 4:4

Wole lanayabɛlɛnu, ka a fɔ ko ni duninya kɛ diyara mɔgɔ-wo-mɔgɔ ye, Alla yoge le wo tigi la, wo ma wo lɔn, wa? N ni a fɔ tun, mɔgɛ min bi mala duninya kɛ diyana-mɔgɛ la, wo si a nyɛrɛ ma Alla yoge la.

Lankɛnimayɛ 8:13

Nba, n ya n yɛ layɛlɛ. N ya kokɛ-kan lamɔɛn firifirila san ma pon! A kumara kan-wɛ la ko, “E, gbalo! E, gbalo! Melika sawɛ min tonɛ, wonu ba anuna burinu fɛ tumɛ min, a si ma gbalo-wɛ la bɛɛ ye minnu siginɛ dugu-kole kuma.”