Bɔ-Koe-Iyipiti 32:4 - ALLALA KUMƐ

⁴ A ya wonu bira anu bolo ka anu lee ka a ma ninki-danla muninyɛ la. Isirɛla mɔgɛnu ya a fɔ ko, “E, mata bɛsɛ le kɛ la min nara ma la ka bɔ Iyipiti nyamanɛ rɔ.”

Bɔ-Koe-Iyipiti 32:4 Iomraidhean Croise

1 Mansɛnu 12:28

Ale Mansa Yɛrabowami tara a kun nayigi ala mɔgɔ-banu fɛ. A ban wo mala, a ya sɛnɛ ladan ninki-den filala muninyɛ la. A ya a fɔ ala mɔgɛnu ye ko, “Wole ara mɛ tala Mari bato tinɛ Yerusalɛm. Wole Isirɛla mɔgɛnu, wo ma wota allanu yen kɛ la minnu nara wo la ka bɔ Iyipiti nyamanɛ rɔ?”

1 Mansɛnu 12:32

Mansa Yɛrabowami ya a fɔ ala nyamanita-mɔgɛnu ye ko anu ni ladiyɛ do dabira ka a sanka Yuda mɔgɛnutɛ ma min si kɛ anuna san karɛ segin nyɔgɛ, tele tan-ni-loli ma. Mansa Yɛrabowami nyɛrɛ-nyɛrɛ ya tele wo yabɔ a nyɛrɛ ma ka sarakɛnu bɔ wulɔn. Wo tele nyɛrɛ kenɛ, a ya saraka-masɔlɛnu sigi Bɛtɛli soe burɔ minnu ya sarakɛnu bɔ saraka-bɔ-tinɛ kuma ninki-dannuna muninyɛ wonu ye. A ya ladiyɛ wo dabira Isirɛla mɔgɛnu ye ka le.

2 Mansɛnu 10:20

A ya a fɔ anu ye tun ko, “Ma ni kun wona tele kelen ma, ma si Beyali kɔ min ma.” Anu dama sarata tele kelan wo ma.

2 Mansɛnu 10:29

Kɔnɔ hali wo, Mansa Yehu ya a sanka Mansa Yɛrabowami ma bawo Mansa Yɛrabowami ya ninki-danla muninyɛ ladan min kɛ Bɛtɛli soe burɔ anubɛ Dan soe burɔ, ale Mansa Yehu ma wonu tinya, ado a ya anu kɔ. Min kolo wo ko, Mansa Yɛrabowami ya a ma, Isirɛla mɔgɛnu donta wonu kɔɛ rɔ.

2 Ko-Kɔrɔta-Karan 11:15

Ale Mansa Yɛrabowami ya ata saraka-masɔlɛnu yabɔ a nyɛrɛ ye alako wonu ni to sarakɛnu bɔla Alla-batobɛlɛnuna kɔ tinɛnu tɔ anubɛ nyinɛnu anubɛ bɛsɛnu ye, a ya minnu nadan tura-danla muninyɛ la.

2 Ko-Kɔrɔta-Karan 13:8

Nba, wo ye Mari le kɛlɛ tinɛ kaka gbɛ bawo wo ye Mansa Dawuda bɔnsɔnnu kɛlɛla. Ila kɛlɛ-dannu siya, ado wo nara bɛsɛ minnu na, wonu nadanta sɛnɛ dɔrɔn na, Mansa Yɛrabowami ya minnu nadan tura-danla muninyɛ la, kɔni.

Nihɛmaya 9:18

Anu ya tura-bulanla muninyɛ ladan anuna bɛsɛ la. Anu ya a fɔ ko anuta alla le wo la min ya anu nabɔ Iyipiti. Wo ya a ma, anu bilara i la dɔgɔma-ma-de!

Bɔ-Koe-Iyipiti 20:2

“Nde le wota Mari Alla la min ya wo labɔ yɔɔnyɛ rɔ Iyipiti nyamanɛ rɔ.

Bɔ-Koe-Iyipiti 20:23

Anu kana wodi-gbɛ anubɛ sɛnɛ ladan bɛsɛnu na ka mabɛ wonu kɔ.

Bɔ-Koe-Iyipiti 20:4

“Fan minnu bi san-kole rɔ wo, fan minnu bi dugu-kole kuma wo, fan minnu bi yi kɔrɔ wo, wo kana wonuna muninya fenfen ladan

Bɔ-Koe-Iyipiti 28:9

“Wo ni kuru-da-gbɛlɛ fila bi minnu tɔgɛ ɔnikisi ka Isirɛla bɔnsɔn-mɔgɔ tan-ni-fila tɔgɛ sɛbɛ wonu ma.

Bɔ-Koe-Iyipiti 32:1

Mɔgɛnu ya a yen tumɛ min ko Musa ara mɛ Sinayi kɔnkɛ kuma, anu ya anu kundɛn Aruna dafɛ. Anu ya a fɔ a ye ko, “Musa min nara ma la ka bɔ Iyipiti nyamanɛ rɔ, ma ma a lɔn min bara ma a la. I lasɔ ma fɛ ka bɛsɛ do ladan ma ye min si sɔ ma yarɔ.”

Bɔ-Koe-Iyipiti 32:24

Woletɔ n ya a fɔ anu ye ko anu ni na anuna sɛnɛnu na. Anu ya anuna sɛnɛnu don n bolo. N ya anu sa tɛ rɔ tumɛ min, ninki-danla muninyɛ kɛ bɔra a nyɛrɛ ma.”

Bɔ-Koe-Iyipiti 32:3

Anu nara sɛnɛ-tolola-fan wonu na ka anu don Aruna bolo.

Bɔ-Koe-Iyipiti 32:35

Mari ya kiraya-fitinɛ lana mɔgɛnu kuma ka a tɛgɛ ninki-dan wola muninyɛ ladan-koe ma Aruna ya min nadan anu ye.

Bɔ-Koe-Iyipiti 32:5

Aruna ya wo yen tumɛ min, a ya saraka-mintan-tinɛ sɔ ninki-danla muninyɛ wo yarɔ. A ya a fɔ anu ye ko, “Nba, sinan tele si ma ladiya-tele la Mari ye.”

Bɔ-Koe-Iyipiti 32:7

Anu bi wo kun na, Mari ya a fɔ Musa ye kɔnkɛ kuma ko, “I buri yigila kamasɔrɔn i wara na mɔgɛ minnu na ka bɔ Iyipiti nyamanɛ rɔ, wonu bara yɛlɛma ka yogoya.

Bɔ-Koe-Iyipiti 32:8

N bara kilɛ min yira anu na, anu bara bɔ wo fɛ tiriya! Anu bara ninki-danla muninyɛ ladan ka a kɔ ka sarakɛnu bɔ a ye. Anu bi a fɔla ko anuta bɛsɛ le wo la min nara anu na ka bɔ Iyipiti nyamanɛ rɔ.”

Aiseya 30:22

Wola bɛsɛ minnu makirinɛ sɛnɛ anubɛ wodi-gbɛ la, wo si wonu nafili a rɔ iko fen-gbalɛ ka a fɔ ko, “Bɔ n yakɔrɔ.”

Aiseya 46:6

Mɔgɛnu si anuna wodi-bɔrɛnu dɛ laka ka sɛnɛ rawuya. Anu bi wodi-gbɛnu sumanna ka anu gbiliyɛ dan lɔn. Anu bi siyaki sarala alako wo ni anuta bɛsɛ ladan anu ye. Wo kɔma, anu bi anu nyɛnkinna bɛsɛ wo kɔrɔ ka a kɔ.

Isikiyɛli 23:8

Kebi a ya yɛlɛnyɛ dabira Iyipiti wo tumɛ a dennɛ, a ma bɔ wo da kun tɔ. Kebi a denni pɔipɔi, a ya kei-koe dabira. Keinu tolonta a kinyɛ la ka anu sa a fɛ.

Hoseya 10:5

Sɛnɛ min nadannɛ ninki-danla muninyɛ la Bɛti-Efɛn soe burɔ, wole Samariya kɛnu bi kilanna ko anu kana na foo wo la. Wo yogenu ba sɛnɛ wo bɛɛ ka kɔlɔma-lɛsɛnɛ wo ma, bɛsɛ wo kɔlɛnu anubɛ a saraka-masɔlɛnu si na di bɛsɛ wola ko la bawo anu bara foo a la.

Hoseya 13:2

Hali wo, anu tora wodi-gbɛ laleela ka anu ma bɛsɛ la. Hadama-den-hɛnkili le ya wodi-gbɛ kɛ lalee, ado hadama-dan le ya a ladan. Anu ban a ladanna, anu ko, “Wo ni sarakɛ bɔ a ye de!” Min tenbira wo la, fan min nadannɛ turɛla muninyɛ la dɔrɔn, mɔgɛnu bi wonu sunbula tagbayi!

Kɛwɔlɛnu 17:29

Nba, ni ala dannu le male la, ma kana ma miri ko Allayɛ manɛ iko sɛnɛ anubɛ wodi-gbɛ, ni wo ma, kuri min lɛsɛnɛ mɔgɛnuna halliyɛ anubɛ hɛnkili la.

Kɛwɔlɛnu 7:41

Wo kɔma, anu ya ninki-danla muninyɛ ladan ka wo ma bɛsɛ la anu nyɛrɛ ye ka sarakɛ bɔ wo ye. Anu ya ladiyɛ ladan ka a tɛgɛ anu nyɛrɛta bolola-wɔlɔ-gbɛ wo ma ka wo gbiliya.

1 Kɔrɛnti 10:7

Ma kana bɛsɛnu kɔ iko wonu denu ya a ma nya min, ado a sɛbɛnɛ Allata kitabu rɔ ko, “Anu ya anu de-nyini ka anu min. Wo kɔma, anu wulita Alla-lɔnbɛlɛnuna dɔn-kɛ-nya bila.”

Tɔn-Fɔɛ-Fila-Nyɔgɛ 9:16

N ya a taran, wo ara banna wota Mari Allata tɔn tinyana. Wo ara hakɛ kɛ Alla la ka ninki-danla muninyɛ ladan.

Kɛlɛ-Kurugbɛnu 8:24

Wo kɔma, Kidiyɔn ya anu manyinika ko kelen ma, a ko, “Min sɔgɛ ye n na dɔrɔn, wo ya sɛnɛ-fore minnu bi ma yogenu bolo, wo kelen-kelennamɛ-bɛɛ ni wotɛ di n ma.” (Midiyan keinu si sɛnɛ-fore le don anu tole la iko anu sigi-nyɔgɛnu si a ma nya min.)

Kɛlɛ-Kurugbɛnu 8:27

Kidiyɔn ya sɛnɛ wonu nalee ka a ma fɔlɔnfalan-kundi la. A tara wo la a warɛ Ɔfara soe burɔ. Isirɛla mɔgɔ damasi ya hakɛ kɛ ka don sɛnɛ-fɔlɔnfalan-kundi wo batoe rɔ. Sɛnɛ min manɛ fɔlɔnfalan-kundi wo la, wo mara gbɛrɛ la Kidiyɔn anubɛ ala denbayɛ ye.