Maika 1:7 - ALLALA KUMƐ

⁷ Wola bɛsi-da-gbɛlɛmɛ wonu ta si bunden. Wo ye wola kɔlɔma-malɛsɛnɛ anubɛ wola kuru-malɛsɛnɛ minnu kɔla, wonu bolokanɛ si belenna sundu-kunyɛnu ma. Wole Samariya mɔgɛnu ya fan minnu di wola yɛlannu ma minnu bi wola bɛsi-bɔnnu na, fan wo donu si mintan gburr! Ni wo bolo-fan minnu ma mintan, wo yogenu si na wonu bi ka ta anu na anuna yɛlannu ye anuna bɛsi-kɔ-tinɛnu tɔ.”

Maika 1:7 Iomraidhean Croise

2 Ko-Kɔrɔta-Karan 31:1

Ladɛn wo kanɛ a la, Isirɛla mɔgɛ bɛɛ tara Yuda nyamanɛ soenu tɔ ka bɛsi-kɔ-tinɛnu tinya. Kɔlɔma minnu lɛsɛnɛ bɛsi-musila muninyɛ la, anu ya wonu tatɛgɛtɛgɛ. Bɛsi wo tɔgɛ le ko, “Asura.” Kuri-lɛsɛnɛnu fanan, anu ya wonu tatiitii. Anu tara wo le sufa ma Bɛnyamɛ anubɛ Ifɛrɛm anubɛ Manasa bɔnsɔn-mɔgɛnu barɛnu tɔ. Anu ban bɛsɛ wonu tinyana, bɛɛ sɛgira a warɛ.

Aiseya 23:17

San bi-wɔrɔnfilɛ wo wa ban, Mari si sɔn wole Taya kɛnu ni sɛgi anuta wɔli-kɔrɔ-yogomɛ ma tun. Wo si fen-mayirɛ-kɛ duninya mumɛ ma tun.

Aiseya 27:9

Alla-lɔnbɛlɛnuna saraka-mintan-tinɛnu ba ma gbangban la tumɛ min Isirɛla mɔgɛnu bolo, Mari si Isirɛla mɔgɛnu makoto anu hakɛ la wo wati le tɔ. A ti anu makoto fɔ wusura mintan tinɛnu ba ban. A sa nyinina fenfen-lɛsɛni ma tun iko anuna bɛsi-musumɛ Asura manɛ nya min.

Isikiyɛli 6:6

Isirɛla soe bɛɛ si halaki pɔ! Wo si a ma, saraka-mintan-tinɛnu anubɛ bɛsɛnu si tinya pɔ! Anuna isɛnti mintan tinɛnu si tii mɛmɛ! Anu bara min bɛɛsi ladan, wonu si tunu yen!

Hoseya 2:12

A ya ki-fen-gbɔ-hakikɛ min bɛɛ sɔrɔn ala keminɛnu bolo a sarayɛ la, n si wo damasi halaki. N si ala ki-fan bɛɛ ma fɔgbɛ la, ado firarɔ-sogenu si to wonu dɔnna.

Hoseya 2:14

N bi nala tala a la wulɛ rɔ. N ba ke a la nyɔ, n si a manugu-nɛgɛ-kumɛnu fɔ alako n ni diya a ye tun.

Hoseya 8:5

Sɛnɛ min nadannɛ tura-danla muninyɛ rɔ, Samariya kɛnu bi min batola, wo batoe gbo n ye dɔgɔma-ma-de! Wo ara n yisi kɔrɔtɔ n ma kosɛbɛ! Wo si wo fara wola bɛsi-kɔɛ kɛ la muntuma?

Hoseya 8:6

Isirɛla boloma-wɔli-kɛlɛ do le ya turɛ wo ladan dɔrɔn. Nde, Alla ma wo la. Tura-danla muninyɛ wo ra si mɔsɔkɔn-mɔsɔkɔn.

Yowɛli 3:3

Mari ko anu bara korɔn lakɛ mɔgɔ-biranɛ wonuna ko la iko siyaman, ni min si to min ye. Anu ya Isirɛla den-keinu fɛlɛn alako anu ni yɛlannu-sarɛ sɔrɔn. Anu ya Isirɛla sunkurɔnnu ma baan-sɔnkɛ la.

Saraka-Masɔlɛnuta Tɔnnu 26:30

Wo si wola isɛnti mintan wola bɛsɛnu bi kan min, nde si kan tinɛ wonu tinya ka wo furinu nakɛ wola bɛsi-tinyanɛ wonu kuma. Wo wara-koe si gboya n ye.

Tɔn-Fɔɛ-Fila-Nyɔgɛ 23:18

Ni min ya wodi sɔrɔn yɛlɛnyɛ wo rɔ, a kana na wodi wo la wota Mari Alla Bato-Bɔn la ka wo ma a dakan-kanbali-fan la. Wo ko-sunu gbo Mari ye.

Tɔn-Fɔɛ-Fila-Nyɔgɛ 9:21

N ya wola fen-kɔsɔnɛ wo bi, wola ninki-danla muninyɛ, kɔni, ka a lakɛ tɛ rɔ. Wo kɔma, n ya a rakerikeri ka a ramɛsɛya ha a mara gbangban la. N ya a gbangban bi ka a rawuya yi rɔ min kunyɛ sɔnɛ kɔnkɛ wo ma. Yi wo yigira gbangban wo la pon!

Lankɛnimayɛ 18:3

Wo mara bawo a ya ala yɛlɛnyɛ-nata-baan-kunayanɛ di mɔgɛ bɛɛ ma alako anu ni a min. Mansɛnu bara yɛlɛnyɛ kɛ a fɛ. Yilanu mara nɔnfulu-tiginu na ala nata-dan-natenbinɛ fɛ.”

Lankɛnimayɛ 18:9

Mansɛ minnu ya yɛlɛnyɛ anubɛ fɛrɛ-bɔnku-nata kɛ a fɛ, wonu ba soe wo mintan-sisi yen tumɛ min, anu si gbele-gbelen ka di ala ko la biribiri!

1 Samuwɛli 5:4

Wo fanan banda kɛ tun, anu ya a taran tun, a buinɛ tɔn-kenkirɛ wo kɔrɔ. Kɔnɔ a bui kɛ rɔ, anu ya a taran, a kunyɛ anubɛ a bolenu kerinɛ a la. Wonu sanɛ bonda-dɛ kɔrɔ. A mununkulɔn tora sani Allata tɔn-kenkirɛ kɔrɔ.