Hoseya 5:1 - ALLALA KUMƐ

¹ “Wole saraka-masɔlɛnu, wo ni wo tole masɔ. Wole Isirɛla kun-tiginu, wole fanan ni wo tole masɔ. Wole min bi mansa-bɔn la, wo ni wo tole masɔ. Wo si kiti sɔrɔn bawo a bɛnta, wo ni kiti sa telenbagayɛ la nun. Wo ye bɛsi minnu kɔla Misipa soe burɔ, wo mara gbɛrɛ la mɔgɛnu ye. Wo ara ma donsoya-yalɛ la Tebɔ kɔnkɛ kuma.

Hoseya 5:1 Iomraidhean Croise

Yɛrɛmaya 11:7

A bɔɛ wo benbanu na Iyipiti, a ya anu makawandi ko anu ni a kan to a gbɛ rɔ. A ko a mɛra anu makawandi-siyaman kɛla ha bi!

Yɛrɛmaya 13:18

Mari ya a fɔ n ye ko n ni kɛ fɔ Yuda mansɛ anubɛ a na ye. A ko anu ni anu nasɔ anuna mansaya-waganɛ rɔ. Anuna mansaya-fulɛ si bɔ anu kunyɛ la.

Yɛrɛmaya 46:18

Mari ko mansɛ le ale Mari Sɛnbɛ-Bɛɛ-Tigi la. A ko Alla-nimɛ le ale la. Iko Tebɔ kɔnkɛ layan kɔnkɛ bɛɛ ko nya min, iko Kamɛli kɔnkɛ dunnɛ kɔgɔ-yi kuma nya min, Iyipiti yogenu sɛnbɛ kolo Iyipititɛ ko wo nya na le.

Hoseya 10:15

Wole Bɛtɛli kɛnu, n bi a mala wole fanan na wo nya na le ka a tɛgɛ wola karagbɛlɛya-yogomɛ ma. Kɛlɛ wo ye buila nya min wo, Isirɛla mansɛ wo ye fagala le.”

Hoseya 13:8

N si kɛ wo ma iko sogo-ferema-yuwan, ala dan wa tunu a ma. A si wo buyi laka. A ye kɛla wo ma kan min, a ye wo dɔnna nyɔ le sa! N si wo rafarafara iko sogo-dalamɛ si a ma nya min.

Hoseya 4:1

Mari ko a ye Isirɛla mɔgɛnu sɔn fɛrɛnna anu na. Wole Isirɛla mɔgɛnu, wo ni wo tole masɔ a la. A ko telenbagayɛ anubɛ keninteya fenfen sa wola nyamanɛ rɔ tun. Min sanɛ wo kuma, a ko mɔgɔ-wo-mɔgɔ ma ale lɔn Alla la tun.

Hoseya 6:9

Wole saraka-masɔlɛnu mani de iko kankan-kurɔn minnu siginɛ kilɛ la. Wo ye mɔgɔ-lapɛran la. Hali kilɛ min bi tala a labilala Sɛkɛmta kan-tina-sɛnimɛ ma, wo ye mɔgɛnu fagala wo fɛ. Wo ye karagbɛlɛyɛ wo dama lawulila a ma le bihin!

Hoseya 9:8

Alla ara n sɔ nɛbiyɛ la ka wole, Isirɛla mɔgɛnu makawandi. Kɔnɔ n tara kan-bo-kan, n bira-sɔgɛ ye wo la iko kona. Hali Mari Bato-Bɔn la, nɛbinu yoge le wole la.

Yowɛli 1:2

Wole kinanu, wo ni wo tole masɔ! Wole Yuda nyamanita-mɔgɛnu, wo ni wo tole masɔ! Ha bi, kɛ nyɔgɔn ko sufa ara ma wo benbanuta tele, ka, wotɛ?

Emɔsi 3:1

“Woletɔ wole Isirɛla mɔgɛnu, a ya wole min nana ka bɔ Iyipiti, kɔni, Mari ye nala kumɛ min fɔla wo kan ma, wo ni wo tole masɔ wo la.

Emɔsi 7:9

Nɛbi Emɔsi ya Mari kuman-kannu natenbi ko, “Isiyaka kegeyɛnu bi ale Mari batola anuta kan-tina-sɛnimɛ minnu tɔ Isirɛla nyamanɛ rɔ, Mari ko a si kan tinɛ wonu kasara ka nyɔnu ma tonbon-kole la. Mari ko a si mansayɛ bɔ Mansa Yɛrabowami kebilɛ bolo.”

Maika 3:1

Nde, Nɛbi Maika ko, “Wole Isirɛla kun-tiginu, wo ni wo tole masɔ! A bɛnta, ko-latelenni-hɔnya ni sigi wo la.

Maika 3:9

Kɔnɔ wole Isirɛla mɔgɔ-banu, wo ni wo tole masɔ de! Ko-latelennɛ ma di wo ye mumɛ! Wo si tonyɛ yɛlɛma foninyɛ la.

Maika 7:2

Hali mɔgɔ-den-kelen sa wole, Isirɛla mɔgɛnu tɛma min telennɛ Alla ye. Mɔgɛ bɛɛ kɔnkɔnnɛ a ta-nyɔgɛ faga-koe ma. Wo ye belenna gbɛrɛnu nasigila wo nyɔgɔn ye.

Malakayi 1:6

Mari Sɛnbɛ-Bɛɛ-Tigi ya a fɔ ata saraka-masɔlɛnu ye ko a bɛnta, den-kei ni a fa gbiliya. A bɛnta fanan, wɔli-kɛlɛ ni a tigi gbiliya. Kɔnɔ a ko wo fa le ale la kɔnɔ wo sa ale gbiliyala. A ko wo tigi le a la fanan kɔnɔ wo sa a gbiliyala. A ko a ma di wole saraka-masɔlɛnu ye mumɛ kɔnɔ hali wo, wo ye a manyinikala ko, “Ma ya a yira a la kama ko a sɔgɔ la ara bɔ ma la?”

Malakayi 2:1

Mari Sɛnbɛ-Bɛɛ-Tigi ye a fɔla saraka-masɔlɛnu ye ko tɔn kɛ ye wola ko la.

Kɛlɛ-Kurugbɛnu 4:12

Sisara ya a lamɔɛn tumɛ min ko Bɛraki anubɛ ala kɛlɛ-dannu bara yɛlɛ Tebɔ kɔnkɛ kuma,

Kɛlɛ-Kurugbɛnu 4:6

Lunyɛ do, a ya Abinowamta den Bɛraki kele min siginɛ Kidɛsi soe burɔ Nafatalita nyamanɛ rɔ. Bɛraki nanɛ a wara, a ya a fɔ a ye ko, “Isirɛla mɔgɛnuta Mari Alla le ya kumɛ kɛ di n ma ka a fɔ i ye, a ko i ni kei waga tan (10,000) bi Nafatali bɔnsɔn anubɛ Sɛbulɔn bɔnsɔn rɔ. A ko i ni wonu bi ka yɛlɛ anu na Tebɔ kɔnkɛ kuma.

1 Samuwɛli 7:16

San-bo-san, Samuwɛli si ta so-kun sawɛ kɛ bɛɛ rɔ kiti fɔ tinɛ, Bɛtɛli wo, Kiligali wo, anubɛ Misipa.

1 Samuwɛli 7:5

Wo kɔma, Samuwɛli ya Isirɛla mɔgɛ bɛɛsi kele alako anu ni na a taran Misipa soe burɔ. A ya kilayɛ lata ko a si madiyali kɛ anu ye nyɔ.

1 Samuwɛli 7:6

Isirɛla mɔgɛ bɛɛsi ladɛnta Misipa soe burɔ. Anu ya yi do layɛlɛ kɔlɔn rɔ ka wo labɔn dugi ma Mari ye nyɔ. Anu telenta sunyɛ rɔ gbɛn, ha wurɛ la. Anu ko, “Ma ara hakɛ kɛ Mari la.” (Samuwɛli mara nyamani-kuma-kun-tigi la Isirɛla mɔgɛnu kun na Misipa soe kɛ le burɔ.)