Luka 7:21 - ALLALA KUMƐ

²¹ Wo wati, Yisa ye mɔgɔ siyaman dandanna ka kirayatoenu anubɛ nyina-yogoma-tiginu nakɛndɛya. A ya fiyɔn siyaman yɛ laka.

Luka 7:21 Iomraidhean Croise

1 Mansɛnu 8:37

“Ni kondɔnnu anubɛ tunbinu ya a ma, kɔnkɔ-fitinɛ ni nɔ-ko sɔrɔn mɔgɛ kɛnu ma, ni wo ma, fui-fannu ma wa fɔsɔ ka kɛrin, ni anu ya i matara, i ni anu makoto. Ni anu yogenu nara ka anu namini anu kɛlɛ-koe la, ni wo ma, kasarɛ, hali kiraya-yogomɛ ni anu tɔrɔ, ni anu ya i matara, i ni anu makoto.

Saraka-Masɔlɛnuta Tɔnnu 14:48

Ni a nara a mafɛlɛn a ni a taran, bon-fundan ma bɔ tun mumɛ, a si a fɔ worɔ ko bon-sɛninyanɛ le iko Mari ya a fɔ nya min nun bawo bon-fundan ma bɔ tun.

Matiyu 4:23

Yisa tara Kalili sigisɔn bɛɛ rɔ ka mɔgɛnu karan Yahudiya-dina-bɔnnu na. A ye Allala mansayɛ kibara-nyimɛ kawandili bɔla. A ya kirayɛ su bɛɛ dandan mɔgɛnu tɔ.

Matiyu 4:24

Yisa mankan nyɛnsɛnta Siriya nyamanɛ bɛɛ rɔ. Wo le ya a ma, mɔgɛnu nara kirayato-su bɛɛ la a wara. A nyinato wo, a kirikirisato wo, a solomonya-fagani-tigi wo, Yisa ya wonu dama lakɛndɛya.

Maraka 3:10

A ara mɔgɔ siyaman nakɛndɛya nun min kɛ, kirayatoe bɛɛ tora anu nyɔgɔn matuntunna alako anu si anu bole tugu a la nya min.

Maraka 5:29

A ya a bole tugu ala duruki la nya min wo, ala musu-kirayɛ banta kelenna! A ya a lɔn a fɛrɛ rɔ ko a ara kɛndɛya ka bɔ ala tɔrɔyɛ rɔ.

Maraka 5:34

Yisa ya a fɔ musi wo ye ko, “N na, ila dɛnkɛninyɛ ara i lakɛndɛya. Ta yisi-kimɛ rɔ. Ila kirayɛ ara ban i rɔ.”

Luka 7:20

Anu nara Yisa wara tumɛ min, anu ko, “Yɔni-Batasi-Kɛlɛ le ya ma sɔ ko ma ni i manyinika ko a ya minna na-koe fɔ, ni ile le wo la, ka, ma ni dogbɛrɛ makɔni?”