Nimisa Koe 2:9 - ALLALA KUMƐ

⁹ Tarɛ wo don-da-wɛnu tora sani yefe-gbalɛ rɔ. A dɛ-balan-kɔnnu ta ara kerikeri. Nna mansɛ anubɛ nna mɔgɔ-banu bi biralɛ rɔ nyamani-gbɛrɛkɛnu tɔ. Nta saraka-masɔlɛnu sa mɔgɛnu karanna tɔn ma tun. Mari sa wɔlɔyiya-kumɛnu yirala nta nɛbinu ma tun.

Nimisa Koe 2:9 Iomraidhean Croise

2 Mansɛnu 25:7

Anu ya ale Mansa Sɛdɛkayala den-keinu faga a nyɛrɛ yakɔrɔ nyɔ. Wo kɔma, Mansa Nɛbukanasa ya a ma, anu ya Mansa Sɛdɛkaya yɛnu bɔ a kolɔn rɔ. Anu ya yɔlɔkɛ kɛ a ma ka ta a la Babilɔn nyamanɛ rɔ.

2 Ko-Kɔrɔta-Karan 15:3

Wati donu bara tenbi, wole Isirɛla mɔgɛnu sa Allatayɛ la nun, ado saraka-masɔla sa wo bolo nun minnu si wo labila Alla wara-koe la. Wo sa tɔn kɔrɔ wo wati rɔ.

Nihɛmaya 1:3

Wonu ko mɔgɔ-birani-kɔrɛ minnu kunyɛ ma to-a-rɔ, wonu sɛgira Yerusalɛm. Anu kɔndɔfilinɛ kaka dɔgɔma-ma-de! Anu ko fanan ko sibolo-gbɛrɛ minnu bi anuna foolɛ rɔ, wonu yigi tɛgɛnɛ anu tɔ. Anu ya min fɔ n ye Yerusalɛm wara-koe rɔ ko kebi anu ya nyɔ-tarɛ keri ka a don-dɛnu mintan, ha bi, nyɔ tinyanɛ. A la ma dan bɛ.

Yaburi 74:9

Mala kabana-ko-tamasere bɛɛ ara tunu don! Hali mala nɛbinu, anu ma anu to anu kɔma, ado mɔgɔ ma kɛ laban-wati lɔn.

Aiseya 24:12

Anuna soe si ban kasarala feufeu! A don-dɛ si keri.

Yɛrɛmaya 14:14

Wo kɔma, Mari ya a fɔ n ye tun ko nɛbi wonu bi foninya-wɔlɔyiyɛ kɛla a tɔgɛ rɔ. A ko ale ma anu nata. A ma anu sɔ, ado a ma a sara anu na. A ko anuna ko-rayen wo, anuna yi-kɔrɔ-fɛlan wo, anuna bolo-tafɛlanyɛ wo, wo bɛɛ foninya. Anu nyɛrɛ miriya dɔrɔn, anu bi wo le wɔlɔyiya-kumɛnu fɔ-tinɛ.

Yɛrɛmaya 23:16

Mari Sɛnbɛ-Bɛɛ-Tigi ya a fɔ wole, Yerusalɛm kɛnu ye ko wo kana wo tole sigi nɛbinu kan kɔrɔ. Nɛbinu bi wo buyi lafala foninyɛnu na. Ko-rayirɛ minnu bi nala nɛbi wonu kunyɛ rɔ, anu bi wo le fɔla, ado Mari miriya ma wo la feu!

Yɛrɛmaya 39:2

Sɛdɛkayala mansayɛ san tan-ni-kelen-nyɔgɛ wo karɛ nanɛ, a tele kɔnɔntɛ ma, anu ya soe tarɛ keri tele wo le ma.

Yɛrɛmaya 39:8

Babilɔn kɛlɛ-dannu ya Yerusalɛm mansɛla bolɔn mintan anubɛ so-burɔ-bɔnnu ka a tarɛ toe keri.

Yɛrɛmaya 51:30

Babilɔn kɛlɛ-dannu munna si tɛgɛ. Anu si belenna sigila anuna so-latankanɛnu tɔ. Anu si ma iko musi. Tarɛ don-dɛnu si keri. Tɛ si na tugu bɔnnu na.

Yɛrɛmaya 52:14

Babilɔn kɛlɛ-dannu ya tarɛ toe wo damasi keri Yerusalɛm soela foolɛ rɔ.

Nimisa Koe 1:3

Yuda nyamanita-mɔgɛnu bara don yɔɔnyɛ min tɔ, wo yogo. Anu yogenu ya anu bira ka ta anu nyɛnsɛn sibolo-gbɛrɛkɛnu tɛma wula-yan la, anu ma lafɛrɛ-kunya sɔrɔn. Anu sagarannɛnu ya anu bira, ado anu bɔ-kunya sa wonu bolo.

Nimisa Koe 4:15

Mɔgɛnu bi anu masɛgila anu na. Anu bi a fɔla ko, “Wo kɔsɔnɛ. Wo kana tugu ma la.” Woletɔ anu ya anu bɔ Yerusalɛm soe burɔ ka to yilan-yilanna sibolo-gbɛrɛnu tɛma minnu fanan ya a fɔ ko, “Wo ni wo bɔ mala nyamanɛ rɔ.”

Nimisa Koe 4:20

Mari ara mata mansɛ min yabɔ, ma yogenu ya wo bira anuta gbɛrɛ rɔ, ado ma niyi-kunyɛ le wo la. Ma lara wo le la ko a si ma latanka ma yogenu ma.

Isikiyɛli 12:13

A fɔ anu ye ko n si nta yalɛ rafulen mansɛ yarɔ alako n ni a bira. Wo kɔma, n si ta a la Babilɔn soe burɔ. Ha a si faga nyɔ, a ti soe wo ragbɛ a yɛ la.

Isikiyɛli 17:20

N si yalɛ laburun a kuma ka a bira wo la. N si a bi ka ta a la Babilɔn nyamanɛ rɔ ka a tɔrɔ nyɔ bawo a ma a telen n ye.

Isikiyɛli 7:26

Tɔrɔyɛ do tenbi banna, do ye nala. Yisi-tinya-kumɛ ye nala dɛɛ! Wo si to wola nɛbinu madiyala alako anu ni to yarɔ-koenu fɔla wo ye kɔnɔ anu ti wo kɔntɔ-diya-kuma fenfen fɔ. Wo karan-fen fenfen ti taran wola saraka-masɔlɛnu bolo. Hɛnkili-wo-hɛnkili ti taran wola kun-tiginu na.

Hoseya 11:6

Kɛlɛ si wola soe tarɛ don-dɛnu keri ka wola soenu ban fegba! N si wole nta mɔgɛnu tɔrɔ bawo wo miri ko wo ye tonyɛ le tɔ.

Hoseya 3:4

Alla ko Isirɛla mɔgɛnu bi mala le iko musi kɛ. Anu si mɛ sigini, kun-tigi ti taran anu kun na. Anu ti saraka-wo-saraka bɔ. Hali anuna Alla-sako-lɔn-fannu, wonu ti taran anu bolo.

Emɔsi 1:5

A ko a si Damasika tara-dɛ keri. A ko a ye nala mɔgɛ wonu gbenna minnu bi Efɛn lɛɛ rɔ anubɛ wola kun-tigi min bi Bɛti-Idɛn soe kun na. Mɔgɛ donu si na bui Siriyanu ma ka ta anu na Kira nyamanɛ rɔ.” Filisitinu

Tɔn-Fɔɛ-Fila-Nyɔgɛ 28:36

“Mari si wole anubɛ wola mansɛ lagbengben ka wo labɔ wola nyamanɛ rɔ ka ta wo don wo yogenu bolo anuna nyamanɛ rɔ. Wo yogenu si to wo gbenna ka ta wo la nyamanɛ do rɔ, wo ma wo kian sɔ wɛ kan min nun, hali wo benbanu. Wo wa ke wonu bole tɔ tumɛ min, wo si anuna bɛsɛnu kɔ. Kɔlɔma anubɛ kuru-malɛsɛnɛ le wonu na.

Tɔn-Fɔɛ-Fila-Nyɔgɛ 28:63

Iko Mari sewanɛ ya wo lasiyaya nya min ka wo ma fen-tiginu na, ni wo ma ala tɔnnu bira, a si sewa wo nya na le fanan ka wo ma bolo-kolɔnnu na ka wo rabunden sinini! A ye nala lanyiri-nyamanɛ min dila wo ma, a si wo wurun nyɔ rɔ.

1 Samuwɛli 28:6

Woletɔ a ya Mari manyinika wola ko la. Kɔnɔ Mari ma sɔn a yabila kiyo rɔ anubɛ kuru filɛ wonu fɛ, Yurim anubɛ Tumin, kɔni, hali nɛbinu fɛ.