5 Yɛgɛ-fagalɛnu si anuta yalɛnu tagbala farɛ wo ma kɔgɔ-yi dafɛ. Nde, wo Tigi Mari kan le kɛ la. Sibolo-gbɛrɛnu si na bui Taya kɛnu ma ka anu bolo-fan bɛɛ toronde anu na.
N si anu don sibolo-gbɛrɛnu bolo. Wonu si anuna mirannu kankan anu ma. N si anu halaki ha ka anu sibole bɛɛ ban. Anu ti anu halala-nyamanɛ sɔrɔn tun! Wo si a lɔn wo le ma ko wo Tigi Mari le nde la.”
N si nyɔ ma iko fara-gbaran-makolɔn, yɛgɛ-fagalɛnu ni to anuna yalɛnu tagbalala kan min. Mɔgɔ-wo-mɔgɔ ti ke soe wo sɔla a kurɛ la tun. Nde, wo tigi Mari kan le kɛ la.
Nde, i Tigi Mari ye nala min fɔla, wo le kɛ la ko n bi nala Iyipiti nyamanɛ latenbila Mansa Nɛbukanasa ma. A wa bui nyɔ ma, a si fen-kolomɛ bɛɛ bi ka wonu ma ala kɛlɛ-dannu sarɛ la.
Ka a bi Ɛngidi tenke ma, ha ka ta sigi Ɛnɛgilayim tenke la, nyɔ ra ti kolonya yɛgɛ-biralɛnu na. Anu si anuta yalɛnu tagbala nyɔ. Yɛgɛ-subolo-siyamɛ minnu bi Mɛdetereniyan kɔgɔ-yi rɔ, wonu subole bɛɛ si taran Dalɛ Faganɛ rɔ fanan.