Saraka-Masɔlɛnuta Tɔnnu 26:6 - ALLALA KUMƐ

⁶ “Wo si kinɔgɔ wo fanbolo. Mɔgɔ-wo-mɔgɔ ti ke wo makilanna. N si sogo-yogomɛnu nabɔ wola nyamanɛ rɔ. Wo ti kɛlɛ sɔrɔn tun wola nyamanɛ rɔ.

Saraka-Masɔlɛnuta Tɔnnu 26:6 Iomraidhean Croise

2 Mansɛnu 2:24

Nɛbi Ilaisa ya a tintan ka a yɛ wuya a rɔ. Wo kɔma, a ya anu danka Mari tɔgɛ rɔ. Tiriyante wo rɔ, sogo-ferema fila bɔra anu burila firɛ rɔ ka na kemini-mɛsɛ mɔgɔ bi-nani ani mɔgɔ fila (42) mafarafara.

1 Ko-Kɔrɔta-Karan 22:9

Kɔnɔ hali wo, a ya lanyiri kiri n ye. A ko a si dan di n ma min si mansayɛ kɛ ka nyamanɛ kɛ mara yisi-kimɛ rɔ. A ko yisi-kimɛ si taran dan wonubɛ a yogenu tɛma. A ko n si dan wo kele Silamɛni bawo a ko nyamanɛ kɛ si to yisi-kimɛ rɔ ata wati rɔ.

2 Ko-Kɔrɔta-Karan 20:30

Mansa Yɛhosafati ya ala mansaya-toe duni yisi-kimɛ rɔ. Alla ya ala nyamanɛ latanka kan tinɛ bɛɛ rɔ ala foolɛ bɛɛ rɔ.

Yobu 11:19

I sanɛ si to, ado mɔgɔ-wo-mɔgɔ sa nyɔ min si i maban. Mɔgɛnu si na anu makoe rɔ i wara.

Yobu 5:23

Hali kuri, i ti a taran ila wɔli-kɛ-tinɛ rɔ. Sogo-feremɛnu ti i kɛlɛ.

Yaburi 144:14

Alamɛ mala ninkinu tora dannu sɔrɔnna. Anu bu kana tinya ha anu ni tunu yen! Alamɛ yerelen-tɛgɛ-kan kana taran mala soenu tɔ.

Yaburi 147:14

Dan minnu bi ila nyamanɛla foolɛ rɔ, a si wo kandan i ye ka i hɛnɛ dɔn-fen-hakikɛnu na.

Yaburi 29:11

Mari si sɛnbɛ di ata mɔgɛnu ma. A si ata duwɛ layigi anu kuma. Anu ni yisi-kimɛ sɔrɔn.

Yaburi 3:5

N tenbi kinɔgɔla suyi rɔ, ile Mari le ye n niyi-koni gbenna.

Yaburi 4:8

N ba n sa kinɔgɛ rɔ suyi rɔ, n si kinɔgɔ n fanbolo bawo ile Mari le kelen pe ye n matankala.

Yaburi 85:8

N tole masɔnɛ alako n ni a lɔn ile Mari Alla ye nala min fɔla. I ya lanyiri kiri male ita mɔgɛnu ye ko ma si to yisi-kimɛ rɔ. Alako tun, ma kana ma lasɛgi mala kun-takolonya-koe wonu ma tun.

Bɔ-Koe-Iyipiti 23:29

kɔnɔ n ti ban wo yoge wonu gbenna wo yarɔ san kelen kɔrɔ alako gbɔfɛ kana yɛlɛ ki-fannu na nyamanɛ wo rɔ. Firarɔ-sogenu kana yiri ka siyaya wo ko nyɔ.

Hɛnkilimaya-Kumɛnu 3:24

I wa i sa suyi rɔ, i ti kilan. I si kinɔgɔ i fanbolo.

Hɛnkilimaya-Kumɛnu 6:22

I tenbi tagama rɔ, karan wo si i sɔ kilɛ ma. I tenbi sani, a si i kandan. I tenbi i yala, a si to i kawandila.

Aiseya 35:8

Kila-gbonkan-bɛ si taran nyɔ anu bi min kelela ko, “Allata Sɛninya Kilɛ.” Hakɛ-tigi fenfen ti tenbi nyɔ. Mɔgɔ-nyimɛ minnu bi tagamana kilɛ wo fɛ, kun-takolon wo kun-takolon ti ke wonu kɔndɔfilila.

Aiseya 35:9

Yara ti taran nyɔ. Sogo-ferema wo sogo-ferema ti a kian sɔ nyɔ. Mari ara anu denu minnu dɔrɔn nakanan, wonu denu si bɔ kilɛ wo fɛ ka ta anu barɛ.

Aiseya 45:7

A ko ale le ya pinpi ani fila waan dan. Ale le ye nala duwɛ anubɛ kasarɛ la. Ale Mari ko ale le wara kɛ dama ma.

Aiseya 9:7

Ata mansaya-dan sa. Yisi-kimɛ le ye ata mansayɛ rɔ burubukai! A si mansayɛ kɛ a kebila Mansa Dawuda gbɛ rɔ. Ka a bi wo wati ma ha tumɛ min di Alla ye, ata mansaya-sɛnbɛ le tɔn-birɛ anubɛ telenbagayɛ la. Mari Sɛnbɛ-Bɛɛ-Tigi ara a wakila wo kɛ-koe ma.

Yɛrɛmaya 30:10

A ko wole, ata mɔgɛnu, wo kana kilan. Wole Isirɛla mɔgɛnu, wo kuma kana kɔ. A ko a si wo kunyɛ bɔ nyamani-yan wo rɔ wo ye biralɛ rɔ kan min nun, kɔni. A ko wo si sɛgi wo warɛ. Wo ni sigi nyɔ wo fanbolo. Wo si to sigini lafɛrɛ rɔ. Mɔgɔ ti wo rakilan.

Yɛrɛmaya 31:26

Mɔgɛnu si to a fɔla wo wati rɔ ko, “N bi kinɔgɔ le tɔ nun kɔnɔ n yɛ ma ara tɛgɛ.”

Isikiyɛli 14:15

“Tumado n si sogo-feremɛnu natugu nyamanɛ wo ma ka mɔgɛnu wara-koe ka-a-la. Nyamanɛ wo ma si kilan, mɔgɔ-wo-mɔgɔ ti sisi tala nyɔ.

Isikiyɛli 14:17

“Tumado, n si kɛlɛ lana anu ma. N si kɛlɛ-kɛ-fen-yogomɛnu nana minnu si mɔgɛnu anubɛ sogenu wara-koe ka-a-la.

Isikiyɛli 14:21

Ma Tigi Mari kan le kɛ la ko, “N si nta tɔrɔya-su nanɛ kɛnu nana Yerusalɛm kɛnu ma min tenbira tɔrɔyɛ bɛɛ la, kɛlɛ wo, kɔnkɔ-fitina wo, sogo-feremɛnu wo, anubɛ wuka. Wonu si mɔgɛnu anubɛ sogenu nato dogbe!

Isikiyɛli 34:25

Ma si sarama-kan kiri ma nyɔgɔn tɛma alako anu nakanannɛ si to nya min. Sogo-nyɛɛnɛ minnu bi anuta nyamanɛ wo rɔ, n si wo bɛɛ lato dogbe! Woletɔ nna sagɛnu si to lafɛrɛ rɔ bin-dɔn-tinɛ, ado anu si ke kila-gbɔngbɔn kɔrɔ lafɛrɛ rɔ fanan.

Isikiyɛli 34:27

Anuna kɔlɔmanu si gbɔ, anuna sɛnɛnu si sabati. Bɛɛ si sigi a halala-dugi rɔ lafɛrɛ rɔ. N ba yɔlɔkɛnu tatɛgɛ nta mɔgɛnu ma tumɛ min ka anu hɔrɔya yɔɔn-tiginu ma, anu bi a lɔnna wo le ma ko Mari le nde la.

Isikiyɛli 5:17

N si kɔnkɛ anubɛ sogo-feremɛnu natuntun wola dannu ma. N si kɛlɛ anubɛ kiraya-fitinɛ lana wo kuma. Nde, Mari kan le kɛ la, yɔ!”

Hoseya 2:18

Wo wati rɔ, sogo wo, koni wo, sagan-fen wo, nde, Alla ko anubɛ wonu si sarama-kan kiri anu nyɔgɔn tɛma alako wonu kana ko-yogoma fenfen ma nta mɔgɛnu na. N si kɛlɛ-kɛ-fannubɛ kɛlɛ wara-koe bɛɛ ka-a-la nyamanɛ rɔ, a faan wo, a kalabɛn wo. Nta mɔgɛnu si to yisi-kimɛ anubɛ lafɛrɛ rɔ wulɔn.

Hoseya 2:20

N si nta lanyiri latɔnbagaya ka ile Isirɛla ma n halalɛ la. I si n lɔn i Mari la.

Saraka-Masɔlɛnuta Tɔnnu 25:18

“Ni wo ya nna tɔn kɛ damasi bira, wo si ke worɔ ka sigi yisi-kimɛ rɔ nyamanɛ wo rɔ.

Saraka-Masɔlɛnuta Tɔnnu 25:19

Wo si dɔn-fen siyaman sɔrɔn dugi wo rɔ ka tagba wo ma. Wo ti yakɔrɔ-mamɔɛ sɔrɔn nyamanɛ wo rɔ.

Saraka-Masɔlɛnuta Tɔnnu 26:22

N si sogo-feremɛnu nana wo tɛma. Wonu si to wola dannu fagala. Anu si wola kolo-fannu kasara. N si wo madɔgɔya hali wola kila-kunyɛ na si kolonya fiyon!

Saraka-Masɔlɛnuta Tɔnnu 26:25

N si mɔgɛnu nana wo tɛma ka wo kɛlɛ. Wonu si wo tɔrɔya bawo wo ara sarama-kan tinya min bi ma tɛma wo na. Hali wo ya wo ladɛn wola soenu tɔ alako wo ni kisi wo yogenu ma, n si kiraya-yogomɛ lana wo tɛma min ti dandan muk! Wo ra si nama anu kɔrɔ ka wo nyɛrɛ don anu bolo.

Saraka-Masɔlɛnuta Tɔnnu 26:7

Wo si nɔ-ko sɔrɔn wo yoge damasi kuma.

Maika 4:4

Mɔgɛ bɛɛ si taran yisi-kimɛ rɔ anu nyɛrɛta sɛnɛnu tɔ. Mɔgɔ-wo-mɔgɔ sa nyɔ min si wo maban. Wota Mari Sɛnbɛ-Bɛɛ-Tigi ara lanyiri kɛ kiri wo ye.

Sɛfanaya 3:13

Wole Isirɛla mɔgɛ toe minnu bi tola wo niyi la yan tɔ, wo ti ko-yogoma ma mɔgɛ la, wo ti foninya fɔ, ado wo ti yanfa don. Wo si sigi yisi-kimɛ rɔ. Mɔgɔ-wo-mɔgɔ ti wo maban.

Hegayi 2:9

Wati ye nala, Bato-Bɔn kɛta gbiliyɛ si tenbi a fɔlɔtɛ la. A si a ma, wo ni sabati ka yisi-kimɛ sɔrɔn Bato-Bɔn kɛ la. Mari Sɛnbɛ-Bɛɛ-Tigi ya kɛ le fɔ.

Sakaraya 9:10

Mari ko ale mansɛ si kɛlɛ-kɛ-kirindinu wara-koe ka-a-la Isirɛla nyamanɛ rɔ. A mako ti taran soeenu na min tabɛnnɛ kɛlɛ-kɛ-koe la Yerusalɛm. A si kalabɛn-kalɛnu takerikeri. A si yisi-kimɛ lana sibolenu tɛma. Ka a bi kɔgɔ-yi-dan doi ma ka a sigi a dan doi la, a si mansayɛ kɛ wo dama rɔ. Ala mansayɛ dan da si bira Yufereti bɛ ma ha duninya dan.

Yɔni 14:27

“N bi yisi-kimɛ tola wo fɛ. N bi nta yisi-kimɛ min dila wo ma, n sa a dila wo ma iko duninya ye a mala nya min. Wo yisi kana tinya. Wo kana kilan.

Kɛwɔlɛnu 12:6

A sɔgɛ ye Hɛrodi la ka Pita kiti mɔgɛnu yala tele min na, suyi wo rɔ, Pita kinɔgɔra a kandanna mɔgɔ filɛ tɛma, a kirinɛ yɔlɔkɔ fila la. Yele-bon-kandannɛnu sɔnɛ dɛ la.

Romu 5:1

Ma ara telen Alla ye dɛnkɛninyɛ fɛ min kɛ, yisi-kimɛ ye mabɛ Alla tɛma ma Mari Yisa, Allata-Mɔgɔ-Yabɔnɛ baraka rɔ.