Taita 3:2 - ALLALA KUMƐ

² A fɔ anu ye ko anu kana kuma-yogoma fɔ mɔgɔ-wo-mɔgɔ ma. Anu kana ma kɛlɛ-tɛgɛlɛnu na. Anu ni ko-nyimɛ kɛ ka anu munyu mɔgɛnu kɔrɔ, ado anu kana sɔnkɔ mɔgɛnu ma.

Taita 3:2 Iomraidhean Croise

2 Samuwɛli 22:36

“E, Mari, i wara n nakanan. I wara n dɛnbɛ woletɔ n bara ma tɔgɔlamɛ la.

Yaburi 140:11

Minnu bi ma tɔgɛ malibi-libila, alamɛ wonu wara-koe diginta bore la map! Minnu bi wunduyogoyɛ mala, alamɛ karagbɛlɛyɛ ya wo manɛgɛn ka wo lato dogbe!

Hɛnkilimaya-Kumɛnu 19:19

Mɔgɛ min yisi lakala, a si nanparan lana a nyɛrɛ kuma tiriya! I tenbi a bɔla nanparan do rɔ, a ye tala nanparan do ratɛgɛla tun.

Hɛnkilimaya-Kumɛnu 25:24

Yanni i ni i sigi musu-gbengbɛrɛlɛ fɛ bon-hakikɛ la, a fisa, i kelan ni to bon-nɛ la i dan na.

Aiseya 40:11

A si ala mɔgɛnu fɛ-bira iko saga-fɛ-biralɛ si ala sagɛnu fɛ-bira nya min. A si saga-dannu kundɛn kan-tina-kelen ka ta anu na a kɔnkɔn tɔ. Wonu nanu si bila anu fɛ fungban!

Matiyu 11:29

Wo ni nta dunɛ bi ka wo sa wo kuma. Wo ni karan nde fɛ bawo n dinyanɛ, n famayiginɛ. Nba, wo si wo sulen worɔ.

Kɛwɔlɛnu 23:5

Pɔli ya anu yabi ko, “N kɔrɔnu, n ma a lɔn ko saraka-masɔla-kun-tigi-wɛ le nun, ado a sɛbɛnɛ Allata kitabu rɔ ko n kana kuma-yogomɛ fɔ mala kun-tigi ma.”

1 Kɔrɛnti 6:10

kankannu wo, wasabɛlɛnu wo, baan-minnɛnu wo, nafiginu wo, minnu bi buila mɔgɛnu ma wo, wonu fenfen ti Allala mansayɛ sɔrɔn,

1 Kɔrɛnti 9:19

Hɔrɛ le nde la, mɔgɛla yɔɔn ma n na. Kɔnɔ n bara n nyɛrɛ ma bɛɛta yɔɔn la alako n ni mɔgɔ siyaman sɔrɔn Yisa ye.

2 Kɔrɛnti 10:1

Donu bi a fɔla nde, Pɔli ma ko n tenbi wo tɛma, n famayiginɛ kɔnɔ n ba bɔ wo fɛ tumɛ min, n kerinteyanɛ wo la. N bi a fɛ ka kuma wo ye dinyɛ anubɛ nyimayɛ la iko Kirasiti duruta a mala nya min nun.

2 Kɔrɛnti 12:20

N kilannɛ ko n ba ke nyɔ tumɛ min, n bi wo taranna nya-gbɛrɛ ma iko a ma di n ye ka wo taran nya min. Wo fanan si n taran nya do ma iko a ma di wo ye ka n taran nya min. Sɔsɔlɛ wo, keliyɛ wo, yisi-bɔɛ wo, kɔrɔndiyɛ wo, lafɛyɛ wo, nafigiyɛ wo, wasinteyɛ wo, sɔnkɔ-sɔnkɛ wo, n kilannɛ ko wo donu si taran wo tɛma.

Kalesiya 5:22

Kɔnɔ Allata Ni-Sɛnimɛ si wo labila min na, wo le kɛnu na, keninteyɛ wo, sewɛ wo, yisi-kimɛ wo, munyɛ wo, dinyɛ wo, nyimayɛ wo, lanayɛ wo,

Kalesiya 6:1

N na-kelen-nyɔgɛnu, wole min bilanɛ Allata Ni-Sɛnimɛ fɛ, ni wo ya mɔgɛ do bira ko-yogoma-kɛ la, wo ni a latelen. Wo ni a kɛ dinyɛ rɔ. Kɔnɔ wo ni a ma wo fɛrɛma alako wo fanan kana na ko-yogomɛ ma.

Kalesiya 6:10

Woletɔ ma wa fɛrɛ sɔrɔn tumɛ min, ma ni ko-nyimɛ kɛ mɔgɛ bɛɛ ye kɔnɔ katarala ma na-kelen-nyɔgɛnu ma dɛnkɛninyɛ rɔ.

Ɛfɛsa 4:2

Wo kana a lagbɛlɛya wo nyɔgɔn kuma fɔ ka famayigiyɛ kɛ wo nyɔgɔn ye a nya bɛɛ ma. Wo ni wo munyu wo nyɔgɔn kɔrɔ keninteyɛ rɔ.

Ɛfɛsa 4:31

Nyɔgɔn-kɔn wo, yisi-bɔɛ wo, diminyɛ wo, wo ni wonu boloka. Wo kana nyɛɛ mɔgɛnu ma ka mɔgɛ manyini, ado wo kana ni-yogoyɛ kɛ wo nyɔgɔn na.

Filipai 4:5

Mɔgɛ bɛɛ ni a lɔn ko wo dinyanɛ, ado Mari na-tumɛ ara gbɛrɛn!

1 Tɛsalonaika 2:7

Kirasitita kilayɛ le male la. Sɛnbɛ ye ma bolo nun ka a lagbɛlɛya wo kuma. Kɔnɔ ma dinyanɛ tora wo fɛ iko musu-denbɛ si dinya ala dannu kɔrɔ nya min.

1 Timoti 3:11

Anuna musinu fanan ni ma sɔn-nyima-tiginu na. Anu kana ma mɔgɔ-dan-tinyanɛnu na. Anu ni ma sɛbɛna-mɔgɛnu na ka lanayɛ kɛ koe bɛɛ rɔ.

1 Timoti 3:3

A kana ma baan-minnɛ la anubɛ kɛlɛ-tɛgɛlɛ. A ni ma sabari-mɔgɛ anubɛ yisi-kima-mɔgɛ la. A kana wodi keni.

Yemesi 3:17

Kɔnɔ hɛnkili min bɔnɛ san ma, a fɔlɔtɛ ye min na, a sɛnima. A yisi-kimanɛ fanan. A dinyanɛ. A madiya-koe ma gbɛlɛ. A fanɛ kinikinɛ la. A ye kɛwɔli-nyimɛnu kɛla. A ti lafisayalɛ kɛ. A ti a nyɛrɛ kɔrɔta.

Yemesi 4:11

N na-kelen-nyɔgɛnu, wo kana wo nyɔgɔn mapandin ha ka wo nyɔgɔn yiliki. Ni wo ya wo ma, wo ye Alla leta tɔn mapandinna ka a yiliki. Ka a fɔ i si ke a fɔla ko, “Tɔn kɛ bɛnta, tɔn kɛ ma bɛn,” wo kiti-tɛgɛla ma ile la, ado ita wɔlɛ ye min na, wo le, ka tɔn wonu bira wo bolo filɛ la.

1 Pita 2:1

Woletɔ wo ni fara ko-yogomɛ bɛɛ la. Wo kana foninyɛ fɔ tun. Nyɛrɛmankolayɛ wo, keliyɛ wo, mɔɛn-kɛ wo, wo ni fara wonu na!

1 Pita 3:10

Iko a sɛbɛnɛ Allala kitabu rɔ nya min ko, “Wo ye a fɛ, wo ni to wo diya? Wo ye nyinina simayɛ anubɛ sewɛ ma? Wo ni wo fara foninya-fɔɛ anubɛ kuma-gbondani-fɔɛ la.

1 Pita 3:8

Ala ban, wo dama miri-nya anubɛ wo kɛ-nya ni ma kelen na. Wo ni wo nyɔgɔn keni iko na-kelen-nyɔgɛnu. Wo ni ko-nyimɛ kɛ ka wo famayigi wo nyɔgɔn ye.

1 Pita 4:4

Nba, kaka Alla-batobɛlɛnu bara kawa bawo wo sa kofula anu ma tun kisimiriya-sufa wonu tɔ. Woletɔ anu bi wo lafɛyala.

2 Pita 2:10

Ado minnu bi tagamana anu fɛrɛ-bɔnku-nata fɛ, hali ka Allala mansayɛ lafɛya, a si a lagbɛlɛya wonu kuma. Foninya-karan-mɔgɛ wonu wasira. Anu si anu nyɛrɛ kɔrɔbi kati! Melika-gbiliyanɛ minnu bi san ma, anu ti wonu gbiliya mumɛ, fɔ ka to wonu mɔɛnna.

Yude 1:10

Kɔnɔ hali mɔgɛ kɛnu ma min lɔn, anu si wo lafɛya. Min ba na anu kunyɛ rɔ, anu bi wo le mala iko firarɔ-sogenu, ado koe wonu nyɛrɛ le ye anu halakila.

Yude 1:8

Foninya-karan-mɔgɔ kɛnu fanan bi ko-rayirɛ kɛla wo nya na le. Wonu bi anu nyɛrɛ bagbuyi latinyana. Anu bi Allala sɛnbɛ lafɛyala ka kuma-yogomɛ fɔ gbiliya-tiginu ma minnu bi san-kole rɔ.