Yɛrɛmaya 10:12 - ALLALA KUMƐ

¹² Alla ya duninya ladan ata fanka le la. A ya duninya ladan ata hɛnkilimayɛ le la. A ya san-kole rafulen ata ko nya-yen le la.

Yɛrɛmaya 10:12 Iomraidhean Croise

Ko-Dabirɛnu 1:1

Alla ya duninya-dan dabira tumɛ min,

Ko-Dabirɛnu 2:5

dugu-kole makolɔn le nun. Ki-fan anubɛ fira sa nun kamasɔrɔn mɔgɔ sa min si a wɔli, ado Mari Alla ma bandɛ lana wɛ dugu-kole kuma nun

1 Ko-Kɔrɔta-Karan 16:26

Sibolo-gbɛrɛnu bi minnu kɔla, bɛsɛ le wonu na dɔrɔn! Kɔnɔ mata Mari, wo le ya san-kole dan.

Yobu 26:7

Alla le ya san-kole rafulen kan-tina-rakolɔn rɔ san ma. A ma dugu-kole dun fenfen na.

Yobu 37:18

Ile si ke Alla dɛnbɛna san-kole rafulen tinɛ ka a manunku iko nyɛrɛ-mafɛlan min manunkunɛ pinapina?

Yobu 9:8

Mɔgɔ-wo-mɔgɔ ma Alla dɛnbɛ san-kole rafulen tinɛ. A kelen pe le si ke tagamana kɔgɔ-yi kuma.

Yaburi 104:2

I wara waan ma i nyɛrɛta duruku-ba la. I wara san-kole rafulen iko fani-bɔn.

Yaburi 104:24

Mari, i wara fen-siyaman dan. Ita hɛnkilimayɛ le ya wo bɛɛ dan. Duninya lafanɛ ila nima-fannu na.

Yaburi 119:90

Ita lanayɛ ye a gbɛ rɔ tolon! I ya dugu-kole kɛ fanan sigi a gbɛ rɔ, bi ma, ado a tonɛ a gbɛ wo le tɔ.

Yaburi 24:2

A ya duninya sɔ yi-rayan-bɛ kuma min bi dugu-kole kɔrɔ. A ya a kurukɛ kɔgɔ-yi-dumɛ kɔrɔ.

Yaburi 33:6

Mari kumara le gbansan, san-kole ladanta. Tele wo, karɛ wo, lolenu wo, ata kuma-gbansan le ya wonu nadan.

Yaburi 65:7

Kɔgɔ-yi tugun-kan a rɔ, i si wo rade don! Hali sibolo-gbɛrɛnu kurun-kan, i si wo fanan tade don!

Yaburi 78:69

Ala Bato-Bɔn min sɔnɛ sɛnbɛ rɔ iko a warɛ Arinyɛnɛ, a ya wo sɔ nyɔ le. A ya a sɔ fanka rɔ iko dugu-kole. A latankani de dɛɛ! Ko-wo-ko ti ma a la.

Yaburi 93:1

Mari le mansɛ la. A makirinɛ mansaya-mirannu tɔ, ado a makawara. Duninya ara balan gben a gbɛ rɔ, ado a la ti maga mumɛ!

Hɛnkilimaya-Kumɛnu 3:19

Mari ya dugu-kole kɛ dan hɛnkilimayɛ le tɔ. A ya san-kole sa a sa-tinɛ ata lɔnnɛ rɔ.

Hɛnkilimaya-Kumɛnu 30:4

Kɔnɔ mɔgɔ yon bara yɛlɛ Arinyɛni tɔ ka sɛgi tun? Mɔgɛ yon bara ke a bole lagburula fɔnyɔ ma? Mɔgɛ yon bara ke kɔgɔ-yi-mumɛ bɛɛsi kɛla ala duruki rɔ ka ala duruki lagburu a ma? Mɔgɛ yon bara dugu-kole dan sa? Mɔgɛ kɛ anubɛ ala dan tɔgɛ ye kama? Ni min ya wonu tɔgɔ lɔn, i ni anu tɔgɔ ratɛgɛ n ye.

Aiseya 37:16

“E, Isirɛlata Mari Alla, ile min mayiginɛ melika filɛ muninyɛ tɛma tɔn-kenkirɛ kuma. Alla, ile le kelen pe le duninya rɔ. Ile le ya san-kole anubɛ dugu-kole dan.

Aiseya 40:22

Duninya-dannɛ le siginɛ ala mansaya-waganɛ rɔ. A ye san-kole kɔma duninya kuma pon! Mɔgɛ mani de a yala iko mɛnɛ-mɛnɛnɛnu. A ya san-kole rafulen de iko yorolan, ni wo ma, fani-bɔn.

Aiseya 42:5

Alla ya san-kole dan ka a rafulen san ma. A ya dugu-kole dan anubɛ a rakɛ-fannu. A ya niyi di mɔgɛ bɛɛ ma. Mari Alla ye a fɔla ala wɔli-kɛlɛ ye ko

Aiseya 44:24

Mari ko ma kisilɛ le ale la. A ko ale le ya ma dan kebi ma ye ma na burɔ, ado a ko ale le ya fan bɛɛ dan. A kelen pe le ya san-kole rafulen. A ye dugu-kole danna tumɛ min, mɔgɔ ma a madɛnbɛ.

Aiseya 45:12

A ko ale le ya duninya dan anubɛ mɔgɛ minnu bi a rɔ. A ya san-kole rafulen ata fanka le la. Tele anubɛ karɛ anubɛ lolenu bi ata sɛnbɛ le kɔrɔ, ata kɛlɛ-dannu, kɔni.

Aiseya 45:18

Mari le ya san-kole mumɛ dan. Ale le kelen pe ye Allayɛ la. A ya dugu-kole kɛ dɛlɛkɛn ka a ladan a kin na! A ya a lagbɛlɛya gben, alako a ni mɛ. A ma di a ye a ra ni kolonya filili, fɔ ka a ma hadama-dannu sigi tinɛ la. A ko Mari le ale la, ado a ko Alla-gbɛrɛ fenfen sa ale kɔma.

Aiseya 48:13

A ya duninya kurukɛ a kɔɛn le la ka san-kole rafulen. A ko a wa dugu-kole anubɛ san-kole rakele, wonu si na sɔ a yakɔrɔ tiriya!

Aiseya 49:8

Mari ara a fɔ ala mɔgɛnu ye ko anu kisi-wati wa ke tumɛ min, a si ala duwɛ layigi anu kuma. A si anu dɛnbɛ iko anu ya a rakele nya min. A ko a si anu kandan ka anu natanka. Wo si ma sarama-kan misalɛ la Yerusalɛm kɛnu anubɛ mɔgɛ bɛɛ tɛma. A ko a si a ma, anu ni anu sigi nyamani-tinyani-kɔrɛ wo rɔ tun.

Yɛrɛmaya 10:13

A nɛn-naban kumala, bandɛ si tugu. A si a ma, banda-yi la ni dɛn dagɛ rɔ ka bɔ duninya kan-tinɛ bɛɛ rɔ. A si san-sɛran anubɛ bandɛ lana. A si fɔnyɔ labɔ ala fɔn-barɛnu tɔ.

Yɛrɛmaya 10:16

Kɔnɔ Yakobata Alla sa iko bɛsɛ kɛnu. Alla le ya fan bɛɛ ladan. A ya Isirɛla mɔgɛnu ma a halalɛ la. A tɔgɛ le Mari Sɛnbɛ-Bɛɛ-Tigi.

Yɛrɛmaya 14:22

Sibolo-gbɛrɛnuta bɛsɛnu si ke bandɛ lanala le, wa? San-kole si ke bandɛ lanala a nyɛrɛ ma, wa? Ade fɔ ile mata Mari Alla kelan min si wo ma. Ma yili-madiyanɛ ile kelen pe le ma. Ile le kelen pe si ko sufa kɛnu ma.

Yɛrɛmaya 27:5

a mɔgɔ wo, a sogo wo, a dugu-kolo wo, Mari ko ale le ya wonu nadan a sɛnbɛ-makawanɛ la. A ko mɔgɛ min ba diya ale ye, a ye fan kɛ bɛɛ latenbila wo le ma.

Yɛrɛmaya 32:17

“E, ma Tigi Mari, i ya san-kole anubɛ dugu-kole ladan ita fanka le la. I ti kuri fenfen na.

Sakaraya 12:1

Mari min ya san-kole rafulen ka dugu-kole ladan ka hadama-dan-niyi bila a rɔ, Mari kelan wo le ya kumɛ kɛ fɔ Isirɛla ko la.

Yɔni 1:3

Alla ya fan bɛɛ dan ale le baraka rɔ, ado Alla ma fenfen dan ale kɔma.

Kɔlɔsi 1:16

Alla ya fan bɛɛ dan ale le baraka rɔ. Min bi san-kole rɔ wo, min bi dugu-kole kuma wo, fan min si yen wo, min ti yen wo, Allata nima-fan bɛɛ, a mara a melika la wo, a mara a nyina la wo, a mara a hadama-den na wo, Alla ya fan bɛɛ dan ale le baraka rɔ. A ya wonu dan alako wonu ni ma atɛ la.