Ɛsita 9:3 - ALLALA KUMƐ

³ Nyamanɛ wo mɔgɔ-ba-malɔnnɛnu wo, anubɛ mɔgɔ-ba-toenu wo, wonu damasi ya Yahudiyanu dɛnbɛ bawo anu kilannɛ Mɔdekɛyai la.

Ɛsita 9:3 Iomraidhean Croise

Ɛsira 2:2

Minnu sɛgira, wonuna kun-tiginu tɔgɛ le kɛnu na, Sarababulu wo, Yɛsuwa wo, Nihɛmaya wo, Sɛraya wo, Riyɛlaya wo, Mɔdekɛyai wo, Belesan wo, Misipari wo, Begifeyai wo, Rihum wo, anubɛ Beyana. Kebilɛ minnu sɛgira ka bɔ biralɛ rɔ anubɛ min bɔra kebila kelen-kelan bɛɛ rɔ, wo yatɛ le kɛnu na tala.

Ɛsira 8:36

Mansɛ ya kɛdi min don anu bolo, anu tara wo yira Yufereti bɛ tele-yigi waralɛ kun-tiginu anubɛ nyɔ-mɔgɔ-banu na. Wonu dama ya anu dɛnbɛ Bato-Bon-ko-wɔlɛ wo rɔ.

Ɛsita 3:12

San wo karɛ fɔlɛ, a tele tan-ni-sawa nyɔgɛ ma, Heman ya mansɛla kɛdi-sɛbɛlɛnu kundɛn. A ya sereya do latenbi anu ma alako anu ni a sɛbɛ bɛɛta kan rɔ iko bɛɛta kan si sɛbɛ nya min. Anu ba ban a sɛbɛla, anu ni a don kun-tiginu anubɛ mɔgɔ-ba-malɔnnɛnu bolo nyamanɛ wo tonke bɛɛ rɔ. Anu ya wonu sɛbɛ mansɛ tɔgɔ rɔ. Anu ya mansɛla dɛɛn-kɔlɔnɛ wo bi ka wo mandan sa kɛdi wonu ma.

Ɛsita 8:17

Anu ya mansɛla kɛdi kɛ karan kan tinɛ min bɛɛ rɔ, Yahudiyanu ya tolon-belebele-wɛ ladan ka ladiyɛ kɛ nyɔnu tɔ. Mɔgɔ-siyaman ya anu sibole yɛlɛma ka ma Yahudiya la bawo bɛɛ ara fɔlɔ kilanna Yahudiyanu na.

Ɛsita 8:5

“N tigi, ni n bara-koe ara i hɛnɛ, ado n di i ye, i ni n dɛnbɛ ko kelen na. Ekaki bɔnsɔn, Hamidetala den Heman ara sereya sa nun ko ka Yahudiyanu nato ila nyamanɛ kɛ rɔ. Ni i sɔnta, i ni sereya-gbɛrɛkɛ sa min si a ma, Hemanna ko-rabɛnni-kɔrɔmɛ ni tinya.

Ɛsita 8:9

San wo karɛ sawɛ min tɔgɛ Sifan, wo tele mogan-ni-sawa nyɔgɛ ma, anu ya kɛdi wo sɛbɛ. Mɔdekɛyai ya mansɛla kɛdi-sɛbɛlɛnu kele. A ya a fɔ anu ye ko anu ni a kan sɛbɛ. Anu ni a sɛbɛ Yahudiyanu ma anubɛ mɔgɔ-ba-malɔnnɛnu anubɛ mɔgɔ-ba-toenu ma minnu bi nyamani-kun kɛmɛ, nyamani-kun mogan-ni-wɔrɔnfilɛ wo bɛɛ rɔ ka a dabira Yindiya nyamanɛ ma ha ka a sigi Sudan nyamanɛ la. Anu ya a ma, kɛdi wonu sɛbɛra bɛɛta kan rɔ iko anu si anuna kannu sɛbɛ nya min. Anu ya a sɛbɛ Yahudiyanu fanan ma anuna kan rɔ iko anuna kan si sɛbɛ nya min.

Daniyɛli 3:2

Ale mansɛ ya kilayɛnu nata ala nyamanɛ wo tonke bɛɛ rɔ ka ala mɔgɔ-banu kele alako anu ni ta anu kundɛn lɛɛ wo rɔ. Ala kandɛ wo, a pati-mansa wo, a sigisɔn-mansa wo, a so-tigi wo, a makawandila wo, a nɔnfulu-lamarala wo, a kiti-tɛgɛla wo anubɛ ala sɛbɛla wo, a ya a mɔgɔ-ba wonu dama kele alako anu ni na bɛn bɛsɛ wo dantɛgɛ-koe rɔ.