Hoseya 9:1 - ALLALA KUMƐ

¹ Wole Isirɛla mɔgɛnu, wo ni wo fara wola ladiyɛnu kɛla iko Alla-lɔnbɛlɛnu. Wo ara wo kan-kɔ sɔ wota Alla la ka ma telenbɛlɛnu na a ye. Wo ara wo nyɛrɛ ma iko musu-yɛlan ka wo nyɛrɛ latenbi wola bɛsi Beyali ma nyamanɛ kɛ mumɛ bɛɛ rɔ iko bɛsɛ wo le wo de-nyinina ka wola fui-fan sabati.

Hoseya 9:1 Iomraidhean Croise

Yaburi 73:27

Mɔgɔ-wo-mɔgɔ ya a masɛgi ile la, wo tigi si tɔrɔ, yɔ! Ni mɔgɔ-wo-mɔgɔ ma a telen i ye, i si wo tigi halaki.

Aiseya 17:11

Hali bagɛ wonu gbusura yona ka anu fere-nyimɛ labɔ, fenfen ti ma-a-la nyɔ. Fɔ tɔrɔyɛ anubɛ duma-dandanbɛlɛ tolon!

Yɛrɛmaya 2:19

A ko wola karagbɛlɛyɛ si tɔrɔyɛ lana wo ma. Wola ko-yogomɛnu si wo don nyagbɛ rɔ. Wo ni wo miri a ma a kilɛ fɛ alako wo ni ko nya-yen. Ka wo kan-kɔ sɔ wota Mari Alla la, wo yogo dɔgɔma-ma-de! A ko ka a fɔ wo ti kilan a la, wo ma telen. Wo Tigi Mari Sɛnbɛ-Bɛɛ-Tigi kan le kɛ la.

Yɛrɛmaya 2:20

Wo Tigi Mari ko wo ara wo kan-kɔ sɔ ata Mariyɛ la bi-ko-ma! Yili min sɔnɛ wo la, wo ya wo ratɛgɛ. Wo ya a fɔ ale, Mari ye ko wo ti ala kumɛ bira hali ka a bato, ado wo ye bɛsɛnu kɔla kɔnkɔ-layan-bɛnu kuma anubɛ kɔlɔma-kuru-wɛnu kɔrɔ bɛsi-fuyinu kɔ-tinɛ. Wo ma telen ale, wota Mari ye iko musi-yɛlan.

Yɛrɛmaya 44:17

Ma wa ma dato min na, ma ye wo le mala. Ma benbanu anubɛ mala mansɛnu, anubɛ mala kun-tiginu bi isɛnti mintanna ka minni-sarakɛnu nabon mala bɛsɛ ye min tɔgɛ Arinyɛnɛ Musu-Mansɛ Yerusalɛm soe anubɛ Yuda nyamanɛ toe rɔ. Wonu ya a ma nya min, male fanan bi a mala wo nya na le. Dɔn-fen-siyaman taranta ma bolo nun. Ma ara ma-a-la nun, ado nanparan sa ma ma nun.

Nimisa Koe 4:21

Wole, ma yoge Idɔm minnu siginɛ Yusi nyamanɛnu tɔ, wo ni wo yɛlɛn bawo a ti mɛ tun tɔn si sigi wola yɛlan wo la. Wota kasarɛ ye nala wo ma. Wola ko-yogomɛnu si bɔ gbɛ ma. Wo gbu-makolɔn si to miliyɛ bolo.

Isikiyɛli 16:15

“ ‘I ya ila mankan anubɛ ila kinyɛ wonu ma yɛlɛnya-fan la. Kei-wo-kei nara, wo ti tenbi i la. I kinyɛnu mara kei bɛɛtɛ la iko a di anu ye nya min.

Isikiyɛli 16:30

“ ‘Nde, i Tigi Mari ko i sɔn-yogo iko gbɔɔn. I ya kɛ dama ma le iko yɛlan min ti miliya.

Isikiyɛli 20:32

Anu bara a latɛgɛ ko anu ni ma iko sibolo-gbɛrɛnu ka kɔlɔmanu anubɛ kurinu kɔ. Kɔnɔ wo ti ma mumɛ!

Isikiyɛli 21:10

A dɛ lasanɛ mɔgɔ-faga-koe le la. A masusanɛ alako a ni malan-malan iko san-sɛran. Bawo nta mɔgɛnu ya nna makawandili-kumɛ anubɛ tɔrɔyɛ bɔrɔbɔ min kɛ, sewɛ ti taran kan-bo-kan.

Hoseya 10:5

Sɛnɛ min nadannɛ ninki-danla muninyɛ la Bɛti-Efɛn soe burɔ, wole Samariya kɛnu bi kilanna ko anu kana na foo wo la. Wo yogenu ba sɛnɛ wo bɛɛ ka kɔlɔma-lɛsɛnɛ wo ma, bɛsɛ wo kɔlɛnu anubɛ a saraka-masɔlɛnu si na di bɛsɛ wola ko la bawo anu bara foo a la.

Hoseya 2:12

A ya ki-fen-gbɔ-hakikɛ min bɛɛ sɔrɔn ala keminɛnu bolo a sarayɛ la, n si wo damasi halaki. N si ala ki-fan bɛɛ ma fɔgbɛ la, ado firarɔ-sogenu si to wonu dɔnna.

Hoseya 4:12

Wo ye kɔlɔma-malɛsɛnɛnu mala wola nya-nyini-kɛ-fannu na. Kɔlɔma-fuyi le wonu na dɔrɔn. Wo si min ma, wonu denu bi wo labilala wonu na. Wo ara wo kan-kɔ don nde, Mari la feufeu! Wo ara nde, Mari boloka iko musu-yɛlan si ala kei boloka nya min ka ta yɛlɛnya-kɛ-tinɛ.

Hoseya 5:4

Wole Isirɛla mɔgɛnu bara ko-yogomɛ minnu ma, wo le ye wo mabelila wota Alla-bato-kilɛ ma. Bɛsi-kɔɛ ara wo bira gbuturu! Wo ma Mari lɔn fenfen na.

Hoseya 5:7

Wo ma wo telen Mari ye muk! Wola dannu ma ko-wo-ko lɔn Alla wara-ko rɔ. Woletɔ a ti mɛ tun, a si wobɛ wola nyamanɛ kasara pɔ!

Emɔsi 3:2

Mari ko wole Isirɛla mɔgɛnu di ale ye ka tenbi sibole bɛɛsi la duninya rɔ. Mari ya wole le dɔrɔn yabɔ ka wo fɛ-bira. Wo le ya a ma, wola hakɛ ara yogoya a ya la dɔgɔma-ma-de! Woletɔ a ko a fɛrɛ sa fɔ a wa wo tɔrɔ.”

Emɔsi 4:5

Ni a di wo ye fanan, wo ni na wola biredinu na wo bolo wasinteyɛ la ka a ma baraka-bira-kɔ-fannu na iko a di wo ye nya min. Wo ye wo nyɛrɛ matagbala kɔ-fan minnu di-koe rɔ, ni a di wo ye, wo ni to wo nyɛrɛ matɔgɔla iko a di wo ye nya min. Nba, Mari ko bawo ko-sufa wonu di wole, Isirɛla mɔgɛnu ye, awa, wo ni to wo sufanu mala iko a di wo ye nya min.

Emɔsi 6:13

Wo ye wo nyɛrɛ matɔgɔla ko wo ara Lodiba soe wo bira. Wo ye wasila a la ko wo ragbɛlɛ bawo wo ara Kanam soe bi.

Emɔsi 8:10

Wo si wo kundɛn wola sewa-tele minnu ma, Mari si tele wonu ma di-kɛ-tele la. Mari ko a si wola sewa-siginu yɛlɛma yisi-magboya-siginu na. A si a ma, wo ni wo kunyɛ gbana ka kasa-kurɛnu don wo kan na. A si kunaya wole, Isirɛla mɔgɛnu kuma iko mɔgɔ-kɔrɔyanɛla den kelan wa sa. A si gbɛlɛya wo kuma ha wola tɔrɔya-wati da ni fa.

Yemesi 4:16

Kɔnɔ kaka, wo wasinɛ. Wo ye wo nyɛrɛ matɔgɔla, ado nyɛrɛ-matɔgɔ-su wo yogo.

Yemesi 5:1

Nba, wole nɔnfulu-tiginu, wo ni wo tole masɔ bɛrɛkɛ! Wo ni gbele-gbelen ka di yakɔrɔ-mamɔɛ wola ko la min bi nala wo yarɔ!