Yɔni 8:11 - ALLALA KUMƐ

¹¹ A ya a yabi ko, “N fa, hali kelen ma to.” Nba, Yisa ko, “Nde fanan ti i yiliki. I ni ta kɔnɔ i kana hakɛ kɛ tun.”]

Yɔni 8:11 Iomraidhean Croise

Yobu 34:31

Nba, n fa Yobu, i wara i sɔn i hakɛ la Alla ye nun, ba? I wara a fɔ a ye nun ko i ti hakɛ kɛ tun?

Hɛnkilimaya-Kumɛnu 28:13

Mɔgɛ min si a hakɛ dogon, wo tigi ti ta yarɔ. Kɔnɔ mɔgɛ min bi a hakɛ bɛɛ labɔla gbɛ ma ka anu boloka, Mari si kinikini wo tigi ma.

Aiseya 55:6

Mari-nyini-tumɛ le kɛ la yanni tele ni ta wo ma, ado a rakele-tumɛ le kɛ la bawo a gbɛrɛnnɛ wo ma.

Luka 13:3

Ade! N ni a fɔ wo ye, ni wole ma tubi ka yɛlɛma, wo dama si faga iko wonu!

Luka 13:5

Ade! N ni a fɔ wo ye, ni wo ma tubi ka yɛlɛma, wo dama si faga iko wonu.”

Luka 15:10

N bi a fɔla wo ye, hakɛ-tigi kelen ba tubi, Allala melikanu si sewa wo nya na le.”

Luka 15:32

Kɔnɔ a bɛnta ma sewanɛ ni ladiyɛ kɛ bawo i dɔgɔ faganɛ le nun kɔnɔ kaka, a ye a niyi la. A tonɛ-a-rɔ nun kɔnɔ kaka, ma ara a yen tun.’ ”

Luka 15:7

N bi a fɔla wo ye, hakɛ-tigi kelen ba tubi, sewɛ si kɛ Arinyɛni tɔ wo kelenna ko la ka tenbi mɔgɔ-telennɛ bi-kɔnɔntɔ anubɛ kɔnɔntɛ la minnu miriya ko anu mako sa tubi-koe la.

Luka 5:32

N ma na mɔgɔ-telennɛnu kele tinɛ tubi-koe ma fɔ hakɛ-tiginu.”

Luka 9:56

Anu tara so-gbɛrɛkɛ rɔ.

Yɔni 18:36

Yisa ko, “Nta mansayɛ sa duninya kɛ rɔ. Ni a ye duninya kɛ rɔ nun, nna mɔgɛnu si kɛlɛ kɛ n ye. Anu ti sɔn n don-koe la Yahudiya mɔgɔ-banu bolo. Nna mansayɛ sa yan tɔ mumɛ!”

Yɔni 3:17

Alla ma ala dan sɔ duninya rɔ alako a ni ma duninya-kiti-tɛgɛlɛ la, fɔ ka a ma duninya-kisilɛ la.

Yɔni 5:14

Wo kɔma, Yisa ya namarato-kɔrɛ wo yen Alla-Bato-Bɔn la. A ya a fɔ a ye ko, “I yɛ lana. I wara kɛndɛya kaka. Fara hakɛ la, ni wo ma, min yogo kɛ ko, wo kana ma i la.”

Yɔni 8:15

Wo ye kiti tɛgɛla iko wola hadama-denyɛ ye nya min. Nde sa mɔgɔ-wo-mɔgɔ kiti tɛgɛla.

Romu 2:4

Allala nyimayɛ wo, ata dinyɛ wo, anubɛ ata munyu-waranɛ wo, wo ara tɛgɛ wonu tɔ, nyɛ? Ko Alla ye ko-nyimɛ kɛla wo ye alako wo ni tubi a ma, wo ma wo lɔn, ba?

1 Kɔrɛnti 5:12

Ka mɔgɔ-gbɛrɛnu kiti, nta wɔli ma wo la! Alla le si wonu kiti. Ka kiti tɛgɛ wo nyɔgɔn tɛma chɔchi burɔ, wota wɔlɛ le wo la. Iko a sɛbɛnɛ Allala kitabu rɔ nya min ko, “Wo ni ko-yogoma-kɛlɛnu nabɔ wo tɛma.”

Tɔn-Fɔɛ-Fila-Nyɔgɛ 16:18

Musa ya Mari kuman-kan kɛ latenbi Isirɛla mɔgɛnu ma ko, “Wo ye nala soe minnu sɔrɔnna Mari Alla bolo, wo ni kiti-tɛgɛlɛnu sigi nyɔnu tɔ. Mɔgɛ wonu ni kiti sa a kila-bɛrɛbɛrɛ fɛ.

Tɔn-Fɔɛ-Fila-Nyɔgɛ 17:9

a si ta kumɛ wo la saraka-masɔlɛnu bara Marita kan-tina-yabɔnɛ wo rɔ anubɛ kiti-tɛgɛla-kun-tigi-wɛ min bi soe wo kun na.

2 Pita 3:15

Iko ma na-kelen-nyɔgɛ, Pɔli min di ma ye, wo ya a sɛbɛ wo ma nya min, wo ni Marila munyu-koe lɔn ko a ye fɛrɛ le dila wo ma alako wo si kisi nya min. Alla ya hɛnkili min di a ma, a ya hɛnkilimaya-kumɛ wonu fɔ wo ye.