Yaburi 21:3 - ALLALA KUMƐ

³ Ile Mari ya mala mansɛ sɛnibɔ ka bɔ kɛlɛ rɔ duwa-belebele la. I ya mansaya-fulɛ sigi a kunyɛ la min nadannɛ sɛnɛ la.

Yaburi 21:3 Iomraidhean Croise

2 Samuwɛli 12:30

Mansa Dawuda ya anuna mansɛla mansaya-fulɛ bi a kunyɛ la ka a don a nyɛrɛ salɛ la. Fulɛ wo, sɛnɛ le wo la. Kuru-da-gbɛlɛnu sanɛ a ma tala. Ala gbiliyɛ anubɛ fui-fan bɔrɔ-talɛla gbiliyɛ rakɛn de. Wo kɔma, kɛlɛ ya fan minnu bira, a ya wo siyaman bi.

2 Samuwɛli 2:4

Yuda bɔnsɔn-mɔgɛnu nara ka Dawuda ma mansɛ la. Dawuda ya a lamɔɛn min kɛ ko Yɛbusi kɛ minnu bi Kaliyadi nyamanɛ rɔ, wonu bara Mansa Sɔli togon,

2 Samuwɛli 5:3

Woletɔ Isirɛla kun-tiginu bara a lakiri yisi-kimɛ rɔ gben ka to kan kelen tɔ. Anu ya dantɛgɛ-tuli kɛ Dawuda kunyɛ rɔ ka a ma anuna mansɛ la.

1 Ko-Kɔrɔta-Karan 20:2

Mansa Dawuda ya anuna mansɛla mansaya-fulɛ bi a kunyɛ la ka a don a nyɛrɛ salɛ la. Fulɛ wo, sɛnɛ le wo la. Kuru-da-gbɛlɛnu nɔrɔnɛ a ma tala. Fulɛ wola gbiliyɛ anubɛ fui-fan bɔrɔ-talɛla gbiliyɛ rakɛn de! Wo kɔma, kɛlɛ ya fen-kolomɛ minnu bira, a ya wonu bi.

2 Ko-Kɔrɔta-Karan 6:41

E, Mari Alla, i lakɔɛnma. Ta i mayigi Bato-Bɔn burɔ ila tɔn-kenkirɛ ye kan min ado wo manɛ ila sɛnbɛ-tamasere la. I si to nyɔ burubukai! Ila saraka-masɔlɛnu bi koe min bɛɛsi mala, ita duwɛ layigi anu kuma wonu tɔ. Ka a tɛgɛ ila ko-nyimɛ ma, alamɛ mɔgɛ bɛɛ sewara.

Yobu 41:11

Yon si ke a kɛlɛla, a kunyɛ ni bɔ a rɔ? Mɔgɔ-wo-mɔgɔ sa min si a nɔ.

Yaburi 18:18

Kɔndɔfili ye n ma wati min, n yogenu buira n ma kɔnɔ nta Mari ya n nakanan wulɔn.

Yaburi 20:5

Wo dama wa ma tumɛ min, ma si a lawɔyɔ ka a tɛgɛ ila nɔ-ko-sɔrɔn-koe ma sewɛ bolo. Ma si baraka bira Alla ye bui! Alamɛ Mari ya i makoe bɛɛ nyinya.

Yaburi 31:19

Ile ye ko-nyimɛ min bɛɛsi lamarala i gbiliyalɛnu ye, wo kin. Mɔgɛ bɛɛ ya ila ko-nyima-kɛ lɔn. Minnu lara i la, i ye wonu birala a kin na!

Yaburi 59:10

N di nta Alla ye tɛban! A si n nabɛn. Lunyɛ do, i si n yogenu nɔ nya min, n ni wo yen n yɛ la.

Romu 11:35

Yon si a fɔ ko a ara fen di Mari ma, a ni wo tigila yili sara?”

Romu 2:4

Allala nyimayɛ wo, ata dinyɛ wo, anubɛ ata munyu-waranɛ wo, wo ara tɛgɛ wonu tɔ, nyɛ? Ko Alla ye ko-nyimɛ kɛla wo ye alako wo ni tubi a ma, wo ma wo lɔn, ba?

Ɛfɛsa 1:3

Ma ni baraka bira ma Mari Yisa Kirasiti, wo Fa Alla ye dɛɛ bawo duwɛ min bɛɛsi ye Arinyɛni tɔ, Alla ara wonu di ma ma. Ma ya wonu sɔrɔn Kirasiti baraka le tɔ.

Hiburunu 2:9

Kaka, ma ye Yisa le yenna mansayɛ kɛla bonyɛ anubɛ gbiliyɛ rɔ ka a tɛgɛ ata saya-tɔrɔyɛ ma. Melikanu tenbira a la nun wati-kundu-ni kɔrɔ alako a si faga mɔgɛ bɛɛ ye nya min Allata hinɛ baraka rɔ.

Lankɛnimayɛ 19:12

A yɛ mani de iko ta-mɛlan. Mansaya-fulɛ siyaman bi a kunyɛ la. Mɔgɔ-wo-mɔgɔ ma tɔgɛ min lɔn bɛ fɔ ale nyɛrɛ, wo le sɛbɛnɛ a ma.

1 Samuwɛli 16:13

Samuwɛli ya dantɛgɛ-tuli wo bi ka a kɛ Dawuda kunyɛ rɔ a kɔrɔnu yala. Tiriyante wo rɔ, Marita sɛnbɛ yigira Dawuda kuma. A tora Dawuda fɛ wo nya na le burubukai! Wo kɔma, Samuwɛli sɛgira a kɔma Rema soe burɔ.