Hoseya 13:6 - ALLALA KUMƐ

⁶ Wo kenɛ nyamani-hakikɛ kɛ rɔ, wo makoe bɛɛ nyinyara ha wo wasara. Wo kɔma, wo wasira ka nyina nde, Mari ko.

Hoseya 13:6 Iomraidhean Croise

Nihɛmaya 9:35

Wati wo rɔ, anu taranta sigini anuna mansɛnu kɔrɔ yisi-kimɛ rɔ nyamani-nyimɛ kɛ rɔ ile ya min di anu ma. Kɔnɔ hali wo, anu ma anu fara hakɛ-kɛ la ka ile sako kɛ.

Yaburi 10:4

Alla bɔrɔ sa karagbɛlɛnu ye. Anuna miriya ma ke ale Alla ma anuna wasinteyɛla ko la.

Hɛnkilimaya-Kumɛnu 30:9

Bawo ni n mara fugarɛ la, tumado, n si kankanyɛ kɛ ka ma ile lafɛya-koe la. Ado nfan, ni n mara bana la fanan, tumado, n si a fɔ ko n mako sa ile Alla la.”

Aiseya 17:10

Wole Isirɛla mɔgɛnu, Alla min bi iko mɔgɛ si dogon farɛ min kɔma, a ye wo lakananna ka wo kumafunfan, wole ara nyina wo ko salon! Yanni wo ni sɛgi Alla ma, fɔ wo ye nako-nyimɛnu nadanna sibolo-gbɛrɛnuna bɛsɛnu ye.

Yɛrɛmaya 5:7

Mari ko nde ni ma makoto-kunya fɔ a ye bawo wole, ata mɔgɛnuna ko sa ala ko rɔ tun. Wo dama ara wo gboro bɛsɛnu tɔ Alla ma minnu na. Alla ko a ye wo hayu bɛɛ kasala kɔnɔ hali wo, wo telenni ma a ye. Wo kɛnɛ wo nyɔgɔn kɔma yɛlɛnnuna bɔn la.

Isikiyɛli 23:35

“ ‘Bawo i wara i kan-kɔ sɔ n na ka nyina n ko, i si tɔrɔya ka a tɛgɛ ila kei-koyɛ anubɛ ila yɛlɛnyɛ ma.’ ”

Isikiyɛli 28:5

A tora halliya-yilayɛnu kɛla ka tɔnɛ sɔrɔn, ado ala nɔnfulu-tigiyɛ wara a ma wasinte la.

Hoseya 10:1

Wole Isirɛla mɔgɛnu bara sabati nun iko kɔn wa gbɔ tisikiri! Wo ye tɔnɛ sɔrɔnna nya min, wo ye tola saraka-mintan-tinɛnu nadanna bɛsɛnu ye wo nya na le. Ki-fannu bi tola sabatila wola dugi rɔ nya min, wo ye tola wola kuru-malɛsɛnɛnu makirila wo nya na le.

Hoseya 12:8

Wo ye a fɔla ko, ‘Ma ara ma nɔnfulu-tiginu na, ado mɔgɔ-den-kelen ti ke a fɔla ma ma ko ma ara kɛ sɔrɔn kensunyɛ le tɔ.’

Hoseya 2:13

N si a tɔrɔ bawo a ye n bolokɛ min kɛla ka ta isɛnti mintan ala bɛsi Beyali ye. N bi a tɔrɔla bawo a ye a makiri boloko-nyimɛ-kɛla ka bila ala keminɛnu fɛ. Mari kan le kɛ la.

Hoseya 2:7

Ala keminɛnu sagaran-kilɛ bɛɛ si faga a ma. A ti fenfen sɔrɔn wonu bolo tun. Wo kɔma, a si to a fɔla ko a ye sɛgila le tun nde, ala kei-kɔrɛ ma bawo a wara-koe sa tun iko fɔlɔ.

Hoseya 4:6

Gbalo ye nta mɔgɛnu kuma bawo anu ma nde, Alla lɔn wole, saraka-masɔlɛnu bolo. N lɔn-sɔgɔ sa wole, saraka-masɔlɛnu na. Wo ara wo kan-kɔ sɔ nta karan la. Woletɔ wo ye wo banna a la. Hali wota dannu, n ti wonu yatɛ saraka-masɔla la.

Hoseya 4:7

“Wole saraka-masɔlɛnu bi tola siyayala nya min, wo ye tola hakɛ kɛla wo nya na le. A bɛnta, wo ni gbiliyɛ min sɔrɔn, n si wo yɛlɛma wo bolo miliyɛ la.

Hoseya 5:14

Mari ko a si kɛ Yuda anubɛ Isirɛla mɔgɛnu ma iko yarɛ ye kɛla soge ma nya min. Ale nyɛrɛ nyɛrɛ si wo rafarafara ka wo boloka. A wa ban wo saganna dugi la ka ta wo la, wo lakananna fenfen ti taran.

Hoseya 7:14

Wo ma n matara wo yisi la fɔ ka wo nyɛrɛ gbesi dugi la ka belenna dila iko Alla-lɔnbɛlɛnu bi a mala nya min. Wo tenbi n matarala dɔn-fen-koe la, wo ye belenna wo mafarafarala iko kafirinu. Mɔgɔ-murutiyani-bɛrɛbɛrɛ le wo la.

Hoseya 8:14

“Wole Isirɛla mɔgɛnu bara bon-hakikɛnu sɔ wo nyɛrɛ ye ka nyina nde, wo Dali-Mari ko salon! Wole Yuda kɛnu fanan bara wola so-latankanɛnu sɔ kɔnɔ nde, Mari si tɛ layigi ka bon-hakikɛ wonubɛ so-latankanɛ wonu mintan gburr!”

Hoseya 8:4

“Wole nta mɔgɛnu bi mansɛnu sigila wo nyɛrɛ ma. Wo sa n nalɔnna ka n sako nyini fɔlɔn. Wo ara sɛnɛ anubɛ wodi-gbɛnu nadan wola bɛsɛnu na. Wo kasara-kunyɛ le bɛsi-ladan wo la.

Tɔn-Fɔɛ-Fila-Nyɔgɛ 32:18

Wo ara nyina wota Alla ko min ya niyi di wo ma, ale Farɛ min ya wo matanka, kɔni.